Illit Ingerlatseqatigiiffik akerleralugu 

Ingerlatseqatigiiffik pillugu naammagittaalliuutit Atuisartunut Pisisartunullu Maalaaruteqartarfiup 3. november 2016-imi suliaraa imalu aalajangiilluni:

AALAJANGIUSSAQ

Aalajangernerup matuma tiguneqarneranit ullut 30-t qaangiutsinnagit Ingerlatseqatigiiffik naammagittaalliuuteqartumut 2.996 kr.-t akilissaaq kiisalu taakku erniaat ilanngullugit erniat pillugit inatsit ulloq 12. november 2015-imeersoq malillugu akiliisoqarnissaata tungaanut.

Aallaqqaasiut

Naammagittaalliuut 12. oktober 2015-imi tiguneqarpoq. Suliaq inuup ataatsip timmisartumik angalanissaraluanik ulloq 23. juli aamma 6. august 2015-imi pisussaagaluartumut naammagittaalliuutigineqartup atorunnaarsinneranut tunngavoq.

Akiliutivit utertinnissaat piumasarivat.

Ingerlatsiviup unitsitsinermini ilisimatitsissutigisimavaa aningaasat utertinneqassasut, kisianni aamma saaffiginnissummut akissuteqaranilu suliap suliarinerani peqataanngilaq.

Suliamik saqqummiussineq

Ulloq 24. april 2015 23. juli aamma 6. august 2015-imi ingerlaartussamut Ingerlatseqatigiiffimmi billetisivutit.

Aallarfissaq qanillilluinnartoq ingerlatsiviup angalanissaq taamaatippaa ilisimatitsivorlu pisiap akia piaarnerpaamik utertinneqarumaartoq. Tamatuma kingorna oqarasuaatikkut qarasaasiakkullu utertinneqartussat nukingisaarutigaatit akineqarnalli.

Tamatuma kingorna 18. september 2015-imi naammagittaalliuummik taamanikkut atuisartunut pisisartunullu maalaaruteqartarfiup ataatsimiititaliaanik taaneqartartumut nassiussigaluarputit pisiavit akiata utertinneqartussaasoq oqaatigalugu taamaattorli naammagittaalliuut nassiusseqqinnermi 12. oktober 2015-imi tiguneqarlunilu nalunaarsorneqarpoq.

Naammagittaalliuutigineqartoq, ingerlatseqatigiiffik, illinnit Atuisartunut Pisisartunullu Maalaaruteqartarfianilluunniit saaffiginnissutinut qisuariarsimanngilaq suliamullu atatillugu oqaaseqarsimanani.  Atuisartunut Pisisartunullu Maalaaruteqartarfiup 12. oktober 2015-imi naammagittaalliuut ingerlatseqatigiiffimmit oqaaseqaqquneqarpoq. Saaffiginnissut akineqanngilaq soorluttaaq ingerlatseqatigiiffiup emailiata aappaa atunngitsoq. Atuisartunut Pisisartunullu Maalaaruteqartarfittut Ataatsimiititaliap allatseqarfiata ulloq 8. februar 2016-imi  ingerlatseqatigiiffimmi aqutsisoq naammagittaalliutaasumut attaviginerani paasissutissanik atorneqarsinnaasumik tunniusseqqullugu qinnuigineqarpoq.   Saaffiginnissut taanna akissuteqarfigineqanngilaq.

Ingerlatseqatigiiffiup pisortatigoortumik najugaqarfia nalunaarsorneqarsimasoq suliap suliarineqarnerata nalaani ilisimaneqanngitsutut nalunaarutigineqarpoq.  Taamaattumik suliami uppernarsaatit annertunerusut ingerlatseqatigiiffimmut najugaanut ilisimaneqartumut kingullermut Atuisartunut Pisisartunullu Maalaaruteqartarfiata ulloq 31. oktober 2016-imi nalunaarfigaa suliaq naammattumik erseqqissaaffigineqarsimasutut isigineqartoq taamatullu piaarnerpaamik aalajangiisoqarnissaa naatsorsuutigineqartoq.

Tunngavilersuut

Aallaqqaammut maalaaruteqartarfik isumaqarpoq suliap najukkami suliarinissaanut pisinnaatitaaffigineqartoq tassami ingerlatseqatigiiffik ilaatigut kalaallisut oqaasertaqartumik qarasaasiakkut nittartakkani aqqutigalugu Kalaallit Nunaanni naammagittaalliuuteqartup taamatuttaaq najugaqarfiani ussassaaruteqarsimammat, takuuk matumani eqqartuussisarneq pillugu inatsimmi § 212, imm. 2, 2 pkt., tak. § 207.

Angallassineq pillugu isumaqatigiissummut atatillugu nunap sorliup inatsisai atorneqassanersut isumaqatigiissutaasimanerannik ersittoqanngilaq.  Suliffeqarfimmit suliffeqarfiup aqqa atorlugu aammalu Kalaallit Nunaat sutigut tamatigut isiginiarlugu nalinginnaasumik tuniniaanermigut aammalu Kalaallit Nunaanniit Kalaallit Nunaannullu angallassinissamut tunngatillugu angallassinissaq pillugu isumaqatigiissut Kalaallit Nunaanni atuisumut tunineqarsimammat illuatungeriit akornanni eqqartuussisoqassappat nunatsinni eqqartuussivik aqqutigineqassasoq maalaaruteqartarfik isumaqarpoq.  Pisut aallaavigalugit erseqqilluinnarpoq isumaqatigiissut qaninnerpaatut Kalaallit Nunaannut attuumassuteqartoq, tak. Rom-konventionens art. 4, imm. 1, tak. imm. 5, 2. imm. kalaallit nunaanni eqqartuussiveqarnermut ilanngutsinneqartoq nunat tamalaat pisussaaffiisigut inatsisinik toqqaasarneq pillugu peqqussutikkut nr. 413 13. september 1985-imeersukkut.

Angalanissamik aaqqissuussisutut ingerlatseqatigiiffik nammineq atini atorlugu pilersuisuusoq aqqutigalugu angallassinissaanut billetisisimavutit, angalanissaq ingerlatseqatigiiffiup piviusunngortissimanngilaa, tassani illit pisunut pisuussuteqanngilatit.  Tamannalu pissutigalugu akiliutigisimasavit utertinneqarnissaannut pisinnaatitaavutit.

Ilisimatitsivutit billetti 2.996 kr.-nik akilersimallugu akiliutaasimasorlu billetikkut uppernarsarneqarpoq.  Naammagittaalliuutip tunniutinnginnerani tamanna pillugu ingerlatseqatigiiffimmut nalunaarutigisimallugu ilisimatitsissutigaat, kisiannili qanga naammagittaalliorsimanersutit imaluunniit taassuma imaa pillugu uppernarsaatitaqanngilaq. Billetip akiata assigiinngissutaannik taarsiivigineqarnissat ingerlatseqatigiiffimmut ulloq 12. oktober 2015-imi e-mailikkut piumasaqaatigisimagit uppernarsarpat taamaattumillu piumasaqaatigineqartoq erniat pillugit inatsit malillugu ulloq manna aallarnerfigalugu ullut 30-it ernialersorneqassaaq.  

Tamanna pissutigalugu Maalaaruteqartarfik isumaqarpoq ingerlatseqatigiiffik ilinnut 2.996 kr.-nik akiliuteqassasoq, kiisalu taakku erniaat ilanngullugit erniat pillugit inatsit 12. november 2015-imeersoq malillugu akiliinissaq tikillugu.

Naammagittaalliuuteqarnissamut ilitsersuut

Atuisartunut Maalaaruteqartarfittut Ataatsimiitsitaliap aalajangiinera allaffissornikkut oqartussaasunut allanut naammagittaalliutigisinnaanngilat, tak. tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaat nr. 39, 9. december 2015-imeersoq, § 35 imm. 2 periarfissaavoq.