Aaliangiussaq

Suliamik saqqummiussineq:Ineqarneq pillugu Maalaaruteqartarfiup 10. oktober 2006-imi attartortup maalaarutaa tiguaa. Attartortup maalaarutigaa, attartortup attartukkami iluani sumiiffinni arlalinni iluarsaattariallit pillugit attartortitsisumut saaffiginnittaraluarnini attartortitsisumiit qisuariarfigineqartarsimanngitsut. Tassani qaliaq ussiitsoq aammalu qilaani iikkanilu oquk pineqarput. Attartortoq allappoq, nuunnerminiit ukiup ataatsip qaangiunneranili attartortitsisoq ajoqutinik iluarsaasseqqullugu arlaleriarluni qinnuigisarsimagaluarini. Attartortoq isumaqarpoq, iluarsaassinissaq attartortitsisup akisussaaffigigaa, attartortoq isertermat inissiaq nutaamik iluarsaanneqarsimammat, kiisalu qaliap ussiinnera aammalu qilaat iikkallu oqoqarnerat peqqutaallutik ajoqutit ingerlaavartumik takkussuutilersimammata.

Attartortoq 1. december 2002-mi attartukkaminiilerpoq, maannalu suli tassani najugaqarluni. Attartortitsisoq-mit paasissutissiissutigineqartut malillugit attartortoq pisortat inissiaataanni attartortittakkami, 65 kvadratmeterinik annertussuseqartumi pingasunillu initalimmi najugaqarpoq. Attartugaq illup affarleriiusup affarlianiippoq.

Attartortup maalaarutaa 17. oktober 2006-imi attartortitsisumut oqaaseqarfigisassanngorlugu saqqummiunneqarpoq. Attartortitsisoq ataasiarluni eqqaasinneqareerluni 27. november 2006-imi akissuteqarpoq.

Attartortitsisup ilisimatitsissutigaa, attartortitsisumiit attartortup saaffiginnissutai qisuariarfigineqarsimasut, aammalu attartortitsisoq 1. september 2006-imi sanasumut iluarsaassassanik iluarsaassititsinissamik suliakkiisimasoq. Qalia ussissarneqarpoq, aammalu 1. september 2006-ip kingunitsianngua perusuersartarfimmi qipisartoq, imermut nillertumut kissartumullu akoorivik taarserneqarpoq.

Kingusinnerusukkut paasineqarpoq qaliap iluarsaanneqarnera iluameersumik suliarineqarsimanngitsoq, taamaattumillu attartortitsisup 26. oktober 2006-imi aammaloorluni qalia sanasumut suliakkiissutigaa. Sanasup illup qaata qalissiartaa annertuumik iluarsaappaa. Attartortitsisup 27. oktober 2006-imi perusuersartarfiup qalipanneqarnissaa qalipaasumut suliakkiissutigaa, suliassarlu taanna tamatuma kingunitsianngua suliarineqarpoq.

Attartortitsisup akissuteqaataa 27. november 2006-imeersoq attartortumut oqaaseqarfigisassanngorlugu saqqummiunneqarpoq.

Attartortoq 15. december 2006-imi allakkatigut oqaaseqaasiaminik tunniussaqarpoq. Attartortitsisup akissutitut allakkiaa aallaqqaammut tamakkiisumik attartortup paasisimannginnamiuk oqaaseqaatiminut ilassutitut 23. januar 2007-imi allakkatigut attartortoq oqaaseqaateqaqqippoq.

Attartortup uppernarsarpaa, attartortup saaffiginnissutaanut aatsaat piffissaq sivisoorsuaq ingerlareersoq attartortitsisoq qisuariaateqarsimasoq. Kisiannili illup qaliata qalissiartaata annertuumik iluarsaanneqarsimanera, kiisalu perusuersartarfiup iigaasa qalipanneqarsimanerat pillugu attartortup attartortitsisoq isumaqatigaa. Attartortoq allappoq 22. januar 2007-imi qalianiit perusuersartarfimmut imeq kusilereersimasoq, aammalu perusuersartarfimmi iikkat 2006-imi oktobarimi qalipanneqareersimagaluarlutik qalipaataat makialatitilereersimasut.

Attartukkap qaliata sannaata qanoq issusia aammalu qilaani iikkanilu oquup annertussusia nalilersinniarlugu suliamut attuumassuteqanngitsoq immikkut suliamut ilisimasalik attartukkamik misissuinissaanik qinnuigineqassasoq Ineqarneq pillugu Maalaaruteqartarfiup siulittaasua tamatuma kingorna aalajangerpoq. Suliamut attuumassuteqanngitsup immikkut suliamut ilisimasallip attartugaq 10. maj 2007-imi misissorpaa. Tamatuma kingorna attartukkap qanoq issusianut nalunaarusiaq Ineqarneq pillugu Maalaaruteqartarfiup tiguaa. Nalunaarusiaq taanna malillugu suliamut attuumassuteqanngitsoq immikkut suliamut ilisimasalik isumaqarpoq, illup qaliani igalaaq kaajallallugu qalissiap ikkunneqarnerani kukkusoqarsimanera pissutaalluni illup qaliani ussiittoqartoq. Qalissiap ilaa equngavoq. Siusinnerusukkut isugutsertoqartarnera peqqutigalugu qaliata qisuttaasa aasimanerat tamatumunnga peqqutaasimassasoq ilimagineqarpoq. Qalianut majuartarfeqarfiup sannaa isugutannersaqarpoq qaliata sannaani ussiittoqarneranik peqquteqarsorineqartumik. Uffartarfimmi iikkap ataa tungaata teqeqqua aasimavoq qaavalu qitulluni. Perusuersartarfeqarfiup qalipaataa makialatiterpoq, aammalu qilaami igalaap eqqaani qalliutaa katagarluni. Qaliata igalaartaa kaajallallugu sannarlutaammat oqaatigineqareersutut tamatumunnga peqqutaavoq.

AALAJANGIINEQ

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussummi) § 84, imm. 1 nr. 2 naapertorlugu suliami aalajangiissalluni piginnaatitaalluni Ineqarneq pillugu Maalaaruteqartarfik isumaqarpoq.

Ineqarneq pillugu Maalaaruteqartarfimmi suliaq misissorneqarpoq, isumaqatigiissumillu aalajangiilluni qaliap sannaata naammaginartumik aserfallatsaaliorneqarnissaa attartortitsisup isumagissallugu pisussaaffigigaa. Kiisalu attartortitsisoq pisussaavoq attartukkap illutarpiaani iikkat qilaallu oqunnginnissaat anguniarlugu naammaginartumik aserfallatsaalissallugu.

Aalajangiinerup matuma illuatungeriinnut nalunaarutigineqareernerani attartortitsisup pisariaqanngitsumik kinguarsaanertaqanngitsumik ornigulluni attartortorlu peqatigalugu attartugaq misissussavaa.

Attartortitsisup attartugaq ornillugu misissuiffiginerani attartugaq najugaqarfittut naleqqunnersoq naliliiffigissavaa.

Attartortitsisup attartugaq najugaqarfittut naleqquttutut naliliiffigippagu, attartortitsisup ornigulluni misissuinermini, qaliap sannaanik kiisalu iikkanik qilaanillu attartortitsisup aserfallatsaaliuisussaanera naammassiniarlugu suliassat suut attartortitsisumit aallartinneqassanersut attartortitsisup naliliiffigissavai. Attartortitsisup ornigulluni misissuinermi kingorna kingusinnerpaamik ullut 14-it qaangiunnerini aserfallatsaaliuisussaatitaaneq naammassiniarlugu suliassat aallartissavai.

Attartortitsisup attartugaq najugaqarfissatut naleqqutinngitsoq naliliiffigiguniuk, attartortitsisup attartortitsineq unitsissinnaavaa. Tamanna pissappat piffissamilu attartorunnaarsitsiviusumi attartortup attartukkaminut taamaatitinneqartumut isumaqatigiissut malissimappagu, attartortoq inissiamut allamut innersuunneqassaaq. Attartortoq inissiamut allamut innersuunneqassappat, attartortitsisoq attartortup nuunneranut aningaasartuutinut matussutissanik 4.200 koruuninik attartortumut taarsiissuteqassaaq.

Tunngavilersuut:

Attartortitsinermut peqqussummi § 45, imm. 1 naapertorlugu attartortitsisoq pisussaavoq, illup aamma attartukkap isumannaatsumik aserfallatsaaliorneqarnissaat isumagissallugu. Illup qaliata sannaa illumut ilaavoq, taannalu attartortitsisup aserfallatsaalissallugu pisussaaffigaa. Aamma aalajangersagaq taanna naapertorlugu attartortitsisoq pisussaavoq, iikkat qilaallu oqunnginnissaat isumagissallugu.

Ineqarneq pillugu Maalaaruteqartarfiup aalajangiinermini suliamut attuumassuteqanngitsup immikkut suliamut ilisimasallip attartukkamik naliliinera tunngavigaa. Taanna malillugu paasineqarpoq attartugaq piffissami matumani aserfallatsaalineqannginnini pissutigalugu ajoquteqartoq, qalia ussiikkami, kiisalu iikkat qilaallu oqussimagamik, aammalu attartortitsisup maannamut suliaritissimasai ajoqusernerit iluarsinissaannut naammassimanngitsut.

Attartortitsisoq attartukkamut ornigulluni misissuinermini attartugaq najugassatut naleqquttoq naliliippat, tamatuma kingorna kingusinnerpaamik ullut 14-it qaangiunnerini qaliata sannaa ussissunngorniarlugu suliniutinik attartortitsisoq aallartitsissaaq. Aamma oquk peerniarlugu suliniutinik attartortitsisoq aallartitsissaaq. Kiisalu oqummik pinngortoqaqqinnginnissaa anguniarlugu attartortitsisoq suliniuteqassaaq.

Attartortitsinermut peqqussummi attartortitsisup aserfallatsaaliuisussaatitaaneranut maleruagassat, attartortitsisup qanoq pilertortigisumik aserfallatsaaliorneqanngitsut isumaginissaannut piffissarititassanik aalajangersaasoqarsimanngilaq, taamaattumillu Ineqarneq pillugu Maalaaruteqartarfiup attartortitsisup aserfallatsaaliuisussaatitaanera pillugu maleruagassat isumasiornerini paasivaa, attartortitsisoq pisariaqanngitsumik kinguarsaanertaqanngitsumik aserfallatsaaliunngitsuukkanik, attartortitsisup akisussaaffigisaanik iluarsaassisussaasoq.

Attartortitsisup ornigulluni misissuinermini attartugaq najugaqarfissatut naleqqutinngitsoq naliliiffigippagu, aammalu inissiap iluarsaanneqarnerani isaterneqarneraniluunniit attartugaq qimanneqartariaqarpat, attartortitsisup attartorneq unitsissinnaavaa, tak. attartortitsinermut peqqussummi § 67, imm. 1, nr. 2. Aalajangersagaq taanna malillugu attartukkap qimanneqartariaqarneranik kinguneqartumik illup iluarsaanneqarnissaa pisariaqartoq attartortitsisup attartorunnaarsitsinerani uppernarsaaserneqassaaq.

Attartortitsisup attartorunnaarsitsinerani attartortup attartukkamut attartorunnaarsinneqartumut isumaqatigiissut malissimappagu, attartortitsisup attartortoq inissiamut allamut innersuutissavaa, tak. attartortitsinermut peqqussummi § 68, imm. 1.

Attartortup inissiamut allamut nuunnerminut atatillugu aningaasartuutaanut matusissutissatut attartortitsisoq attartortumut taarsiissuteqassaaq. Attartortitsisarnermut pequssummi § 68, imm. 4-mi maleruagassat naapertorlugit taarsiissutissat 4.200 koruuninut aalajangerneqarput, attartugaq najugaqarfissanik pingasunik initaqarmat.

Kiisalu attartortitsinermut peqqussummi § 68, imm. 2-mi maleruagassat naapertorlugit attartukkap iluarsaanneqarluni naammassineqarnerani attartortoq uternissamut pisinnaatitaaffeqarpoq.