Siulequtsiussaq

Isumaginninnermi Naammagittaalliuuteqartarfik, isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 10 imm. 5 naapertorlugu Inatsisartunut ukiumoortumik nalunaaruteqartarpoq.

Nalunaarummi qaammatisiutit malillugit ukioq malinneqarpoq aammalu Isumaginninnermi Naammagittaalliuuteqartarfiup atuunnera, naammagittaalliuutit tiguneqartut aamma suliat naammassineqartunut kisitsisitigut paasissutissat pillugit naatsumik nassuiaammik imaqarluni.

Nalunaarut Isumaginninnermi Naammagittaalliuuteqartarfiup nittartagaani: www.dsa.gl  takuneqarsinnaavoq.

Isumaginninnermi Naammagittaalliuuteqartarfiup, nalunaarutip nittartakkamut ikkunneqarnera pillugu taamaallaat kommunit, Kanukoka, Inatsisartut Ombudsmandiat, Rigsombudsmandi aamma Isumaginninnermut Ilinniarfik ilisimatissavai.

Isumaginninnermi Naammagittaalliuuteqartarfiup Allattoqarfiata isumaqatigiissuteqarneq malillugu ukiumoortumik nalunaarutip assilinera pappialanngorlugu tunniussinnaavaa imaluunniit nassiussinnaallugu.

Isumaginninnermi Naammagittaalliuuteqartarfik imatut attaveqarfigineqarsinnaavoq:

Najugaq: Hans Egedesvej 3, postboks 689, 3900 Nuuk

Mail: dsa@nanoq.gl 

Oqarasuaat nr: 32 80 33

Fax nr: 32 78 50

XX 2013

Naja Joelsen

Siulittaasoq

NAAMMAGITTAALLIUUTEQARTARFIMMUT INATSISITIGUT TUNNGAVIUSOQ

1980-imi Isumaginninnermi Naammagittaalliuuteqartarfiup atuunnera aallartippoq.

Isumaginninnermi Naammagittaalliuuteqartarfiup aalajangiisinnaatitaanera isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 8, imm. 1-imi aamma 2-imi allassimavoq.

Isumaginninnermi Naammagittaalliuuteqartarfik, isumaginninnermi maleruagassat malillugit kommunit imaluunniit Ilaqutariinnermut, Isumaginninnermi Naalakkersuisoqarfik aalajangiinerannut naammagittaalliuuteqartarfiuvoq.

Naammagittaalliuuteqartarfiup atuunnera peqqussummi §§ 9 – 11-imi erseqqinnerusumik inatsisitigut maleruagassaqartinneqarpoq.

Isumaginninnermi Naammagittaalliuuteqartarfik pillugu nalinginnaasumik

Isumaginninnermi Naammagittaalliuuteqartarfik isumaginninnermut suliassaqarfimmi nunami allaffissornikkut naammagittaalliortarfittut qullersaavoq.

Suliassat ataasiakkaat qanoq suliarineqartassanersut aalajangiiffigineqartassanersullu pillugu, ilitsersuutinit aamma oqartussaasunit allanilluunniit oqaaseqaatinut tunngatillugu arlaannaannulluunniit attuumassuteqanngitsumik allaffissornikkut, eqqartuussivimmut assigusumik oqartussaasuuvoq.

Isumaginninnermi Naammagittaalliuuteqartarfiup ilaatigut suliassaraa aalajangiinissaq:

  • siusinaartumik pensionisianut aamma utoqqalinermi pensionisianut suliani
  • pisortanit ikiorsiissutinut suliani
  • meeqqanut suliani
  • Nunani avannarlerni isumaqatigiissut malillugu pensionisianut suliani
  • isumaginninnermut suliassaqarfimmi suliassani allani
  • suliani isumaginninnermut suliassaqarfimmi aningaasartuutit akilerneqarnissaat pillugu kommunit marluk isumaqatigiinngissutigisaanni

Taamaattumik Isumaginninnermi Naammagittaalliuuteqartarfiup aalajangiineri aallaaviatigut inaarutaasuupput aammalu oqartussaasunut allanut naammagittaalliuutigineqarsinnaanatik.

Tassani pineqanngillat meeqqanik akuersissuteqarfigineqanngitsunik inissiineq pillugu aalajangiinerit. Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 8, imm. 3-imi toqqaannartumik allassimavoq, aalajangiinerit taakkua eqqartuussivimmut suliakkiissutigineqarsinnaasut.

Suliaqarnermi tamanna isumaqarpoq, aalajangiinerit amerlanerit isumaginninnermut suliassaqarfimmi kommuninit aalajangiiffigineqarsimasut innuttaasut naammagittaalliuutigisinnaagaat.

Isumaginninnermi Naammagittaalliuuteqartarfiup aamma siunertaraa, aalajangiinerit, pingaartumik tunngaviusumik aalajangiinerit, erseqqissumik iluatinnaateqartumillu kommuninut allanullu sulianut soqutigisaqartunut ilitsersuutitut suliaqarnermullu tunngavissiisassasut.

Taamaalilluni Isumaginninnermi Naammagittaalliuuteqartarfik, nunami sumiluunniit najugaqaraluaraanni sukumiisumik eqqortumillu aalajangiisoqartarnissaanut qulakkeerisooqataasarpoq. 

 

Katitigaanera

Isumaginninnermi Naammagittaalliuuteqartarfik ukiumi nalunaaruteqarfiusumi ataatsimik siulittaasoqarpoq inatsisilerituujusumik aammalu pingasunik ilaasortaqarluni isumaginninnermut inatsisinik ilisimasaqartunik aammalu isumaginninnermi naalakkersuinikkut pissutsinik paasisimasaqartunik.

Siulittaasoq:

Naja Joelsen, Nuuk

Ilaasortat:

Bendt Frederiksen, Upernaviup eqqaani Nuussuaq

Nukákuluk Kreutzmann, Nuuk

Stine Egede Nørbæk, Qaqortoq

Isumaginninnermi Naammagittaalliuuteqartarfik ukiumi nalunaaruteqarfiusumi 2011-mi sisamariarluni naammagittaalliuuteqartarfimmi ataatsimiippoq: april, juni, september aamma december. Ataatsimiinnerit pingasut aningaasaqarnermik pissuteqartumik ilaatigut oqarasuaatikkut ataatsimiinnertut ingerlanneqarput.

Ataatsimiinnerni tamaginni suliassat 30-40-t akornanniittut suliarineqarput.

Suliat amerlanerussuteqarnikkut aalajangiiffigineqartarput. Tassa imaappoq Isumaginninnermi Naammagittaalliuuteqartarfiup aalajangiineri siulittaasumit aammalu ilaasortatut toqqagaasunit aalajangiiffigineqartarput. Suliat ataasiakkaat tamarmik ataatsimiinnermi misissorneqartarput aalajangiiffigineqartarlutillu.

 

Naammagittaalliuteqartarfiup 2011-mi suliaqarnera

Isumaginninnermi Naammagittaalliuuteqartarfiup ukiumi nalunaaruteqarfiusumi, piffissap suliassanik suliarinninnermut atorneqartartup sivikillisinneratigut, aammalu aalajangiinerit suli qaffasissumik pitsaassuteqartinnerisigut, innuttaasut inatsisitigut pisinnaatitaaffiisa qulakkeernissaat suli sammivaa.

Isumaginninnermut Naammagittaalliuteqartarfiup ukiut siuliisulli suliat kukkunillit 47-t utertippai, Kommunini sullissinerup amigarnerujussua peqqutaallluni.

2011-mi naammagittaalliortarfiup suliassat 270 tiguai, suliallu 341-t inaarsarlugit.

Agguartaarinermi suliat suliarineqartarput qaammatini qulini imaluunniit aqqanilinni.

Assersuussinermi erseqqissarneqarsinnaavoq, Isumaginninnermi Naammagittaalliortarfiup 2010-mi suliassat 291 tigusimammagit 336-llu naammassisimallugit.

Immikkuullarissumik suliat innarluutilinnut tunngasut

Isumaginninnermut Naammagittalliortarfiup naammagittaaliutit amerliartorneri annertuumik innarluutilinnut tunngasut naammagittaalliutit ernumanartutut isigai.

Siornatigut Ilaqutareeqarnermut, Avatangiisinut, Ilageeqarnermut Naligiisitaanermullu Naalakkersuisoqarfiup Kommuninut Januarip aallaqqaataani 2011-mi aaliangiinissamut piginnaatitsissut tunniunneqarpoq annertuumik innarluutilinnut tunngasut suliassat.

Taakkununnga tunngasut naammagittaalliutit appariangaatsiarput, aaliangiinissamut piginnaatitaanermut Kommuninut tunniussinerup kingorna.

Isumaginninnermut Naammagittaalliortarfiup 2009-mi tiguai: Naammagittaalliutit 23-t annertuumik innarluutillit pillugit, 2010-milu: Naammagittalliutit 62 annertuumik innarluutillit pillugit naammagittaalliutit, 2011-milu: naammagittaalliutit 6-t annertuumik innarluutilinnut tunngasut tigusimallugit.

2011-mi naammagittaalliutini 6-nni pingasut akueriumaneqanngillat piginnaatitaaffiup amigarnera peqqutigalugu, tassa imaappoq Isumaginninnermut Naammagittaalliortarfiup piviusumik 3-t kisiisa suliarisinnaavai 2011-mi isertuni.

Sulianik taakkuninnga sukumiisumik mississuinerup takutipaa, inersimasut timikkut innarluutillit, imaluunniit meeqqat angajoqqaanit meeqqat anguniagaanik suliaqartut. Inersimasut tarnikkut napparsimasuniit naammagittaalliutaanik takkuttoqassaarnikuuvoq.

Siusinnerusukkut Kommunini sullissisuusut (piginnaatitsissummut uppersaateqarlutik) aaliangiussamut naammagittaalliortitsisinnaasarput, aaliangiussaq aaliangerneqarsimasoq Ilaqutareeqarnermut, Avatangiisinut, Ilageeqarnermut Naligiisitaanermullu Naalakkersuisoqarfimmiit Isumaginninnermi Naammagittaalliortarfimmut. Isumaginninnermi Naammagittaalliortarfiup paasinninnerivaa inuit annertuumik innarluutillit, immikkut ittumik pineqarput tarnikkut napparsimasut pisariaqartitaat naammagittaalliornissaminnut tapersersorneqarnissaat Kommuunit aaliangigaat pillugu Isumaginninnermi Naammagittaalliortarfimmut.

Isumaginninnermut Naammagittaalliortarfiup ernumanini saqqummiunnikuuaa Ilaqutareeqarnermut, Avatangiisinut, Ilageeqarnermut Naligiisitaanermullu Naalakkersuisoqarfimmut Kanukokamullu. Isumaginninnermut Naammagittaalliortarfik neriuppoq ajornartorsiummut ikiuutaasinnaasumik aaliangiisoqassasoq. 

Isumaginninnermi Naammagittaalliuuteqartarfimmi 2011-imi aalajangiinerit agguataarnerat

Utoqqalinermi pensionisiat aamma siusinaartumik pensionisiat: suliat                 27-it

Naartunermi, erninermi meeravissiartaarnermilu sulinngiffeqartarneq ullormusiaqartarnerlu: suliat                                                                                                                          5-it

Pisortanit ikiorsiissutit: suliat                                                                                  54-it

Suliffeqarnermi ikiorsiissutit: suliat                                                                        12-it

Meeqqanut inuussuttunullu ikiorsiissutit: suliat                                                        6-it

Inunnut annertuumik innarluutilinnut ikiorsiissutit: suliat                                      24-it

Meeqqanut tapiliussat: suliat                                                                                     6-it

Ineqarnermut tapiissutit: suliat                                                                                  2-it

Meeqqanut akilersuutit: suliat                                                                                   1-it

Paaqqinnittarfiit: suliat                                                                                              1-it

Siulittaasoq aalajangiivoq suliani                                                                            52-ini

Allattoqarfiup tigujumanngilai suliat                                                                      52-it Allattoqarfiup suliat kukkuneqarneri pissutigalugu utertippai suliat:                                             47-it                                            

Suliat allat suliat                                                                                                      52-it

Katillugit suliat                                                                                                      341-it

Kisitsisit atorlugit sulianik nassuiaaneq siulleq ima isikkoqarpoq, aaliangersaanerit, allannguutit, suliareqqitassanngorlugit utertitat.

Kisitsisit atorlugit sulianik nassuiaanerup tullia, siulittaasup aaliangiinermini naammasisai, aaliangersaanerit, allannguutit kiisalu suliareqqitassanngorlugit utertitat.

Kisitsisit atorlugit sulianik nassuiaanerup pingajua, utertiinnarneqartut sullissinermi kukkusimaneq pissutigalugu.

Qulaani taaneqartutut suliat 47-t Kommuninut utertinneqarput suliassanngorteqqillugit, kukkulluni suliarinnissimaneq pisuulluni. Annertuumik kukkulluni suliaanngillat, allaat innuttaasup inatsisitigut isumannaatsumik pineqarnissaanut akerliusumik. Taamaattumik pisariaqartarpoq suliat suliareqqitassanngorlugit utertinneqartarnerat, Kommunillu qinnuigalugit suliareqqeeqqullugit, nutaamillu aaliangeeqqullugit, taamaalilluni sullissineq aammalu aaliangiineq, sulianik sullissinermi inatsimmut maleruuttunngussammat.

Isumaginninnermi Naammagittaalliuuteqartarfiup 2011-imi tunngaviusumik aalajangiinerit katillugit 16-it, isumaginninnermut suliassaqarfimmi Isumaginninnermi Naammagittaalliuuteqartarfimmut naammagittaalliuutigineqarsinnaasunut agguataarsimasut tamanut saqqummiuppai. Tunngaviusumik aalajangiinerit pingaarnerpaat matuma kinguliani imaqarniliorlugit allanneqarput. Aalajangiinerit tamarmik imarisaat tamaasa naammagittaalliuuteqartarfiup nittartagaani atuarneqarsinnaapput:  www.dsa.gl 

Isumaginninnermi Naammagittaalliuuteqartarfiup Allattoqarfia

Allattoqarfiup Isumaginninnermi Naammagittaalliuuteqartarfimmut allattoqarfimmi suliassat isumagisarai. Allattoqarfik Siunnersuisoqatigiinnut Aalajangiisartunullu Aqutsisoqarfiup ataaniippoq.

Ukiumi nalunaarusiorfiusumi 2011-mi Allattoqarfimmi inatsisilerituut pingasut aamma allaffimmiut marluk sulisorineqarput.

Allattoqarfiup suliassarai:

  • Naammagittaalliutip tigusimaneranik uppernarsaaneq
  • naammagittaalliornissamut piffissaliussaq tunngavigalugu suliassat suliarineqarnissaasa itigartitsissutigineqarnerat
  • aalajangiisinnaatitaannginneq pissutigalugu itigartitsineq
  • paasissutissanik pissarsiniarneq
  • naammagittaaliuuteqartarfimmi ataatsimiinnissamut suliassanik piareersaaneq
  • naammagittaalliuuteqartarfimmi ataatsimiinernit imaqarnilianik allanneq
  • aalajangiinerit nassiussornissaat
  • tunngaviusumik aalajangiinerit tamanut ammasumik nittartakkami saqqummiunneqarnissaat

Allattoqarfiup aamma naammagittaalliuuteqartarfiup ataatsimiinnissaasa aaqqissuunnissaat isumagisaraa.

Innuttaasut inatsisitigut pisinnaatitaaffii isumannaarniarlugit, Isumaginninnermi Naammagittaalliortarfik (Inatsisitigut siunnersuisarfik) IKIU-lu isumaqatigiissusiorput Tasiilaq, Ilulissat kiisalu Upernavik tikeraarneqarnerannik kinguneqartumik

Tassanilu Kommunit isumaginninnermut inatsisinik ilisimasaqarnerannik pitsanngorsaasoqarluni Inatsisartut inatsisaanni nr. 8, 13. juni 1994-imeersumi pisortat ingerlatsineranni suliassat suliarineqartarnerat pillugu.

Taasumalu saniatigut Politiit eqqartuussisoqarfiillu ilisimatinneqarlutik, ullormut suliaannut attumassuteqarsinnaasunik Isumaginninnermi inatsisit malillugit.

Aammalu aaliangiisartuni sulisoq tamanut paasititsiniaanermi ataatsimiititsilluni Oqaatsuni. Tassani innuttaasut ilisimatinneqarput naammagittaalliorsinnanermut Kommunip aaliangigaanut tunngasumut Isumaginninnermi Naammagittaalliuteqartarfimmut. Kiisalu Narsami isumaginninnermi suliaqartumik Kommune-mi sulisumit oqaloqarteqarluni, Isumaginninnermut Naammagittaalliuteqartarfiup suliaanut tunngasumik nassuiaateqarluni.

 

Aalajangiinerit tamanut saqqummiunneqartut naalisarlugit:

 

Matuma kinguliani aalajangiinerit 2011-imi tunngaviusumik aalajangiinertut ilusilerlugit tamanut saqqummiunneqartut naalisarnerat issuaavigineqarput.

Ukiut siuliinitulli aaliangiussat amerlanerit oqaaseqarfigineqarput, inatsisit Inatsisartut inatsisaanni nr. 8, 13. juni 1994-imeersumi pisortat ingerlatsineranni suliassat suliarineqartarnerat pillugu inatsit malinneqartarsimanngimmat. Aaliangiussat amigaatigikkajuttarpaat unnerluussinermi eqqortumik inatsimmik tunngaveqarnersoq, kiisalu tunngavilersuutit amigartarnerujussui.

Kiisalu aaliangiussat arlaliupput innuttaasumut tamakkiisumik tapersiinngitsumik, allakkatigut nalunaarutigineqartussaagaluartumik – inatsisitigut piumasaqaataanngikkaluarpalluunniit.

Allattuisussaatitaanermi Inatsisartut inatsisaat § 6 nr. 9, 13. juni 1994-imeersoq Pisortat ingerlatsinerat pillugu paasitinneqarsinnaatitaaneq suliani amerlasuuni malinneqartarsimanngimmat.

Aaliangiinerit ataasiakkaat oqaaseqarfigineqarput amigaatit pillugit.

Aalajangiinerit tamakkiisunngorlugit Isumaginninnermi Naammagittaalliuuteqartarfiup nittartagaani atuarneqarsinnaapput: www.dsa.gl

1.

2009-015706  Siusinaartumik pensonisianik inummullu tapinik naatsorsuineq

  1. april 2011

Suliami pineqarput aappariit tamarmik siusinaartumik pensionisiallit. Aappariit qammammut 10.500 koruuninik tunineqartarput. Akiligassat aalajangersimasut ilanngaatigereerlugit, imaappoq innaallagiaq kiassarnerlu aappariit qaammammut nammineq atugassaat 8.506,65-usarput.

Kommunp Isumaginninnermi Naammagittaalliuuteqartarfimmut allakkamini oqaatigaa aappariit inummut tapimik pissarsinissamut pisinnaatitaanngitsut, pissutigalugu aningaasat amerlassusii aappariinnut siusinaartumik pensionisialinnut  qaammammut 8.000 koruuninit inummut tapimik pissarsinissamut kommunip ikinnerpaaffissaliussaanit qaffasinnnerummata.

Isumaginninnermi Naammagittaalliuuteqartarfik isumaqarpoq aappariit pensionisiassat qaffasinnerpaat  pissarsiarisimagaat, tassaasut Inatsisartut peqqussutaanni nr. 4-mi, 7. Maj 2007-imeersumi § 11 malillugu aappariinnut tamarmik siusinaartumik pensionisialinnut tunniunneqarsinnaasut.

Kiisalu Isumaginninnermi Naammagittaalliuuteqartarfik isumaqarpoq aappriit inummut tapimik pissarsinissamut pisinnaatitaanngitsut, pissutigalugu aapaariit nammineq atugassaat akiligassat aalajangersimasut ilanngaatigereerlugit ima amerlaasuseqarmata aappariit nalinginnaasumik ulluinnarni inuuniarnissaannut naammallutik.

Isumaginninnermi Naammagittaalliuuteqartarfiup kommunimut oqaatigaa inummut tapimik qinnuteqarnermi  qinnuteqartut  ataasiakkkaat pisariaqartitaat pillugit piviusorsiortumik naliliisoqartassasoq. Siusinaartumik pensionisiat pillugit peqqussummi inummut tapinut tunngatillugu qummut killiliinissamut malittarisassani tunngavissaqanngilaq.

Isumaginninnermi Naammagittaalliuuteqartarfik kommunip aalajangiineranik allanngortitsinissamut inatsisitigut tunngavissaqanngilaq.

Aalajangiinermut inatsisitigut tunngavigisaq tassaavoq siusinaartumik pensionisiat pillugit Inatsisartut peqqussutaanni nr. 4-mi, 7. Maj 2007-imeersumi §§ 11 aamma 15.

2.

40.72.03 pisortanit ikiorsiissutit – aapparisap qimannera – pilersuisussaaneq:

  1. april 2011

Suliami pineqarpoq anaanaq  tallamanik mikisunik qitornalik. Naammagittaalliuuteqartarfik isumaqarpoq qinnuteqartoq pisortanit ikiorsiissutinik pissarsinissamut pisinnaatitaasoq. Aalajangiinermi Isumaginninnermi Naammagittaalliuuteqartarfiup ilaatigut pingaartippaa aappariit najuaqatigiikkunnaarsimanerat avinnissamullu piareersimanerat. Naliliinermut ilaavoq aappariit aappariittut najugaqatigiikkunnaartut imminnut pilersuiffigeqatigiinnissamut pisussaaffeeruttarnerat , taamaattumik aappaasoq qinnuteqartumut meeqqanullu akilersuinissamik pisussaaffilerneqarsimasussaagaluarpoq. Isumaginninnermi Naammagittaalliuuteqartarfiup aalajangiinermini innersuussutigaa akilersuutissat aalajangersaaviginissaannut kommuni pisinnaatitaaffimmik tigusisinnaasimagaluartoq kingornalu tamakku tunniunneqarnissaannik piumasaqarnissaq isumagalugu. Qinnuteqartup aapparmi aningaasarsiaasa allagartaannik pissarsisinnaasimannginnera qinnuteqartup meeqqallu iluaqutissaannut akornusiissanngilaq. Kommuni qinnuteqartup meeqqallu akilesuiffigineqarnissaannut ikiuunnissamut qinnuigineqarpoq.

Aalajangiinermi inatsisitigut tunngavigineqarpoq pisortanit ikiorsiissutit pillugit Inatsisartut peqqussutaanni nr. 15-imi, 20. November 2006-imeersumi § 4, imm. 2 aamma § 5, imm. 1  aamma imm. 2, § 7 aamma § 13, kiisalu § 6, imm. 1, oqaaseqatigiit siulliit tulliilu.

3.

2010-035918 ilinniagalinnut pisortanit ikiorsiissutit:

  1. april 2011

Suliami pineqarpoq anaanaq kisermaaq ilinniagaqartoq. Pisortanit ikiorsiissutinik qinnuteqarsimavoq qaammammut ilinniarnersiutit 3.587,00 koruuniusut imminut meeqqamullu pilersuinermut naammanngimmata. Anaanaasup pisariaqartitai kommunip naatsorsuiffigai kingornalu pisortanit ikiorsiissutinik 2.334,00 koruuninik akuersissuteqarfigalugu.

Isumaginninnermi Naammagittaalliuuteqartarfik isumaqarpoq qinnuteqartoq pisortanit ikiorsiissutinik pissarsinissamut pisinnaatitaanngitsoq ilinniagaqartuunini pissutigalugu. Isumaginninnermi Naamaagittaalliuuteqartarfiup  innersuussutigaa pisortanit ikiorsiissutinik tunniussinissamut akuersissuteqartoqarsinnaanngitsoq qinnuteqartoq pilersuinissamut isumalluuteqareerpat. Isumaginninnermi Naammagittaalliuuteqartarfiup aalajangiinermini pingaartutut isigaa qinnuteqartoq inuuniarnerup tungaatigut nalaataqarnerlussimanngimmat, aammalu suliffissarsiortutut sukkulluunniit suliartoquneqarnissamut piareersimasuunngimmat.

Kiisalu Isumaginninnermi Naammagittaalliuuteqartarfiup oqaatigissavaa pisortanit ikiorsiissutit tunniunneqarsimasut utertillugit akilerneqassanngimmata.

Aalajangiinermut inatsisitigut tunngavigineqarpoq pisortanit ikiorsiissutit pillugit Inatsisartut peqqussutaanni nr. 15-imi, 20.  November 2006-imeersumi § 4, imm. 2, § 7, imm. 1 aamma § 8, imm. 1 oqaaseqatigiit siulliit.

4.

2010-055413  pisortanit ikiorsiissutinik tunniunneqartunik utertitsineq – atornerluisutut katsorsartinneq:

  1. april 2011

Qinnuteqartoq ukiumi 2007-imi katsortinnissani pillugu pisortanit ikiorsiissutinik tunineqarpoq. Ikiorsiissutit tunniunneqartut utertitassanngorlugit tunniunneqarput. Qinnuteqartup akileraarutinik utertoorutissaqarneranut tunngatillugu kommunip utertoorutissat uninngatippai qinnuteqartup utertitassaanut ilanngaatissatut. Tamatuma kingorna qinnuteqartup utertitsinissaminik uppernarsaat atsiorpaa.

Isumaginninnermi Naammagittaalliuuteqartarfik isumaqarpoq kommuni pisortanit ikiorsiissutit, katsorsartinnissamut angalanissamullu atugassatut tunniunneqartut utertillugit akileqqunissaannik piumasaqassalluni pisinnaatitaanngitsoq. Taamatuttaaq kommuni qinnuteqartup akileraarutinit utertoorutissaanik uninngatitsinissamut pisinnaatitaanngilaq. Aalajangiinermt tunngavigineqarpoq aningaasanik tunniunneqartunik utertitsinissamut piumasaqaatit nammassineqannginnerat. Akileraarutinit utertoorutissat  utertissanut atorneqartut qinnuteqartumut utertillugit akilerneqassapput, taamatuttaaq qinnuteqartup kommunimut utertillugit akilersimasani tigoqqissavai.

Kiisalu Isumaginninnermi Naammagittaalliuuteqartarfiup oqaatigissavaa kommuni sorlerluunniit pisortanit ikiorsiissutinik utertillugit akileeqqusinissamut tunngatillugu kommunip nammineq iluani malittarisassaliorsinnaanngitsoq, malittarisassani  qinnuteqartup katsorsartinnini, ilinniarnini assigisaaluunniit naammassisinnaanerai apeqqutaatillugu.

Isumaginninnermi Naammagittaalliuuteqartarfiup kommunip aalaajangiinera allanngortippaa.

Aalajangiinermut tunngaviuvoq pisortanit ikiorsiissutit pillugit Inatsisartut peqqussutaanni nr. 15-mi, 20. November 2006-imeersumi §§ 20, imm. 1, aamma 28, imm. 1, oqaaseqatigiit siulliit aamma oqaseqatigiit aappaat.

5.

2009-022116  Pisortanit ikiorsiissutinik utertitsineq – angalanermi aningaasartuutit:

  1. april 2011

Suliami pineqarput aappariit marlunnik ukiulimmik nunami allami napparsimmavimmut suliaritikkiartortussamik qitornallit. Kommuni ataataasup angalanissaanut atugassanik aningaasanik pisortanit ikiorsiissuteqarpoq, ikiorsiissutit utertitassanngorlugit tunniunneqarput. Aningaasat tunniunneqarnerinut atatillugu akiligassaqarnermut allagartaq  ataataasup atsiorpaa. Ataataasup aningaasanik tunniunneqartunik utertitsinissamik piumasaqaat naammagittaalliuutigaa, tassunga ilanngullugu kommunip akiitsunik ikilisaanissaq isumakkeerinissarluunniit itigartitsissutigimmagit.

Isumaginninnermi Naammagittaalliuuteqartarfik isumaqarpoq ataataasup ikiorsiissutit utertillugit akilissanngikkai. Aalajangiinermut tunngavigineqarpoq ikiorsiissutit sumilluunniit tunngaveqaraluarpata utertititsinissamik piumasaqarnermut piumasaqaatinik nammassinninnermut uppernarsaammik takussutissaqanngilaq.

Isumaginninnermi Naammagittaalliuuteqartarfiup aamma innersuussutigaa angalanermut atugassanik ikiorsiissutinik tunniussinissamut inatsisitigut tunngavissaqarsimanngippat, taamaattorli ataataasup utertitsinissamik oqaasii tunngavigiinnarlugit ikiorsiinissaq akuersissutigineqarsimappat, utertitsinissamik piumasaqarneq atorsinnaanngilaq. Tamatumunnga tunngaviuvoq kommnip akuersissuteqartarnermi malittarisassanik eqqortitsisussaanera, tamannalu isumaqarpoq ikiorsiissuteqarnissamut piumasaqaatit pigineqanngipata utertitsinissamik piumasaqaateqartoqarsinnaanngilaq.

Kommunip aningaasanik atorniartarfittut atornissaanut peqqussummi tunngavissaqanngilaq.

Kommunip aalajangiinera allanngortinneqarpoq.

Aalajangiinermut inatsisitigut tunngavigineqarpoq pisortanit ikiorsiissutit pillugit Inatsisartut peqqussutaanni nr. 15-imi, 20. November 2006-imeersumi §§ 27 aamma 28.

6.

2010-0308688 Meeqqanut tapinik naatsorsuisarneq – inooqatiginneq:

  1. april 2011

Suliami pineqarpoq anaanaq marlunnik qitornalik, taanna 4. Januar 2010 meeqqanut tapermik qinnuteqarpoq. Ullormit 7. August 2009-miit inooqateqarsimavoq. Aallaqqaammut kommuni meeqqamut tapermik akuersissuteqarpoq 2009-mi anaanaasup isertitai tunngavigalugit.

Aalajangiinermi kingusinnerusukkut pisumi anaanaq itigartinneqarpoq nammineq aappaasullu ataatsimut isertitaat tunngavigalugit.

Isumaginninnermi Naammagittaalliuuteqartarfik isumaqarpoq anaanaasoq januar 2010-miit meeqqamut tapermik pissarsinissamut pisinnaatitaasoq nammineq isertitai tunngavigalugit. Qinnuteqarnerup nalaani anaanaasup inooqatigisaatalu sivikinnerpaamik ukiumi ataatsimi inooqatigiissimannginnerat innersuussutigineqarpoq. Taamaattumik inooqataasup isertitai naatsorsuinermi ilanngunneqartussaanngillat.

Isumaginninnermi Naammagittaalliuuteqartarfiup oqaatigaa meeqqamut tapeq september 2010-miit naatsorsoqqinneqassasoq, pissutigalugu taamanikkut inooqatigiinneq ukiumi ataatsimi atareersimammat. Kingornagut meeqqamut tapeq inooqatigiit ataatsimut isertitaat tunngavigalugit, inooqatigiinneq ataannarsimappat, naatsorsorneqartassapput.

Isumaginninnermi Naammagittaalliuuteqartarfiup kommunip aalajangiinera allanngortippaa.

Aalajangiinermut tunngaviuvoq meeqqanut tapisiat pillugit Inatsisartut peqqussutaanni nr. 11-mi, 31. Oktober 1996-imeersumi § 1, imm. 1 aamma § 3, imm. 1 aamma imm. 3, kiisalu § 4, im. 1.

7.

2010-040320  Meeqqanut akilersuutit tunniunneqartarnerat:

  1. april 2011

Suliami pineqarpoq anaanaq ullormi 18. Oktober 2010-mi panimminut akilersuutinik siumoortumik qinnuteqarsimasoq. Pania taamanikkut qatanngummini angajullermi najugaqarpoq 10. Klassemi atuarnini ingerlatiinnarniarlugu.

Kommuni qinnuteqaammik itigartitsigallarpoq niviarsiaqqap kimit pilersorneqarnerata misissuiffigeqaarnissaa innersuussutigalugu. Naammagittaalliuummi anaanaasup oqaatigaa meeqqanut akilersuutinik qinnuteqaatini itigartinneqarsimasoq panimmi angajumini najugaqanera pissutigalugu.

Tamatuma kinguneraa meeqqamut akilersuutit anaanaasup panianut angajullermut tunniunneqarmata.

Isumaginninnermi Naammagittaalliuuteqartarfik isumaqarpoq meeqqamut akilersuutit siumoortumik 18. Oktober 2010 aallarnerfigalugu anaannaasumut tunniunneqartariaqarsimagaluartut.

Paniup nukarliup angajumini najugaqarnera  meeqqamut akilersuutinik siumoortumik tunniunneqartartut tunniunnissaannut akornutissaanngilaq. Tunniussinissamut apeqqut pingaarutilik tassa meeraq kimit pilersorneqarnersoq.

Isumaginninnermi Naammagittaalliuuteqartarfiup pingaartutut isigaa suliami taaneqartoq anaanaasoq panimmi angajulliup konto-anut aningaasanik ikisiuartarsimasoq panimmi nukarliup pilersornissaanut atugassanik. Taamatuttaaq taaneqarpoq kommunimit anaanasulluunniit panianit angajullermit assortorneqanngimmat anaanaasup panimminik nukarlermik pilersuinerata ingerlaannarnera. Kommunip meeqqamut siumoortumik akilersuutit panimmut angajullermut tunniunneqarsimasut utertillugit akilerneqarnissaat piumasarisinnaanngilaa, pissutigalugu taassuma aningaasanik pissarsinissamut pisinnaatitaannginnini ilisimasimasimanngimmagu.

Isumaginninnermi Naammagittaalliuuteqartarfiup kommunip aalajangiinera allanngortippaa.

Aalajangiinermut inatsisitigut tunngavineqarpoq meeqqanut akilersuutit il. il. kiisalu meeravissiartaarnermi tapiissutit tunniunneqartarnerat pillugit Inatsisartut peqqussutaanni nr. 2-mi, 3. Marts 1994-imeersumi § 4 aamma Namminersornerullutik Oqartussat meeqqanut akilersuutit il. il. kiisalu meeravissiartaarnermi tapiissutit tunniunneqartarnerat pillugit nalunaarutaanni nr. 36-imi, 26. Juli 1994-imeersumi § 4, imm. 1.

8.

2009-015941  Naartunermi erninermilu ullormusiassanik naatsorsuisarneq – suliamik utertitsineq:

  1. april 2011

Suliami pineqarpoq arnaq 16. December 2008-mi naartunermut atatillugu ullormusianik kommunimut qinnuteqartoq. Kommuni qinnuteqaat oqaasiinnartigut itigartitsissutigaa. Naammagittaalliuummi arnap oqatigaa ernivissatut naatsorsuutigisaq sioqqullugu sapaatip akunnerini 13-ini ullormusiassanik naatsorsuinermi tunngaviusussat iluanni sapaatip akunneri marluk napparsimasimalluni. Sapaatip akunnerini taakkunani marlunni suliffeqanngikkallernermi ikiorsiissutinik pissarsisimavoq.

Kommunip oqaatigaa naatsorsuinermi sapaatip akunneri aqqaniliinnaat tunngavigineqarsimasut, pissutigalugu arnaq piffissami tassaniinnaq akissarsiaqarluni sulisimammat. Sapaatip akunneri marluk suliffeqanngikkallarnermi ikiorsiissutisiffiusut naatsorsuinermi ilanngunneqanngillat.

Kommunip oqaatigaa suliffeqanngikkallarnermi ikiorsiisarneq pillugu Inatsisartut peqqussutaanni  § 21, imm. 2 imatut paasisassaasoq sapaatip akunneri marluk arnap pineqartup sulinngiffii naatsorsuinermi ilanngunneqartussaanngitsut.

Isumaginninnermi Naammagittaalliuuteqartarfiup suliaq kommunimit suliareqqitassanngorlugu utertippaa. Naammagittaalliuuteqartarfik isumaqarpoq Inatsisartut peqqussutaanni § 21, imm. 2 imatut nassuiartariaqartoq arnap napparsimanini pissutigalugu sapaatip akunnerini marlunni suliffimmiinnginnera isiginnginniartariaqartoq, taamalu suliffeqaannartutut isigisariaqarluni. Taamaattumik kommunip arnap ullormusiassaanik naatsorsuinermini sapaatip akunneri marluk suliffeqanngikkallarnermi ikiorsiissutisiffiusut naatsorsuinermi ilannguttariaqarsimagaluarpai.

Suliaq utertinneqarpoq nutaamik naatsorsuineq pisussanngorlugu aammalu nutaamik aalajangiisoqartussanngorlugu.

Aalajangiinermi inatsisitigut tunngavigineqarpoq naartunermi, erninermi meeravissiartaarnermilu sulinngiffeqartarneq il. il. ullormusiaqartarnerl pillugit Inatsisartut peqqussutaanni nr. 12-imi, 31. Oktober 1996-imeersuymi § 21, imm. 2.

9.

2010-038643  pisortanit ikiorsiissutit – nammineq pigalugu inigisaq:

  1. juni 2011

Suliami pineqarput aappariit ukiukitsumik meerallit. Anaanaasoq pisortanit ikiorsiissutinik ilaatigut qaammammut aprilimut 2010 tunngatillugu ineqarnermut akiliutinut atugassanik qinnuteqarpoq, qaammammi tassani napparsimanini pissutigalugu sulisimanani. Kommuni qinnuteqaammik itigartitsivoq pisortanit ikiorsiissutit pillugt Inatsisartut peqqussutaanni nr. 15-imi, 20. November 2006-imeersumi § 13 innersuussutigalugu.  Kingornagut kommunip innersuussutigaa  nammineq pigisatut illugisamut/inigisamut ikiorsiinissamut ikiorsiissuteqarnissaq peqqussummi tunngavissaqanngitsoq.

Isumaginninnermi Naammagittaalliuuteqartarfik naak arlaleriarluni eqqaasitsereeraluarluni paasissutissanik suliamut tunngassuteqartunik qinnutigisaminik nassiussiffigineqarsimanngilaq. Taamaattumik naammagittaalliuuteqartarfiup paasissutissat pigisai malillugit aalajangiisoqarpoq.

Isumaginninnermi Naammagittaalliuuteqartarfik isumaqarpoq appariit aprilimi 2010-mi pisortanit ikiorsiisstuinik tunineqarnissamut pisinnaatitaasut. Pisortanit ikiorsiissutit tassaassapput ineqarnermut akiliut, innaallagissamut akiliut, solaroliamut aammalu inersimasunut marlunnut meeqqamullu inuussutissanut aningaasartuutissat. Ilaqutariit april qaammat isertitaqarsimappata taakku ikiorsiissutinit ilanngaatigineqassapput.

Isumaginninnermi Naammagittaalliuuteqartarfiup oqaatigaa pisortanit ikiorsiissutit pillugit peqqussummi apeqqutaatinneqanngitsoq inissiami attartortittakkami, nammineq piginneqataaffigisami (andelsbolig), namminerluunniit pigisami ineqarnermut akiliummik ikiorsiissuteqartoqassanersoq. Apeqqutaatitsinikkut peqqussutip atuuffigisaanik killeqartitsiniarneq ilitsersuusiornikkut pisinnaanngilaq, inatsimmilli tunngaveqassalluni.

Kommunip aalajangiinera allanngortinneqarpoq.

Aalajangiinermi inatsisitigut tunngavigineqarpoq pisortanit ikiorsiissutit pillugit Inatsisartut peqqussutaanni nr. 15-imi, 20. November 2006-imeersumi §§ 7 aamma 8.

10.

2009- 019838  Innarluuteqarneq – tapersersorterqarnermi nal. akunneri atugassiissutit:

  1. juni 2011

Suliami pineqarpoq arnaq qaratsamigut aanaartoornermi kingunersanik annertuumik innaarluuteqalersimasoq. Tapersersortip nalunaarusiaa malillugu taannalu tunngavigalugu qinnuteqartoq sapaatip akunneranut nal. akunneri 40 ikiorteqartinneqalerpoq.

Tapersersorteqarnermut nal. akunneri pillugit nutaamik qinnuteqaammut tunngatillugu Isumaginninnermut Naalakkersuisoqarfik (Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik) aalajangerpoq sapaatip akunneranut nal. akunneri 20 tapersersorteqarnermut atugassatut akuersissutigalugit. Tapersersortip nalunaarusiaa malillugu qinnuteqartup peqqissutsip tungaatigut aammalu imminut ikiorsinnaanermi tungaatigut siuariaallaateqanngilaq. Isumaginninnermut Naalakkersuisoqarfiup tapersersorteqartitsinerup nal. akunnerinut 20-nut appariaateqartinnera tunngavilerpaa qinnuteqartoq siornatigutut sammisaqartinneqarunnaartussaasoq qasuersaarfeqarnissani aamma pisariaqartimmagu.

Isumaginninnermi Naammagittaalliuuteqartarfiup Isumaginninnermut Naalakkersuisoqarfiup aalajangiinera allanngortippaa. Isumaginninnermi Naammagittaalliuuteqartarfik isumaqarpoq Naalakkersuisoqarfiup qinnuteqartup tapersersorteqarnermut nal. akunnerinik pisariaqartitsinerata milleriarsimanera uppernarsaasinngikkaa, taamalu aamma tamanna pillugu paasissutissanik takussutissaqarani. Taamaattumik Isumaginninnermi Naammagittaalliuuteqartarfik isumaqarpoq qinnuteqartup sapaatip akunneranut nal. akunneri 40 suli tapersersorteqarnissamut pisariaqartikkai.

Aalajangiinermut inatsisitigut tunngavigineqarpoq annertuumik innarluutilinnik ikiorsiisarneq pillugu Inartsisartut peqqussutaanni nr. 7-imi, 3. November 1994-imeersumi § 7 aamma annertuumik innarluutilinnik ikiorsiisarneq pillugu Namminersornerulllutik Oqartussat nalunaarutaanni nr. 9-mi, 4. April 2008-meersumi §§ 9 aamma 10.

11.

2011-047016  Ineqarnermut tapiissutit – qinnuteqaat:

  1. Juni 2011

Suliami pineqarpoq angut kisimiittoq. Taanna 9. Februar 2011 ineqarnermut tapiissutinik qinnuteqarsimavoq, tassani pineqarlutik ukiumut 2011-mut ineqarnermut tapiissutit.

Kommunip 1. Marts 2011-imiit atuutilersunik ineqarnermut tapiissutinik akuersissuteqarpoq, taakku naatsorsorneqarlutik 2011-mi isertitassatut naatsorsuutigisat tunngavigalugit. Qinnuteqartup naammagittaalliuutigaa qaammatit januar aamma februar 2011 ineqarnermut tapiissutisiffiginnginnamigit.

Isumaginninnermi Naammagittaalliuuteqartgarfik isumaqarpoq qinnuteqartoq 1. Januar 2011 aallarnerfigalugu ineqarnermut tapiissutinik pissarsinissamut pisinnaatitaasoq. Aalajangiinermut tunngavigineqarpoq ineqarnermut tapiissutisinissamut apeqqutaanngitsoq ukiup aallartilaarnerani qinnuteqaateqarsimaneq. Aalajangiinermi pingaartinneqarpoq qinnuteqartup ikiorsiissutinik pissarsinissani inatsisitigut illersugaasumik qallikkut pisariaqartitamigut piumasaqaatigisinnaagaa. Tamanna isumaqarpoq qinnuteqartup nammineq inuttut atugarisami allannguuteqarnerinik kommuni ilisimatitassarigaa, taamaalilluni taamaaliornissamut tunngavissaqarpat ineqarnermut  tapiissutit kommunip iluarsiivigissammagit.

Kommunip aalajangiinera allanngortinneqarpoq.

Aalajangiinermut inatsisitigut tunngavigineqarpoq inissiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. Maj 2001-imeersumi §§ 7 aamma 8 aamma inissiani attartittakkani ineqarnermut tapiissutit pillugit Inatsisartut peqqussutaata allanngortinneqarnera pillugu Inatsisartut peqqussutaanni nr. 13-imi, 14. November 2004-imeersumi § 9.

12.

2010043447  Ineqarnermut tapiissutinik naatsorsuineq – suliamik utertitsineq:

  1. juni 2011

Suliami pineqarput aappariit angerlarsimaffimminni qitornaminnik najugaqateqanngitsut, massakkut inigisaminnut 2010-mi nuussimasut. Ineqarnermut tapiissutinik qinnuteqaat kommunip itigartitsissutigaa, itigartitsinermi kommunip innersuussutigalugu appariit ataatsimut isertitaasa ineqarnermut tapiissutisinissamut isertitatigut qummut killissarititat akimorsimammatigit. Aappariit oqaatigaat nuliaasoq siusinaartumik pensionisiaqartoq uialu suliffeqanngitsoq.

Kingusinnerusukkut kommunip aalajangiineq tunngavilerpaa uiusoq massakkut suliffeqanngikkaluarluni, taamalu qangaanerusumut naleqqiullugu isertitaqartiginngikkaluarluni, isertitatigut ataavartumik ajorseriaateqarsimasutut oqaatigineqarsinnaanngimmata, imaammat Naalakkersuisoqarfiup ilitsersuusiaa malillugu isertitatigut annertuumik ataavartumillu appariaateqarneq imatut paasisariaqarmat ineqarnermut tapiissutinik naatsorsuineq isertitassatut naatsorsuutigisat tunngavigalugit pisinnaasoq.

Isumaginninnermi Naammagittaalliuuteqartarfiup siulittaasua isumaqarpoq kommunip aalajangiinera eqqunngitsuusoq. Aalajangiinermi pingaartutut isigineqarpoq isertitassatut naatsorsuutigineqartut tunngavigalugit tapiissutissanik naatsorsueqqittoqarsinnaaneranut peqqussutip isertitatigut appariaateqarnerup ataavartuunissaanik piumasaqaateqannginnera.

Taamaammat Naalakkersuisoqarfiup inissiani attartortittakkani ineqarnermut tapiissutinik qinnuteqaatit suliarineqartarnerat pillugu ilitsersuusiaa, 2001-imi saqqummersoq matumunnga tunngatillugu eqqortuunngilaq. Peqqussutip atuuffii Naalakkersuisoqarfiup ilitsersuusiaa tunngavigalugu annikillisinneqarsinnaanngillat.

Taamaattumik kommuni ukiumut 2011-mut tunngatillugu ineqarnermut tapiissutinik 2001-mi isertitassatut naatsorsuutigineqartut tunngavigalugit nutaamik  naatsorsuissaaq.

Aalajangiinermi inatsisitigut tunngavigineqarput  inissiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. Maj 2001-imeersumi §§ 5 aamma 6 aamma ineqarnermut tapiissutisinissamut aningaasanut killiliussat, nammineq akileeqataassutissat kiisalu ineqarnermut tapiissutit aningaasartaasa ikinnerpaaffissaat amerlanerpaaffissaallu pillugit Namminersornerullutik Oqartussat nalunaarutaanni nr. 12-imi, 2. Maj 2003-meersumi  §§ 1 aamma 2.

13.

2010-040270  pisortanit ikiorsiissutinik naatsorsuineq – suliamik utertitsineq:

  1. september 2011

Isumaginninnermi Naammagittaalliuuteqartarfiup siulittaasua isumaqarpoq inuup ullut 14-kkaarlugit akissarsisartup agguaqatigiissillugu qaammammut akissarsiassaanik naatsorsuinermi tunngavigineqassapput inuup pineqartup sapaatip akunneranut akissarsiai.

Tamatuma kingorna kommunip sapaatip akunnerini 13-ini inuup pineqartup akissarsiassai naatsorsussavai, qaammatini pingasuni akissarsianut naapertuuttut. Akissarsiat 3-mik agguarneqassapput, taamalu inuup pineqartup qaammammut akissarsiassai nassaarineqassapput. Naatsorsuinermi naatsorsuutigineqassaaq qaammat ullunit 28-nit amerlanerusunik ulloqartarmat.

Aalajangiineqrmi qarasaasiami nittartakkami takutinneqartutut takutinneqarpoq naatsorsuineq qanoq ingerlanneqassasoq.

Suliaq utertinneqarpoq naatsorsuinermut tunngatillugu allaaserineqartut tunngavigalugit nutaamik suliassanngorlugu.

Alajangiinermi inatsisitigut tunngavigineqarpoq pisortanit ikiorsiissutit pillugit Inatsisartut peqqussutaani nr. 15-imi, 20. November 2006-imeersumi §7, § 8, § 13, imm. 2 aamma § 14.

14.

2009-016920  Ineqarnermut tapiissutit – isertitatigut allannguutit – suliap utertinneqarnera:

  1. december 2011

Qinnuteqartoq siornatigut ineqarnermut tapiissutisisimanngitsoq tapiissutinik qinnuteqaamminik itigartinneqarpoq, itigartitsinermi innersuussutigineqarluni qinnuteqartup aappaatalu isertitaasa ineqarnermut tapiissutisinissami aningaasanut killissarititat akimormatigit. Naammagittaalliuummi oqaatigineqarpoq aappaasoq suliffeqanngitsoq, aappariillu sisamanik qitornaqartut.

Kommunip oqaatigaa aappariit itigartinneqartut, inoqutigiiit isertitaat amerlavallaarmata, aammalu  aappaasup suliffeqannginnerata kingunerisinnaanngimmagu ineqarnermut tapiissutit pillugit Inatsisartut peqqussutaanni nr. 3-mi, 31. Maj 2001-meersumi § 5 malilluygu aappariit ineqarnermut tapiissutinik akuersissuteqarfigineqarnerat., tassani pissutigalugu suliffeqanngineq inoqutigiit/aappariit isertitaasa ataavartumik appariaateqarnerattut isigineqarsinnaanngimmat.

Isumaginninnermi Naammagittaalliuuteqartarfiup siulittaasua isumaqarpoq kommuni nutaamik aalajangiisariaqartoq, pissutigalugu peqqussummi piumasarineqanngimmat isertitatigut appariaateqarneq annertuujussasoq ataavartuullunilu, peqqussummili taamaallaat pineqarluni isertitaqarnerup annertuumik appariaateqarsimanissaa. Tunngavittut Isumaginninnermi Naammagittaalliuuteqartarfiup innersuussutigai peqqussummi § 5-imi allasimasut. Taamaattumik aapparit ineqarnermut tapiissutinik pissarsinissamut pisinnaatitaasussaallutik inoqutigiit isertitamikkut appariaateqarnerat annertuutut isigineqarpat.

Isumaginninnermi Naammagittaalliuuteqartariup oqaatigigaa ineqarnermut tapiissutit pillugit Inatsisartut peqqussutaanni § 5-mi pineqarmata pisut qinnuteqartup siornatigut ineqarnermut tapiissutinik pissarsiffiginngisai.

Qinnuteqartoq ineqarnermut tapiissutisissarpat peqqussummi § 10 atorneqassaaq, tassani pineqarmat inoqutigiit isertitaasa annertuumik ataavartumllu appariaateqarsimanissaat naatsorsueqqittoqassappat.

Aalajangiinermut tunngaviuvoq ineqarnermut tapiissutit pillugit Inatsisartut peqqussutaanni nr. 3-mi, 31. Maj 2001-imeersumi § 5, immk. 2.

15.

2011-049006  Sulisumut nal. akunnermusialimmut ineqarnermut tapiissutinik naatsorsuussineq:

  1. december 2011

Suliami pineqarpq ilinniartitsisoq nal. akunnermusialik, nal. akunnerini aalajangersimasuni atuartitsineq ajortoq. Ineqarnermut tapiissutinik qinnuteqarneranut atatillugu kommuni ullut 14-kkaarlugit akissarsiat allagartaat arfinillit piumasarai, taakkulu tunngavigalugit ukiumut aningaasarsiai naatsorsorlugit 126.252 koruuninut, taavalu ineqarnermut tapiissutit 2.285 koruuninut naatsorsorlugit. Naatsorsuinermi sulinngiffeqarnissat aammalu qinnuteqartup qaammammi januarimi suliffeqarsimannginnera naatsorsuutigineqarsimanngillat.

Isumaginninnermi Naammagittaalliuuteqartarfiup siulittaasuata kommunip qinnuteqartup ukiumut aningaasarsiaanik naatsorsugai pillugit aalajangiinera allanngortippaa.

Isumaginninnermi Naammagittaalliuuteqartarfiup siulittaasuata aalajangiinermut tunngaviliuppai piffissami sapaatip akunnerinik 12-inik sivisussuseqartumi qinnuteqartup isertitarisimasai 36.330 koruniusut, sapaatip akunneranut naatsorsorlugit 3037 koruuniusut. Isumaginninnermi Naammagittaalliuuteqartarfiup siulittaasua naliliivoq qinnuteqartoq sapaatip akunnerin 41-ni sulisimassasoq, taakkulu akileraaruteqaataasussanik isertitassatut naatsorsuutigisanik 114.127 koruuninik  naleqartut. Tamanna tunngavigalugu ineqarnermut tapiissutisiassat qaammammut 2.805 koruuniussapput.

Aalajangiinerm inatsisitigut tunngaviuvoq inissiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. Maj 2001-imeersumi § 5.

16.

2010-043122  Suliffeqanngikkallarnermi ikiorsiissutit – nammineq pisuussutigalugu suliffeerunneq:

  1. december 2011

Suliami pineqarpoq qinnuteqartoq nammineq suliffimmit soraarsimasoq, soraaginnarlunilu suliffissarsiortutut nalunaarsortissimasoq. Sulifeqanngikkallarnermi ikiorsiissutinik qinnuteqarnerup nalaani kommunip qinnuteqartoq sapaatip akunnerini sisamani ikiorsiissutinik pissarsisinnaajunnaarallartutut nalunaarsorpaa, tassani innersuussutigalugu qinnuteqartup suliffimminit imminut soraarsissimanera, taamaalilluni suliffeerulluni nammineq pisuussutigisaminik.

Isumaginninnermi Naammagittaalliuuteqartarfik isumaqarpoq qinjnuteqartoq suliffeqanngikkallarnermi ikiorsiissutinik pissarsinissamut pisinnaatitaanngitsoq, aamma tamanna atuuttoq sapaatip akunnerisa sisamat qaangiunneranni. Qinnuteqartup suliffimmini pissusilersornera pissutaasimavoq suliffimminit soraarsitaaneranut. Nammineq pisuussutigalugu suliffeerunnermi suliffeqanngikkallarnermi ikiorsiissutinik pissarsisoqarsinnaanngilaq.

Aalajangiinermi Isumaginninnermi Naammagittaalliuuteqartarfiup oqaatigaa  suliffeqanngikkallarnermi ikiorsiissutit pillugit peqqussut malillugu kommuni ikiorsiissutinik pisinaatitaanermik atorunnaarsitsigallarsinnaanngitsoq, taamaaliorsinnaallunili aatsaat qinnuteqartoq ikiorsiissutinik pisinnaatitaapppat, aammalu piffissami suliffeqanngikkallarnermi ikiorsiissutinik pisartagaqarfigisamini qinnuteqartoq pisuni § 11, imm. 1-mi nr. 1-miit 5-imut taagorneqartuni nammineq pisuussuteqarsimappat.

Kommuni pisortanit ikiorsiissutinik pissarsisinnaanermut periarfissat pillugit aammalu suliffeqanngikkallarnermi pisortanit ikiorsiissutinik pissarsinissamut piumasaqaataasut naammassineqarsimanerat pillugit ilitsersuisimasussaagaluarpoq.

Aalajangiinermut inatsisitigut tunngaviupput suliffeqanngikkallarnermi ikiorsiissutit pillugit Inatsisartut peqqussutaanni nr. 5-imi, 1. Juni 2006-imeersumi § 2, imm. 1, § 3 aamma § 11, imm. 1, aamma suliffeqanngikkallarnermi ikiorsiissutit pillugit Inatsisartut peqqussutaata allanngortinneqarnera pillugu Inatsisartut peqqussutaanni nr. 7-imi, 20. November 2006-imeersumi § 17, imm. 1.