Anguniagaq taanna nalunaarasuartaatitigut niuffaffiit ammarneqarnissaannut politikkikkut ataatsimut isigalugu anguniakkap ilagaa. Ammaanissap piviusunngortinneqarnissaa aqqutissiuunneqarpoq Nalunaarasuartaateqarnermi Aqutsisut ulloq 5. septembari 2012 aalajangiimmata annertuumik nioqqummut kiffartuussissummut Global IP-Transitimut akigititaasussanik.

Silarsuup annersaani nalunaarsuartaateqarnermik ingerlatsiviit niuffaffitsigut teknologikkullu ineriartornerat annertusiartupiloorpoq. Kalaallit Nunaannut tamanna aamma atuuppoq. Kiffartuussinerit amerligaluttuinnartut kattussuunneqarput, nalunaarsuartaateqarnermilu kiffartuussissutitoqqat unammillerneqaqattaartuarput kiffartuussissutinit internettikkut neqeroorutigineqartunit. Kiffartuussisut nutaat ilutsit nutaat niuffaffimmi misilerarpaat, kiffartuussisullu pioreersut nioqqutitik pisisartut piumasaannut naleqqussarpaat

Tamanna ingerlaavartumik naleqqussarnissamut anguniakkanillu siunniussinissamut annertuumik piumasaqarfiuvoq nalunaarasuartaateqarnermi malittarisassat tunngaviusut eqqarsaatigalugit, qularnaarniarlugu nalunaarasuartaateqarnermut politikkip piviusunngortinneqarnissaata pitsaanerpaamik atugassaqartinnissaa.

Tamatumunnga piumasaqaataavoq nunanit naleqqiussiviusinnaasunit ilisimasat misilittakkallu ingerlaavartumik katersortarnissaat aammalu Qallunaat Nunaanni Savalimmiunilu nalunaarasuartaateqarnikkut ammaassinerit ingerlanneqareersut tunngavigalugit misilittakkat takutitaat aalajangersimasumik periaaseqarluni suliarinissaat. Taamaattumik Nalunaarasuartaateqarnermi Aqutsisut Savalimmiuni Qallunaallu Nunaanni nalunaarasuartaateqarnermi oqartussaasut qanimut suleqatigaat.

Nalunaarasuartaateqarnermi sullissinerup ineriartornerata sapinngisamik annertunerpaamik piareersimaffiginissaata anguniartuarneranut ilaatillugu aamma nalunaarasuartaateqarnikkut sullissinermi niuffaffiup inatsisitigut ataatsimut tunngavigisaasa ingerlaavartumik naleqqussarneqartarnissaat ineriartortinnissaallu siuarsarniarlugu Nalunaarasuartaateqarnermi Aqutsisut nalunaarasuartaateqarnikkut peqqussummi § 18 malillugu Naalakkersuisunut ukiumoortumik nalunaarusiortussaatitaapput. Taamaalilluni nalunaarusiaq pingaarutilimmik ilanngussisuuvoq Nalunaarasuartaateqarnermi Aqutsisut suliat nalunaarasuartaateqarnermut tunngasut tungaasigut Naalakkersuisunut siunnersuisartutut atuunnerinut.

Nalunaarusiap imaraa ataatsimut isigalugu Nalunaarasuartaateqarnermi Aqutsisut suliaasa ilisaritinnerat kiisalu Aqutsisut takorluugaat, suliassaat naleqartitaallu. Ukiup ingerlanerani suliat tungaasigut angusat eqqartorneqarput aamma nalunaarasuartaateqarnerup immikkoortuani inatsisitigut tunngaviusut atuuttut misilittagaqarfigineri. Aaqqissuussinikkut teknologikkullu ineriartorneq nalunaarasuartaateqarnerup immikkoortuani unammillernerup annertussusaata nalilerniarneranut tunngaviusoq eqqartorneqarpoq, soorlu aamma nalunaarusiap imarigaa Nalunaarasuartaateqarnermi Aqutsisut nassuiaataat ataatsimut ingerlaarnermi sullississummut Global IP-Transitimut akigititaasoq aamma Savalimmiut Qallunaallu Nunaata suleqatigineri pillugit.

Kiisalu eqqartorneqarpoq eqqaartuussisutigut suliaq niuffaffimmi kiffartuussissutinik neqerooruteqartup suliakkiissutigisimasaa Nalunaarasuartaateqarnermi Aqutsisut ataatsimut ingerlaarnermi sullississummut Global IP-Transitimut tunngasumut akigititaasoq pillugu aalajangiinerannut attuumassuteqartoq. Aammalu nalunaarusiami eqqartorneqarpoq aqutsisut nakkutilliinermi oqartussaasutut. Taamaalilluni nalunaarusiamik matuminnga ataatsimut isigalugu anguniagaavoq nalunaarasuartaateqarnermut politikkikkut suliniutigineqarsinnaasut eqqarsaatiginissaannut tunngavissiuissalluni. Taamaattumik sammisat arlallit qaqinneqassapput oqaaseqarfigineqarlutillu, taakkununnga ilaatigut ilaallutik Nalunaarasuartaateqarnermi Aqutsisut nakkutilliinermi oqartussaasutut attaviitsutut inissisimanerat aamma Nalunaarasuartaateqarnermi Aqutsisut nalunaarutinik saqqummiisinnaanissamut piginnaatitaanerisa annertussusaat.

Ataatsimut isigalugu anguniakkami ”pitsanerpaamik akikinnerpaamillu” oqaasertalimmi inissinneqarsimavoq nalunaarasuartaateqarnermut politikkimut tunngatillugu piumasarineqartup ammaassinerup kingunerissagaa piviusumik unammillerneq ilaatillugulu atuisut pisariaqartitaq naapertorlugu illersorneqarnissaasa qulakkerneqarnissaa pilersorneqarnissallu qularnaatsuunissaa, kiisalu nalunaarasuartaateqarnermi piginnaasat killeqartut pitsaanerpaamik atorneqarnissaat. Taamaattumik Nalunaarasuartaateqarnermi Aqutsisut nakkutilliinermi oqartussaasutut qulakkiissavaat anguniakkat taakku sunniuteqarnerpaamik piviusunngortinneqassasut.

Anguniakkat taakku anguneqassappata pisariaqarpoq nalunaarasuartaateqarnermi nakkutilliinermi oqartussat sunniuteqartut attaviitsut pilersinneqarnissaat.

Nalunaarasuartaateqarnermi Aqutsisut – 2008-mi pilersinneqartut – suliassinneqarsimapput nakkutilliinermi oqartussaaneq taanna tigummissagaat.

Atuarluarina! 

Nicolai Odgaard Jensen
Aqutsisoqarfimmi pisortaq