SIULEQUT

Ineqarneq pillugu maalaaruteqartarfiup ukiumoortumik nalunaarut saqqummiuppaa Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 83, imm. 4 naapertorlugu.

Nalunaarutip ukioq naallugu nalunaarsuut najoqqutarivaa imaqarlunilu naatsumik nassuiaammik Ineqarneq pillugu maalaaruteqartarfiup suliassarisaanik, naatsorsuutinik maalaarutit pillugit suliarineqarsimasunik aammalu sulianik naammassineqarsimasunik.

Nalunaarut aamma nassaassaavoq Ineqarneq pillugu maalaaruteqartarfiup quppersagaani: www.maalaarut.gl

Ineqarneq pillugu maalaaruteqartarfiup allatseqarfia isumaqatiginninnikkut tunniussisinnaavoq imaluunniit nassiussilluni ukiumoortumik nalunaarutip assinganik pappialanngorlugu.

Ineqarneq pillugu maalaaruteqartarfiup allatseqarfia attavigineqarsinnaavoq uunga:

Najugaqarfik: Hans Egedesvej 3 ( B48), postboks 689, 3900 Nuuk

Mail: maalaarut@nanoq.gl

Oqarasuaat: 32 80 33

Fax nr.: 32 78 50

Nuuk, maj 2012

Morten Nornild

Ineqarneq pillugu maalaaruteqartarfiup

Siulittaasua

Paasissutissat nalinginnaasut

Ineqarneq pillugu maalaaruteqartarfik pilersinneqarsimavoq Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq § 82, imm. 1 tunuliaqutaralugu.

Ineqarneq pillugu maalaaruteqartarfik nunatsinni allaffissornikkut qullersaavoq maalaaruteqartarfittut inissianut attartortittakkanut tunngassuteqartunut.

Allaffissornikkut assingusuuvoq eqqartuussiveqarnerup suleriaasaanut, attuumassuteqarani aqunneqaranilu iliuusissatsigut oqaaseqaateqarnissakkulluunniit pisortaqarfinniit imaluunniit allatigut, qanoq suliassat ataasiakkat ingerlanneqassanersut aalajangiiffigineqassanersullu.

Aalajangiisartoqatigiit aalajangiisarput attartortut attartortitsisullu akunnerminni aaqqiagiinngissutaannut Namminersorlutik kommunillu attartortittakkatut ineqarfiutaannut tunngassuteqartunut.

Aalajangiinerit atuuttussaatinneqartarput allanngortinneqarsinnaanatik inaarutaasuusarlutillu. Ineqarneq pillugu maalaaruteqartarfiup aalajangiussai taamaasillutik allanut allaffissornikkut qullersaqarfinnut ingerlateqqinneqarsinnaanngillat. Aalajangiussat taamaallaat kisimi ingerlatinneqarsinnaapput eqqartuussiveqarfinnut maleruagassat nalinginnaasut naapertorlugit.

Ineqarneq pillugu maalaaruteqartarfiup siunertaa aamma unaavoq, aalajangiussai ersarissumik pingaarutilimmillu sunniuteqartinneqassasut siunnersuinikkut- aammalu suleriaaseq tunngavigalugu innuttaasunut, inissiaatileqatigiiffinnut allanullu taamatut sammisalinnut soqutiginnittunut.

Tamannalu tunngavigalugu Ineqarneq pillugu maalaaruteqartarfik qulakkeerinneqataavoq, tunngavilersorluakkanik eqqortunillu aalajangiisoqartarneranik, sumiluunniit illoqarfinni inissiat inissisimagaluarpata.

Maalaaruteqartarfiup atuutsinneqarnera erseqqinnerusumik naleqqussarneqarnikuuvoq attartortitsisarneq pillugu peqqussummi § 82-86-ip tungaanut. 

Ineqarneq pillugu maalaaruteqartarfiup pisinnaatitaaffii

Ineqarneq pillugu maalaaruteqartarfiup pisinnaatitaaffii erserput attartortitsisarneq pillugu peqqussutip § 84, imm. 1-ianni.

Ineqarneq pillugu maalaaruteqartarfiup suliassaq maalaarut suliarisinnaavaa, attuumassuteqarpat sammisanut makkununnga:

  1. Piumasaqaatit nalinginnaasut naammassisassat kalerriisoqarpat ineqarnermut akiliutip qaffanneqarnissaanik.
  2. Aserfallatsaaliinernut iluarsartuussinernullu tunngassuteqartunut.
  3. Inigisap isikkuanut tunngasut iserterfigineqarnerani.
  4. Ikkussugassanut pitsanngorsagassanullu attartukkamut tunngasut (aalajangiisinnaatitaaneq).
  5. Attartortup atuinera attartukkaminik (unioqqutitsinerit ineqarfiup maleruaqqusaanik).
  6. Attartuisinnaatitaanerup allamut tunniunnera (inigisanik paarlaanneq, attartukkamik attartuisitsineq attartornerullu nanginneqarnera).
  7. Inigisap isikkuanut tunngasut qimannerani (nalinginnaasumik iluarsartuineq)

Nalinginnaasumik suleriaaseq imaappoq, Ineqarneq pillugu maalaaruteqartarfiup maalaarutit amerlanersaat suliarisinnaagai aalajangiussaasimasut inissiaatileqatigiiffinninngaanniit.

Akeqartinneqarpoq 150 kr.-imik Ineqarneq pillugu maalaaruteqartarfimmut maalaaruteqarnissaq. Maalaaruteqartoq taamaallaat akiliuteqassaaq, suliap ingerlateqqinneqarnissaa suliarineqalerpat. Akiliut uterteqqinneqassaaq, paasinarsippat, attartortoq tamakkiisumik ilaannakortumilluuniit maalaarumminut taperserneqarsimappat.

Ineqarneq pillugu maalaaruteqartarfiup aaqqissuuneqarnera (ilaasortaqarnikkut):

Ineqarneq pillugu maalaaruteqartarfik aaqissuussaavoq siulittaasoqarluni naliginnaasunillu pingasunik siunnersuinermut ilaasortaqarluni.

Siulittaasoq tassumalu tullersortaa toqqarneqartarput Naalakkersuisumiit siunnersuusiorfigineqarnikkut Naalakkersuisut ilaasortaaniit, akisussaassuseqarfeqartuusumiit ineqarnernut tunngasuusunut. Toqqarneqartut tamarmik immikkut ilisimasaqartuussapput inissiaatileqatigiiffinnut tunngassuteqartunut imaluuniit naamassisaqarsimassalluni inatsisilerituutut kandidatitut soraarummeersimanermut uppernarsaateqassalluni.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Inissiaatileqatigiiffik A/S INI-miit.

Maalaaruteqartarfiup ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut KANUKOKA-miit maalaaruteqartarfiullu ilaasortaa ataaseq taassumalu sinniisussaa toqqarneqassaaq Naalakkersuisuniit siunnersuusiorfigineqarnikkut Attartortut Nuna tamakkerlugu kattuffianiit IPK imaluunniit SIK, IMAK aamma PPK.

Taakku pingasut naliginnaasumik ilaasortaasut sinniisuilu ilisimasaqartuussapput inissiaateqarnernut tunngassuteqartunut.

Ineqarneq pillugu maalaaruteqartarfiup aaqissuussaanera malitseqarpoq taamaattumik, attartuisut attartortitsisullu soqutigisaqarfianniit sinniisoqartinneqarlutik.

Siulittaasoq:

Morten Nornild, Kalaallit Nunaanni Ilagiit.

Suppleant: Peter Sindal Lundsberg, advokat Nordic Law Group.

Maalaaruteqartarfimmut ilaasortat:

  1. Josef Therkildsen, SIK

Sinniisoq: Sofie Fleischer, SIK

  1. Ken Nyborg, KANUKOKA

Sinniisoq: Petur Gudmundsson, KANUKOKA

  1. Kenneth Bøjler, A/S Boligselskabet INI

Sinniisoq: Erik Ravn, ISERIT A/S

Ineqarneq pillugu maalaaruteqartarfik minnerpaamik pingasoriarlutik ataatsimiittassapput ukiup ingerlanerani. Ukioq 2011-imi siulittaasoq pisariaqartitsisimavoq sisamariarlutik ataatsimiisinneqarnissaannik. Ataatsimiinnerit ingerlanneqarsimapput marts-imi, august-imi, september-imi aammalu november-imi.

Suliassat tamarmik ataasiakkaarlugit siulittaasumiit atuarneqartarput aalajangiiffigineqartarlutillu maalaaruteqartarfiup ataatsimiinneranni. Suliassat aalajangiiffigineqartarput taasinerni amerlanerussuteqarnikkut, tassannga siulittaasoq taakkulu ilaasortaatitaasut tamarmik taasinermik ataatsimik naleqartinneqartarlutik. Taasinerni naligiissoqartillugu siulittaasup taasinera apeqqutaatinneqartarpoq.

Ineqarneq pillugu maalaaruteqartarfiup Allatseqarfia

Naalakkersuisut inissitarivaat allatseqarfeqarnerup pisariaqartinneqartup ingerlanneqarnera Ineqarneq pillugu maalaaruteqartarfiup sulissussinerannut.

Ineqarneq pillugu maalaaruteqartarfiup tungaasigut Siunnersuisoqatigiinnut Aalajangiisartunullu Aqutsisoqarfiup tigummisarivaa allatseqarfiup ingerlanneqarnera. Ineqarneq pillugu maalaaruteqartarfiup suliassarisaasa ingerlanneqarnissaanut ukiumoortumik akuersissumik tapiissuteqartitsisoqartarpoq.

Allatseqarfiup suliassarai:

  • maalaarutip tigusimaneranut ilisimatitsissut
  • itigartitsissut tunngavigalugu amigartumik pisinnaatitaanermik
  • paasissutissanik aallernissaq
  • piareersassallugit suliat ataatsimiinnissamut
  • nassitsinerit aalajangiinernik
  • tamanut saqqummiussinerit aalajangiinernik quppersakkatsigut

INEQARNEQ PILLUGU MAALAARUTEQARTARFIUP NALUNAARUTAA 2011-MUT

Siulittaasup nalunaarutaa:

Ukioq 2011-imi isumaga malillugu siullerpaamik takuvugut aatsaat taamatut annertutigisumik maalaarusussutsimut piumassuseqarnermik qanillattuisumut inuiaqatigiinniit ineqarnernut tunngassuteqartunut. Suliassat annertussusaat maalaaruteqartarfimmut apuunneqartut annertuseriarujussuarput ukioq siullermut naleqqiullugu. Ineqarneq pillugu maalaaruteqartarfiup qangaaniilli eqqummaariffigisimavaa taanna pisussanngorunartoq nikingassuteqarnerujussuaq, taamaasilluni ukioq 2011-imi maalaaruteqartarfiup atuunnera suliniuteqarneralu ersarissisissimallugu nuna tamakkerlugu ilisimaneqarnerulernissaanut sulissuteqarnertigut.

Ineqarneq pillugu maalaaruteqartarfik allatseqarfikkut Siunnersuisoqatigiinnut Aalajangiisartunullu Aqutsisoqarfikkoortumik sullinneqarpoq. Annertuumik sullinneqarneq- aammalu suliamut ilisimasaqarnermik (attartortitteriaatsinut) tunngassuteqartunut allatseqarfikkoortumik salliullugu piumasaqaatitut tunngaviuvoq ingerlalluartumik maalaaruteqartarfiunissaanut. Nammineq paasinninnera naapertorlugu, pissutsit ullumikkut taamaattut pilersinneqarsimapput. Annertuumillu qutsavissaqarfigaagut sulisut taakkuninnga suliaqartut alajangersimasut allatseqarfimmiittut aqutsisuilu. Anguniagaavoq piumasaqaataasoq, allatseqarfikkoorlugu 2012-imi pilersaarusiorsinnaassasugut aalajangersimaqqiissaartutigut ”angerlariartuutigaluta ataatsimiittarnissaq” ineqarnernut tunngassuteqartunut inissiaatileqatigiiffinnut sulisunullu aammalu allanut soqutigisaqartunut tunngatillugu.

Siunnersuisoqatigiinnut Aalajangiisartunullu Aqutsisoqarfik taanaasoq 2012-imi assigiinnik ilaasortaqarpoq ukiup siulianiit ilaareersuniit. Taamaasilluni taakkua tamarmik eqqarsaatigalugit misilittagaqarluartoorerput nukittoqqutaallutillumi pikkorissut, tamaattumillu taamatut inissisimanerup annertuumik ataatsimiinnerit sunniuteqarfigilluartarpaat naliginnaasumillu, periarfissaritinneqartoq aalajangiisarnikkut, aalajangersimaqqissaartumik ingerlaatsimik periuseqartitsilluni, nuannaarutaasussamik attartortuusunut aammalumi inissiaatileqatigiiffiusunut.

Attaveqaqatigiinnerit suleqatigiinnerillu inissiaatileqatigiiffinnut oqaatigisariaqarput pitsaasuusutut. Inissiaatileqatigiiffiit nammataqarput aqutsisuusutut atasiakkaanut attartortittakkanut akisussaaffeqartuusutut attartortunut. Arlalitsigut 2011-imi takussutissiisoqarpoq, suliat isumaqatigiissutaasinnaasut attaveqaqatigiinnikkut akunitsinniit ataani atsiortunga aammalu allatseqarfiup imaluuniit inissiaatileqatigiiffiillu, tassannga eqqartuiffigineqarluni pisinnaatitaaffiusoq piffimmi aalajangersimasumi, pineqartut aalajangiisimanerni piviusuni, aalajangiisuusarmata suliap ingerlateqqinneqarnissaanut aqqiagiinngissutini aalajangersimasuni, taamaasilluni taakku suliat pineqartut ingerlateqqinneqarsinnaallutik inissiaatileqatigiiffinnut allamik tunngavimmik inissiinikkut, pisariaqarunnaarsillugu maalaaruteqartarfikkut ingerlanneqartariaqarnissaannik. Periuseq nammineq paasinninnera naapertorlugu oqariartuuteqartoq ataqqeqatigiinnermik akunnitsinni pigisaqarnitsinnik ingerlataqartugut, aqutsisutigullu akisussaassuseqartoqarneranik attartortitsisarnerup pisinnaatitaaffiinut suliassatigut ingerlanneqarnerannik inissiaatileqatigiiffinni annertuuni taakkunani marluusuni. Taamatuttaaq 2011- imi paasisaqarfigaara, annertunerusumik kommuninit pigineqartoq inissiaatileqatigiiffiup piginnaaneqarfigilluaraa allannguuteqartitsinissaminik suliariaatsitigut aalajangiisoqarsimanera naapertorlugu.  

Ukioq 2010 malitseqarpoq oqallisissiangortitsinernik aalajangiinerit arlaqartut kinguneratigut suleriaaseq pillugu attartorunnaarsitsinikkut aammalu attartuiunnaarnikkut. Taakkulu suliassarpassuit 2011-imi pineqartut arlaannaalluuniit tunngassuteqanngimmat taakkununnga ajornartorsiutinut tunngasunik, takussutissiivoq uannut uppernarsaatitut taaneqareersumut suleriaatsimut allannguisinnaanermik takusutsisiisumut inissiaatileqatigiiffiit tungaaniit. Suliat 2011-imi, periusaat naapertorlugit, annerpaamik qulequtaqarnerupput imaqartinneqarlutillu tunngassuteqartunik killeqartitsinermik attartortup aserfallatsaaliisussaatitaaffiannik tunngassuteqartunik, attartortsitsinermut peqqussut § 45 naapertorlugu. Siumullu naatsorsuutigereersinnaavara ukioq 2012-imi naggataagut takussutissiiumaartoq tunngassuteqassasoq aaqqiagiinngissutinut tunngasunut oqu pillugu.

Morten Nornild

Ineqarneq pillugu maalaaruteqartarfiup Siulittaasua