Illit Inuussutissarsiortumut

Inuussutissarsiortoq pillugu naammagittaalliuutit Atuisartut Pisisartullu Maalaarutaanik Aalajangiisartut 20. oktober 2016-imi suliaraat imalu aalajangiilluni:

AALAJANGIINEQ

Naammagittaalliutinni ilalerneqarputit. Taamaalillutit faktura nr. 3226-ip 2.286 kr.-inik akiligassiiffiusup akilernissaanut pisussaatitaanngilatit.

Aallaqqaasiut

Naammagittaalliuut 14. april 2014-imi tiguneqarpoq. Suliami 11. juni 2013-imi 70 HK Yamahamik pisineq, ikkussuineq katiterinerlu pineqarpoq.

Faktura nr. 3226-ip 2.286 kr.-inik akiligassiiffiusoq akilertussaanagu piumasaqarputit.

Inuussutissarsiortup piumasaqaatit malikkumanngilaa, isumaqarami faktura nr. 3226, 2.286 kr.-inik akiligassiiffiusoq akilissallugu pisussaaffeqartutit.

Suliamik saqqummiussineq

70 HK Yamaha motoorimik 11. juni 2013-imi pisinerit pillugu Inuussutissarsiortoq 14. april 2014-imi Atuisartut Pisisartullu Maalaarutaanik Aalajangiisartunut naammagittaalliuutigaat. Naammagittaalliuutinnut erseqqinnerusumik nassuiaatitit 2014-imi oktobarimi nassiuppatit.

Motoorimik pisininnut, katiterinermik ikkussuinermillu ilaqartumut peqatigitillugu 3.000 kr.-inik qularnaveeqqusiillutit akiliivutit. Faktura nr. 3167-imik 56.990-inik akiligassiiffiusumik tigusaqarputit.

Pisininnut atatillugu aperineqarputit naammagittaalliuutigineqartoq illilluunniit nammineerlutit motoorimik ikkussuissanersoq. Pisininni motoorimik ikkussineq ilanngunneqarnissaa aalajangiuppat.

Suli ikkussuineq pinngitsoq fakturamik nr. 3226-imik 14. juni 2013-imeersumik 2.286-inik akiligassiiffiusumik tigusaqaqqipputit, taassumalu akilernissaa pisussaaffiginngissoraat.

Taamaattumik faktura nr. 3226 naammagittaalliuutiginiarlugu Inuussutissarsiortumut saaffiginnipputit.

Naammagittaalliuutigineqartoq assigiinngitsunik nassuiaavoq, tassunga ilanngullugit akiligassaq tassaanerarlugu motooritoqqap piiarneranut atatillugu, kiisalu motoorip nutaap ikkussorneranut atatillugu atortunut nutaanut aningaasartuutinut matussutissaq.

Tamanna isumaqataaffiginngilat, tassami motoori nutaaq motooritoqqap taarsigassap meqqia assigimmagu.

Akiligassap nr. 3226-p suli akilerneqarsimannginnera 14. oktober 2015-imi uppernarsarpat.

Naammagittaalliuutigineqartoq 15. aamma 16. oktober 2015-imi naammagittaalliuummut oqaaseqarpoq.

Naammagittaalliuutigineqartup motoorisinerup sunik ilaqarnera nassuiaatigaa. Motoori, instrument, aqutsissut (gear-gas) aamma sarpiit pissarsiaraatit. Aammattaaq naammagittaalliuutigineqartup nassuiaatigaa motoori qularnaveeqquserneqassappat naammagittaalliuutigineqartup nammineq ikkussortussaagaa. Faktura 3167, 56.990 kr.-inik akiligassiiffiusoq atorlugu tamanna matussuserneqassaaq.

Faktura 3226, 2.286 kr.-inik assortuussutaasunik taakkuninnga akiligassiiffiusoq atorlugu motoorip aquummut (aquuserluni aqunneq) kabel aquummut atasoq aqqutigalugu ikkussinermut matussutissaavoq. Naammagittaalliuutigineqartup Atuisartut Pisisartullu Maalaarutaanik Aalajangiisartunut nammineerluni faktura 3226-mut assammik allalluni allappoq, "Oqaatigineqareersutut tunisinerup nalaani attaveqaqatigiinneq annikippallaarsimagunarpoq."

Naammagittaalliuutigineqartup paasissutissiineri 15. aamma 16. oktober 2015-imeersut malitsigisaannik nutaanik paasissutisseeqqinngilatit.

Tunngavilersuut                    

Isumaqatigiinnginnermi 2.286 kr.-it naammagittaalliuutigineqartumit 14. juni 2013-imi faktura nr. 3226 atorlugu akiligassiissutigineqartut pineqarput. Nalingi akilerneqarsimanngillat.

Motoorimik 70 HK Yamahamik, ikkussornera katiterneralu ilanngullugit inniminniillutillu pisisimanerit assortorneqarsinnaanngilaq. Aammattaaq motoorimut qularnaveeqqummik akiliisimavutit. Katillugit 56.990 kr.

Ikkussuineq suli pinngitsoq faktura 3226-mik akiligasseqqinneqarputit akilissallugulu pisussaasorinngilatit, taamaattumik naammagittaalliuutigineqartumut saaffiginnipputit.

Aningaasat motoorip aquummut attavilerneranut, taamatullu motooritaa taassumalu angallammut ikkunneranut pinnani matussutissaaneri naammagittaalliuutigineqartup Atuisartut Pisisartullu Maalaarutaanik Aalajangiisartunut nassuiaatigaa.

Motoorisinermut atatillugu sorpiaat isumaqatigiissutigineqarsimanerannik qulaajaataasinnaasunik allakkatigut illit naammagittaalliuutigineqartullu akornissinni isumaqatigiissuteqartoqarsimanngilaq.

Suliami pisunut aalajangersimasunut tunngatillugu Atuisartut Pisisartullu Maalaarutaanik Aalajangiisartut isumaqarput naammagittaalliuutigineqartoq tassaasoq motoorisineq pillugu isumaqatigiissummut suut ilaaneri pillugit paasissutissiinissamik qulakkeerinissamut qaninnerpaaq.

Faktura nr. 3167 naapertorlugu aningaasat 56.990 kr.-iusut ikkussinermut aamma atornersut atunnginnersulluunniit isumaqatigiissutigineqanngilaq.

Naammagittaalliuutigineqartup tamatumunnga 2.286 kr.-t nammineq akiligassiissutigisimavai.

Atuisartut Pisisartullu Maalaarutaanik Aalajangiisartut isumaqarput ikkussinermut akiligassat, naammagittaalliuutigineqartup faktura nr. 3226-kkut akiligassiissutigisai ataatsimut isigalugu ima ikitsigisut isumaqarsinnaallutit ikkussineq isumaqatigiissutaaqqaartumut, faktura nr. 3167-imi akiligassiissutigineqartumi ilaareersoq.

Aammattaaq motoorimik tunisinerup nalaani attaveqaqatigiinngippallaarsimaneq naammagittaalliuutigineqartup isumaqatigaa.

Taamaattumik Atuisartut Pisisartullu Maalaarutaanik Aalajangiisartut isumaqarput naammagittaalliuutigineqartup ikkussinerup faktura nr. 3167-imut ilaannginneranut naammattumik uppernarsaasiinissaq qulakkeersimanngikkaa.

Atuisartut Pisisartullu Maalaarutaanik Aalajangiisartut matumani suliami pisut tamarmiusut, pingaartumillu susassaqartut akornanni attaveqaqatigiinngippallaarsimanerup naammagittaalliutigineqartumit namminermit nassuerutigineqarnera pingaartippaat.

Taamaalillutit motoorip aquummut ikkunneqarnera faktura nr. 3167-ikkut akilerpat. Taamaattumik naammagittaalliuutigineqartup tamanna akiligassiissutigeqqissinnaanngilaa.

Taamaattumik naammagittaalliuutinni ilalerneqarputit taamaalillutillu faktura nr. 3226-p katillugit 2.286 kr.-inik akiligassiiffiusup akilernissaanut pisussaaffeqarunnaarlutit.

Naammagittaalliuuteqarnissamut ilitsersuut                 

Atuisartunut Maalaaruteqartarfittut Ataatsimiitsitaliap aalajangiinera allaffissornikkut oqartussaasunut allanut naammagittaalliutigisinnaanngilat, tak. tuniniaanissamik nittarsaassisarneq aamma nalunaaqutsersuisarneq pillugu Inatsisartut inatsisaanni nr. 39-mi, 9. december 2015-imeersumi § 35, imm. 2 naapertorlugu.