Atuisartoqarnermut Unammilleqatigiinnermullu Aqutsisoqarfik logo Atuisartoqarnermut Unammilleqatigiinnermullu Aqutsisoqarfik AUA

Print

Peqqissimisinnaatitaanermut pisinnaatitaaffiit

Pisisimaninnut peqqissimileruit pisiaq pisiffigisannut utertinneqarnissaa pisinnaatitaaffigaajuk?

Pisiniarfinni niuerniartillutit aallaavittut utertitsinissamut, taarsiinissamut aammalu peqqissimisinnaanermut pisinnaatitaaffeqanngilatit. Aamma pisiaq akilereernerata kinguninngua taarserusussagaluarukkuluunniit pisinnaatitaaffeqanngilatit taama iliornissamut, aattaalli pisiaq amingaateqarpat ajoquteqarpalluunniit taarsiisinnaaneq periarfissaavoq. Uanili inatsisit immikkut ittut atuutsinneqassapput naammangittaalliorsinnaanermut periarfissaq atorneqassappat.

Pisiniarfiit ilai peqqissimisinnaanermut assigusumik periarfissanik neqerooruteqartarput, tamakkuli inatsisitigut piumasaqataanngillat pisiniarfiilli nammineerlutik sullissinerminnut tapiliullugu neqeroorutigisarivaat. Niuertarfiit ilaat taarsiinissamut nipitittagannguamik pisianut ikkussisarput, soorlu immaqa sapaassuit nalaanni (juulli) aammali ilaat ukiut kaajallallugu nipitittakkanik ikkusisinnaasarput, immaqa pingaarnertut tunissutissatut pisianut. Taarsiisinnaanermut periarfissinneqarneq taama ittoq inatsisinit pitsaanerusumik atuisartunut periarfissiivoq. Neqeroorutigineqanngippalli allatut iliortoqarsinnaanngilaq.

Amerlanertigut niuertarfiit allagartaliisimasarput taarsiinissamik neqerooruteqarnerlutik. Ilaatigut pisinermi allagartami allassimasarput, kisiannili niuertarfimmi pisinermiluunniit allagartami takusinnaanngikkukku utertitsisinnaanallu taarsiisinnaanngilatit.

Amerlanertigut iluaqutaasinnaavoq niuertitsinut aperineq taarsiisoqarsinnaanersoq pisereernerup kingorna. Kisiannili eqqaamallu allaganngorlugu piumanissaa niuertitsisunit oqaatsitigut neriorsorneqaruit kingusinnersukkut taarsiisoqarsinnaasoq.

Imaassinnaavoq pisiniarfiit ilaanni naliginnaasuusoq taarsiisarneq, kisiannili naliginnaasutut taaneqarsinnaavoq aattaat pisiniarfik taama iliortarsimappat ukiuni arlalinni aammalu ilisimaneqarluni atorneqartarsimanguni.

Ungasissumit pisineq
Ungasissumit niuerniaruit ullunik 14-inik periarfissaqarputit peqqissimisinnaanissamut. Ungasissumit niuerniarneq paasineqassaaq, niuernerit internetsikkut imaluunniit oqarasuaatikkut pisimasut, tassa pisiniaq niuertarfiup avataanit niuerniarpat aammalu niuertarfiup nalinginnaasumik ungasissumeersunut niuerniartartuuppat. Ungasissumit niuerniarnermi peqqissimisinnaatitaanerit atussagukku peqqutissaqartariaqanngilatit pisinnaatitaaffiummat.

Qulaani pineqartoq suleriaatsinik inatsisinillu issuaanerinnaavoq atuisartut peqqissimisinnaanerinut taarsiisinnaanerinullu periarfissaasunut. Apeqqutissaqaruit Atuisoq attavigisinnaavat sianerlutit 32 80 33 imaluunniit allallutit uunga: atuisoq@nanoq.gl.