Atuisartoqarnermut Unammilleqatigiinnermullu Aqutsisoqarfik logo Atuisartoqarnermut Unammilleqatigiinnermullu Aqutsisoqarfik AUA

Print

Isumaginninnermi Naammagittaalliuteqartarfimmut maalaaruteqarit

Imatut naammagittaalliussaatit

Uani paasissutissat qanoq Isumaginninnermi Naammagittaalliuteqartarfimmut naammagittaalliorsinnaanerlutit takusinnaavatit.

Inunnik isumaginninnermut tunngatillugu pisortanit aalajangiissummik pisimaguit, aalajangiinerlu naammaginngikkukku imatut Isumaginninnermi Naammagittaalliuteqartarfimmut naammagittaalliuteqarsinnaavutit.

Naammagittaalliuteqarniuaruit ima iliorsinnaavutit:

Allagaqarlutit imaluunniit immersorlugu uungalu nassiullugu:

Atuisartoqarnermut Unammilleqatigiinnermullu Aqutsisoqarfik

Isumaginninnermi Naammagittaalliuteqartarfik,
Postboks 689
3900 Nuuk

Uunga e-mail-erlutit:

-       maalaarut@nanoq.gl

Uunga fax-erlutit:

-       (+299) 32 78 50

Uunga sianerlutit:

-       (+299) 32 80 33

Uagutsinnut ornigullutit:

Atuisartoqarnermut Unammilleqatigiinnermullu Aqutsisoqarfik
Imaneq 29, 1. sal
3900 Nuuk

Elektronisk-imik naammagittaalliut immersoriarlugu nassiullugu (NemID atorlugu aammalu atornagu)

Uani naammagittaalliut nanisinnaavat:

Elektronisk-imik naammagittaalliut

Eqqumaffigissavat naammagittaalliuteqarsinnaanerit sap.ak. sisamanik kommune-risamiit aalajangiussap tiguneraniit sivisunerpaamik sivisussuseqassammat. Tamannalu taamaallat pissaaq kommune-risat naammagittaalliuteqarnissamut ilitsersuummik tunniussisimappat.

Isumaginninnermut Naammagittaalliuteqartarfimmut iluaqutaassaaq uku naammagittaalliutinnut ilanngukkukkit:

  • allakkatigut aalajangiissut
  • kommune-risanniit allakkat allat suliamut tunngassutillit

Isumaginninnermut Naammagittaalliuteqartarfiup aalajangiussaa tassaassaaq suliap naammassineqavinnera, taamaattumillu pisortanut ingerlateqqinneqarsinnaanani.

Naammagittaalliutip suliarineqartarnera

Naammagittaalliutip suliarineqartarnera

Naammagittaalliutippit tunniutereernerani susoqartarpa?

Naammagittaalliut tiguneqarpat:

Isumaginninnermut Naammagittaalliuteqartarfiup naammagittaalliut tiguppagu Naammagittaalliuteqartarfimmiit nalilersorneqaqqaartarpoq naammagittaalliut suliarineqarsinnaanersoq. Tassa imaappoq isumaginninnikkut pissutsit malillugu siornatigut aalajangiiffigineqarnikuusimassaaq, innuttaasoq allaganngorlugu suliamut tunngatillugu aalajangiinermik pisimappat naammagittaalliornissamut ilitsersuutitalimmik, taava naammagittaaliut Isumaginninnermut Naammagittaalliuteqartarfimmi naammagittaalliorfissap killissarititaani sap.ak. sisamat qaangiutsinnagit tiguneqareersimassaaq. Piumasaqaatit taakku naammassineqarsimanngippata, naammagittaalliut akuerineqassanngilaq. Naammagittaalliuuteqartoq allakkatigut paasitinneqassaaq Naammagittaalliortarfimmi suliaq itigartitsissutigineqartoq, aammalu sooq itigartinneqarnersoq.

Naammagittaalliut suliarineqarsinnaappat, naammagittaalliuuteqartoq allaffigineqassaaq, suliaq tiguneqartoq, aammalu suliaq aallartinneqartoq. Taamatuttaaq naammagittaalliuuteqartoq ilisimatinneqassaaq naammagittaalliuuteqartarfimmiit suliap sivisussusissaa pillugu.

Maannakkut agguaqatigiisillugu ukiup ataatsip missaa naammagittaalliut suliarineqartarpoq.

Angajoqqaat avaqqullugit meeqqat angerlarsimaffiup avataanut inissinneqarneri pillugit naammagittaalliuutit aammalu inuit innarluutillit ikiorneqarnissaat pillugit naammagittaalliutit siulliullugit suliarineqartarput.

Naammagittaalliutit allat tulleriiaarlugit suliarineqartarput.

Suliap takussutissartaanik pissarsiniarneq:

Naammagittaalliuteqartarfik nammineerluni kommune-mut suliap takussitissartaanik nalunaarutinillu naammagittaaliut pillugu pissarsiniassaaq, taakku naammagittaalliuteqartarfiup suliap suliarinerani atortussaammagit. Naammagittaalliuteqartup kissaatiginngippagu naammagittaalliuteqartarfik paasissutissanik piniassasoq, naammagittaalliuteqartup naammagittaalliuteqartarfik saaffigissavaa allakkatigut oqarasuaatikkulluunniit (e-mail: maalaarut@nanoq.gl, tlf: 328033, adresse: Box 689, 3900 Nuuk).

Pingaaruteqarpoq kommune suliamut tunngatillugu takussutissat assilinerinik tamanik nassiussaqarnissaa. Naammagittaalliuteqartarfiup piffissarujussuaq atorlugu paasissutissanik annertunerusunik kommune-mut pissarsiniarnerminut atortarpaa, paasissutissat ilanngullugit nassiunneqartut amigaateqartaqimmata, tamanna naammagittaalliuteqartarfimmut aalajangiiniarnermi ajornartorsiutaasarmat.

Naammagittaalliuteqartarfik attavigineqarsinnaavoq, naammagittaalliuteqartoq apeqqutissaqarpat imaluunniit suliamut tunngatillugu paasissutissanik allanik peqarsimaguni.

Naammagittaalliuteqartup sillimaffigissavaa, Isumaginninnermi Naammagittaalliuteqartarfiup suliaq tamakkiisumik aalajangiiffigisinnaammagu, naammagittaalliutigineqartoq kisiat pinnagu. Tassa imaappoq Isumaginninnermi Naammagittaalliuteqartarfik aamma aalajangiisinnaammat naammagittaalliuteqartumut akuersunngitsumik.

Allattoqarfiup suliamik saqqummiussinissaq innersuussuteqarnissarlu piareersartarpaa:

Allagartat takussutissat suliamik ersarissaasussat tamarmik tiguneqareerpata, suliaq naammagittaalliuteqartarfimmi suliarineqarnissaanut piareersarneqassaaq. Tassa imaappoq, allattoqarfiup paasissutissat tigusimasat aallaavigalugit suliaq inaarsassavaa. Suliami ersarissarneqassapput, qanoq naammagittaalliuteqarninni angusaqarsinnaanersutit, aammalu piumasaqaatitit qanoq taperserneqarsinnaanersut. Aammattaaq oqartussaasut aalajangiinermut akuersaanngippata taassuma nassuiaatitai ilanngullugit. Allattoqarfik Isumaginninnermut Naammagittaalliuteqartarfimmut innersuussuteqassaaq, qanoq allattoqarfik isumaqarnersoq suliaq aalalangiiffigisariaqartoq. Kisiannili ataatsimiititaliap allattoqarfiup innersuussutai malissallugit pituttorsimanngilaq.

Sinaakkusersornera

Allattoqarfiup misissussavaa naammagittaalliutit qaqugu Isumaginninnermi Naammagittaalliuteqartarfiup suliarissaneraa. Naammagittaaliuteqartarfiup naammagittaaliluterpassuit ataatsimiinnerminni suliarisarpaat. Nalinginnaasumik naammagittaalliuteqartarfik ukiumut sisamariarluni ataatsimiittarpoq. Tassani naammagittaaliuteqartarfiup naammagittaaliut aalajangiussiffigissavaa, aalajangiinerullu inernera tunngavilersorlugu. Suliassat allat siulittaasumit imaluunniit allattoqarfimmit suliarineqartarput. Aalajangikkat, Isumaginninnermut Naammagittaalliuteqartarfiup, siulittaasut imaluunniit allattoqarfiup aalajangigai nunatsinni kommune-t tamarmik malitassarivaat. Tunngaviusumik aalajangikkat uani quppernermi saamiatungaani nanineqarsinnaapput.

Isumaginninnermut Naammagittaaliluteqartarfik:

Naammagittaalliuteqartarfik tallimanik ilaasortaqarpoq, taakkunannga marluk inunnik isumaginninnerup tungaatigut ilisimasaqartuussallutik, marluk isumaginninnikkut politik-imut ilisimasaqartuussapput, kingullerlu Naalakkersuisunit toqqarneqarsimassalluni aammattaaq naammagittaalliuteqartarfimmut siulittaasuussalluni. Siulittaasoq, inatsisit malillugit, inatsisilerituujussaaq imaluunniit nunatsinni inunnik isumaginninnikkut pissutsinik ilisimaarinnittuussalluni.

Ataatsimiititaliami ataatsimiittarnerit:

Naammagittaalliutit allattoqarfimmit tiguneqarsimasut saqqummiunnissaannut innersuunnissaannullu piffissaalluartillugu ataatsimiititaliap ataatsimiinnginnerani ataatsimiititaliami ilaasortanut nassiunneqassapput, ilaasortat ataatsimiinnerup pinnginnerani suliap imai ilisimaarilluassammatigit. Ataatsimiinnermi suliat ataasiakkaat oqaluuserineqassapput, isumaqatigiittoqanngippallu taasinikkut suliaq inernilerneqartassaaq. Aalajangiineq inatsisitigut aammalu suliap tungaatigut tunngavilimmik aalajangiinerussaaq.

Aalajangiineq:

Ataatsimiititaliap suliaq naammassillugu suliarippagu, naammagittaaliuteqartoq allakkatigut naammagittaaliutip inerneranik tigusaqassaaq. Tassunga aalajangiinermut ilaassapput naammagittaalliutip inernilerneranut tunngavilersuutit, ilinnut aammalu pisortanut nassiunneqarnissaa ataatsimiititaliap ataatsimeereernerani sapaatip akunnialuini pissaaq.

Aalajangiineq aalajangiiniviua?

Isumaginninnermi Naammagittaaliuteqartarfiup aalajangigaa kommune-p malissavaa.