Nalunaarsuartaateqarnermi peqqussummut siunnersuummi oqaaseqaatini piumasarineqarpoq internettikkut kiffartuussineq ammanerulersinneqassasoq.

Naalakkersuisut qanittoq isigalugu pilersaarutitigut anguniagaraat kiffartuussinikkut ammanerulersitsisoqassasoq internettikkut kiffartuussinermik neqerooruteqarnermut isersinnaanermi.


Naalakkersuisut septembari 2009-mi aalajangerput, ikkuffeqanngitsumik internetteqarnermik tuniniaaneq ammanerulersinneqassasoq. Neqeroorutillit nutaat illoqarfinni nunaqarfinniluunniit ataasiakkaani attaveqaatinik ikkuffeqanngitsunik nammineq pigisaminnik pilersitsinissaminnut periarfissinneqarput.

Nalunaarasuartaateqarnermi attaveqaatit illoqarfiit, nunaqarfiit nunallu allat akornini suli Nammnersorlutik Oqartussanit kisermaassisuuffigineqarput. Illoqarfiit nunaqarfiillu iluini kabelikkut attaveqaatit aamma kisermaassisuunermut ilaapput. Attaveqaatit kisermaassisuunermut tunngasut TELE-POSTimut akuersissutitut tunniunneqarput.

2014-imi Naalakkersuisut suliniut ”Nalunaarasuartaateqarnermi Ammanerulersitsinerup sinaakkutai” suliaraat, tassani pilersaarut pingasunik alloriarnilik nalunaarsuartaatitigut kiffartuussinernik nangillugu ammanerulersitsineq allaaserineqarpoq immikoortunut pingasunut.

Nalunaarsuartaatitigut kiffartuussinernut suliniummi immikkoortoq 1 2014-imi ingerlanneqarpoq, tassani datanik kiffartuussinermi ammanerulersitsineq, taassuma ataani internettimut kiffartuussinerit  ikuffeqanngitsutigut ikkuffilitsigullu attaveqarfiit ammanerulersinneqarmata. Attaveqarfiit ikkuffillit suli Namminersorlutik Oqartussat kisermaassisuunerannipput TELE-POSTillu akuersissummik tigumminninneraniillutik. Taamaattumik kiffartuussisut nutaat  ataatsimut ingerlaarneq aqqutigalugu attaveqarfinnut isersinnaanissartik TELE-POSTimi pisiarissavaat.

Immikkoortoq 2 tassaavoq ikkuffilitsigut angallattakkatigullu oqarasuarnerup ammanerulersinneqarnera. Angallattakkatigut oqarasuarnerup ammanerulersinneqarneranut atatillugu nalunaarasuartaatitigut kiffartuussinernut pilersuisussaatitaaneq aalajangersarneqassaaq.

Ammanerulersitsinissamut suliniummi immikkoortut pingajuat kingullersaallu tassaavoq nalunaarasuartaatitigut kiffartuussinerit allat ammanerulersinneqarnissaat.