AALIANGIUSSAQ

Suliamik saqqummiussineq:

3. juli 2006-imi attartortoq qalipaatinik attartukkap iluani ingerlaavartumik aserfallatsaaliuinermut atugassanik tunineqarnissaminut itigartinneqarnini, aammalu attartortup nammineerluni inissiap iluani ingerlaavartumik aserfallatsaaliuinermut attartortitsisumit akileeqquneqarnini pillugu maalaarummik tunniussivoq.

Attartortup attartugaq 1986-imi sulisunut inissiatut najulerpaa, aammalu attartugaq 1. juni 1987-imi inissiatut attartortittakkatut nalinginnaasutut tigullugu.

2006-imi upernaakkut attartortoq inissiap iluani ingerlaavartumik aserfallatsaaliuinermut atatillugu inissiamut qalipaatissanik tunineqarnissani siunertaralugu oqarasuaatikkut attartortitsisumut saaffiginnippoq.

Attartortitsisup attartortoq qinnuteqarnerani itigartippaa, inissiap iluani aserfallatsaaliuisussaatitaanerup attartortumit isumagineqartussaanera, aammalu attartortup nammineerluni inissiap iluani qalipaatinut aningaasartuutissanik akiliisussaanera innersuussutigalugu.

20. juli 2006-imi attartortup maalaarutai ilanngussat ilanngullugit oqaaseqarfigisassatut attartortitsisumut saqqummiunneqarput. Attartortitsisup allakkatigut 10. august 2006-imeersutigut nassuerutigaa, attartorneq 1. januar 1990 sioqqullugu aallartinneqarsimammat inissiap iluani aserfallatsaaliuisussaatitaaneq pillugu maleruagassanik immikkut ittunik atuutsitsisoqartoq. Attartortitsisulli attartortitsisup qalipaatinik tunniussiumannginnera eqqortuunerarpaa, kisiannili attartortitsisup ilisimatitsissutigaa, attartortup attartugaata iluani ingerlaavartumik aserfallatsaaliuinissaq attartortitsisup pisussaaffigigaa. Attartortitsisup suleriaasia malillugu attartortup saaffiginninnerata kingorna attartortitsisup inissiap iluata qanoq innera naliliiffigisussaavaa. Attartukkap qanoq innera peqqutaalluni aserfallatsaaliuinissaq pisariaqartinneqarpat, attartortitsisup najugaqarfimmi tamatumunnga aningaasassaritinneqartutut missingersuutaasut iluanni aserfallatsaaliugassat suliarissavai. Allakkatigut 17. august 2006-imeersutigut ilaatigut attartortoq ilaatigullu attartortitsisoq qinnuigineqarput, attartornermut isumaqatigiissutip assilineranik nassiusseqqullugit. Attartortumiit attartornermut isumaqatigiissutip assilinera 24. august 2006-imi tiguneqarpoq, aammalu attartortitsisumiit 23. august 2006-imi tiguneqarluni.

AALAJANGIINEQ

Ineqarneq pillugu Maalaaruteqartarfik isumaqarpoq, § 84, imm. 1, nr. 2 naapertorlugu suliamut aalajangiinissamut piginnaaffeqarluni.

Ineqarneq pillugu Maalaaruteqartarfiup suliaq misissorpaa, ilaasortallu isumaqatigiillutik aalajangerput, aalajangiinermiit kingusinnerpaamik ullut 14-it qaangiunnerini illuatungeriit nalunaarfigineqassasut attartugaq ornillugu misissorneqassasoq, attartukkap qanoq issusia apeqqutaalluni qalipanneqarnissamut pisariaqartinneqarnersoq naliliiffiginiarlugu.

Maalaaruteqartarfimmi ilaasortat pingasut amerlanerussuteqarlutik isumaqarput, attartortitsisup attartukkap iluata ingerlaavartumik aserfallatsaaliorneqarnissaa akilertartussaagaa, iluata qalipanneqartarnera tassunga ilaalluni, tamatumani aserfallatsaaliuineq attartortitsisumit imaluunniit attartortitsisup akiligaanik attartortumit suliarineqaraluarpalluunniit.

Maalaaruteqartarfimmi ilaasortaq ataaseq ikinnerussuteqarluni isumaqarpoq, attartortitsisup attartukkap iluata ingerlaavartumik aserfallatsaaliorneqarnissaa akilertartussaagaa, iluata qalipanneqartarnera tassunga ilaalluni. Aserfallatsaaliuineq attartortitsisumit suliarineqartassalluni.

Aalajangiineq amerlanerussuteqartut aalajangiinerat tunngavigalugu pivoq.

Tunngavilersuut:

Ineqarneq pillugu Maalaaruteqartarfimmi ilaasortat tamarmiullutik isumaqarput, inissiap iluani ingerlaavartumik aserfallatsaaliuinissamut attartortup akisussaaffeqarnera akiliisussaaneralu pillugit aaqqissuussaq maanna atuuttoq attartukkamut pineqartumut atorneqarsinnaanngitsoq, attartornissamik isumaqatigiissut 1986-imi suliarineqarsimammat, tak. inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 88, imm. 1, § 45, imm. 3.

Maalaaruteqartarfimmi ilaasortat pingasut amerlanerussuteqarlutik isumaqarput, attartukkap iluani ingerlaavartumik aserfallatsaaliuinermut aningaasartuutit agguarneqartarnerat attartornermut isumaqatigiissummi tassanilu aalajangersakkani nalinginnaasuni malittarisassiuunneqarsimasut, tassanimi allassimavoq attartukkap iluata qalipanneqartarnissaa attartortitsisumit isumagineqartussaasoq, tak. attartornermut isumaqatigiissummi aalajangersakkani nalinginnaasuni imm. 6.2. Attartornermut isumaqatigiissummi aalajangersakkani nalinginnaasuni attartukkap iluata ingerlaavartumik aserfallatsaaliorneqarnera attartortitsisumit imaluunniit attartortitsisup akiligaanik attartortumit suliarineqassanersoq malittarisassiuunneqanngilaq, taamaattumillu attartortoq pisinnaatitaavoq inissiap iluata ingerlaavartumik aserfallatsaaliorneqarnera isumagissallugu.

Inissiap iluata aserfallatsaaliorneqarnerani pineqarput: Qilaat qaqorsarneqarnerat, iikkat qalipanneqarnerat aamma/imaluunniit tapetilersorneqarnerat, kiisalu inissiap naqqisa lakkerneqarnerat.

Maalaaruteqartarfimmi ilaasortaq ataaseq ikinnerussuteqarluni isumaqarpoq, attartukkap iluani ingerlaavartumik aserfallatsaaliuinermut aningaasartuutit agguarneqartarnerat attartornermut isumaqatigiissummi tassanilu aalajangersakkani nalinginnaasuni malittarisassiuunneqarsimasut, tassanimi allassimavoq attartukkap iluata qalipanneqartarnissaa attartortitsisumit isumagineqartussaasoq, tak. attartornermut isumaqatigiissummi aalajangersakkani nalinginnaasuni imm. 6.2. Attartornermut isumaqatigiissummi aalajangersakkani nalinginnaasuni attartukkap iluata ingerlaavartumik aserfallatsaaliorneqarnera attartortitsisumit imaluunniit attartortitsisup akiligaanik attartortumit suliarineqassanersoq malittarisassiuunneqanngilaq, taamaattumillu attartortitsisup kissaatigippagu attartortoq pisinnaatitaavoq inissiap iluata ingerlaavartumik aserfallatsaaliorneqarnera isumagissallugu.