Atuisartoqarnermut Unammilleqatigiinnermullu Aqutsisoqarfik logo Atuisartoqarnermut Unammilleqatigiinnermullu Aqutsisoqarfik AUA

Print

Nalunaarasuartaateqarnermi Oqalliffik

Nalunaarasuartaateqarnermi Aqutsisut Nalunaarasuartaateqarnermi Oqalliffik pilersippaat. Tamatumunnga aallaaviuvoq Nalunaarasuartaateqarnermi Aqutsisut ataatsimut ingerlaarneq pillugu 2012-imi aalajangigaat. Kiisalu ammanerulersitsiartuaarnerup aallartinneranut atatillugu naalakkersuinikkut kissaatigineqarpoq nalunaarasuartaateqarnermii oqalliffimmik pilersitsisoqassasoq niuffaffimmit tapersersorneqartumik.

Siunertaq

Nalunaarasuartaateqarnermi Oqalliffiup siunertaraa nettimut isersinnaaneq, ataatsimut ingerlaarneq nalunaarasuartaateqarnermullu tunngasut nalinginnaasut allat, taakku ataanniillutik unammillernermut pissutsit aamma Kalaallit Nunaanni nalunaarsuartaateqarnikkut niuffaffimmi ammanerulersitsinerup ingerlanera, pillugit oqalliffeqarnissaq oqallisiginninnissamullu aallarnisaaffiusinnaasoqarnissaq.

Siunertaavoq Oqalliffimmi ataatsimiinnerit niuffaffiup, Nalunaarasuartaateqarnermi Aqutsisut aamma Naalakkersuisut akornini oqaloqatigiittarnerit nalunaarasuartaateqarnermi malittarisassaliornerit piviusumik kinguneri, taakku ataanniilluni malittarisassaliornerit naammannginnersut imaluunniit ajoqutaasumik malittaasumik kinguneqarnersut, pillugit suleqatigiinneq nukittorsassagaat. 

Oqalliffimmi oqallisiginninnerit aamma peqataassapput akimmiffinnik, paatsoortoqarsinnaanernullu pinngitsuuiniarnermut aammalu Nalunaarasuartaateqarnermi Aqutsisut piaartumik qanoq iliuuseqarsinnaanerannik periarfissamik qularnaarinissaannut.

Nalunaarasuartaateqarnermi Oqalliffimmi ataatsimiinnerit imaqassapput Nalunaarasuartaateqarnermi Aqutsisut ilanngussaannik piareersakkanik, soorlu amma niuffaffimmiit ilanngussanik.

Siulittaasoqarneq aqutsinerlu:

Nalunaarasuartaateqarnermi Aqutsisut pisortaat Nalunaarasuartaateqarnermi Oqalliffimmut siulittaasuuvoq.

Nalunaarasuartaateqarnermi Aqutsisut Nalunaarasuartaateqarnermi Oqalliffimmut allaffeqarfiupput. Allaffeqarfiup ataatsimiinnerit ingerlannerisa ilaasortanullu attaveqarnerit aqunneqarnerinut tunngasut isumagissavai. Allaffeqarfik  Nalunaarasuartaateqarnermi Aqutsisuni sulisunit marlunnit ingerlanneqassaaq.

Peqataasut:

Nalunaarsuartaateqarnermi Oqalliffimmut peqataasinnaapput Kalaallit Nunaanni nalunaarasuartaateqarnikkut niuffaffimmi neqerooruteqartut, kiffartuussinernik neqerooruteqartut soqutiginnittullu allat. Neqerooruteqartut siunnersuisunik/eqqartuussissuserisunik il.il. sinniisoqarsinnaapput. Kiisalu nalunaarsuartaateqarnikkut nioqqutillit aamma nalunaarsuartaatitigut attaveqaqatigiittarnermut atortunik nioqqutillit peqataasinnaapput.  Nalunaarasuartaateqarnermi Aqutsisut neqeroorutillit nutaat ingerlaavartumik ataatsimiinnernut aggersartassavaat. Neqeroorutilik nutaaq  Nalunaarsuartaateqarnermi Oqalliffimmut peqataarusukkuni  Nalunaarsuartaateqarnermi Oqalliffiup allattoqarfianut attaveqarsinnaavoq oqarasuaatikkut 328033 atorlugu imaluunniit Susanna Rosing-imut allalluni uunga:  suro@nanoq.gl imaluunniit Martin Christoffersen: mach@nanoq.gl

Periaaseq:

Neqerooruteqartoq Nalunaarsuartaateqarnermi Oqalliffimmut oqaluuserisassamik ilanngusserusukkuni pineqartoq imaluunniit ajornartorsiut pillugu oqallissaarummik  naatsumik allalluni Nalunaarasuartaateqarnermi Aqutsisunut nassitsissaaq. Taava suliamik akisussaalluni tigummisup ingerlateqqinnissaa isumagissavaa. Oqaluuserisassaq aamma oqarasuaatikkut Nalunaarasuartaateqarnermi Aqutsisunut oqaloqatigiissutigineqarsinnaavoq ataatsimiinnissamut tullermut ilanngunneqarnissaa eqqarsaatigalugu. Aamma ataatsimiinnerni oqaluuserisassat/apeqqutit aalajangersimasut ataatsimiinnerni tullerni ilanngunneqartussatut siunnersuutigineqarsinnaapput.

Takussutissat:

Ataatsimiinnerit tamaasa sioqqullugit Nalunaarasuartaateqarnermi Aqutsisut ullormut oqaluuserisassat ilimagineqartut Nalunaarsuartaateqarnermi Oqalliffimmut peqataasunut nassiussortassavai. Nalunaarasuartaateqarnermi Aqutsisut ataatsimiinnernit tamanit allakkiamik/imaqarniliamik suliaqartassapput ataatsimiinnerup imaanik pingaarnernik imalimmik.

Ataatsimiinnernit allakkiat piniarneqarsinnaapput Nalunaarasuartaateqarnermi Aqutsisut v/ ”Susanna Rosing, e-mail: suro@nanoq.gl ” imaluunniit Martin Christoffersen: mach@nanoq.gl saaffigalugit.

Allakkiat, ullormut oqaluuserisassat, ataatsiimiinnernit imaqarniliat il.il Nalunaarasuartaateqarnermi Aqutsisut nittartagaannut ”Nalunaarasuartaateqarnermi Oqalliffik”-up iluanut ikkunneqartassapput.