AALIANGIUSSAQ

Matup nutaamik taarserneranut atatillugu aningaasartuutit ilinnut akileqquneqartut pillugit naammagittaalliuutit ineqarneq pillugu maalaaruteqartarfiup ulloq 19. september 2011 suliaraa imatullu aalajangiilluni

AALIANGIINEQ

Matup nutaamik taarserneranut atatillugu aningaasartuutit akilissanngilatit.

Isumaqarpoq Inissiaatileqatigiiffiup pisussaaffigaa matup taarsernera akilissallugu.

Akiligassat ilaannaalluunniit akilersimagukkit akilikkatit Inissiaatileqatigiiffiup ilinnut utertillugit akilissavai.

Paasissutissat suliamut tunngassuteqartut takuneqarsinnaasut:

  • Naammagittaalliuut 6. januar 2010-miit
  • Akiligassat allagartaat sulinerlu pillugu nalunaarusiaq 23. oktober 2009-meersut.
  • Qarasaasiaq atorlugu allakkat 2. december 2009-meersut.
  • Akilersuinissamik isumaqatigiissut 3. december 2009 ulloqartoq.
  • Inissiaatileqatigiiffiup allagai 9. maj 2011 ulloqartut.

Nassuiaat:

Ineqarneq pillugu maalaaruteqartarfiup allattoqarfiata inigisimasavit initaasa ilaanni matup taarserneranut atatillugu Inissiaatileqatigiiffiup akiligassiissutaa pillugu naammagittaalliuutit ulloq 6. januar 2010 tiguaa.

Oqaatigaat inigisat iluarsaanneqartussaasoq, tassungalu atatillugu ernerpit siniffik anninniartillugu siniffiup matumut kalluuttoorneratigut matut ilaat putusimasoq. Tamatuma kingunerisaanik matu nutaamik taarserneqarpoq. Matup nutaamik taarserneranut atatillugu akiligassaq naammagittaalliuutigaat, isumaqaravit matup taarsernerinnaanut nal. akunneri pingasut atorneqarsinnaanngitsut.

Ineqarneq pillugu maalaaruteqartarfiup allattoqarfia ulloq 26. april 2011 akiligassat allagartaat ilinnit tiguaa, taanna aningaasartaqartoq 2.140 koruuninik, atortussat nal. akunnerilu sulinermut atorneqartut nalingi.

Suliaqarnermut tunngatillugu nalunaarusiami ilanngullugu nassiunneqartumi takuneqarsinnaavoq atortussat naleqarsimasut 1090,00 koruuninik, nal. akunnerilu sulinermut atorneqartut katillugit nal. akunneri pingasuusut 1050,00 koruuninik naleqartut.

Inissiaatileqatigiiffiup allakkatigut 9. maj 2011 tiguneqartutigut oqaatigaa inoqutivit ilaata matu aserorsimagaa, taamaattumik illit matup aserorneranut tamatumalu malitsigisaanik matup nutaamik taarserneranut atatillugu akiligassanut akisussaasutit.

Aammattaaq Inissiaatileqatigiiffiup oqaatigaa akiligassat allagartaannut ilanngullugu suliaq pillugu nalunaarusiap assinga suliassamillu suliaqartup akiligassanut allagartaliaa ilanngullugit pissarsiarigitit, taamaalilluni akiligassat katillutik 2.140,00 koruunik amerlassusillit uppernarsaaserneqarlutik.

Inissiaatileqatigiiffiup uparuarpaa Ineqarneq pillu Maalaaruteqartarfik suliami matumani pisinnaatitaaffeqanngitsoq, pissutigalugu attartortup attartortitsisumut matup taarserneqarneranut taasiissuteqarnissamik akisussaaffia naammagittaalliuummi pineqarmat.

Tamatumunnga tunngatillugu Inissiaatileqatigiiffiup inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 48, imm. 1 innersuussutigaa.Naggataagut Inissiaatileqatigiiffiup aalajangiuppaa attartortup inoqutaasa illersorneqarsinnaanngitsumik pissusilersornerisa kingunerisaannik suliaqarnermut atatillugu akiligassat attartortup akilissagai.

Inatsisitigut tunngavigisat:Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imersumi § 45, imm. 1 malillugu Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu taknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamtuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfalatsaalissallugit attartortitsisup pisussaaffigaa. Nungullarsimasut pisoqalisullu ajorseriaatsit kingunerisaannik ima akuliktisigisumik isumagineqartassapput nutarterinerit iluarsaassinerillu illuutit attartorneqartullu pisussissaat eqqarsaatigalugit pisariaqartitsinerit malillugit suliarineqartassallutik.

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu naqqit lakkernissaat akisussaaffigaa taakkununngalu aningaasartuutit akilissallugit.

Peqqussummi pineqartumi § 48, imm. 1 malillugu attartortup attartorneqartoq isumannaatsumik paarissavaa, ajoqusikkanullu attartortup nammineq , attartortup inoqutaasa allalluunniit attartortup attartorneqartumut isersinnaatitaasa illersorneqarsinnaanngitsumik pissusilersornerisigut ajoqusersimasaannut taarsiinissamut attartortoq akisussaavoq. Takusaanermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai.

Peqqussummi pineqartumi § 84, nr. 2 malillugu ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

2) Aserfallatsaaliuineq iluarsaassinerlu, tak. § 45.

Naliliineq:

Ineqarneq pillugu maalaaruteqartarfiup pisinnaatitaanermik apeqqummut tunngatillugu aallaqqaammut oqaatigissavaa, inigisap iluata aserfallatsaaliornissaanut akisussaassuseqarnerup agguataarnera inissianik attartorneq pillugu peqqussummi § 45, imm. 2-mi takuneqarsinnaasoq (attartortitsisoq) imm. 3-milu (attartortoq), aalajangersagarlu taanna malillugu ineqarneq pillugu maalaaruteqartarfik pisinnaatitaalluni, tak. § 84, nr. 2. Attartortitisisoq tunngaviatigut – aamma suliami matumani – tak. § 45, imm. 2 aamma imm. 3 attartukkap matuinut aamma taakku taarserneqarnerinut attartortup attartukkamik nalinginnaasumik atuinerani akisussaavoq.

Inissianik attartorneq pillugu peqqussummi § 48, suliami matumani ineqarneq pillugu maalaaruteqartarfiup pisinnaatitaaffeqannginnera Inissiaatileqatigiiffiup innersuussutigisaa, taanna malillugu aseruisup/ajoqusiisup pisuussuteqarneq tunngavigalugu akisussaatitaaneranik naleqqussaaneq pineqarluni, taanna malillugu attartortoq illersorneqarsinnaanngitsumik pissusilersornerup kingunerisaanik aserukkanut/ajoqusikkanut aalajangersimasunut aningaasat tungaasigut akisussaatinneqarsinnaalluni – aammalu taamaalilluni akisussaassuseqarneq pillugu aalajangersakkanut pingaarnernut (tassani aamma aningaasanut tunngatillugu) issuaavigineqartunut qaqutigoortumik isiginiaannginnissamut aalajangersakkatut nipeqarnerulluni, tak. § 45-mi aalajangersagaq pingaarneq issuaavigisaq agguataarinerlu.

Ineqarneq pillugu maalaaruteqartarfiup – attartortunut imaluunniit ineqarneq pillugu maalaaruteqartarfimmut tunngatillugu – siumoortumik namminerluunniit aalajangersagaq pingaarneq malillugu attartorneqartup aserfallatsaaliorneranut qanorlu issusianut tunngatillugu suliassat suut attartortup illersorneqarsinnaanngitsumik pissusilersorneranut tutsinneqassanersut aalajangiivigisinnaanngilaa, tamatuma kingunerisussaassammagu ineqarneq pillugu maalaaruteqartarfiup pisinnaatitaaffeerunnera, Inissiaatileqatigiiffimmit aseruineq/ajoqusiineq attartortup illersorneqarsinnaanngitsumik pissusilersoneranik pissuteqarsinnaanera ilimagimmagu. Taamaalilluni ineqarneq pillugu maalaaruteqartarfik tunngaviatigut attartorneqartup aserfallatsaaliorneranut qanorlu issusianut tunngatillugu suliassani tamani akisussaavoq, tak. § 45, aamma tak. § 84, nr. 2.

Attartorneqartumiik aserfallatsaaliuineq inigisallu pissusissaa pillugu suliassami ineqarneq pillugu maalaaruteqartarfik isumaqaruni ajoqusiineq/aseruineq aalajangersimasoq attartortup attartukkamik nalinginnaarsumik atuinerata kingunerisaatut oqaatigineqarsinnaasoq, taava ineqarneq pillugu maalaaruteqartarfik suliamut attuumassutaarutissaaq, tassani innersuussutigalugu apeqqut pineqartoq inissianik attartortitsisarneq pillugu peqqussummi § 48 malillugu suliarineqartussatut paasinarmat aalajangersagaq taanna malillugu ineqarneq pillugu maalaaruteqartarfik pisinnaatitaaffeqanngilaq.

Ineqarneq pillugu maalaaruteqartarfik isumaqarpoq suliami matumani aseruineq/ajoqusiineq sukkulluunniit pisinnaasutut pinnani pisuittut pisimanera uppernarsineqanngitsoq, taamaattumillu § 45, imm. 2-mi aamma imm. 3-mi aalajangersakkat pingaarnerit malinneqarsimasut, aalajangersakkanilu taakkunani pisuni taaneqartutut ittuni akisussaassuseqarneq ataatsimut oqaatigineqarlutik tassaasut nungullarnerit pisoqalinerillu.

Taamaalilluni ineqarneq pillugu maalaaruteqartarfik isumaqarpoq Inissiaatileqatigiiffiup matup taarsernissaanut aningaasartuutit akilersinnissaannut peqqussummi tunngavissaqanngitsoq.

Naliliinermi tassani ineqarneq pillugu maalaaruteqartarfiup pingaartutut isigaa matup aserornerata illit ernerpilluunniit illersorneqarsinnaanngitsumik pissusilersornissinnit pissuteqannginnera.

Suliami takuneqarsinnaavoq ini iluarsaaneqartussaasoq, iluarsaassinissamullu tunngatillugu ernerpit siniffik ineeqqamit anninniartillugu siniffiup matumut kalluunneratigut matu putusimasoq. Tamatuma kingunerisaanik matu taarserneqartussanngorsimavoq.

Tamanna sukkulluunniit pisinnaasutut isigineqarmat ajoquserneq inissianik attartortitsisarneq pillugu peqqussummi § 48, imm. 1-imi pineqanngilaq, taamaattumik, takuuk qulaani allassimasut, tamanna isigineqartariaqarluni nungullarnertut pisoqalinertullu, tassanilu attartortitsisoq akisussaalluni, tak. § 45, imm. 2 pkt. 3.

Taamaattumik illit matup nutaamik taarsernissaa pillugu aningaasartuuteqarnissamut pisussaanngilatit.Akiligassat ilaannaalluunniit akilersimagukkit, taava taakku Inissiaatileqatigiiffiup ilinnut utertillugit akilertariaqarpai.

Aalajangiineq:

Inissiaatileqatigiiffik Inissiaatileqatigiiffik peqqussummi tunngavissaqanngilaq matup akilerneqarnissaanik piumasaqarnissaminut. Inissiaatileqatigiiffiup matup taarsernissaa aningaasartuutigissavaa.

Naammagittaalliorsinnaanermut ilitsersuut:

Ineqarneq pillugu maalaaruteqartarfiup aalajangiinera pisortat ingerlatsineranni oqartussaasunut allanut suliassanngorteqqinneqarsinnaanngilaq, tak. Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 86, imm. 7. Attartortitsisup attartortullu akornanni saqitsaassutaasup eqqartuussivimmut suliassanngortinnissaa kissaatigineqarpat, attartortitsisumik eqqartuussivimmut aqqeqqusissut eqqartuussivimmut tunniunneqassaaq. Tamanna aamma atuuppoq attartortitsisup allafissornikkut piginneqatigiiffianinngaanniit allakkatigut il.il. attaveqaqatigiinneq ingerlanneqarsimagaluarpalluunniit.

Ineqarneq pillugu maalaatueqartarfiup aalajangiineri Naamminersornerullutik Oqartussanit kommuninillu, attartortitsisuusunit pinngitsoorani malinneqartussaapput, tak. § 86, imm. 6.

Nunatta Eqartuussiviani ilitsersuinermut immikkoortortaqarfik oqarasuaatikkut saaffigineqarnissamut ammasarpoq sisamanngornerni nal. 14.00-miit 15.00 –mut. Oqarasuaat 36 80 00.