AALIANGIUSSAQ

Igaffippit nutarteriffigineqarnerani kissarsuutivit innaallagiatortup taarserneranut atatillugu Illuutileqatigiip akiliutigineqartussatut piumasarisaasa ilaannakortumik matussusernissaannut atugassatut taarsiissutisiassannik unitsitsinera naammagittaalliuutigisat ineqarneq pillugu maalaaruteqartarfiup 19. september 2011 suliaraa imatullu aalajangiilluni

AALAJANGIINEQ

Ilit kissarsuutivit innaallagiatortup nutaamik taarserneranut atatillugu aningaasartuutit kimit akilerneqarnissaannut tunngatillugu ineqarneq pillugu maalaaruteqartarfik isummerfiginninnissamut pisinnaatitaaffeqanngilaq, pissutigalugu aserortut aserornerat attartukkap atortullu tassaniittut nalinginnaaasumit allaasumik atorneqarnerannik pissuteqartumik aserorsimammata, taamaattumillu aserortut inissianik attartorneq pillugu peqqussummi § 45-p avataqaniillutik.

Taarsiissutisiassavit 1.800,00 koruuniusut tigunissaannut pisinnaatitaavutit.

Tamanna imatut paasineqassaaq Illuutileqatigiit aningaasanik taakkuninnga uninngatitsinissaminut pisinnaatitaanngitsoq.

Paasissutissat suliamut tunngassuteqartut takuneqarsinnaasut

• Inissiaatileqatigiiffiup B-illu akornanni inissiamik attartornermut isumaqatigiissut, atsiorneqartoq qaammat august 2001.

• Kissarsuummik innaallagiatortumik ikkussinermi sullisinermit pisassarisat allagartaat suliffeqarfimmit El-imeersoq , ulloqartoq 23. oktober 2009.

• Kissarsuutip innaallagiatortup ikkunneranut akiligassat akilerneqarnissaat pillugu Inissiaatileqatigiiffimmit B-imut allakkat 11. november 2009 ulloqartut.

• B-ip kissarsuutip innaallagiatortup ikkunneranut aningaasartuutit akileqquneqarnerat pillugu naammagittaalliuutaa Inissiaatileqatigiiffimmut 17. november 2009 nassiunneqartoq.

• Inissiaatileqatigiiffimimit kissarsuutip innaallagiatortup ikkunneranut atatillugu akiligassat B-imit akilerneqarnissaat pillugu tuavisaarut 9. december 2009 ulloqartoq.

• Kissarsuutit innaallagiatortut taarsersornerinut taartisiassat pillugit allakkiaq 7. marts 2011-meersoq.

• T-imit taartisiassanik uninngatitsineq pillugu O-mut qarasaasiaq atorlugu allakkat 7. marts 2011-meersut.

• B-ip inissiaatileqatigiiffiullu akornanni taartisiassat tunniunneqarnissaat pillugu qarasaasiaq atorlugu allaffigeqatigiinneq.

• Qaraasiaq atorlugu allakkatigut Inissiaatileqatigiiffiup “kissarsuummut tunngasumik” “aamma” igaffimmut tamarmut tunngasumik ularussinera pillugu B-ip inooqatigisaatalu naammagittaalliuutaat.

• Inissiaatileqatigiiffiup ulloq 11. marts 2011 suliaq pillugu B-imut nassuiaataa.

• Suliap ingerlanera pillugu Inissiaatileqatigiiffiup ineqarneq pillugu maalaaruteqartarfimmut nassuiaataa 10. august 2011-meersoq.

Nassuiaat

Oqaatigineqarpoq illit inissiamut Q, 39XX by ulloq 14. august 2001 nuuttutit.

Ulloq 16. oktober 2009 kissarsuutit innaallagiatortoq taarserneqarpoq. Taarsiinermut aningaasartuutit inissiaatileqatigiiffimmit akilerneqarput.

Ulloq 23. oktober 2009 aammaarlutit kissarsuutit innaallagiatortoq taarserneqarpoq. Tamatumunnga piussutaavoq kissarsuut ullormi 16. oktober 2009 ikkunneqartoq ikuallassimammat. Ikuallannermut pissutaasimavoq illit kissarsuut ikissimagakku poortuutit kissarsuutillu atornissaanut ilitsersuut il. il. kissarsuutip iluaniittut peeqqaarnagit.

Aningaasat pisassat allagartaat 11. november 2009 ullulerneqartoq atorlugu Inissiaatileqatigiiffiup kissarsuut ikkunneralu akileqquai, aningaasallu amerlassuseqarput 5.355,00 koruuninik.

Illit inooqatigisallu kissarsuutip akilernissaa pillugu ulloq 17. november 2009 naammagittaalliuuteqarpusi.

Naammagittaalliuutinni allapputit kissarsuutip ulloq 16. oktober 2009 tunniunneqarnerani oqarfigineqarsimallutit kissarsuut ikkunneqarpat nal. akunnera ataaseq ikumatissagit, taamaaliortinnalli kissarsuutip iluaniittut pappiaqqat ilitsersuutillu peeqqaassagitit. Ikereernerata kingorna kissarsuummit pujoq anialersimavoq kinguninnguagullu qaartoqarluni, taamalu kissarsuut ikuallalerluni. Oqaatigaat qatserisartut oqaatigigaat kissarsuutip iluaniissimasoq soorlu kigutit qaqorsaataata puuatut ittoq maqittagaq, taannalu

kissannermigut qaarsimasoq. Allapputit kissarsuutip ikinnginnerani iluamik sukumiisumik ilitsersorneqarsimanngitsutit.

Kissarsuut misilillugu salikkaluariarlugu ajormat nutaamik taarserneqarpoq. Naammagittaalliuutinni allapputit Inissiaatileqatigiiffimmiit ilisimatinneqarsimanak kissarsuut nutaaq akilissagit. Taava akileqquneqarneranut isumaqataannginnavit akiligassap allagartaa Inissiaatileqatigiiffimmut utertippat.

Inissiaatileqatigiiffiup naammagittaalliuut ineqarneq pillugu maalaaruteqartarfimmut ingerlateqqissimanngilaa.

Allakkatigut 9. december 2009 ullulerneqartutigut kissarsuutip ilinnit akilerneqarnissaa tuavisaarutigineqarpoq. Tassunga atatillugu qisuariaateqanngilatit.

2011-mi upernaakkut igaffiit nutarsartippat tassungalu atatillugu taartisiaqartussallutit 1.800,00 koruuninik, tassa kissarsuummik atuisinnaanngikkallarninnut taartisiat.

Ulloq 9. marts 2011 inissiaatileqatigiiffiup ilisimatippaatit taartisiassatit tunniunneqarsinnaanngitsut, inisiaatileqatigiiffimmut akiitsoqarnerit pissutigalugu, taakkulu akiitsut amerlassuseqarlutik ullormi 23. oktober 2009 kissarsuutip nutaamik taarseneqarnerani aningaasartuutit nalingingik.

Ulloq 9. marts 2011 qarasaasiaq atorlugu allakkatigut illit inooqatigisallu taarsiissutisiassat unitsinneqarnerat pillugu naammagittaalliuuteqarpusi, tassani illit oqaatigalugu naatsorsuutigisimallugu suliaq kissarsuummut tunngasoq naammassisimassasoq, pissutigalugu 2009-imili Inissiaatileqatigiiffik kingullermik tusarfigisimagakku. Tamatumunnga ilanngullugu Inissiaatileqatigiiffik qinnuigaat pisumut tunngasut marluk immikkut tamaasa naliliivigeqqullugit, taamalu taartisiassat illit konto-nnut ikeqqullugit.

Allakkatigut 11. marts 2011 ullulerneqartutigut Inissiaatileqatigiiffik naammagittaalliuutinnut akissuteqarpoq. Inissiaatileqatigiiffik ataatsimut eqikkaalluni pisut ingerlasimanerat allaaseraa ilanngullugulu oqaatigalugu kissarsuut nutaaq akilinngittuarsinnarakku taartisiassat ikineqarsinnaanngitsut. Kiisalu innersuussutigineqarpoq inissiaatileqatigiiffiup tusarfigisimanngikkaatit piffissami oktoberip naaneranit 2009 marts 2011 tungaanut.

Inissiaatileqatigiiffiup ulloq 10. maj 2011 ineqarneq pillugu maalaaruteqartarfik suliap ingerlasimanera pillugu nassuiaateqafigaa.

Inissiaatileqatigiiffiup ilaatigut innersuussutigaa attartortoq isumaqarsimammat kissarsuut akiligassarinagu, kissarsuut ikitsinnagu poortuutikut ilitsersuutillu il. il. kissarsuutip iluaniittut peeqqaarnissaat pillugu ilitsersorneqarsimannginnini pissutigalugu, taamalu tamatumunnga tunngatillugu aalajangiusimallugu kikkulluunniit silatusaartumik iliuuseqartarmata, tassa atortorissaarutit matumani kissarsuutit innaallagiartortut ikitsinnagit soorlu qinnernik qasungasunik misissuillutik, ilitsersuutit atuarlugit, kissarsuutip iluani pappiaraqarnersoq misissueqqaartarlutik. Inissiaatileqatigiiffik ulloq 9. december 2009 ineqartup akiligassai pillugit tuavisaarivoq kingornagulu ineqartup akiligassai allaffiffornikkut aaqqissuussinerup iluani nalunaarsorlugit.

Inissiaatileqatigiiffiup ineqartup kissarsuummut innaallagiartortumut akiligassai aalajangiusimavai, pissutigalugu kissarsuutip piniarneqarnerani ineqartoq ilisimatinneqarsimammat kissarsuut ineqartup nammineq akiligassarissagaa tassungalu atatillugu attartortup nammineq mianersuaalliorneragut kissarsuummi ikuallaneq pilersimammat. Inissiaatileqatigiiffiup aammattaaq aalajangiusimavaa taartisiassat attartortumut tunniunneqarsinnaanngitsut attartortoq Inissiaatileqatigiiffimmut akiligassaarutsinnagu. Taamaammat taartisiassat akiligassanut matussutigineqarput.

Inatsisitigut tunngavigisat

Inissianik attartorneq pillugu Inatsisartut peqqussutaanni nr. 2-mi, 12. maj 2005-imeersumi § 45, imm. 1 malillugu Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnisaa attartortitsisup pisussaaffigaa.

Peqqussummi pineqartumi § 45, imm.2 malillugu avammut kuuffinnut, kiassarnermut, innaallagissamut, gassimut imermullu teknikkikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit aalaakkaasut, illup iluani atortut il. il. aserfallatsaalissallugit attartortitsisup pisussaaffigai. Nungullarnikut pisoqalisullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqaartullu pissusissaat eqqarsaatigalugit pisariaqartitsinerit malillugit suliarineqartassallutik.

Peqqussummi pineqartumi § 48, imm. 1, oqaaseqatigiit siulliit malillugit attartortup attartorneqartoq isumannaatsumik paarissavaa, ajoqusikkanullu attartortup nammineq, attartortup inoqutaasa allalluunniit attartortup attartorneqartumut isersinnaatitaasa isumannartumik pissusilersornerisigut ajoqusersimasaannut taarsiinissamut attartortoq akisussaavoq.

Peqqussummi pineqartumi § 84, nr. 2 malillugu ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

2) Aserfallatsaaliuineq iluarsaassinerlu, tak. § 45.

Naliliineq

Ineqarneq pillugu maalaaruteqartarfik isumaqarpoq ineqarneq pillugu maalaaruteqartarfiup kina kissarsuummut innaallagiatortumut akiliuteqassanersoq isummerfigissallugu pisussaanngitsoq, pissutigalugu kissarsuutip nalinginnaanngitsumik atornerata kingunerisaanik ajoquserneq pisimammat.

Taamatut naliliinermut tunngaviuvoq attartorneqartup iluata aserfallatsaaliorneranut akisussaaffimmik agguataarineq attartorneq pillugu peqqussummi § 45, imm. 2-mi aamma imm. 3-mi (attartortitsisoq) takuneqarsinnaammat, aalajangersagaq taanna malillugu ineqarneq pillugu maalaaruteqartarfik pisinnaatitaaffeqarluni, tak. § 84, imm. 2. Attartortitsisoq tunngaviatigut – aamma suliaq manna pillugu – tak. § 45, imm. 2 aamma imm. 3 – attartukkap kissarsuutaanut taassumalu attartortup attartukkamik nalinginnaasumik atuinerata kingunerisaanik taarserneranut akisussaavoq.

Taamaalilluni ineqarneq pillugu maalaaruteqartarfik tunngaviatigut attartukkap § 45 malillugu, tak. § 84, qanoq issusia aserfallatsaalineralu pillugit isummernissamut pisinnaatitaavoq.

Akisussaassuseqarneq pillugu malittarisassap pingaarnerup (aamma aningaasanut tunngasuni) atuutinngitsoornissaanut aalajangersagaq tassaavoq § 48, imm. 1. Aalajangersakkap taassuma oqaatigisaa tassa aalajangersagaq taanna pisuussuteqarnermut tunngatillugu naleqqussagaasoq, taanna malillugu attartortoq illersorneqarsinnaanngitsumik pissusilersornerup kingunerisaanik aserukkanut/innarlikkanut aalajangersimasunut aningaasat tungaasigut akisussaatinneqartussaalluni.

Attartukkap qanoq innera aserfallatsaalineqarneralu pillugit suliamut tunngatillugu ineqarneq pillugu maalaaruteqartarfik isumaqarpat aseruineq/innarliineq aalajangersimasoq attartortup attartukkamik nalinginnaasumik atuineratut isigineqarsinnaanngitsoq, ineqarneq pillugu maalaaruteqartarfik suliamut attuumassuteqarunnaassaaq, tassani innersuussutigalugu apeqqutip pineqartup inissianik attartorneq pillugu peqqussummi § 48 malillugu paasiniagassaanera, taamaalilluni aalajangersagaq taanna malillugu ineqarneq pillugu maalaaruteqartarfik pisinnaatitaaffeqarani.

Tamatumunnga peqatigitillugu ineqarneq pillugu maalaaruteqartarfik isumaqarpoq taartisiassat 1.800,00 koruuniusut piffissami kissarsuummik atuisinnaanngiffinni pissarsiarinissaannut pisinnaatitaasutit.

Naliliinermi tamatumani ineqarneq pillugu maalaaruteqartarfiup pingaarutilittut isigaa igaffinnik nutarsaaneq § 45, imm. 2-mi pineqarmat. Taartisiat igaffippit nutarsarneranut atatillugu attartortitsisup tungaanit persaqusersugaanerpit kingunerai.

Aalajangiineq:

Ineqarneq pillugu maalaaruteqartarfik kiap kissarsuut nutaaq akilissaneraa pillugu apeqqummut isummerfiginninnissamut pisinnaatitanngilaq, pissutigalugu apeqqut inissianik attartorneq pillugu peqqussummi § 45-p avataaniimmat.

1.800,00 koruuninik taartisinissamut pisinnaatitaavutit. Taamaattumik Inissiaatileqatigiiffik pisussaavoq aningaasat ilinnut tunniutissallugit.

Naammagittaalliorsinnaanermut ilitsersuut:

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi kingusinnerusukkut allannguuteqartinneqartumi § 86, imm. 7 malillugu ineqarneq pillugu maalaaruteqartarfiup aalajangiineri allaffissornikkut aqutsinermi oqartussaasunut allanut suliassanngorteqqinneqarsinnaanngillat. Attartortitsisup attartortullu akornanni saqitsaassutaasup eqqartuussivimmut suliassanngortinneqarnissaa kissaatigineqarpat, attartortitsisumik eqqartuussivimmut aqqeqqusissut eqqartuussivimmut tunniunneqassaaq. Tamanna aamma atuuppoq attartortitsisup allaffisornikkut piginneqartigiiffianiit allakkanik nassiussuisoqarsimagaluarpalluunniit.

Ineqarneq pillugu maalaaruteqartarfiup aalajangiineri Namminersornerullutik Oqartussanit kommuninillu, inissianik attartortitsisunit pinngitsoorani malinneqassapput. Namminersornerullutik Oqartussat kommunilluunniit avataaniit allaffissornikkut aqutsisumik isumaginnittuutitaqarpata, maalaaruteqartarfiup aalajangiineri aamma taakunannga pinngitsoorani malinneqassapput, tak. inissianik attartortitsisarneq pillugu Inatsisartut peqqussutaanni nr.2 -mi, 12. maj 2005-imeersumi § 86, imm. 6.

Nunatta Eqqartuussiviani ilitsersuinermut immikkoortortaqarfik oqarasuaatikkut saaffiginninnnernut ammasarpoq sisamanngornerni nal. 14-15. Oqarasuaat 36 80 00.