AALAJANGIINEQ

Greenland Express Iceland ehf-ip ullut 30-t allakkat uku tigoreerneraniit ilinnut kr. 35.136-nik akiliuteqassaaq, saniatigullu aamma erniaqartitsisarnermut inatsit 22. august 2015-meersoq naapertorlugu akiliuteqartoqarnissaa tikillugu ernianik ilaneqarsimasunik.

Aallarniut

Naammagittaalliut ulloq 14. marts 2016-mi tigusimavarput. Naammagittaalliuteqarnermi toqqammavigineqarpoq inersimasut 3-t meeqqallu 3-t, siumut 23. juli 2015-mi utimullu ulloq 11. august 2015-mi angalanissaraluinik taamaatitsisimanermut tunngassuteqartut.

Illit piumasaqaateqarninni toqqammavigisimavat akiliutigisimasaraluannik utertitsiffigineqarnissat, taavalu aamma billetsit taamaatittariaqarnerannut tunngatillugu allanik pisisariaqarsimaninni akit assigiinngissutigisimasaat, tassami allatut ajornartumik timmisartortitsileqatigiiffik alla atorlugu taamanikkut billetsisisariaqarsimagavit.

Greenland Express Iceland ehf-ip angallassinissaminnik taamaatitsiinnarnerminni kinguninngua ilisimatitsissutigisimavaat billetsit akiisa nalingi akiat ilinnut utertinneqarumaartut, tamatumali kingorna suliassamut tunngatillugu akissaarlunilu imaluunniit piumassuseqarsimanani suliassap naammassineqarnissaa siunertaralugu suleqataanissamut.

Suliap nassuiarneqarnera

Ulloq 10. marts 2015 Greenland Express Iceland ehf-mit (Greenland Express) billetsissasi tassalu inersimasunut 3-nut meeqqanullu 3-nut pisiariartorsimavasi, tamatumali kingorna 23. juli 2015 taamatullu 11. august 2015-mi aallarnissarsi pilersaarutigilersinnaallusiuk.

Ulloq 13. juli 2015 angalanissat taamaatsinneqarput, tamannalu toqqammavigalugu timmisartuutileqatigiiffik alla (selskabi 2) aqqutigalugu kr. 19.965-it atorlugit aallarnissassinnut billetsisiniarsimallutit. Ulloq 19. juli angerlamut billetsissasi pisiariartorsimavatit, tamatumani inersimasup ataatsip angalanissaa eqqaassanngikkaani ullormut aallarfissassitut naatsorsuutigineqartumut billetsisiniarsimallutit.

Ulloq 14. juli 2015-mi Greenland Express-ip ilisimatitsissutigivaa billetsisiarisimasasi utertitassanngortinneqarsimasut. Kisiannili ulloq 22. juli 2015-mi suli pineqartut utertitsissutigineqarsimannginneri toqqammavigalugu Greenland Express-i attaveqarfigisimavat piumasaqaatigalugu billetsisiarisimasaagaluasi utertitsissutigineqassasut, tamatumali saniatigut (selskab 2-mit) billitsisiarisimasaagaluasi akiisa nalingi aamma taarsiissutigineqaqqullugit. Tamatuma kingorna arlaleriaraluaqalusi attaveqarniartarnisi iluattitsiffiusarsimanngillat. Tamatumali kingorna tassalu ulloq 14. marts 2016-mi Pisisartut Siunnersuisoqatigiiffiannut naammagittaalliuteqarsimallutit.

Greenland Express-ip Pisisartut Siunnersuisoqatigiiffiannit attaveqarfiginiarneqartarsimanerminut akissuteqaateqartarsimanngilaq, suliaq pillugu akissuteqartarusuttarsimanatik. Greenland Express-i pisortatigoortumik najugaqarfia, tassalu islandimi RSK – RÍKISSKATTSJÓRI-mi angerlarsimaffeqarpoq, naammagittaalliutillu nassiunneqarneranut atatillugu ilisimaneqanngitsutut kalerriutigineqarsimalluni. Pisisartut Siunnersuisoqatigiiffiata allaffeqarfiata ulloq 8. februar 2016-mi selskabi paasissutissanik atorsinnaasaminik pissarsiniarluni attaveqarfigisimagaluarpaa. Tamatumuunalu akissuteqarfigineqarsimanani.

Ulloq 7. oktober 2916-mi Pisisartut Siunnersuisoqatigiiffiata allaffeqarfianit attaveqarfigineqarputit, qinnuigineqarlutit paasissutissanik suli annertunerusumik ingerlatitseqqinnissat. Taakkua ulloq 10. november 2016-mi pissarsiarivagut. Ulloq 10. februar 2017-mi Pisisartut Siunnersuisoqatigiiffiata allaffeqarfianiit selskabi email-ikkut attaveqarfigalugu naammagittaalliuut pillugu pissarsiniarfigineqarpoq, tamatumanilu ilisimatitsissutigalugu suliassap naammassiniarneqarnissaanut paasissutissat naammattut pissarsiarisimanerarlugit, tamannalu toqqammavigalugu qanittukkut aalajangiisoqarnissaa naatsorsuutigineqarsinnaasoq. Taamatut saaffiginnissuteqarneq akissuteqarfigineqanngilaq.

Tunngavilersuutit

Paasissutissat pigineqartut toqqammavigalugit Siunnersuisoqatigiiffik tunngavissaqarsorivoq suliassaq tigussallugu, tassami Greenland Express-ip ilaatigut kalaallisut oqaasertalinnik quppersagaliorsimanermigut nunatsinni takoqqusaaruteqarnissaq toqqarsimammagu, tamatumanilu aamma naammagittaalliuteqartoq najugaqartuulluni, takuuk eqqartussisarnermut inatsimmi § 212, imm. 2, 2 pkt, tak. § 207.

Isumaqatigiissutigineqarpasinngilaq angallassisarnissanut tunngatillugu nunap sorliup inatsisai toqqammavigalugit ingerlatsisoqassamaartoqarsimanersoq. Angallassissutissarli nunatsinni atuisumut tunineqarsimammat tamatumanilu timmisartortartoqatigiiffiup kalaallisut taaguusersimanermigut Nunatsinnit avammut utimullu angallassisarnissani siunertarisimagaluaraa, siunnersuisoqatigiit isumaqarput nunatsinni inatsisit toqqammavigalugit aaqqiagiinngissutit nunatsinnilu eqqartuussivinnit suliarineqartariaqartut. Tassami pisut ersarissumik takutippaat, isumaqatigiissutaasimasut nunatsinnut attuumassuteqarnerpaajusimasut, tak. Romami Isumaqatigiissummi art. 4, imm. 1, tak. imm. 5. 2. pkt., tamatumani kalaallit nunaanni eqqartuussivitsigut kaajallaasitaq 413, 13. september 1985-meersoq naapertorlugu inatsisit sorliit nunani assigiinngitsuni tunngassuteqartuni atorneqartussaanersut.

Greenland Express-ip taaguutini toqqammavigalugu angalanissamut billetsissanik tunisiffigisimavaatit. Timmisartuutileqatigiiffiullu kiffartuussinissani isumagisinnaasimanngilaa, tamatumanili illit sutigulluunniit kukkussuteqarsimasinnaanerit takuneqarsinnaanani. Tamannali toqqammavigalugu pisiarisimasatit pillugit utertitsiffigineqarsinnaasutut inissisimasunngortissimallutit.

Unnerluutigineqartup angalatitsinissamik aaqqissuussisuunissani siunertaralugu ulluni 23. juli 2015-mi aammalu 11. august 2015-mi Narsarsuarmiit København-imut angalassutissannik tuniniaavigisimavaatit. (Selskabi 2-p) ulluni pineqartuni Narsarsuarmiit København-imut ullut taanna aamma angallassisussaasimanini toqqammavigalugu, illit periarfissaqalersimavutit taakkunannga billetsisiniarnissamut, tamanna toqqammavigalugu Siunnersuisoqatigiit isumaqarput, Greenland Express-ip – immaqa aningaasassaaleqini patsisiginianngikkaluarlugu – allannguuteqartitsingaarnani pisussaaffeqarsimagaluartoq angallassinissaq piviusunngortinniarsimassallugu. Tamanna toqqammavigalugu ulloq 13. juli 2015-mi Greenland Express-ip angallassisussaatitaalersimagaluarnerminik taamaatitsiinnarsimanermigut akisussaassuseqalerpoq, taamaattumillu illit pissutissaqarlualersimallutit taartissaanik allami pisinissamut, tamatumani pisisarnermut inatsisimmi § 25-mi allaqqasut toqqammavigalugit.

Siunnersuisoqatigiinni isumaqarpugut, illit selskabimi allami billetsisinnginninni Greenland Express-imut attaveqarniaqqaarsimanngitsutit, tamatumani isumaqatigiissutersi naapertorlugu allatut neqerooruteqarfigineqarnissat anguniarlugu, tamannali pisut toqqammavigalugit aalajangiisuusimasutut isumaqarfigineqanngilaq. Angalanissap taamak kingusitsigisukkut unitsiinnarneqarneratigut, tamatumali kingunerisaanik illit allatut aaqqiinissamut periarfissaqalersimanerit toqqammavigalugu, immikkullu unnerluutigineqartup pissusilersuutigisarsimasai toqqammavigalugit siunnersuisoqatigiinni isumaqarpugut, taakkununnga qanoq iliuuseqarniarsinnaaneq imminut akilersinnaasimanngitsoq, taamaattumillu illit nammineerlutit allatigut periarfissarsiornissat pissusissamisoortuusimasoq.

Ilisimatitsissutigisimavat illit kr. 37.093-it atorlugit (selskabi 2-mi) billettissanik pisiniartariaqarsimallutit. Billetsisinissaq unnerluutigineqartup piffissap taamaasinerani – tassalu angalanissaq ullunik 10-nik sioqqutsilluni taamaatitsiinnarsimaneranut taarsiullugu - allatut ajornartumik pisiniartariaqarsimallutit. Aningaasatigut periarfissat toqqammavigalugit ulloq 19. juli 2015-mi, tassalu aallarnissaq ullunik 4-nik sioqqullugu aatsaat angerlarnissamut billetsisisinnaasimallutit. Billetsi ataaseq eqqaassanngikkaani allat tamarmik piffissamut angerlarnissamut pilersaarutigineqartut naapertorlugit aallarsinnaasimapput.

Illit nutaamik billetsisiniartariaqarninnut tunngatillugu sapinngisamik annaasaqarnaveersaarnissat anguniartussaasimavat, ilanngullugu aamma tamatumani pisussaallutit timmisartortitseqatigiiffinni allani pisisariaqalerninnut (selskabi 2) atatillugu akikinnersiortussaassimallutit. Qinikkat tassaasimavoq Narsarsuarmiit tamatumuuna Islandi aqqusaarlugu Danmarkimut timmisartuussisussaq. Siunnersuisoqatigiit isumaqarput billetsit nutaat pisiarisimasatit atorsinnaajunnaartunut assersuukkuminartuusut, tamatumanimi aamma nuna alla aqqusaaqqaarlugu ingerlasariaqaqqaarneq naapertuuttutut isigiuminaassinnaalluni (soorlu nunatsinni innuttaasunut napparsimalernermi sillimmataasartunut sanilliullugit pissutsit allaanerummata), tamatumali saniatigut ilimanaateqarsinnaasimalluni timmisartuunneqarnerup kinguaattoorfiusinnaasimanera. Tamatumali saniatigut piffissaqarpallaarsimanngilatit allanit timmisartuuneqarnissarsi toqqammavigalugu ujartuinissamut, angalaqatigiimmi aamma 6-usussaasimagassi.

Pisut taamatut isikkoqalersimanerisa kingunerisaanik, aammalu eqqarsaatigissagaani nunatsinnit inuit 6-t angalatinniarnerannut tunngatillugu akigititaasartut nalinginnaasut isiginiassagaani, piffissami taamak sivikitsigisumi pisiniapallattariaqarnermi allatut iliornissaq ajornarsimassasoq takorloorneqarsinnaalluni. Taamaattumik Greenland Express-ip pissusissamisuunngitsumik taamaatitsiinnarsimaneranut atatillugu, alla aqqutigalugu billetsisisariaqarsimanerit pissusissamisoortutut isigineqarsinnaalluni aamma billetsisiarineqartut nikingassusaat eqqarsaatigissagaani.

Timmisartortitseqatigiiffik alla aqqutigalugu (selskabi 2) aallarnissassinnut 19.965 kr.-nit atorlugit billetsisisimavutit, taakkuli pisiarisimallugit Greenland Express-i aqqutigalugu aallarnissaagaluarnersi taamaatsinneqarsimasoq naapertorlugu. Tamanna aamma pivoq (selskabi 2) aqqutigalugu kr. 5.671-nit angerlamut ingerlanissassinnut (selskabi 2) aqqutigalugu 11. august 2015-mi billetsisisariaqarsimanersi, tassami aamma billetti taanna taamaatitsiinnartoqarsimanera naapertorlugu, Greenland Express-i aqqutigalugu angerlarnissaagaluarnersi naapertorlugu pisiarisariaqarsimasarsi.

Angerlamut angalanissamut tunngatillugu inersimasunut 2-nut meeqqanullu 3-nut tamatumuuna ulloq Greenland Express-i aqqutigalugu angerlarnissagaluarnissinnut ullui eqqarsaatigalugit allaapput. Billetsit taakkua eqqarsaatigalugit pilersaarutaasimasuugaluit eqqarsaatigalugit billetsit nutaat allaanerungaatsiarsimapput, taamaattumillu imaassiinnarlugu annaasaqaatissinnut taarsiullugit naapertuuttutut taaneqarsinnaasutut. Tamanna toqqammavigalugu annaasaqaatigisimasasi taggissinikkut annertussusilerneqarsimapput.

Nunatsinnut timmisartuussititsisarnermi akiutinneqartartut piffissami taamak sivikitsigisumi inersimasunut 2-nut meeqqanullu 3-nut akiutinneqartartunut isiginiassagaani aammalu piffissami pineqartumi sulianut allanut sanilliussinikkut assersuutigissagaani, siunnersuisoqatigiit isumaqanngillat billetsinut annaasimasunut 9.500 kr.-nit assersuutigissagaani pissusissamisoortuusut. Tamakkiisumik annaasat aammalu taggiussatut annaasat pisiarisimasaagaluanut sanilliussinikkut annertussusaat, tamanna toqqammavigalugu 17.126 kr.-ninut annertussusilerneqarsinnaapput.

Illit uppernarsaatissaqartippat Greenland Express-imut ulloq 22. juli 2015-mi emailikkut akiliutigisimasatit naapertorlugit tamatumali saniatigut (selskabi 2) aqqutigalugu (takussutissaq 1) utertitsiffigineqarnissaat piumasaqaatigisimavat. Taamaattumillu Greenland Express-ip ulluni pineqartuni sinaakkutissatut pisiassat akii takorloorsinnaasimammagit aammalu periarfissaqarsimalluni tamakku pillugit paasiniaanissaminut, taamaattumik piumasaqaatigineqartut annertussutsimikkut naapertuuttutut isigineqartariaqartut isumaqarpugut, taamaattumillu ernialiisarnermut inatsit naapertorlugu ullut 30-t ullormiit pineqartumit tamatuma kingorna ernialiisoqarnissaa pissusissamisoortutut isigineqartariaqarluni.

Taamaattumik Siunnersuisoqatigiit isumaqarput Greenland Express-ip ilinnut 35.136 kr.-ninik akiluteqartariaqartoq, tamatumali saniatigut ernialiisarnermut inatsit naapertorlugu 22. august 2015-miit akiliuteqarnissaq tikillugu ilanngullugu akiliuteqartitsoqartariaqartoq.

Naammagittaalliuteqarnissamut ilitsersuut

Qinnutigisinnaavat suliassaq Inatsisartut inatsisaat nr. 39, 9. december 2015-meersumi § 33 naapertorlugu qinnuteqaateqarnissamut. Pisisartut Siunnersuisoqatigiit aalajangiinera allaffissornikkut ingerlatsivinnut allanut naammagittaalliutigineqarsinnaanngilaq, tak. inatsimmi pineqartumi § 35, imm. 2.

Inussiarnersumik inuulluarit

Pisisartut Siunnersuisoqatigiiffiat

Nicolai Odgaard Jensen

Siulittaasoq