Siulequt

Ineqarneq pillugu Maalaaruteqartarfiup matumuuna 2007-imut ukiumoortumik nalunaarutini saqqummiuppaa.
Nalunaarut inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, Inatsisartut peqqussutaatigut nr. 14-ikkut, 20. november 2006-imeersukkut allannguuteqartinneqartumi § 83, imm. 4 naapertorlugu saqqummiunneqarpoq, taannalu malillugu Ineqarneq pillugu Maalaaruteqartarfik ukiumut ataasiarluni sulinini pillugu nalunaarusiortussaavoq. Nalunaarummi Ineqarneq pillugu Maalaaruteqartarfik ilaasortallu pillugit paasissutissat
allaaserineqarput. Ineqarneq pillugu Maalaaruteqartarfimmi 2007-imi suliaasimasut nassuiarneqarput. Tamatuma saniatigut immikkoortoq ataaseq, Ineqarneq pillugu Maalaaruteqartarfiup 2007-imi aalajangigaanut ataasiakkaanut tunngasoq ilaatinneqarpoq. Kiisalu suliat tiguneqartut aammalu naammassillugit suliarineqarsimasut kisitsisitigut takussutissartaat ilaatinneqarpoq. Ineqarneq pillugu Maalaaruteqartarfiup suliaannut aalajangiinerit Ineqarneq pillugu Maalaaruteqartarfiup nittartagaa www.maalaarut.gl aqqutigalugu ingerlaavartumiktamanut ammasumik saqqummiunneqartarput. Aalajangiinerit Ineqarneq pillugu Maalaaruteqartarfiup nittartagaatigut tamanut ammasumik ingerlaavartumillu saqqummiunneqartarnerisigut
maalaaruteqartarfiup aalajangiisarnerinik paasissutissiisarnerup pitsaasumik piffissamullu naleqquttumik ingerlanneqarnissaata qulakkeerneqarnissaa Ineqarneq pillugu Maalaaruteqartarfimmit neriuutigineqarpoq.

Nuuk

Siulittaasuugallartoq

Ineqarneq pillugu Maalaaruteqartarfik sunaava

Namminersornerullutik Oqartussat kommunillu inissiaataanni attartortut attartortitsisullu akornanni aaqqiagiinngissutit arlallit allaffissornikkut inaarutaasumik aalajangiiffigineqarnissaat Ineqarneq pillugu Maalaaruteqartarfiup suliassaraa.
Ineqarneq pillugu Maalaaruteqartarfiup maalaarut, aatsaat pineqartut uku arlaannut tunngasuuppat suliarisinnaavaa:
- Ineqarnermut akiliutinik qaffaanissamut siumoortumik ilisimatitsisarnermi periaatsit.
- Aserfallatsaaliuineq iluarsaassinerlu.
- Iserternermi inissiap qanoq issusia.
- Attartukkami atortulersuutit pitsannguinissallu (atuisinnaatitaaneq).
- Attartortup attartukkamik atuinera (torersaarnissamut maleruagassanik unioqqutitsinerit).
- Atuisinnaatitaanerup allanut tunniunneqarnera (inissianik paarlaateqatigiinneq, allamut attartortitsineq aamma attartornermik ingerlatitseqqinneq).
- Inissiamit nuunnermi inissiap qanoq issusia (nalinginnaasumik aserfallatsaaliuineq).
Ineqarneq pillugu Maalaaruteqartarfik siulittaasoqarpoq pingasunillu ilaasortaqarluni, taakkulu katitigaaneranni attartortup attartortitsisullu soqutigisaat sinniisoqartinneqarput. Attartortoq maalaarummik tunniussinermini 150 kr.-inik akiliissaaq, paasinarsippallu maalaarut Ineqarneq pillugu Maalaaruteqartarfimmi suliarineqarnissaminut naleqqutinngitsoq, imaluunniit attartortoq maalaarummini tamakkiisumik ilaannaasumilluunniit taperserneqarpat taakku attartortumut utertinneqassapput.

Ilaasortat

Ineqarneq pillugu Maalaaruteqartarfik 2007-imi imatut aaqqissuussaavoq:

Siulittaasoq: Annemette Larsen, Ineqarnermut Attaveqarnermullu Pisortaqarfik,
(sinniisissaq, Ruth Lindhardt)

Ilaasortat:
Lars Olsen, KANUKOKA, (sinniisissaq, Jens Romerdahl)
Sofie Fleisher, SIK (sinniisissaq Josef Therkildsen)
Christian Borch Grell, A/S Inissiaatileqatigiiffik INI (sinniisissaq, Anne Sofie Thomsen, aamma 1. november 2006 aallarnerfigalugu sinniisissaq, Susie Kristiansen)
Naalakkersuisoq Ineqarneq pillugu Maalaaruteqartarfimmut allattoqarfeqartitsissaaq. Ineqarnermut Attaveqarnermullu Pisortaqarfiup allattoqarfeqartitsineq isumagisaraa, 2007-imilu tamanna pisortaqarfimmi fuldmægtigitut atorfilimmik isumagineqarpoq.

Ineqarneq pillugu Maalaaruteqartarfiup 2007-imi suliarisimasai

Ineqarneq pillugu Maalaaruteqartarfiup suliassai tassaapput, attartortitsisoq tassaappat kommuni imaluunniit Namminersornerullutik Oqartussat, attartortup attartortitsisullu akornanni aaqqiagiinngissutit pillugit aalajangiinissaq.

Naalakkersuisut

Naalakkersuisut februaar 2006, Ineqarneq pillugu Maalaaruteqartarfiup suliai pillugit nalunaarut nr. 4, 13. februar 2006-imeersoq akueraat, taannalu malillugu Ineqarneq pillugu Maalaaruteqartarfiup sulinera 1. april 2006 aallarnerfigalugu aallartippoq.

Maalaaruteqartarfiup ilaasortai

Ineqarneq pillugu Maalaaruteqartarfik siulittaasoqarpoq kiisalu pingasunik ilaasortaqarluni.

Maalaarutit suliarineqartartut

Ineqarneq pillugu Maalaaruteqartarfik 2007-imi maalaarutinik 15-inik nutaanik nalunaarsugaqarpoq. 2007-imi sulianit taakkunannga 11-it aalajangiiffigineqarput, suliallu pingasut 2008-imi suli suliarineqarlutik. Suliat taakku pingasut 2008-imi aalajangiiffigineqarnissaat naatsorsuutigineqarpoq.
Suliami ataatsimi attartortup attartortitsisullu akornanni isumaqatigiinngissuteqartoqanngimmat Ineqarneq pillugu Maalaaruteqartarfiup suliassaq suliariumanngilaa. Suliat marluk maalaaruteqartumit taamaatinneqarput.
Maalaarutit marluk utertinneqarput, Ineqarneq pillugu Maalaaruteqartarfik sulianut taakkununnga aalajangiinissamut pisinnaatitaanngimmat. Maalaarutit 19-it utertinneqarput, Ineqarneq pillugu Maalaaruteqartarfiup maalaaruteqarnermut
akiliutissaq 150 koruuniusoq tigusimanngimmagu.

2007-imi suliat aalajangiiffigineqartut

2007-imi Ineqarneq pillugu Maalaaruteqartarfik arfinileriarluni ataatsimiippoq. Ataatsimiinnerit februaarimi, apriilimi, maajimi, juunimi, oktobarimi aamma novembarimi pipput.
Matuma kinguliani aalajangiinerit, Ineqarneq pillugu Maalaaruteqartarfimmi Ineqarneq pillugu Maalaaruteqartarfiup 2007-imi ataatsimiinnerini aalajangiiffigineqartut kinaassutsimik taasiffiunngitsut issuaaffigineqarput.

Ineqarnermut akiliutip qaffanneqarnissaanut ilimasaaruteqarneq pillugu suliaq

Suliamik saqqummiussineq
9. oktober 2006-imi attartortoq attartortup inissiamut najugaanut attartortitsisup ineqarnermut akiliutip qaffanneqarnissaanik siumoortumik nalunaaruteqarnera pillugu Ineqarneq pillugu Maalaaruteqartarfimmut maalaaruteqarpoq. Ineqarnermut
akiliutip qaffanneqarnissaanik siumoortumik nalunaarut attartortup isumaa malillugu ineqarnermut akiliutip qaffanneqarnissaanut peqqutaasumut paasissutissanik naammattunik imaqanngilaq, aammalu tunngavilersuutigineqartut ikittunnguit eqqunngillat. Taamaattumik siumoortumik nalunaarut atorsinnaanngitsoq attartortoq isumaqarpoq. Attartortoq pisortat inissiaataanni attartortittakkami najugaqartuusoq suliami takuneqarsinnaavoq. Inissiaq Namminersornerullutik Oqartussanik pigineqarpoq, aammalu najugaqarfik 159-imi inissisimalluni. Paasissutissiissutigineqartut malillugit najugaqarfimmi inissiat attartortittakkat 31. marts 2006-imi 109-upput, inissiat katillugit 8.422,70 kvadratmeterisut annertussuseqarlutik, kiisalu inissiat immikkut ittumik attartortittakkat 77 kvadratmeterisut annertussuseqarlutik. Inissiat attartortittakkat
18-it 1. januar 2007-imi najugaqarfimmit peerneqarput, attartortunit piginneqatigiilluni inissiatut tiguneqarmata. Taamaattumik 1. januar 2007-imi najugaqarfik 159-imi inissiat attartortittakkat 91-inngorput, inissiat katillugit 6.723,80 kvadratmeterisut annertussuseqalerlutik, kiisalu inissiat immikkut ittumik attartortittakkat 77 kvadratmeterisut annertussuseqarlutik.
12. oktober 2006-imi attartortup maalaarutaa tassungalu ilaliussat attartortitsisumut oqaaseqarfigisassanngorlugit saqqummiunneqarput. 30. oktober 2006-imi siumoortumik ilimasaarummi inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi (attartortitsinermut peqqussummi) § 28, imm. 2-mi piumasaqaatit siumoortumik nalunaaruteqarnermi naammassineqartut attartortitsisup oqaatigaa, taannalu malillugu ilisimatitsissut pissutsinut marluusunut ukununnga tunngasunut paasissutissanik imaqartussaavoq: Qaffaatissat annertussusaat
aamma qaffaanermut peqqutaasoq. Siumoortumik nalunaarut attartortup ineqarnermut akiliutaata qaammammut 704 koruuninik qaffannissaanut paasissutissanik imaqartoq attartortitsisup ilisimatitsissutigaa. Najugaqarfiup ukiumi pineqartumi
ukiumilu tulliuttumi missingersuutai, qaffaanissamut pissutaasumik paasissutissiiffiusut siumoortumik ilisimatitsissummut ilanngunneqarput. Taamaattumik siumoortumik nalunaarut atortussaasoq attartortitsisoq isumaqarpoq.

Aalajangiineq

Attartortitsinermut peqqussummi § 84, imm. 1, nr. 1 naapertorlugu Ineqarneq pillugu Maalaaruteqartarfik suliami aalajangiinissamut piginnaatitaalluni isumaqarpoq. Siumoortumik nalunaarut attartortitsisup nassiussimasaa, attartortullu 26. september 2006-imi tigusimasaa atorsinnaasoq Ineqarneq pillugu Maalaaruteqartarfiup siulittaasua ataatsimiititaliamilu ilaasortaq ataaseq isumaqarput. Siumoortumik nalunaarut attartortitsisup nassiussimasaa, attartortullu 26. september
2006-imi tigusimasaa atorsinnaanngitsoq ataatsimiititaliami ilaasortat marluk isumaqarput.
Attartortitsisup siunissami siumoortumik nalunaaruteqartarnermini ineqarnermut akiliutip qaffaatissaanut tunngavilersuutinik atuaruminarnerusunik nassiussisalernissaa kissaatiginartoq, Ineqarneq pillugu Maalaaruteqartarfimmi ilaasortat isumaqatigiillutik oqaatigaat.
Aalajangiinerit nalinginnaasumik taasisut amerlanerussuteqarnerisigut pisarput. Taasisulli amerlaqatigiinnerini siulittaasup taasinera aalajangiisuusarpoq.

Tunngavilersuut

Attartortitsinermut peqqussummi § 28, imm. 2-p immikkoortuani siulleq naapertorlugu ineqarnermut akiliut najugaqarfinni ataasiakkaani ukiumut tulliuttumut ingerlatsinermut missingersuutit, attartortitsisup suliarisimasai akuerisimasaalu tunngavigalugit ukiumoortumik aalajangersarneqartussaapput.
Ineqarnermut akiliut najugaqarfimmi isertitat tamarmiusut najugaqarfimmi aningaasartuutinut tamarmiusunut naleqqiullugit amerlassuseqarnissaat tunngavigalugu aalajangerneqartarpoq, tassalu attartorneq oqimaaqatigiissinneqartarluni. Aallaqqaammut attartortitsisup najugaqarfimmi aningaasartuutissat pisariaqartinneqartut tamaasa naatsorsortarpai, tamatumalu kingorna attartortitsisup aningaasat naatsorsorneqartut amerlaqatai ineqarnermut akiliutitut akilersittarpai (najugaqarfiup isertitai tamarmiusut). Attartortut tamarmik immikkut inissiami kvadratmeterit amerlassusai malillugit akiliisarput. Kisiannili attartukkat tamarmik allaffissornermut akiliisitsivigineqartarput, inissiap angissusaa apeqqutaatinnagu.
Attartortitsisup ingerlatsinermut missingersuutit najugaqarfimmi siulersuisunut saqqummiussimanngilai, najugaqarfimmi siulersuisoqanngimmat. Kisiannili attartortitsisup najugaqarfik 159-imi attartortut tamaasa najugaqarfimmi ataatsimiinnissamut
nalinginnaasumut, Nuussuarmi meeqqerivimmi Annersuarmi 29. september 2006-imi pisussamut aggersarsimavai.
attartortitsisup sinniisaasa sisamaasut saniatigut attartortut marluinnaat takkussimammata, taakkulu takkuttut ikinnerat pissutigalugu ataatsimiinnerup ingerlanneqarnissaa kissaatiginngimmassuk. Attartortut marluk taakku 2007-imi ingerlatsinermut missingersuutinik tunineqaannarput. Ingerlatsinermut missingersuutit inissiap
piginnittuanit 22. september 2006-imi akuerineqarput. Attartortoq maalaarummik matuminnga tunniussisoq 29. september 2006-imi najugaqarfimmi ataatsimiititsinermut takkuttut akornanniissimanngilaq. Attartortoq 26. september 2006-imi ineqarnermut akiliutip qaffanneqarnissaa pillugu siumoortumik nalunaarutitut allakkiamik tigusaqarpoq.
Ineqarnermut akiliut 1. januar 2007-imi qaffanneqassasoq siumoortumik allakkiami allassimavoq, taamaattumillu Ineqarneq pillugu Maalaaruteqartarfimmi ilaasortat isumaqatigiissut aalajangiipput, siumoortumik nalunaaruteqarnissap allakkatigut
qaammatinik pingasunik sioqqutsisumik pinissaanik attartortitsinermut peqqussummi piumasaqaat malinneqarsimasoq, tak. attartortitsinermut peqqussut § 28, imm. 2-p immikkoortuata tullia. Ineqarnermut akiliut qaammammut 704 koruuninik qaffassasoq siumoortumik nalunaarummi paasissutissiissutigineqarpoq.
Tamanna pissutigalugu Ineqarneq pillugu Maalaaruteqartarfik isumaqarpoq, siumoortumik nalunaaruteqarnermi attartortitsinermut peqqussummi siumoortumik nalunaarutip qaammammut qaffaatissat koruuninngorlugit ilisimatitsissutigineqarnissaannik piumasaqaat naammassineqarsimasoq, tak. attartortitsinermut peqqussummi § 28,
imm. 2-p immikkoortuisa pingajuat. Tamatuma saniatigut najugaqarfimmi 2007-imut missingersuutit kisitsisinngorlugit
paasissutissartai siumoortumik nalunarummut ilaatinneqarput, tassanilu ukiumi pineqartumi ukiumilu tulliuttumi missingersuutit pingaarnersai takutinneqarput. Ineqarneq pillugu Maalaaruteqartarfiup siulittaasuata ataatsimiititaliamilu ilaasortap
ataatsip oqaatigaat, siumoortumik nalunaarut minnerpaamik ineqarnermut akiliutip qaffanneranut pissutaasut pingaarnersiorlugit saqqummiunneqarnerannik imaqartariaqartoq attartortitsinermut peqqussummi § 28, imm. 2-mut oqaaseqaatini allassimasoq. Kiisalu oqaaseqaatini allassimavoq, attartortitsisup ukiumut tulliuttumut missingersuutinut kisitsisitigut paasissutissat, ukiumi pineqartumi ukiumilu tulliuttumi missingersuutit pingaarnersaannik saqqummiussiviusut ilanngunnerisigut paasissutissiisussaatitaanini naammassisinnaagaa. Missingersuutit kisitsisitigut paasissutissiiviusut 2006-imi kiisalu 2007-imi aningaasartuutissanik pingaarnernik imaqarput, taamaattumillu attartortitsinermut peqqussummi tunngavilersuinissamut piumasaqaat malinneqarsimalluni. Tamanna tunngavigalugu siumoortumik nalunaarummi
attartortitsinermut peqqussut malinneqarpoq, taamaattumillu siumoortumik nalunaarut paasissutissanik allanik, ineqarnermut akiliutip qaffanneranut pissutaasunik takutitsiviunngitsunik imaqaraluarpalluunniit atuuttussaalluni.
Tamatumunnga tunngatillugu Ineqarneq pillugu Maalaaruteqartarfiup siulittaasuataataatsimiititaliamilu ilaasortap ataatsip oqaatigaat, najugaqarfiup isertitaasa aningaasartuutaasalu allannguutaannut pissutaasoq pingaarneq tassaasoq, najugaqarfiup
inissiaataasa ilaasa 1. januar 2007-imi attartortunit piginneqatigiilluniinissiatut tiguneqarsimanerat, taamaattumillu inissiat taakku najugaqarfimmit peerneqarsimanerat. Najugaqarfimmi inissiat ikilinerat isertitat aningaasartuutit apparnerinut sanilliullutik annertunerusumik apparnerannik kinguneqarpoq, taamaattumillu tamatuma kingunerisaanik ineqarnermut akiliut 1. januar 2007-imi qaffanneqarpoq. Attartortitsisup taamaattoqarnera siumoortumik nalunaaruteqarnermini
erseqqissumik nassuiarsimasariaqaraluarpaa. Nassuiaateqannginnerali siumoortumik nalunaarutip atortussaajunnaarsinneqarsinnaaneranik kinguneqartussaanngilaq, siumoortumik nalunaarummi attartortitsinermut piumasaqaat matuma siuliani oqaatigineqartutut malinneqarsimammat, aammalu missingersuutit eqikkarnerini
najugaqarfimmi isertitassat ataatsimoortut 1. januar 2007-imi appartussaasut attartortup takusinnaammagit.
Ataatsimiititaliami ilaasortat marluk isumaat malillugu siumoortumik nalunaarut atorsinnaangilaq, najugaqarfimmi kvadratmeterit amerlassutsimikkut 1. januar 2007- imi 8.422,70 kvadratmeteriniit 6.723,80 kvadratmeterinut apparnissaannik, aammalu kvadratmeterit appaataat taakku ineqarnermut akiliutit qaffannerinut peqqutaasut pingaarnersarigaat pillugu paasissutissanik sukumiisunik imaqannginnami. Kiisalu najugaqarfimmi missingersuutini qupp. 2-mi allermi ineqarnermut akiliutip allanngorneranut attartortitsisoq kukkusumik tunngavilersuisimavoq.
Ataatsimiititaliami ilaasortat marluusut taakku oqaatigaat, siumoortumik nalunaarut eqqortumik pissaguni, ineqarnermut akiliutip 1. januar 2007-imi najugaqarfimmi ingerlatsinermut aningaasartuutissat qaffanneqartut kvadratmeterinut ikinnerusunut
agguarneqartariaqalernerat peqqutaasuni pingaarnersaasoq pillugu paasissutissanik imaqartariaqaraluartoq. Taamatuttaaq siumoortumik nalunaarut inissiat annertussusaasa 1. januar 2007-imi 8.422,70 kvadratmeteriniit 6.723,80 kvadratmeterinut
apparnerat pillugu paasissutissanik aalajangersimasunik imaqartariaqaraluarpoq.

Torersaarnissamut maleruagassanik unioqqutitsineq pillugu suliaq

Suliamik saqqummiussineq
9. november 2006-imi attartortoq torersaarnissamut maleruagassanik unioqqutitsineq pissutigalugu attartornermut isumaqatigiissummik atorunnaarsitsineq pillugu maalaarummik Ineqarneq pillugu Maalaaruteqartarfimmut tunniussaqarpoq.
Attartortup inissiaq 15. januar 2006-imi sulisunut inissiatut attartulerpaa. 2006-imi marsip aallartinneraniit 2006-imi oktobarip tungaanut sanilii arlallit attartortup taassumalu meeraasa nipiliortarnerat pillugu (torersaarnissamut maleruagassanik unioqqutitsineq) maalaaruteqartarsimapput.
Attartortitsisoq attartortoq pillugu maalaarutinik arlalinnik tigusaqarsimavoq, taakkunanngalu
maalaarutit marluk attartortumut nipiliortarnerit peqqissappata attartornermut isumaqatigiissutip atorunnaarsinneqarnissaanik allakkatigut mianersoqqussutinik marlunnik kinguneqartinneqarsimapput. 29. oktober 2006-imi maalaarummik
tigusinerup kingorna attartortitsisup 1. november 2006-imi attartornermut isumaqatigiissut atorunnaarsippaa.
Atorunnaarsitsinissaq sioqqullugu attartortup attartortitsisullu akornanni isumaqatigiissuteqarfiusumik ataatsimiinnissaq pillugu attaveqaqatigiittoqarpoq. Attartortoq siusissukkut maalaarummi ataatsimi allagaatinik takunnissinnaatitaanissaminik
qinnuteqarpoq, tamannalu attartortitsisumit akuerineqarpoq. Attartortup maalaarutaa ilanngussanik ilaqartinneqartoq attartortitsisumut 13. november 2006-imi oqaaseqarfigisassanngorlugu saqqummiunneqarpoq, taannalu allakkatigut
21. november 2006-imi akissuteqarpoq. Attartortitsisup akissuteqaammini atorunnaarsitsinermut tunngaviusoq nassuiaateqarfigaa, tassanilu attartortitsisup maalaarutit 15. marts 2006-imeersup aamma 12. juni 2006-imeersup assilineri, kiisalu maalaarutinut taakkununnga tunngatillugu attartortumut mianersoqqussutitut allakkiap assilineri nassiuppaa. Aammattaaq Securitas-ip 29. oktober 2006-imi nipiliortoqarneranut tunngatillugu nalunaarusiaata assilinera nassiunneqarpoq. Kingulliullugu taaneqartoq atorunnaarsitsinermut tunngavigineqarpoq. Attartortitsisup suliap ingerlaneranut nassuiaataa attartortumut 4. december 2006-imi oqaaseqarfigisassanngorlugu saqqummiunneqarpoq. Attartortoq allakkatigut 2. januar 2007-imi ullulerneqartutigut attartortup nassuiaataanut 21. november 2006-imeersumut arlalinnik oqaaseqaateqarpoq. Attartortup paasinninnera malillugu pisut attartortup paasinninneranit allaanerupput. Attartortup pisimasunut oqaaseqaatai, attartortup isummersuutaannut isummertoqarnissaa qinnutigineqarluni attartortitsisumut 2. januar 2007-imi saqqummiunneqarput. Tamatuma kingorna attartortoq attartortitsisorlu pisimasut pillugit assigiinngitsunik isumaqaraluartut suliaq naammattumik saqqummiunneqarsimasutut Ineqarneq pillugu Maalaaruteqartarfimmit isummerfigineqarpoq.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 5 naapertorlugu suliami aalajangiinissamut piginnaassuseqarluni Ineqarneq pillugu Maalaaruteqartarfik isummerpoq. Ineqarneq pillugu Maalaaruteqartarfik suliaq misissoreerlugu ilaasortat isumaqatigiillutik aalajangerput, attartortitsisup attartornermut isumaqatigiissummik atorunnaarsitsinera atuuttussaatinneqassanngitsoq.

Tunngavilersuut

Attartortitsinermut peqqussummi § 73, imm. 2, nr. 4 naapertorlugu torersaarnissamut maleruagassat unioqqutinneqarpata attartornermut isumaqatigiissut attartortitsisup atorunnaarsissinnaavaa. Attartortitsinermut peqqussummi § 73, imm. 3
naapertorlugu taamaallaat pissutsit attartortup pisuussutigisai annertuumik pingaaruteqarpata attartornermut isumaqatigiissut atorunnaarsinneqarsinnaavoq. 15. marts 2006-imi maalaarut, attartortumut attartortitsisuunngitsumullu tunniunneqartoq
nal. 21.30 – 23.00 akornanni sakkunik atuinermut tunngasuuvoq. Tamatuma saniatigut inissiami nipip akisunnerujussua maalaarummi oqaatigineqarpoq. Maalaarut kingusinnerusukkut attartortumit akerlilerneqarpoq, tassani oqaatigineqarluni assit
pingasut nivinngarneqarnerat taamaallat tassani pineqartoq. Maalaaruteqarneq 31. august 2006-imi attartortitsisumiit attartortumut akornutaasumik nipituumillu pissusilersortoqarnera pillugu allakkatigut mianersoqqussuteqarnermik kinguneqarpoq. Ullormi sumi akornutaasumik nipituumillu nipiliortoqarsimanersoq mianersoqqussummi allassimanngilaq. 12. juni 2006-imi maalaarut attartortumut tunniunneqartoq 10. juni 2006-imi unnuap qeqqata kingorna nal. 01.20-p tungaanut attartortup nipitungaatsiartumik nipilersorsimaneranik tunngaveqarpoq. Maalaarut Securitas-imit uppernarsarneqanngilaq,
tassanilu saniliusut marluinnaat atsiorsimapput. Maalaarut 14. juni 2006-imi attartortitsisumiit attartortumut allakkatigut mianersoqqussummik kinguneqartinneqarpoq, maalaarummilu 10. juni 2006-imi nal. 00.00 – 01.20-p akornanni nipituumik akornutaasumillu pissusilersortoqarnera tunngavigineqartoq erseqqissarneqarpoq. 29. oktober 2006-imi maalaarut attartortup unnuap qeqqata kingorna nipitoorsuarmik nipilersorsimaneranut tunngasuuvoq, tamannalu Securitas-ip nal. 04.14 nalunaarusiorsimasup uppernarsarpaa. Maalaarut attartornermut isumaqatigiissutip atorunnaarsinneqarneranik kinguneqarpoq.

Matumani maalaarutit pingasut pineqaraluartut Ineqarneq pillugu Maalaaruteqartarfik naliliivoq, maalaarutit imamikkut ataatsimullu naliliiffigineqarnerat tunngavigalugu attartortitsinermut peqqussummi § 73, imm. 3-mi annertuumik pisoqarnissaanut piumasaqaat naammassineqanngitsoq. Aammattaaq maalaarutit amerlassusaat kisiisa tunngavigissagaanni annertuumik pisoqarsimanissaanut piumasaqaatit naammassineqanngillat. Attartortup torersaarnissamut maleruagassanik unioqqutitsinerata annertuumik pingaaruteqannginnera pissutigalugu pissutsit taakkua pingasuusut mianersoqqusinernut
marlunnut aammalu attartornermut isumaqatigiissummik atorunnaarsitsinermut tunngaviusimasut, attartornermut isumaqatigiissutip atorunnaarsinneqarneranut tunngavilersuutigineqarsinnaanngillat. Aalajangiinermi attartornermut isumaqatigiissutip atorunnaarsinneqarnerata attartortumut annertuumik eqqunngitsuliortoqarsimanera tunngavigineqarpoq.

Inissiamit nuunnermi naatsorsuineq pillugu suliaq

Suliamik saqqummiussineq
Attartortoq allakkatigut 2. januar 2007-immeersutigut attartortitsisup 2005-imi novembarip qaammataanut ineqarnermut akiligassiissutaa pillugu Ineqarneq pillugu Maalaaruteqartarfimmut maalaarummik tunniussaqarpoq, attartortoq isumaqarluni
taanna pissusissamisuunngitsoq aammalu attartortup inissiamit nuunnerminut atatillugu qalipaanermut akiliutip annertussusaa eqqunngitsutut isumaqarfigaa. Siornatigut attartortuusimasup igaffimmi antennemut kabelip ikkussaata inaanik qalipaanermut
akiliisariaqartutut attartortoq isumaqanngilaq. Ineqarneq pillugu Maalaaruteqartarfiup 2005-imi novembarip qaammataanut ineqarnermut akiliut pillugu Ineqarnermut Attaveqarnermullu Pisortaqarfimmut suliarisassanngorlugu ingerlateqqippaa, Ineqarneq pillugu Maalaaruteqartarfik maalaarutip tassunga tunngasortaa suliarissallugu piginnaatitaanngimmat. Attartortup attartornini 13. maj 2005-imi aallartippaa, allakkatigullu 29. september 2005-imeersutigut attartornini taamaatillugu, allagaalu 5. oktober 2005-imi A/S Inissiaatileqatigiiffik INI-mit tiguneqarpoq.
Attartornerata aallartinnerani iserternermut atatillugu nalunaarusiortoqarpoq, taannalu 17. maj 2005-imi attartortumit attartortitsisumillu atsiorneqarpoq. Attartornerup aallartinnerani igaffimmi igaq nutaamik qalipanneqarsimanngitsoq ilaatigut
iserternermut atatillugu nalunaarusiami allassimavoq.
Attartukkamit nuunnermut atatillugu 31. oktober 2005-imi misissuisoqarpoq. Torsuusami, igaffimmi inimilu iikkat qilaallu qalipanneqassasut, misissuinermut nalunaarusiami ullormi tassani ullulerneqarsimasumi allassimavoq. Attartortup maalaarutaa 9. januar 2007-imi attartortitsisumut oqaaseqarfigisassanngorlugu saqqummiunneqarpoq. Attartortitsisoq 10. januar 2007-imi ullulerneqartunik allagaqarluni, ilaatigut iserternermut atatillugu nalunaarusiap assilineranik kiisalu qalipaanissamut neqerooruteqartitsinermi neqeroorutip assilineranik ilallugu maalaarummut oqaaseqaamminik saqqummiussaqarpoq. Qalipaanermut akiliutigitinneqartut 1.680 koruuniusut eqqortuusut, taamaattumillu aamma attartukkamit nuunnermut atatillugu naatsorsuutit eqqortuusut attartortitsisup aalajangiusimaannarpaa. Igaffimmi immikkut ittumik qalipagassamernit akilertariaqanngitsutut qalipaasup isumaqarfigisimagai attartortitsisup erseqqissaatigaa.
Attartortitsisup akissuteqaatitut allagai 10. januar 2007-imeersut 13. februar 2007-imi attartortumut oqaaseqarfigisassanngorlugit saqqummiunneqarput. Attartortitsisoq 21. februar 2007-imi allagaqarluni oqaaseqaatinut ilassutissanik saqqummiussivoq, tassungalu attartukkamit nuunnermut atatillugu akiligassanut iluarsiissutit
11. september 2006-imeersut assilineri ilaatinneqarput.
Attartortitsisup ilassutitut oqaaseqaatai 26. februar 2007-imi attartortumut oqaaseqarfigisassanngorlugit saqqummiunneqarput. Attartortoq 17. marts 2007-imi akissuteqarpoq, suliarli pillugu annertunerusumik paasissutissiissuteqarani.
Ineqarneq pillugu maalaaruteqartarfiup suliamik taassuminnga suliaqarnini 21. marts 2007-imi naammassivaa.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu attartortup attartukkaminit nuunneranut atatillugu nalinginnaasumik iluarsaassinermi qalipagassanut akiligassiissutigineqartut annertussusaannut aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq. Ineqarneq pillugu Maalaaruteqartarfiup suliaq misissorpaa, ilaasortallu isumaqatigiillutik aalajangiipput, attartortitsisup 280 koruunit naliliinikkut aalajangerneqartut, tassalu qalipaanermut akiligassiissutigineqartut tamarmiusut arfinilerarterutaat attartortumut utertissagai. Aningaasat aalajangiinerup matuma illuatungeriinnut nalunaarutigineqarnerisa kingorna kingusinnerpaamik ullut 14-it qaangiunnerini akilerneqassapput.

Tunngavilersuut

Iserternermut atatillugu nalunaarusiami 17. maj 2005-imeersumi allassimavoq, attartornerup aallartinnerani igaffimmi iigaq nutaamik qalipanneqarsimanngitsoq. Attartortitsinermut peqqussummi § 47, imm. 1-ip immikkoortua 2 naapertorlugu
attartornerup aallartinnerani iikkat, qilaat naqqillu nalinginnaasumik iluarsaanneqarsimasussaapput. Taamaattumik attartortitsinermut peqqussummi § 77 naapertorlugu ilaatigut iikkat qilaallu nutaamik qalipanneqarsimasussaapput.
Attartornerup aallartinnerani igaffimmi qilaaq nutaamik qalipanneqarsimanngitsoq iserternermut atatillugu nalunaarusiami erseqqissumik allassimanngilaq. Attartortitsinermut peqqussummi § 77, imm. 3 naapertorlugu iserternermi attartugaq
nalinginnaasumik iluarsaanneqarsimanngippat, attartortup attartukkani iserterfigineratut itsillugu utertittussaavaa. Tassalu attartornerup aallartinnerani igaffimmi iigaq nutaamik qalipanneqarsimanngimmat, attartortup attartukkaminit nuunnerminut
atatillugu nalinginnaasumik iluarsaassinerup tassunga tunngasortaa akilertussaanngilaa.

Attartornerup nalaani aserfallatsaaliuineq iluarsaassinerlu pillugit suliaq

Suliamik saqqummiussineq
Ineqarneq pillugu Maalaaruteqartarfiup 10. oktober 2006-imi attartortup maalaarutaa tiguaa. Attartortup maalaarutigaa, attartortup attartukkami iluani sumiiffinni arlalinni iluarsaattariallit pillugit attartortitsisumut saaffiginnittaraluarnini attartortitsisumiit qisuariarfigineqartarsimanngitsut. Tassani qaliaq ussiitsoq aammalu qilaani iikkanilu oquk pineqarput. Attartortoq allappoq, nuunnerminiit ukiup ataatsip qaangiunneranili attartortitsisoq ajoqutinik iluarsaasseqqullugu arlaleriarluni qinnuigisarsimagaluarini. Attartortoq isumaqarpoq, iluarsaassinissaq attartortitsisup akisussaaffigigaa, attartortoq isertermat inissiaq nutaamik iluarsaanneqarsimammat, kiisalu qaliap ussiinnera aammalu qilaat iikkallu oqoqarnerat peqqutaallutik ajoqutit
ingerlaavartumik takkussuutilersimammata. Attartortoq 1. december 2002-mi attartukkaminiilerpoq, maannalu suli tassani najugaqarluni. A/S Inissiaatileqatigiiffik INI-mit paasissutissiissutigineqartut malillugit attartortoq pisortat inissiaataanni attartortittakkami, 65 kvadratmeterinik annertussuseqartumi pingasunillu initalimmi najugaqarpoq. Attartugaq illup affarleriiusup affarlianiippoq.
Attartortup maalaarutaa 17. oktober 2006-imi attartortitsisumut oqaaseqarfigisassanngorlugu saqqummiunneqarpoq. Attartortitsisoq ataasiarluni eqqaasinneqareerluni 27. november 2006-imi akissuteqarpoq. Attartortitsisup ilisimatitsissutigaa, attartortitsisumiit attartortup saaffiginnissutai qisuariarfigineqarsimasut, aammalu attartortitsisoq 1. september 2006-imi
sanasumut iluarsaassassanik iluarsaassititsinissamik suliakkiisimasoq. Qalia ussissarneqarpoq, aammalu 1. september 2006-ip kingunitsianngua perusuersartarfimmi qipisartoq, imermut nillertumut kissartumullu akoorivik taarserneqarpoq.
Kingusinnerusukkut paasineqarpoq qaliap iluarsaanneqarnera iluameersumik suliarineqarsimanngitsoq, taamaattumillu attartortitsisup 26. oktober 2006-imi aammaloorluni qalia sanasumut suliakkiissutigaa. Sanasup illup qaata qalissiartaa
annertuumik iluarsaappaa. Attartortitsisup 27. oktober 2006-imi perusuersartarfiup qalipanneqarnissaa qalipaasumut suliakkiissutigaa, suliassarlu taanna tamatuma kingunitsianngua suliarineqarpoq. Attartortitsisup akissuteqaataa 27. november 2006-imeersoq attartortumut oqaaseqarfigisassanngorlugu saqqummiunneqarpoq. Attartortoq 15. december 2006-imi allakkatigut oqaaseqaasiaminik tunniussaqarpoq. Attartortitsisup akissutitut allakkiaa aallaqqaammut tamakkiisumik attartortup paasisimannginnamiuk oqaaseqaatiminut ilassutitut 23. januar 2007-imi allakkatigut
attartortoq oqaaseqaateqaqqippoq. sivisoorsuaq ingerlareersoq attartortitsisoq qisuariaateqarsimasoq. Kisiannili illup
qaliata qalissiartaata annertuumik iluarsaanneqarsimanera, kiisalu perusuersartarfiup iigaasa qalipanneqarsimanerat pillugu attartortup attartortitsisoq isumaqatigaa. Attartortoq allappoq 22. januar 2007-imi qalianiit perusuersartarfimmut imeq kusilereersimasoq, aammalu perusuersartarfimmi iikkat 2006-imi oktobarimi qalipanneqareersimagaluarlutik
qalipaataat makialatitilereersimasut. Attartukkap qaliata sannaata qanoq issusia aammalu qilaani iikkanilu oquup annertussusia
nalilersinniarlugu suliamut attuumassuteqanngitsoq immikkut suliamut ilisimasalik attartukkamik misissuinissaanik qinnuigineqassasoq Ineqarneq pillugu Maalaaruteqartarfiup siulittaasua tamatuma kingorna aalajangerpoq. Suliamut attuumassuteqanngitsup immikkut suliamut ilisimasallip attartugaq 10. maj 2007-imi misissorpaa. Tamatuma kingorna attartukkap qanoq issusianut nalunaarusiaq Ineqarneq pillugu Maalaaruteqartarfiup tiguaa. Nalunaarusiaq taanna malillugu suliamut attuumassuteqanngitsoq immikkut suliamut ilisimasalik isumaqarpoq, illup qaliani igalaaq kaajallallugu qalissiap ikkunneqarnerani kukkusoqarsimanera pissutaalluni illup qaliani ussiittoqartoq. Qalissiap ilaa equngavoq. Siusinnerusukkut isugutsertoqartarnera peqqutigalugu qaliata qisuttaasa aasimanerat tamatumunnga peqqutaasimassasoq ilimagineqarpoq. Qalianut majuartarfeqarfiup sannaa isugutannersaqarpoq qaliata sannaani ussiittoqarneranik peqquteqarsorineqartumik. Uffartarfimmi iikkap ataatungaata teqeqqua aasimavoq qaavalu qitulluni. Perusuersartarfeqarfiup qalipaataa makialatiterpoq, aammalu qilaami igalaap eqqaani qalliutaa katagarluni. Qaliata igalaartaa kaajallallugu sannarlutaammat oqaatigineqareersutut tamatumunnga peqqutaavoq.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussummi) § 84, imm. 1 nr. 2 naapertorlugu suliami aalajangiissalluni piginnaatitaalluni Ineqarneq pillugu Maalaaruteqartarfik isumaqarpoq.
Ineqarneq pillugu Maalaaruteqartarfimmi suliaq misissorneqarpoq, isumaqatigiissumillu aalajangiilluni qaliap sannaata naammaginartumik aserfallatsaaliorneqarnissaa attartortitsisup isumagissallugu pisussaaffigigaa. Kiisalu attartortitsisoq pisussaavoq attartukkap illutarpiaani iikkat qilaallu oqunnginnissaat anguniarlugu naammaginartumik aserfallatsaalissallugu.
Aalajangiinerup matuma illuatungeriinnut nalunaarutigineqareernerani attartortitsisup pisariaqanngitsumik kinguarsaanertaqanngitsumik ornigulluni attartortorlu peqatigalugu attartugaq misissussavaa.
Attartortitsisup attartugaq ornillugu misissuiffiginerani attartugaq najugaqarfittut naleqqunnersoq naliliiffigissavaa.
Attartortitsisup attartugaq najugaqarfittut naleqquttutut naliliiffigippagu, attartortitsisup ornigulluni misissuinermini, qaliap sannaanik kiisalu iikkanik qilaanillu attartortitsisup aserfallatsaaliuisussaanera naammassiniarlugu suliassat suut attartortitsisumit aallartinneqassanersut attartortitsisup naliliiffigissavai. Attartortitsisup ornigulluni misissuinermi kingorna kingusinnerpaamik ullut 14-it qaangiunnerini aserfallatsaaliuisussaatitaaneq naammassiniarlugu suliassat aallartissavai.
Attartortitsisup attartugaq najugaqarfissatut naleqqutinngitsoq naliliiffigiguniuk, attartortitsisup attartortitsineq unitsissinnaavaa. Tamanna pissappat piffissamilu attartorunnaarsitsiviusumi attartortup attartukkaminut  taamaatitinneqartumut isumaqatigiissut malissimappagu, attartortoq inissiamut allamut innersuunneqassaaq.
Attartortoq inissiamut allamut innersuunneqassappat, attartortitsisoq attartortup nuunneranut aningaasartuutinut matussutissanik 4.200 koruuninik attartortumut taarsiissuteqassaaq.

Tunngavilersuut

Attartortitsinermut peqqussummi § 45, imm. 1 naapertorlugu attartortitsisoq pisussaavoq, illup aamma attartukkap isumannaatsumik aserfallatsaaliorneqarnissaat isumagissallugu. Illup qaliata sannaa illumut ilaavoq, taannalu attartortitsisup aserfallatsaalissallugu pisussaaffigaa. Aamma aalajangersagaq taanna naapertorlugu attartortitsisoq pisussaavoq, iikkat qilaallu oqunnginnissaat isumagissallugu. Ineqarneq pillugu Maalaaruteqartarfiup aalajangiinermini suliamut attuumassuteqanngitsup immikkut suliamut ilisimasallip attartukkamik naliliinera tunngavigaa.
Taanna malillugu paasineqarpoq attartugaq piffissami matumani aserfallatsaalineqannginnini pissutigalugu ajoquteqartoq, qalia ussiikkami, kiisalu iikkat qilaallu oqussimagamik, aammalu attartortitsisup maannamut suliaritissimasai ajoqusernerit iluarsinissaannut naammassimanngitsut.
Attartortitsisoq attartukkamut ornigulluni misissuinermini attartugaq najugassatut naleqquttoq naliliippat, tamatuma kingorna kingusinnerpaamik ullut 14-it qaangiunnerini qaliata sannaa ussissunngorniarlugu suliniutinik attartortitsisoq aallartitsissaaq.
Aamma oquk peerniarlugu suliniutinik attartortitsisoq aallartitsissaaq. Kiisalu oqummik pinngortoqaqqinnginnissaa anguniarlugu attartortitsisoq suliniuteqassaaq. Attartortitsinermut peqqussummi attartortitsisup aserfallatsaaliuisussaatitaaneranut
maleruagassat, attartortitsisup qanoq pilertortigisumik aserfallatsaaliorneqanngitsut isumaginissaannut piffissarititassanik aalajangersaasoqarsimanngilaq, taamaattumillu Ineqarneq pillugu Maalaaruteqartarfiup attartortitsisup aserfallatsaaliuisussaatitaanera pillugu maleruagassat isumasiornerini paasivaa, attartortitsisoq pisariaqanngitsumik kinguarsaanertaqanngitsumik aserfallatsaaliunngitsuukkanik, attartortitsisup akisussaaffigisaanik iluarsaassisussaasoq.
Attartortitsisup ornigulluni misissuinermini attartugaq najugaqarfissatut naleqqutinngitsoq naliliiffigippagu, aammalu inissiap iluarsaanneqarnerani isaterneqarneraniluunniit attartugaq qimanneqartariaqarpat, attartortitsisup attartorneq unitsissinnaavaa,
tak. attartortitsinermut peqqussummi § 67, imm. 1, nr. 2. Aalajangersagaq taanna malillugu attartukkap qimanneqartariaqarneranik kinguneqartumik illup iluarsaanneqarnissaa pisariaqartoq attartortitsisup attartorunnaarsitsinerani uppernarsaaserneqassaaq. Attartortitsisup attartorunnaarsitsinerani attartortup attartukkamut attartorunnaarsinneqartumut
isumaqatigiissut malissimappagu, attartortitsisup attartortoq inissiamut allamut innersuutissavaa, tak. attartortitsinermut peqqussummi § 68, imm. 1. Attartortup inissiamut allamut nuunnerminut atatillugu aningaasartuutaanut matusissutissatut
attartortitsisoq attartortumut taarsiissuteqassaaq. Attartortitsisarnermut pequssummi § 68, imm. 4-mi maleruagassat naapertorlugit taarsiissutissat 4.200 koruuninut aalajangerneqarput, attartugaq najugaqarfissanik pingasunik initaqarmat.
Kiisalu attartortitsinermut peqqussummi § 68, imm. 2-mi maleruagassat naapertorlugit attartukkap iluarsaanneqarluni naammassineqarnerani attartortoq uternissamut pisinnaatitaaffeqarpoq.

Attartukkamit nuunnermut atatillugu naatsorsukkat pillugit suliaq

Suliamik saqqummiussineq
Attartortoq 6. november 2006-imi maalaarummik Ineqarneq pillugu Maalaaruteqartarfimmut nassiussaqarpoq. Attartortup 4. december 2006-imi maalaaruteqarnermut akitsuut 150 koruuniusoq akilersimavaa, kiisalu maalaarut nassiuteqqissimallugu,
taannalu Ineqarneq pillugu Maalaaruteqartarfiup 12. december 2006-imi tiguaa. Attartortup attartukkaminit nuunnerminut atatillugu nalinginnaasumik iluarsaassinermut aningaasartuutit amerlassusilerneqarnerat maalaarutigaa. Attartortup attartornini 1. august 2005-imi aallartippaa, attartukkanilu 1. juli 2006- imi qimallugu. Attartortup iserternissaa sioqqullugu attartortitsisup attartugaq 20. juli 2005-imi misissorpaa. Attartortoq misissuinermut peqataanngilaq. Attartortitsisoq misissuinermut tunngatillugu iserternermut atatillugu nalunaarusiorpoq, taannalu attartortitsisup kisimi atsiorsimavaa.
Iserternermut atatillugu attartugaq iserterfigineqarnermini nalinginnaasumik iluarsaanneqarsimanersoq paasissutissiissutigineqanngilaq, tassanili taamaallat uffarfimmi isugutammik ajoqusertoqarsimasoq paasissutissiissutigineqarluni. Attartortup amigaatit allassimaffiat 6. august 2005-imi atsiorsimavaa, taannalu attartortitsisumut tunniunneqarpoq. Amigaatit ilaatigut matunut, listinut, WC-mut uffarfiullu igaffimmilu iikkat qalliutaannut aserorsimasunut tunngasuupput. Uffarfiup qilaavani isugutaap aserugaasa saniatigut, nalinginnaasumik iluarsaassinerup amigaateqarneranik amigaatit allattorsimaffianni allassimasoqanngilaq.
Attartukkamit nuunnermut atatillugu 3. juli 2006-imi misissuisoqarpoq. Tamatumunnga peqatigitillugu attartukkamit nuunnermut atatillugu nalunaarusiortoqarpoq, taannalu attartortumit attartortitsisumillu atsiorneqarsimavoq. Nalinginnaasumik iluarsaassinermut atatillugu torsuusami ininilu marlunni qalipaasoqassasoq allassimavoq.
Attartukkamilli nuunnermut atatillugu nalunaarusiami allassimavoq, inip aappaa 72 kvadratmeterinik annertussuseqartoq.
Attartukkamit nuunnermut atatillugu naatsorsukkani, 5. oktober 2006-imi attartortumut nassiunneqartuni allassimavoq, nalinginnaasumik iluarsaassinermut aningaasartuutit 17.110 koruuninik amerlassuseqartut, taakkunanngalu attartortup 89
procentit akiligassarigai, attartortoq attartukkamini qaammatini aqqanilinni najugaqarsimagami. Taakku saniatigut attartortoq misissuinermut nalunaarut naapertorlugu sumiginnaanermut 510 koruuninik akiligassinneqartoq allassimavoq. Qalipaasumut isumaqatigiissut 4. juni 2006-imeersoq, aningaasartaliussani attartortumut akileeqqusinermut tunngavigineqartuni allassimavoq, aningaasanit tamarmiusunit 17.110 koruuniusunit 12.310 koruunit iikkanik qilaanillu qalipaanermut,
3.240 koruunit naternik lakkerinermut aamma 1.560 koruunit masattuleriffiup suliarineqarneranut tunngasuusut.
Attartortup maalaarutaa 13. december 2006-imi attartortitsisumut sapaatit akunnerisa pingasut iluanni oqaaseqarfigisassanngorlugu saqqummiunneqarpoq. Attartortitsisoq allakkat 7. januar 2007-imeersut aqqutigalugit akinissamut piffissarititaasup sivitsorneqarnissaanik qinnuteqarpoq. Ineqarneq pillugu Maalaaruteqartarfiup allakkatigut
8. januar 2007-imeersutigut piffissarititaasoq 22. januar 2007-imut sivitsorpaa. 15. januar 2007-imi attartortitsisoq akissuteqarpoq, attartukkamiillu nuunnermut atatillugu suliap ingerlanera nassuiaatigalugu, taamatuttaarlu
amigaatit allattorsimaffiannik attartortumit tigusaqartoqarsimanngitsoq, aammalu attartortup attartorneranut
atatillugu allagaatini iserternermut nalunaarummik soqanngitsoq attartortitsisup ilisimatitsissutigaa.
17. januar 2007-imi allakkatigut attartortitsisup allagaa attartortumut oqaaseqarfigisassanngorlugu saqqummiunneqarpoq. 13. februar 2007-imi Ineqarneq pillugu Maalaaruteqartarfiup attartortoq akissuteqaqqullugu nukingisaarpaa. Attartortoq
ullormi tassani kingusinnerusukkut akissuteqarpoq. Tassani attartortup ilaatigut iserternerminut atatillugu amigaatit allattorsimaffiannik quppernernik marlunnik attartortitsisumut nassiussisimanini erseqqissaatigaa. 19. februar 2007-imi allakkatigut attartortup akissutaa attartortitsismut oqaaseqarfigisassanngorlugu saqqummiunneqarpoq.
Attartortitsisoq 28. februar 2007-imi akissuteqarpoq, tassanili suliaq pillugu sukumiinerusumik saqqummiussaqanngilaq. 6. marts 2007-imi Ineqarneq pillugu Maalaaruteqartarfiup attartortitsisoq aammaloorluni iserternermut atatillugu nalunaarut
nassiuteqqullugu qinnuigaa. 20. marts 2007-imi iserternermut atatillugu nalunaarusiaq ilaliussallu allat, attartortup attartorneranut tunngasut Ineqarneq pillugu Maalaaruteqartarfimmut nassiunneqarput, taakkununngalu attartukkami nalinginnaasumik iluarsaassinermut atatillugu qalipaasumut isumaqatigiissut ilaatinneqarpoq.Ineqarneq pillugu Maalaaruteqartarfiup 19. april 2007-imi ataatsimiinnermini suliaq suliaraa. Ataatsimiititaliap ataatsimiinneranni ilaasortaq ataaseq suliamut attuumassuteqarpallaartutut nalunaarutigineqarpoq, taamaattumillu suliaq aalajangiiffigineqanngilaq.
Suliap suliarineqarnissaa ataatsimiititaliap ataatsimiinnissaannut tullermut kinguartinneqarpoq, tassunga ataatsimiititaliami ilaasortap suliamutattuumassuteqarpallaartup sinniisissaa aggersarneqassammat.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu suliami aalajangiinissamut piginnaassuseqarluni Ineqarneq pillugu Maalaaruteqartarfik isummerpoq. Ineqarneq pillugu Maalaaruteqartarfiup suliaq misissorpaa, tassanilu ilaasortat isumaqatigiillutik aalajangiipput, 4.423,30 koruunit, attartortitsisup attartukkamik nalinginnaasumik iluarsaassinermut atatillugu eqqunngitsumik akilertissimasani attartortumut utertissagai.

Tunngavilersuut

Attartukkamit nuunnermut atatillugu nalunaarusiaq 3. juli 2007-imeersoq, attartortumit attartortitsisumillu atsiorneqarsimasoq attartortitsisup nalinginnaasumik iluarsaassinermi attartortitsisumut akilertissinnaasaasa amerlassusissaannut tunngaviliivoq. Attartukkamit nuunnermut atatillugu nalunaarusiami attartukkamik isumiginnaasoqarsimanersoq allassimanngilaq. Aamma naqqit lakkertussaanersut imaluunniit masattuleriffik suliarineqartussaanersoq allassimanngilaq. Attartortoq qalipaanermut aamma nalunaaquttap akunnerini marlunni tiimimut 170 koruuninik akeqartumik eqqiaanermut akiliisussaasoq, attartukkamit nuunnermut atatillugu nalunaarusiami taamaallaat allassimavoq. Ineqarneq pillugu Maalaaruteqartarfiup aalajangiinermini, attartukkamit nuunnermut atatillugu nalunaarusiami qalipaanermi taaneqartumi attartugaq tamakkerlugu qalipagassat tamarmik pineqarsimanissaat tunngavigaa.
Attartukkamit nuunnermut atatillugu nalunaarusiami nalinginnaasumik iluarsagassatut taaneqartut kisiisa, suliassat nalinginnaasumik iluarsagassatut taaneqartunut atasuuppata, tassalu suliassat qilaanik qaqorsaaneruppata, iikkanik qalipaaneruppata, eqqiaaneruppata attartortitsinermullu peqqussummi § 77, imm. 1 naapertorlugu naqqit nutaamik lakkikkatut isikkoqanngippata nutaamik lakkiineruppata, attartortitsisup attartortumut akilersissinnaavai.
Attartukkamit nuunnermut atatillugu naatsorsukkani 5. oktober 2006-imeersuni attartukkami sumiginnaanerit, naternik lakkerinerit kiisalu masattuleriffimmi suliat katillugit 5.310 koruuninik nalilerneqarsimapput, suliassallu taakku attartukkamit
nuunnermut atatillugu nalunaarusiami taaneqannginnamik attartortumit akilerneqartussaanngillat. Attartortoq attartukkamini qaammatini aqqanilinni najugaqarsimagami 5.310 koruunit 89%-iinnaat, tassalu 4.725,90 koruunit attartortumut utertinneqassapput, tak. attartortitsinermut peqqussummi §§ 77, imm. 1 aamma 78. Attartukkamit nuunnermut nalunaarusiaq malillugu taakku saniatigut eqqiaanermut 340 koruunit attartortumit akilerneqartussaapput. Attartortoq qaammatini aqqanilinni
attartukkamini najugaqarsimagami, eqqiaanermut aningaasartuutit 89%-iinnaat, tassalu 302,60 koruunit akilertussaavai, tak. attartortitsinermut peqqussummi §§ 77, imm. 1 aamma 78. Tassalu attartortitsisup 4.725,90 koruunit – 302,60 koruunit, katillugit 4.423,30 koruunit attartortumut utertissavai.

Attartukkami ikkussukkat pissutaallutik torersaarnissamut maleruagassanik unioqqutitsineq pillugu suliaq
Suliamik saqqummiussineq
Ineqarneq pillugu Maalaaruteqartarfiup attartortup maalaarutaa 19. december 2006- imi tiguaa. Attartortup unioqqutitsilluni errorsivimmik ikkussinera, kiisalu attartortup ikkussukkap inatsisit malillugit aaqqinnissaanut piffissakitsuararsuutinneqarluni
peqquneqarnini maalaarutigai. Tamatuma saniatigut attartortup attartortitsisumit pineqarnini maalaarutigaa.
Attartortup attartornera 2005-imi oktobarimi aallartippoq, attartortitsisullu unioqqutitsilluni errorsivimmik ikkussisoqarsimanera pissutigalugu attartorneq 18. juli 2006-imi atorunnaarsippaa.
Attartortitsisup attartorunnaarsitsinerminik nalunaarutimini 18. juli 2006-imeersumi inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi (attartortitsinermut peqqussummi) §§ 50 aamma 73, torersaarnissamut maleruagassanik unioqqutitsineq pissutigalugu attartorunnaarsitsisarnermut tunngasut innersuussutigai.
Attartorunnaarsitsinissaq sioqqullugu attartortoq peqqussutitut allakkanik 14. juli 2006-imi ullulerneqartunik tigusaqarpoq. Peqqussummi errorsiviup unioqqutitsilluni ikkunneqarsimanera, aammalu inip atiliata qilaavanik, illullu saqqaanik ajoqusiisimanera tunngavigineqarput.
19. december 2006-imi attartortup maalaarutaa attartortitsisumut oqaaseqarfigisassanngorlugu saqqummiunneqarpoq, aammalu 19. januar 2007-imi akissuteqartoqarnissaanik nukingisaarisoqarpoq. Attartortitsisoq 6. februar 2007-imi suliami
akissuteqarpoq. Attartorunnaarsitsineq attartortup errorsivimmik ikkussinnginnermini akuersissummik pisariaqartinneqartumik piniarsimannginneranik tunngaveqartoq attartortitsisumit oqaatigineqarpoq. Kiisalu attartortitsisup oqaatigaa attartortup errorsivia inissiap atiliata pisataanik ajoqusiisimasoq. Attartortup errorsivik misissoramiuk errorsiviup naqqa putoqartoq, tassuunalu imermik ajoqusiinermut pissutaasumik kuuttoqartoq paasisimavaa. Attartortitsisup allakkatigut peqqussutaanik 14. juli 2006-imeersumik naammassinninnginneq torersaarnissamut maleruagassanik unioqqutitsinertut isumaqarfigaa, tamannalu attartorunnaarsitsinermik kinguneqartinneqarpoq. 28. februar 2007-imi attartortitsisup oqaaseqaataa attartortumut oqaaseqarfigisassanngorlugu nassiunneqarpoq. 28. marts 2007-imi attartortoq akissuteqaqqullugu nukingisaarneqarpoq.
Attartortoq 10. april 2007-imi akissuteqarpoq, tassanilu ilaatigut erseqqissaatigaa init quleriit akornanni ussiitsoqarnera ukiuni arlalinni ajornartorsiutaasimasoq, gaani inatsisit malinneqarnersut pillugu suliami aalajangiinissamut piginnaatitaaffeqarluni
Ineqarneq pillugu Maalaaruteqartarfik isummerpoq.Ineqarneq pillugu Maalaaruteqartarfik ataatsimiititaliamilu ilaasortat marluk isumaqarput, attartortitsisup attartornermut isumaqatigiissummik atorunnaarsitsinera atortussaatinneqassanngitsoq.
Ataatsimiititaliami ilaasortaq ataaseq isumaqarpoq, attartortitsisup attartornermut isumaqatigiissummik atorunnaarsitsinera atortussaatinneqassasoq. Aalajangiineq nalinginnaasumik amerlanerussuteqartoqarneratigut pivoq.

Tunngavilersuut

Attartortoq allakkatigut akuersissummik attartortitsisumut piniareerluni nammineq akilikkaminik attartukkamini nalinginnaasunik ikkussuititsisinnaavoq, tamatumani attartortitsisup illumi innaallagissap kuuffiillu pisinnaasai ikkussuinissamut naammanngitsut uppernarsarsinnaanngippagu, tak. attartortitsinermut peqqussummi § 51, imm. 1. Errorsivinnik ikkussisarneq aalajangersakkamut tassunga ilaavoq. Ineqarneq pillugu maalaaruteqartarfimmi ilaasortat isumaqatigiissut oqaatigaat,
attartortitsisarnermut peqqussummi § 73, imm. 2, nr. 4 naapertorlugu torersaarnissamut maleruagassat unioqqutinneqarpata attartortitsisup attartornermut isumaqatigiissut atorunnaarsissinnaagaa. Attartortitsisarnermut peqqussummi § 50, imm. 1
naapertorlugu attartortup torersaarnissamut maleruagassat ilanngussaq 4-mi taaneqartut malittussaavai. Torersaarnissamut maleruagassat naapertorlugit attartortup inissiaq najukkani sumiginnarpagu attartortitsisup attartortitsinermut isumaqatigiissut atorunnaarsissinnaavaa. Unioqqutitsilluni errorsivimmik ikkussineq inissiamik sumiginnaanertut isigineqarpoq.
Kisiannili attartortitsinermut peqqussummi § 73, imm. 3 naapertorlugu pineqartoq attartortumut iluarseqquneqartoq annertuumik pingaaruteqartussaavoq, unioqqutitsillunilu errorsivimmik ikkussineq taamatut isigineqarpoq. Attartorunnaarsitsinissaq sioqqullugu attartortoq pineqartumik iluarseeqqullugu allakkatigut peqquneqartussaavoq, tak. attartortitsinermut peqqussummi § 73, imm.5. Ineqarneq pillugu Maalaaruteqartarfiup siulittaasua ataatsimiititaliamilu ilaasortat marluk isumaqarput, attartortitsinermut isumaqatigiissutip atorunnaarsinneqarnissaanut matumani tunngavissaqartoqaraluartoq attartortup iluarseeqqullugu peqquneqarneranut piffissaliussaq sivikippallaartoq. Tassani 14. juli 2006 tallimanngornerummat pingaartinneqarpoq, aammalu peqqussissutip aatsaat attartortumut ataasinngornermi 17. juli 2006-imi apuussimanera tunngavigineqarluni. Taamaattumik peqqusissummi piffissarititaasoq taamaallaat ulloq ataaseq inorlugu sivisussuseqarsimavoq. Attartortitsisup juulip ulluisa 18-anni ullaakkut attartortitsinermut isumaqatigiissut atorunnaarsissimavaa. Peqqusissuteqartarnermut siunertaasoq eqqarsaatigalugu attartortup pineqartumik iluarsiinissamut naammaginartumik piffissaqartinneqartarnissaa naatsorsuutigineqarpoq. Errorsivimmik unioqqutitsilluni ikkutamik iluarsiinissamut ikkussuisartutut akuerisaasup suliakkerneqarnissaa, kiisalu erngup katersuuffianik pisinissaq pisariaqartinneqarmata, attartortup pineqartoq iluarsissallugu naammaginartumik periarfissaqartinneqarsimanngilaq,
taamaattumillu peqqusinermi piffissarititaasoq naammaginartumik sivisussuseqarsimanani.
Taakku saniatigut Ineqarneq pillugu Maalaaruteqartarfiup siulittaasuata ataatsimiititaliamilu ilaasortat marluk oqaatigissavaat, 2006-imi juulip qaammataani oqaasiinnaat atorlugit 12. januar 2006-imi peqqusineq tunngavigalugu attartortitsinermut
isumaqatigiissummik atorunnaarsitsinissamut periarfissaq iliuuseqartoqarsimannginnera pissutigalugu annaaneqarsimasoq.
Ataatsimiititaliami ilaasortaq ataaseq isumaqarpoq, peqqussut attartortumut tallimanngornermi 14. juli 2006-imi imaluunniit ataasinngornermi 17. juli 2006-imi attartortumut anngussimagaluarpalluunniit, attartortitsisup peqqusinermini piffissaritissimasaa naammattoq. Ataatsimiititaliami ilaasortap tassani errorsivik naqqamigut putoqarluni ajoqutilik pineqarmat, kiisalu erngup katersuuffianik ikkussisoqarsimanngimmat tunngavilersuutigaa. Ajoqutip annertunera aammalu imermik katersuivimmik soqannginnera pissutaallutik peqqusinermi piffissarititaasoq sivikippallaanngilaq.

Suliamik saqqummiussineq
7. marts 2007-imi attartortup attartukkaminit nuunnerminut atatillugu nalinginnaasumik iluarsaassinermut aningaasartuutinut naatsorsukkat annertussusaat pillugit maalaarutaa Ineqarneq pillugu Maalaaruteqartarfiup tiguaa. Attartortup misissuinermi
nalunaarusiap, attartortup attartukkaminit nuunneranut atatillugu suliarineqarsimasup assilinera maalaarummut ilannguppaa.
Attartortup attartornini 1. januar 2005-imi aallartippaa, aammalu 30. maj 2006-imi attartukkani qimanniarlugu taamaatitsilluni nalunaaruteqarluni. Attartugaq sulisunut inissiaavoq. Attartugaq qanoq angitiginersoq suliami takuneqarsinnaanngilaq.
Attartortup inissiamut iserterneranut atatillugu nalunaarusiortoqarsimanersoq pillugu paasissutissat pigineqanngillat. Attartortup 30. maj 2006-imi attartukkaminit nuunnerata kingorna 1. juni 2006-imi misissuinermut nalunaarusiortoqarpoq, tassanilu attartukkami suut suliassaanersut allassimapput. Misissuinermut nalunaarusiaq taamaallaat attartortitsisumit atsiorneqarsimavoq. 21. marts 2007-imi attartortup maalaarutaa attartortitsisumut oqaaseqarfigisassanngorlugu
saqqummiunneqarpoq, aammalu 12. april 2007-imi akissuteqarnissamut nukingisaarisoqarluni. Ineqarneq pillugu Maalaaruteqartarfiup allakkamini siullerni attartortitsisumut erseqqissaatigalugu attartortup attartorneranut atatillugu
allagaatinit uppernarsaatinik attuumassuteqartunik nasseqqulluni qinnuteqaatigaa, tassungalu iserternermut atatillugu nalunaarusiap assilineranik immikkut ittumik qinnuteqarneq ilaavoq. Attartortitsisoq 20. april 2007-imi suliamut tunngatillugu
akissuteqarpoq, tassanilu nalinginnaasumik iluarsaassinermut attartortumut akiligassanngortinneqartut
eqqortumik annertussusilerneqarsimasut erseqqissaatigalugu. Attartortitsisup iserternermut atatillugu nalunaarusiap assilinera nassiutinngilaa. Ineqarneq pillugu Maalaaruteqartarfiup suliamik suliaqarnini 25. maj 2007-imi naammassivaa.
Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu suliami aalajangiinissamut piginnaassuseqarluni Ineqarneq pillugu Maalaaruteqartarfik isummerpoq.

Ineqarneq pillugu Maalaaruteqartarfiup siulittaasua ataatsimiititaliamilu ilaasortaq ataaseq isumaqarput, attartortitsisup nalinginnaasumik iluarsaassinermut akiliinissaq piumasarisinnaanngikkaa, taamaattumillu aalajangiinerup matuma illuatungeriinnut nalunaarutigineqarneraniit kingusinnerpaamik ullut 14-it qaangiunnerini qularnaveeqqusiissut
tamakkerluni utertinneqassasoq. Aamma qularnaveeqqusiissutaasoq sinnerlugu attartortoq akiliisinneqarsimappat, taakku aamma utertinneqassapput. Ataatsimiititaliami ilaasortat marluk isumaqarput, maanna tunngavissatut pigineqartut
tunngavigalugit aalajangiisoqarsinnaanngitsoq. Aalajangiineq nalinginnaasumik amerlanerussuteqartoqarneratigut pivoq. Taasinerit naligiinnerini siulittaasup taasinera aalajangiisuusarpoq.

Tunngavilersuut

Inissianik attartortitsisarneq pillugu Inatsisartut peqqussutaanni nr. 5-imi, 31. maj 2001-imeersumi, kingusinnerusukkut allannguuteqartinneqartumi, attartortup iserternerata nalaani atuuttumi § 28, imm. 2 naapertorlugu attartortup iserterneranut
atatillugu nalunaarusiornissaq attartortitsisup pisussaaffigaa, aamma inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 79, imm. 2 naapertorlugu attartortup attartukkaminit nuunneranut atatillugu misissuinermut nalunaarusiornissaq attartortitsisup pisussaaffigaa. Misissuinermut nalunaarusiaq misissuinermut atatillugu attartortumit attartortitsisumillu
atsiorneqartussaavoq. Iserternermut atatillugu nalunaarusiunngitsoorneq aamma attartukkamit nuunnermut atatillugu nalunaarusiunngitsoorneq pineqaatissiissuteqarnissamik tunngavissiorneqanngillat, kisiannili pisut malillugit uppernarsaatissanut tunngatillugu soorlu inissiamit nuunnermut tunngatillugu attartortitsisumut ajoqusiisinnaalluni.
Ineqarneq pillugu Maalaaruteqartarfiup siulittaasuata aamma ataatsimiititaliami ilaasortap ataatsip oqaatigaat, suliami attartortup iserterneranut atatillugu nalunaarusiortoqarsimaneranut uppernarsaatinik saqqummiussisoqarsimanngitsoq. Aammalu misissuinermut nalunaarusiaq taamaallaat attartortitsisumit atsiorneqarsimasoq takuneqarsinnaavoq.
Attartortitsinermut peqqussummi § 77, imm. 3 naapertorlugu attartortup inissiaq attartukkani tiguneratut itsillugu utertittussaavaa. Ineqarneq pillugu Maalaaruteqartarfiup siulittaasuata ataatsimiititaliamilu ilaasortap ataatsip attartortup minnerpaamik attartukkani tiguneratut itsillugu utertissimassagaa tunngavigaat.

Attartortitsisoq iserternermut atatillugu nalunaarusiunngitsoorsimammat, imaluunniit allatut iliorluni inissiaq iserterfigineqarnermini nalinginnaasumik iluarsaanneqarsimasoq uppernarsarsinnaanngimmagu, Ineqarneq pillugu Maalaaruteqartarfiup siulittaasua ataatsimiititaliamilu ilaasortaq ataaseq isumaqarpoq, attartortup nalinginnaasumik
iluarsaassinermut akiliisinneqarnissaanut tunngavissaqanngitsoq. Tamatumunnga atatillugu neqeroorutit allattorsimaffiannik, attartukkami iikkat qilaallu katillugit 11.500 koruunit nalinginik qalipanneqarnissaannik imaqartumik attartortitsisup
nassiussinera isumaqanngilaq. Taamatuttaaq attartukkamit nuunnermut atatillugu naatsorsukkanik, attartortup qaammatini 17-ini attartukkami najugaqarsimanera pissutigalugu nalinginnaasumik iluarsaassinerup katillugit 9.545 koruuninik
akeqarnissaanik imaqartumik attartortitsisup nassiussinera isumaqanngilaq. Ataatsimiititaliami ilaasortat marluk isumaqarput, suliami aalajangiisoqassappat paasissutissanik sukumiinerusunik pissarsiniartoqaqqaartariaqartoq, ilaatigut attartortoq
attartukkamit nuunneranut atatillugu misissuinissamut aggersarneqarsimanersoq paasiniarneqassalluni.

Attartukkamit nuunnermut atatillugu naatsorsukkat pillugit suliaq
Suliamik saqqummiussineq
Attartortoq allakkatigut 25. januar 2007-imeersutigut attartortup attartukkaminit nuunneranut atatillugu nalinginnaasumik iluarsaassinermut aningaasartuutit amerlassusaat pillugit Ineqarneq pillugu Maalaaruteqartarfimmut maalaarummik saqqummiussivoq. Attartortup 27. februar 2007-imi maalaarutip suliarineqarnissaanut 150 koruunit akilersimavai.
Attartortup attartornini 15. august 2004-mi aallartippaa, attartukkanilu 1. december 2006-imi qimattussanngorlugu taamaatillugu. Attartortup maalaarummini misissuinermut nalunaarusiaq, attartortup attartukkaminit nuunneranut atatillugu 24. oktober 2006-imi attartortumit aamma attartortitsisup sinniisaanit atsiorneqartoq, tamatumalu kingorna attartortitsisumit allaanngortinneqarsimasoq ilisimatitsissutigaa uppernarsarlugulu. Attartortup naqqup moreerneqarnissaa inissiallu ataasiartamik qalipanneqarnissaa akilissagaa, misissuinermut nalunaarusiami 24. oktober 2006-imeersumi allassimavoq. Torsuusaq silarleq inilu qalipanneqassapput. Allannguinermi attartortitsisup misissuinermi nalunaarusiami suliassat ilassuteqarfigisimavai, taamaalillunilu attartortup naqqup moreerneqarnissaa inissiallu marloriarluni qalipanneqarnissaa attartortup akilertussanngorlugit. Torsuusaq, uffarfik, ini, ineeraq 1 aamma ineeraq 3 qalipanneqartussanngorput. Taakku
saniatigut matut marluk qalipanneqartussaapput (inimut matu aamma perusuersartarfimmut matu).
Attartortup misissuinermi nalunaarusiap allaqqaarnerata assilinera kiisalu misissuinermut nalunaarusiap allanngortinneqarsimasup, attartortitsisup nalinginnaasumik iluarsaassinermut attartortumut akiligassiissutaanut tunngaviliisup assilinera nassiuppai.
Attartortup maalaarutaa 1. marts 2007-imi attartortitsisumut oqaaseqarfigisassanngorlugu saqqummiunneqarpoq, aammalu 28. marts 2007-imi akissuteqarnissamut nukingisaarisoqarluni. Ineqarneq pillugu Maalaaruteqartarfiup nukingisaarummini
erseqqissaatigaa, 19. april 2007 nallertinnagu attartortitsisoq akissuteqanngippat, tunngavissatut pigineqartut tunngavigalugit aalajangiisoqarumaartoq. 19. april 2007 nallertinnagu attartortitsisoq Ineqarneq pillugu Maalaaruteqartarfiup saaffiginnissutaanut qisuariaateqanngilaq.
2. maj 2007-imi attartortitsisoq akissuteqarpoq, tassanilu oqaatigaa attartortitsisup misissuinermi nalunaarusiaq atsioriigaq allanngortissimagaa. Attartortup nalinginnaasumik iluarsaassinermut aningaasartuutissaasa annikillisarneqarnissaat eqqarsaatigalugu allannguisoqarsimasoq attartortitsisup oqaatigaa. Ineqarneq pillugu Maalaaruteqartarfiup suliamik suliaqarnini 19. oktober 2007-imi naammassivaa.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu suliami aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq.
Ineqarneq pillugu Maalaaruteqartarfiup suliaq misissorpaa, ilaasortallu isumaqatigiillutik aalajangerput, attartortitsisoq taamaallaat suliassanut, misissuinermi nalunaarusiaq, 24. oktober 2006-imi attartortumit attartortitsisumillu atsiorneqarsimasoq naapertorlugu attartortup akiligaanik suliarineqartussanut akiliisitsisinnaasoq.
Taamaattumik attartortitsisup 1.070 koruunit attartortumut utertissavai, tassalu qularnaveeqqusiissutigineqartumit inissiap ataasiartamik qalipanneqarnissaanik naqqullu suliarineqarnissaanik ilanngarlugu annertussuseqartumik.
Aningaasat aalajangiinerup matuma illuatungeriinnut nalunaarutigineqarneraniit kingusinnerpaamik ullut 14-it qaangiunnerini akilerneqassapput. Aningaasanit qularnaveeqqusiissutit tunniunneqareersimasinnaasut ilanngaatigineqassapput.

Tunngavilersuut

Attartortitsinermut peqqussummi § 47, imm. 2 naapertorlugu attartortup iserterneranut atatillugu nalunaarusiornissaq attartortitsisup pisussaaffigaa, aammalu attartortitsinermut peqqussummi § 79, imm. 2 naapertorlugu attartortup attartukkaminit nuunneranut atatillugu misissuinermut nalunaarusiornissaq attartortitsisup pisussaaffigaa. Attartortitsinermut peqqussummi § 77, imm. 3 naapertorlugu attartugaq iserterfigineqarnermini nalinginnaasumik iluarsaanneqarsimanngippat, attartortup attartukkani iserterfigineratut itsillugu qimassavaa. Attartortup attartukkamini nalinginnaasumik suliassat, misissuinermut nalunaarusiami 24. oktober 2006-imi attartortumit attartortitsisumillu atsiorneqarsimasumi attartortup akiligassaatut isumaqatigiissutigineqarsimasut attartortumit attartortitsisumillu aaqqiagiinngissutigineqannginnerat,
Ineqarneq pillugu Maalaaruteqartarfiup aalajangiinermini tunngavigaa. Tamanna tunngavigalugu misissuinermut nalunaarusiaq 24. oktober 2006-imeersoq, attartortitsisup attartortumut nalinginnaasumik iluarsaassinermut akilersissinnaasaanut tunngavigineqarpoq. Attartortup misissuinermut nalunaarusiamut atsioreernerata kingorna attartortitsisoq allannguisimavoq. Taamaattumik misissuinermut nalunaarusiaq allanngortitaq, nalinginnaasumik iluarsaassinermut akiligassanut uppernarsaatitut attartortumut nassiunneqartoq atortussaatinneqanngilaq.
Tamatumunnga ilassutitut ataatsimiititaliamit oqaatigineqassaaq, uppernarsaat attartortumit attartortitsisullu sinniisuanit atsiorneqarsimasoq allanngortinneqarsimammat, tamanna annertuumik isornartoqartinneqartoq.

Attartukkamit nuunnermut atatillugu naatsorsukkat pillugit suliaq

Suliamik saqqummiussineq

Attartortup attartukkaminit nuunneranut atatillugu nalinginnaasumik iluarsaassinermut aningaasartuutit amerlassusaat pillugit allakkatigut maalaarutaa 16. januar 2007-imi Ineqarneq pillugu Maalaaruteqartarfiup tiguaa. 19. januar 2007-imi Ineqarneq
pillugu Maalaaruteqartarfiup maalaarut utertippaa, maalaaruteqarnermut akitsuutip akilerneqarnissaa qinnutigalugu. 12. februar 2007-imi attartortup maalaaruteqarnermut akitsuut akilereerlugu maalaarutini nassiuteqqippaa. Maalaarut Ineqarneq
pillugu Maalaaruteqartarfimmit 19. februar 2007-imi tiguneqarpoq. Attartortup attartornini 15. august 2004-mi aallartippaa, 20. april 2006-imilu attartukkani 2006-imi maajip naanerani qimattussanngorlugu allakkatigut nalunaarutigalugu.
Attartugaq sulisunut inissiaavoq 116 m2-nik annertussusilik tallimanik initalik, illumi ilaqutariinnut ataatsinut inissiami qalialimmi inissisimalluni. Attartortup iserternerminut atatillugu amigaatit allattorsimaffiat suliarisimavaa atsiorsimallugulu, taannalu 30. september 2004-mi attartortitsisumut nassiunneqarpoq. Iserternermut atatillugu nalunaarusiortoqarsimanngilaq. Kisiannili attartortitsisoq fakturamik takutitsisinnaasimavoq, tassanilu attartugaq iserterfigineqanngitsiarnermini katillugit 33.600 koruunit nalinginut qalipanneqarsimasoq allassimavoq. Qalipaaneq neqeroorut ersarinnerusunik nassuiaatitaqanngitsoq naapertorlugu suliarineqarsimavoq. Iserternermut atatillugu nalunaarusiortoqarsimanngilaq. Allakkat 2. november 2006-imeersut aqqutigalugit attartortitsisup attartortumit kaammattorneqarluni akiligassanut iluarsiissutissat inaarutaasut nassiuppai. Nalinginnaasumik iluarsaassinermut akiligassat inaarutaasut 17.000 koruuninik naleqarput. Attartortup qularnaveeqqusiissutitut akiligai 10.215 koruunit nalinginnaasumik iluarsaassinermut aningaasartuutinut akiliutigitinneqarput, taamatullu attartortitsisup nalinginnaasumik iluarsaassinissamik tigusiartuaarnerata nalingi katillugit 3.740 koruuniusut nalinginnaasumik iluarsaassinermut aningaasartuutinut ilanngaatigineqarlutik. Attartortoq attartukkami nalinginnaasumik iluarsaassinermut katillugit 3.045 koruuninik akiliisinneqarpoq.
Attartortup maalaarutaa 12. februar 2007-imeersoq 21. februar 2007-imi attartortitsisumut oqaaseqarfigisassanngorlugu nassiunneqarpoq. Attartortitsisoq 20. marts 2007-imi akissuteqarpoq, akissuteqaamminullu amigaatit allattorsimaffiata,
attartortumit 30. september 2004-mi nassiunneqartup assilinera ilanngullugu. Nalinginnaasumik iluarsaassinermut aningaasartuutit attartukkap angissusaa eqqarsaatigalugu naammaginartutut isumaqarfigineri attartortitsisup aalajangiusimaannarpaa. Ineqarneq pillugu Maalaaruteqartarfik attartortitsisumut paasissutissanut ilassutissanik najoqqutassanillu allanik piniarnissamut tunngavissarsivoq. Attartortitsisoq 27. marts 2007-imi taamatut qinnuigineqarpoq, 12. april 2007-imi akissuteqartoqarnissaanik nukingisaaruteqarluni. 18. april 2007-imi attartortitsisoq suliami najoqqutassanik allanik nassiussivoq, taakkununngalu attartortitsinermut isumaqatigiissut, attartortup attartorunnaarnissaminik allagaa, kiisalu nalinginnaasumik iluarsaassinermut fakturap assilinera ilaapput. Tamatuma peqatigisaanik iserternermut atatillugu nalunaarusiortoqarsimanngitsoq, taamatullu attartukkamit nuunnermut atatillugu misissuinermut nalunaarusiortoqarsimanngitsoq attartortitsisup nalunaarutigaa. Suliap 25. juni 2007-imi ataatsimiititaliamit suliarineqarneranut atatillugu aalajangerneqarpoq, suliaq aalajangiiffiginiarlugu paasissutissanik sukumiinerusunik piniartoqartariaqartoq. Attartortitsisoq paasissutissanik sukumiisunik saqqummiussinissamut 27. juli 2007-imut piffissalerneqarpoq. Piffissap taassuma naanerata kingorna attartortitsisoq paasissutissanik nassiussivoq, taamaattumillu paasissutissat Ineqarneq pillugu Maalaaruteqartarfimmit ilaatinneqanngillat. Tamanna pissutigalugu paasissutissat pigineqareersut tunngavigalugit aalajangiisoqarpoq. Ineqarneq pillugu Maalaaruteqartarfiup suliamik suliaqarnini 19. oktober 2007-imi naammassivaa.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu suliami aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq.
Ineqarneq pillugu Maalaaruteqartarfiup siulittaasua ataatsimiititaliamilu ilaasortat marluk isumaqarput, attartortitsisoq nalinginnaasumik iluarsaassinermut akiliisitsisinnaanngitsoq, taamaattumillu qularnaveeqqusiissutaasut 10.215 koruuniusut,
taakkulu saniatigut 3.045 koruunit akilersinneqarsimasinnaasut aalajangiinerup matuma illuatungeriinnut nalunaarutigineqarneranit kingusinnerpaamik ullut 14-it qaangiunnerini attartortumut utertinneqassapput. Ataatsimiititaliami ilaasortaq ataaseq isumaqarpoq, inissiap iserterfigineqarnermini iluata qalipanneqarsimanera tunngavigineqartariaqartoq.
Aalajangiineq nalinginnaasumik amerlanerussuteqartoqarneratigut pivoq. Taasinerit naligiinnerini siulittaasup taasinera aalajangiisuusarpoq.

Tunngavilersuut
Inissianik attartortitsisarneq pillugu Inatsisartut peqqussutaanni nr. 5-imi, 31. maj 2001-imeersumi, kingusinnerusukkut allannguuteqartinneqartumi, attartortup iserternerata nalaani atuuttumi § 28, imm. 2 naapertorlugu attartortup iserterneranut
atatillugu nalunaarusiornissaq attartortitsisup pisussaaffigaa, aamma inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 79, imm. 2 naapertorlugu attartortup attartukkaminit nuunneranut atatillugu misissuinermut nalunaarusiornissaq attartortitsisup pisussaaffigaa. Iserternermut atatillugu nalunaarusiortoqarsimanngitsoq, imaluunniit misissuinermut nalunaarusiortoqarsimanngitsoq suliami takuneqarsinnaavoq. Iserternermut atatillugu nalunaarusiunngitsoornerup
aamma attartukkamit nuunnermut atatillugu nalunaarusiunngitsoornerup pineqaatissiissuteqarfiginissaat tunngavissiorneqanngillat, kisiannili pisut malillugit uppernarsaatissanut tunngatillugu soorlu inissiamit nuunnermut tunngatillugu attartortitsisumut ajoqusiisinnaalluni.
Attartortitsinermut peqqussummi § 77, imm. 3 naapertorlugu attartugaq iserterfigineqarnermini nalinginnaasumik iluarsaanneqarsimanngippat, attartortup attartukkani iserterfigineratut itsillugu qimassavaa. Ineqarneq pillugu Maalaaruteqartarfiup siulittaasuata ataatsimiititaliamilu ilaasortat marluk attartortup minnerpaamik attartukkani tiguneratut itsillugu utertissimassagaa tunngavigaat. Attartortitsisoq iserternermut atatillugu nalunaarusiunngitsoorsimavoq, imaluunniit
allatut iliorluni inissiaq iserterfigineqarnermini nalinginnaasumik iluarsaanneqarsimasoq uppernarsarsinnaanagu, taamaattumillu Ineqarneq pillugu Maalaaruteqartarfiup siulittaasua ataatsimiititaliamilu ilaasortat marluk isumaqarput, attartortup
nalinginnaasumik iluarsaassinermut akiliisinneqarnissaanut tunngavissaqanngitsoq. Tamatumunnga atatillugu attartortitsisup neqeroorut tunngavigalugu attartukkap qalipanneranut fakturamik takutitsisinnaanera isumaqanngilaq, attartortitsisup neqeroorut tunngavigalugu qalipaaneq nalinginnaasumik iluarsaassinermut ilagitillugu iikkanik qilaanillu qalipaanermut tunngasuunersoq uppernarsarsinnaanngimmagu. Faktura 20. juli 2004-mi ullulerneqarsimavoq, tassalu attartortup 2004-mi aggustimi iserternissaa sioqqutitsiarlugu.
Ataatsimiititaliami ilaasortaq ataaseq isumaqarpoq, aalajangiinermi attartortitsisup iserternermi kingorna inissiami amigaatit allattorsimaffianik annertuumik tunniussisimanera pingaartinneqartariaqartoq. Allattuiffimmi tassani inissiap ilua qalipanneqarsimannginnersoq allassimanngilaq. Kiisalu attartortup inissiamut iserternermini iluata qalipanneqarsimannginnera pillugu Ineqarneq pillugu Maalaaruteqartarfimmut maalaaruteqanngilaq, taamaallaalli akiligassat saniatigut akiligassinneqarsimanini maalaarutigalugu. Taamaattumik attartortoq iserternermini inissiap nutaamik qalipanneqarsimannginnera pillugu sukkulluunniit maalaaruteqarsimanngilaq.
Attartortitsinermut peqqussummi § 47, imm. 5 naapertorlugu misissuineq annertuunik aningaasartuuteqarfiussappat, iserternermut atatillugu nalunaarusiortoqanngitsoortoqarsimasinnaavoq. Taamaattumik iserternermut atatillugu nalunaarusiortoqarsimannginnera pingaarnerutinneqarsinnaanngilaq.
Ineqarneq pillugu Maalaaruteqartarfik paasissutissat pigineqartut tunngavigalugit aalajangiisariaqarpoq. Iserternissaq sioqqutitsiarlugu inissiap iluata qalipanneqarsimaneranut uppernarsaammik attartortitsisoq saqqummiussisinnaasimammat, aammalu attartortoq allamik isummiussaqanngimmat, tamanna inissiap nutaamik qalipanneqarsimaneranut tunngavigineqarsinnaavoq.Taamaattumik ataatsimiititaliamut ilaasortaq taanna isumaqarpoq, attartortoq attartukkaminit
nuunnerminut atatillugu inissiap qalipanneqarneranut akiliisariaqartoq.

Attartukkamit nuunnermut atatillugu naatsorsukkat pillugit suliaq

Suliamik saqqummiussineq

Attartortoq 31. maj 2007-imi maalaarummik Ineqarneq pillugu Maalaaruteqartarfimmut saqqummiussaqarpoq. Attartortup attartukkaminit nuunnerminut atatillugu nalinginnaasumik iluarsaassinermut aningaasartuutit amerlassusaat maalaarutigai.
Attartortup maalaaruteqarnermut akitsuut 150 koruuniusoq 29. juni 2007-imi akilerpaa. Attartortup attartornini 15. januar 2006-imi aallartippaa, aammalu 1. januar 2007-imi attartukkani qimallugu. Attartortup attartulernerani iserternermut atatillugu nalunaarusiortoqarsimanngilaq. Attartortup 31. maj 2007-imi maalaarummini ilisimatitsissutigaa, iserternermini iikkat nalinginnaasumik iluarsaassinermut atatillugu qalipanneqarsimasut. Attartortup attartukkaminit nuunnerata kingorna 20. februar 2007-imi misissuisoqarpoq, tassanilu attartukkamit nuunnermut atatillugu nalunaarusiortoqarpoq. Attartukkamit
nuunnermut atatillugu nalunaarusiami attartortitsisoq kisimi atsiortuuvoq. Tassani ilaatigut inini arlalinni qilaat iikkallu qalipanneqartussaasut allassimavoq. 3. juli 2007-imi attartortup maalaarutaa attartortitsisumut oqaaseqarfigisassanngorlugu
saqqummiunneqarpoq. Attartortitsisoq eqqaasinneqareerluni 26. august 2007-imi akissuteqarpoq. Iserternermut atatillugu nalunaarusiortoqarsimanngitsoq aammalu siusinnerusukkut attartortuusimasup attartukkaminit nuunneranut atatillugu
nalunaarusiamik peqartoqanngitsoq attartortitsisup ilisimatitsissutigaa. Attartukkap allagaanut misissuinermi /attartukkamit nuunnermut atatillugu nalunaarusiaq I aamma II ilanngunneqarput. Attartortitsisup akissutitut allagaa 26. august 2007-imeersoq 5. september 2007- imi attartortumut oqaaseqarfigisassanngorlugu saqqummiunneqarpoq. Attartortoq
11. september 2007-imi akissuteqarpoq, tassanili suliaq pillugu annertunerusumik paasissutissiissuteqanngilaq.
Ineqarneq pillugu Maalaaruteqartarfiup suliamik suliaqarnini 30. oktober 2007-imi naammassivaa.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu attartortup inissiamit nuunneranut atatillugu nalinginnaasumik iluarsaassinissamut aningaasartuutit annertussusaanut tunngatillugu aalajangiinissamut piginnaatitaaffeqarluni Ineqarneq pillugu Maalaaruteqartarfik  isummerpoq.
Ineqarneq pillugu Maalaaruteqartarfiup suliaq misissorpaa, tassanilu ilaasortat isumaqatigiillutik aalajangerput, attartortup iserternermini inissiaq nalinginnaasumik iluarsaanneqarsimasoq uppernarsarsimammagu attartortitsisoq nalinginnaasumik
iluarsaassinermut akiliisitsinissamik piumasaqarsinnaasoq. Taamaattumik attartortup attartukkaminit nuunnerminut atatillugu nalinginnaasumik iluarsagassanut akiligassani akilertussaavai. Ineqarneq pillugu Maalaaruteqartarfiup tunngavigaa maleruagassat malillugit attartukkamit nuunnissamut atatillugu misissuinissamut aggersaasoqarsimasoq, aamma attartortoq attartukkamit nuunnissamut atatillugu misissuinermut peqataasimanngikkaluartoq.

Tunngavilersuut

Attartortitsinermut peqqussummi § 47, imm. 2 naapertorlugu attartortup iserterneranut atatillugu nalunaarusiornissaq attartortitsisup pisussaaffigaa. Attartortitsinermut peqqussummi § 79, imm. 2 naapertorlugu attartortup attartukkamit nuunneranut atatillugu nalunaarusiornissaq attartortitsisup pisussaaffigaa. Attartortup iserterneranut atatillugu nalunaarusiortoqarsimanngitsoq suliami takuneqarsinnaavoq. Iserternermut atatillugu nalunaarusiunngitsoorneq pineqaatissiissuteqarnissamik tunngavissiorneqanngillat, kisiannili pisut malillugit uppernarsaatissanut tunngatillugu
soorlu inissiamit nuunnermut tunngatillugu attartortitsisumut ajoqusiisinnaalluni. Kisiannili attartortup iserternermini inissiaq nutaamik qalipanneqarsimasoq oqaatigaa. Attartortitsinermut peqqussummi § 77, imm. 3 naapertorlugu attartortup inissiaq
attartukkani tiguneratut itsillugu utertittussaavaa. Ineqarneq pillugu Maalaaruteqartarfiup aalajangiinermini attartortup iserterneranut atatillugu nalunaarusiortoqarsimanngikkaluartoq, iserternermi attartukkap nalinginnaasumik iluarsaanne-
qarsimanera tunngavigaat. Tassani attartortup iserternermini inissiap nutaamikqalipanneqarsimaneranik uppernarsaanera pissutaavoq.

Inissiamik attartukkamik allamut attartortitsineq pillugu suliaq

Suliamik saqqummiussineq

Attartortup inissiamik attartukkamik allamut attartortitsinissamut itigartinneqarnini aammalu attartorunnaarsinneqarnini pillugu allakkatigut maalaarutaa 16. maj 2007- imi Ineqarneq pillugu Maalaaruteqartarfiup tiguaa. Attartortup 15. maj 2007-imi
maalaaruteqarnermut akitsuut 150 koruuniusoq akilerpaa. Ineqarneq pillugu Maalaaruteqartarfiup attartorunnaarsitsineq pillugu maalaarut suliariumanngilaa, Ineqarneq pillugu Maalaaruteqartarfik attartorunnaarsitsineq pillugu maalaarutinik suliaqarnissamut piginnaatinneqanngimmat. Qinnuteqartoq ilinniariartorluni aallartussaagami, 17. november 2006-imi inissiaq
najukkani allamut attartortinniarlugu qinnuteqarpoq. Attartortup inissiamik najukkamik attartortitsiniarluni qinnuteqaataa attartortitsisup 28. december 2006-imi itigartippaa.
Attartortup maalaarutaa 16. maj 2007-imeersoq 22. maj 2007-imi attartortitsisumut oqaaseqarfigisassanngorlugu nassiunneqarpoq. Attartortitsisup inissiamik najukkaminik allamut attartortitsinissamik qinnuteqaataanut itigartitsinermini attartortup inissiamik sumiginnaasimanera, kiisalu ineqarnermut akiligassanik akiitsoqarsimanera tunngavigaa. Sumiginnaanermi attartortup illumi innaallagissamik, imermik kiassarnermillu isumaginnittussamik pissarseqqaarani inissiaq najukkani qimaannarlugu aallarsimanera tunngavigineqarpoq. Tamatuma kingunerisaanik tankimi solaroliap nungunneratigut ruujorit qerisoorlutik qaararsimapput. Tamatuma saniatigut attartortitsisup attartornermini ineqarnermut akiligassaasa akilinngitsuukkat assilineri ilanngussimavai. Attartortitsisup akissuteqaataa 12. juni 2007-imeersoq 18. juni 2007-imi attartortumut oqaaseqarfigisassanngorlugu nassiunneqarpoq. 29. juni 2007-imi attartortoq akissuteqarpoq. Attartortup akissuteqaammini oqaatigaa, ilinniarnini pissutigalugu inissiaq qimallugu aallarsimalluni, aammalu attartortup inissiap
najukkami allamut attartortinnissaa naatsorsuutigisimallugu. Attartortup akissuteqaammini oqaatigaa, inissiamik attartukkamik allamut attartortitsinissamut itigartitsineq attartortup akiitsoqarnera tunngavigineqartoq. Attartortoq allappoq,
ilinniarnermi nalaani inissiap qanoq ilineqarsinnaaneranut periarfissanik allanik attartortitsisoq innersuussisimanngitsoq.
Ineqarneq pillugu maalaaruteqartarfiup suliamik suliaqarnini 30. oktober 2007-imi naammassivaa.

Aalajangiineq

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 6 naapertorlugu maalaarutip attartukkamik allamut attartortitsinermut tunngasortaani aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq. Ineqarneq pillugu Maalaaruteqartarfiup attartorunnaarsitsineq pillugu maalaarut suliariumanngilaa,
Ineqarneq pillugu Maalaaruteqartarfik attartorunnaarsitsineq pillugu maalaarutinik suliaqarnissamut piginnaatinneqanngimmat, tak. akerlianik attartortitsinermut peqqussummi § 84, imm. 1.
Ineqarneq pillugu Maalaaruteqartarfiup suliaq misissorpaa, ilaasortallu isumaqatigiillutik aalajangerput, attartortitsisoq attartortup inissiamik najukkaminik allamut attartortitsinissaanut itigartitsinissamut pisinnaatitaaffeqartoq.

Tunngavilersuut

Attartortitsinermut peqqussummi § 58, imm. 1 naapertorlugu attartortoq attartortitsinermut isumaqatigiissut malissimaguniuk inissiaq najukkani qaammatit 12-it tikillugit allamut attartortissinnaavaa. Taamaattumik attartortup aatsaat attartortitsinermut
isumaqatigiissut malissimaguniuk inissiaq najukkani allamut attartortissinnaavaa. Attartortoq ineqarnermut akiligassanut akiitsoqarami attartortup attartortitsinermut isumaqatigiissut malissimanngilaa, taamaattumillu inissiaq najukkani allamut attartortissinnaanagu. Taamaalilluni attartortitsisoq inissiamik allamut attartortitsinissamut itigartitsigami eqqortumik iliorsimavoq.
Tamatumunnga atatillugu Ineqarneq pillugu Maalaaruteqartarfimmiit oqaatigineqassaaq, attartortitsisarnermut peqqussummi § 58, imm. 3, nr. 3 naapertorlugu attartortitsisup naammaginartumik tunngavissaqaruni, inissiamik najukkamik allamut
attartortitsinissaq itigartissinnaammagu. Aammattaaq attartortup pisariaqartunik attartortitsisumut isumaqatigiissuteqaqqaarani, piffissaatinnagu inissiaq qimallugu allamut nuussinnaanngilaq, tak. attartortitsinermut peqqussummi § 48, imm. 5. Attartortoq inissiami innaallagissamik, imermik kiassarnermillu isumaginnittussamik nassaaqqaarani aallarsimavoq, taamaattumillu attartortitsisoq inissiamik allamut attartortitsinissamut akerliusinnaavoq.