Illit Inuussutissarsiortumut

Inuussutissarsiortoq  pillugu naammagittaalliuutit ulloq 20. oktober 2016-imi Atuisartunut Pisisartunullu Maalaaruteqartarfiup suliaraa ataanilu allassimasutut isumaqatigiissutaasumik:

AALAJANGIUSSAQ

Naammagittaalliuutit itigartitsissutigineqarpoq suliaq Atuisartut Pisisartullu Maalaarutaannik Aalajangiisartunit suliarineqartussatut naleqqutinngimmat.

Aallaqqaasiut

Naammagittaalliuut tiguneqarpoq ulloq 20. februar 2015. Suliami kissarsuummut uunnaavimmik nutaamik pisisimaneq taassuminngalu ikkussuineq pineqarpoq.

Pisiavit utertinneqarnissaa niuernerullu atorunnaarsinneqarnissaa, akiliutigisimasavillu utertinneqarnissai piumasarisimavat.

Inuussutissarsiortup piumasaqaativit naammassinissaa kissaatiginngilaa, isumaqaramik nioqqutissaq kissaatigineqartoq pajugutigisimallugulu ikkussorsimagamikku.

Suliamik saqqummiussineq

Naammagittaalliuutit ulloq 19. februar 2015-imeersoq ulloq 20. februar 2015-imi tiguneqarpoq. 2012-ip aallartinnerani kissarsuutinnut uunnaavimmik nutaamik apeqquteqaateqarsimasutit tassani takuneqarsinnaavoq.

Naammagittaalliuutigineqartoq ulloq 27. marts 2012-imi (ilanngussaq 1) Vvb Sime Aqua 30 inox m. 110 l.-imik katillugit 35.000,- kr.-nik akilimmik neqerooruteqarpoq .

Tassunga atatillugu uuliamik atuinermi 1/3-nik sipaaruteqarnissat neriorsuutigineqarsimavoq.

September 2012-imi uunnaavik ilissinni ikkussuunneqarpoq.

Naammagittaalliuutigineqartoq ulloq 29. april 2015-imi suliamut oqaaseqaatissani saqqummiuppai (ilanngussaq 2).

Tassani takuneqarsinnaavoq 2013-ip qeqqani naammagittaalliuutigineqartoq attavigisimagit, uunnaaviup uulia annertoorujussuaq atortarmagu angerlarsimaffimmilu paasunninnera pissutigalugu.

Illit naammagittaalliuutigineqartoq peqatigalugu angerlarsimaffimmi paasunninnermik naamasaqarsinnaasimanngilasi, ilutigisaanik isumaqatigiissutigaarsi olieflowmålerimik ikkussisoqarnissaa, taamaasiornikkut uuliamik atuinerup piviusumik aalajangerneqarsinnaaniassammat.

Taannalu uuttuut illit nammineq peersimavat.

Qaammatit 1-2-it kingorna naammagittaalliuutigineqartumut saaffiginneqqipputit, tassungalu atatillugu ullup unnuallu ingerlanerani 12,5 literimik uuliamik atuisartutit paasineqarluni.

2014-ip naalernerani naammagittaalliuutigineqartumut saaffiginneqqipputit, isumaqaravit uuliamik atuineq annertuallaartoq. Piumasaqaatit naapertorlugu uunnaavimmik nutaamik minnerusumik ikkussisoqarpoq.

Februar 2015-imi naammagittaalliuutigineqartoq attavigeqqippat, VVS-firmamik allamik attaveqarnerup kingorna ilisimatinneqarsimagavit uunnaavik nutaaq minnerusoq mikivallaartoq. Tamannalu pissutigalugu 2012-imi naammagittaalliuutigineqartup uunnaavik pisiat ikkussuuteqqippaa.

Naammagittaalliuutigineqartup oqaaseqaataanut oqaaseqaatitit ullulerneqarsimapput ulloq 7. maj 2015 (ilanngussaq 3).

Taakkunani takuneqarsinnaavoq naammagittaalliuutigineqartup pisimasup ingerlasimaneranik allaaserisimasai isumaqatiginngikkitit.

Ilaatigut oqaatigaat naammagittaalliuutigineqartoq piffissami qaammatit sisamat ingerlanerini iluarsaassisariaqartarsimasoq imaluunniit ilaatigut ikkussukkat ruujorinut aammalu silaannaarsinermut atortut taarsersortariaqarsimagai.

Februaarip qaammataani pujoorfiata silataa qernertuinnanngorsimavoq, tamannalu pissutigalugu naammagittaalliuutigineqartoq aggeqqusimavat pujoorfillu salitsillugu, tamatuma kingunerisimavaa illup iluani suna tamarmi qernertuinnanngorsimanera.

Naammagittaalliuutigineqartullu taamaallaat ikiorsiissutigisinnaasatuarisimavaa qaqorsaammik ilinnut tunisineq.

Ulluinnarni uunnaavimmiit kassuppaluttorpalaartarpoq, arlaleriarlutillu naammagittaalliuutigineqartoq taassuminnga aaqqiinissaanut qinnuigisarsimagaluarpat. Aggertarsimapput silaannaarsinermut atortut salittarlugit il. il. kisiannili iluaqutaanngitsumik.

Aasap ingerlanerani atuineq appalaarsimavoq, kisianni aaqqissuussinissamut pisariaqartitsineq suli annertusiartorluni. Tamannalu pissutigalugu naammagittaalliuutigineqartup siunnersuutigaa, uunnaavimmik pisiarineqarsimasumit minnerusumik taarserneqarnissaa, tamannalu akueraat.

Tamannali iluaqutaasimanngilaq, paasunninnermi suli illup iluanut isaasarmat.

Aamma eqqaavat uuliamut atuinermi uuttuutip ikkunneqarsimasup ullormut atuineq 18,43 literiusoq takutissimagaa, 12,5 literiinnaanngitsoq.

Naammagittaalliuutigineqartoq ulloq 1. september 2015-imi suliamut tunngatillugu allanik oqaaseqaateqarpoq (ilanngussaq 4).

Naammagittaalliuutigineqartup siusinnerusukkut oqaatigineqartut suli aalajangiussimavai aamma uunnaavimmik pisininni uuliamik sipaaruteqarnissat pillugu neriorsuummik pituttuisunngortitsisumik tunniussisimanissani assortorpaa.

Ulloq 16. september 2015-imi (ilanngussaq 5) oqaaseqaatiginikuusatit aalajangiussimavatit, tassaasut naammagittaalliuutigineqartup ilisimatitsissutigisimagaa 2012-imi uunnaavimmik pisininni uuliamik atuinikkut sipaarutissaqartutit.

Naammagittaalliuutigineqartup ulloq 1. august 2016-imi inaarutaasumik oqaaseqaatai aalajangiusimaneqarput, uuliamik atuinerni pinngitsoornak sipaaruteqarnissannik neriorsorsimanngikkaatit, soorlu naammagittaalliuutinni eqqaasattut.

Tunngavilersuut

Atuisartut Pisisartullu Maalaarutaannik Aalajangiisartut naammagittaalliuutaasoq, Atuisartut Pisisartullu Maalaarutaannik Aalajangiisartuni suliarineqarnissamut naleqqutinngitsutut nalilerneqartoq, suliariumanngissinnaavaa  tak. tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaanni nr. 39, 9. december 2015-imeersumi § 29 imm. 2.

Kissarsuutip uunnaaviata aamma/imaluunniit ikkussornerata amigaateqarnera aammalu taamaattoqarsimappat amigaataasumut taama ittumut kina akisussaaneranik Atuisartut Pisisartullu Maalaarutaannik Aalajangiisartut naliliinissaminnut periarfissaqanngillat.

Kissarsuutip uunnaavianik ajornartorsiuteqarnermut pissutaasoq paasiniassagaanni attuumassuteqanngitsumit misissuititsinissaq naliliinissarlu immaqalu ilisimannittunit nassuiaatitsinissaq pisariaqassaaq. Taama annertutigisumik misissuititsinissamut nalilersuititsinissamullu Atuisartut Pisisartullu Maalaarutaannik Aalajangiisartut akissaqanngillat soorluttaaq aamma ataatsimiititaliaq ilisimannittumik nassuiaatitsisinnaanngitsoq.

Tamanna tunngavigalugu suliaq Atuisartut Pisisartullu Maalaarutaannik Aalajangiisartunit suliarineqartussatut naleqqutinngitsutut Atuisartut Pisisartullu Maalaarutaannik Aalajangiisartut isumaqarput.

Taamaammat naammagittaalliuutit itigartitsissutigineqarpoq.

Tamanna ima isumaqanngilaq suliaq ajorsarfigigit. Ima isumaqaannarpoq piumasaqaatit akuerineqarnersoq imaluunniit akuerineqannginnersoq Atuisartut Pisisartullu Maalaarutaannik Aalajangiisartuni isummerfiginngikkaa.

Suliaq eqqartuussivikkoortinnissaanut periarfissaqarputit. Maluginiassavat inatsisitigut ikiorneqarnissannut sillimmasersimaneq ilanngullugu sillimmasersimaguit, tamanna aningaasartuutinut tamanut ilaannaanulluunniit matussusiisinnaammat. Tamatumunnga atatillugu eqqartuussissuserisumut eqqartuussivimmulluunniit attaveqassaatit.

Naammagittaalliuuteqarnissamut ilitsersuut

Atuisartunut Maalaaruteqartarfittut Ataatsimiitsitaliap aalajangiinera allaffissornikkut oqartussaasunut allanut naammagittaalliutigisinnaanngilat, tak. tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaat nr. 39, 9. december 2015-imeersoq, § 35 imm. 2 periarfissaavoq.