Atuisartoqarnermut Unammilleqatigiinnermullu Aqutsisoqarfik logo Atuisartoqarnermut Unammilleqatigiinnermullu Aqutsisoqarfik AUA

Print

Maalaarutit pillugit apeqqutit akissutaalu

Kina/kikkut maalaaruteqarsinnaappat? 

Atuisumut piumasaqaatit assigiinngitsut marluk naammassineqartussaapput, tassaasut:

Siullermik maalaarniaruit aningaasarsiutigalugu niuertumik niueqateqarsimassaatit.  Assersuutigalugu eqqaamiunni TV-mik pisisimaguit maalaaruteqarsinnaanngilatit, aatsaalli maalaaruteqarsinnaavutit  pisiffigisat inuussutissarsiutigalugu niuertuuppat.

Aappassaanik pisiarineqartoq nammineq atugagassatut pisiarisimagukku aamma maalaaruteqarsinnaavutit.  Illit niuertutut inissisimallutit niuersimaguit  taava illit atuisuunngilatit. Assersuutigalugu inuussutissarsiutigalugu atugassannik angallatisisimaguit taava maalaaruteqarsinnaanngilatit.

Kikkut maalaarutigineqarsinnaappat?
Maalaarutit taamaallaat inuutissarsiummik ingerlatsisunut tunngatinneqarsinnaapput, ataatsimiititaliamilli maalaarutit atuisartunut pisisartunullu tunngatitat suliarineqarsinnaanngillat. Aamma ingerlassiviit tamakkiisumik ilaannakortumilluunniit pisortanik pigineqartut, ingerlassiviit taakku atuisartunut pisisartunullu nioqqutissanik tunisaqarsimappata allatulluuniit kiffartuussissuteqarsimappata, maalaaruteqaatigineqarsinnaapput, soorlu assersuutigalugu Kalaallit Niuerfiat, inunnik usinilluuniit angalassinerit aamma kaallerup inneranik, imermik kiassarnermillu pilersuinerit.

Suut maalaarutigineqarsinnaappat?
Maalaarut suliarineqarsinnaassappat soorunami maalaarut naammaginartumik pitsaasumik tunngaveqassaaq. Isumaqatigiissut, atuinissamut ilitsersuutit, piseqqusaarutit assigisaallu tunngavigalutit nioqqutissap pisiarisap, sullissinerup kiffartuussinerulluunniit qanoq piumasaqaateqarfigineqarsinnaanerat takuneqarsinnaagajuttarpoq. Soorlu assersuutigalugu maalaaruteqarnissamut tunngavissaqarsinnaavoq nioqqutissaq pisiaq tunissup nioqqutissanilluunniit tunioraasup neriorsuutaatut inngippat. taamatuttaaq ippoq nioqquissaq pisiaq ajoquserneqarsimappat imaluuniit pissusissamisut atorneqarsinnaanngippat. Aamma taammappoq nioqqutissaq pisiaq naliginnaasumik peqqussutigineqartutullunniit aserfallatsaalineqarsinnagippat imaluunniit sullissineq kiffartuussisulluunnit (iluarsaarneq, assartuineq assigisaallu) pissusissaq eqqorlugu suliarineqarsimanngippata.
Taamaalilluni maalaarutit tassaasinnaapput nioqqutissat pisiat imaluuniit sulissussinerit kiffartuussinerillu (iluarsaanerit, assassugassanik suliat assigiinngitsut, assartuineq assigisaallu).

Qanoq iliorlutit Atuisartut Pisisartullu Maalaarutaannik Aalajangiisartunut maalaaruteqarsinnaavit?
Siullermik inuutissarsiummik ingerlassaqartumut maalaaruteqaqqaarsimasariaqarpoq. Atsaat maalaarut taamaattoq naammaginartumik kinguneqanngippat Atuisartut Pisisartullu Maalaarutaannik Aalajangiisartunut maalaaruteqartoqarsinnaavoq. Immersugassaq immersorneqassaaq nassiunneqarlunilu uunga Atuisartoqarnermut Unammilleqatigiinnermullu Aqutsisoqarfik, Postboks 689, 3900 Nuuk, aua@nanoq.gl.

Atuisartut Pisisartullu Maalaarutaannik Aalajangiisartut aalajangiinerat malinneqanngippat
Illuatungeriit suliassap atuisartunut pisisartunullu maalaaruteqartarfittut ataatsimiititaliami aalajangiivigineqarnera isumaqatigiinikkunikku eqqartuussivinnut suliassanngortitsisinnaapput.
Tamakkiisumik ilannakortumilluunnit maalaaruteqartarfittut ataatsimiititaliamit isumaqatigineqaruit, aalajangiinerlu inuutissarsiummik ingerlassaqartumik mallinneqanngippat, atuisartunut pisisartunullu maalaaruteqartarfittut ataatsimiititaliamiit suliassap eqqartuussivimmi suliassanngortinnissaannut ikiorneqarsiinaavutit.

Maalaaruteqarneq akeqarpa?

Naamik Atuisartut Pisisartullu Maalaarutaannik Aalajangiisartunut maalaaruteqarneq akeqaanngilaq. Inatsisilerituumik pissarseqqaarnissat pisariaqanngilaq aamma illit aningaasartuuteqassanngilatit. Akiliuteqassaguit  annerpaamik frimærkimut aningaasaajassaatit!

Maalaarummik aalajangiiniarneq  qanoq sivisutigisarpa?

Nalinginnaasumik qaammatit arfinillit qulingiluallu akornanni maalaarut suliarineqartarpoq.