AALIANGIUSSAQ

Inigisanni naqqit kiassaataasa kissassinnaannginneranni, imaappoq april 2011 tungaanut innaallagissamik atuininnut akiligassat qaffasippallaarnerat pillugu naammagittaalliuutit Ineqarneq pillugu Naammagittaalliuuteqartarfiup 24. november 2011 suliaraa imatullu aalajangiilluni

AALAJANGIINEQ

Ineqarneq pillugu Naammagittaalliuuteqartarfik isumaqarpoq Inissiaatileqatigiiffiup suliaq ilinnut tunngasoq eqqortumik suliarisimagaa.

Tamanna paasisariaqarpoq illit naammagittaalliuutinni taperserneqanngitsutit.

Paasissutissat suliamut tunngassuteqartut

• Attartornermik isumaqatigiissut, atsiorneqartoq 2. Juli 2010

• Akiligassat allagartaat suliffeqarfimmit XX-imeersoq, 19. April 2011 ulloqartoq

• Naammagittaalliuut 7. juli 2011 ulloqartoq

• Inissiaatileqatigiiffiup oqaaseqaataa 15. august 2011 ulloqartoq

Nassuiaat

Suliami allassimavoq inissiamut, ullormi 15. Juli 2010 nutsertutit.

Ulloq 19. April 2011 Inissiaatileqatigiiffik attaveqarfigaat inigisanni naqqit kissatsissinnaanngimmata, innaallagissamik kiassarnermut uuttuummi sikringi atorsinnaajunnaarmat naqqit kiassaataata ikinnerani.

Naammagittaalliuutinni allapputit innaallagissamik atuinermut akiligassat tamatigut 1000 koruunit – 1200 koruunillu akornanniittartut, naqqillu kiassarnerat ajoquteqartoq. Qaammatip aprilip kingornagut innaallagissamut akiligassat 700 koruunit aamma 900 koruunit akornannut apparput.

Inissiaatileqatigiiffik ulloq 15. August 2011 Ineqarneq pillugu Naammagittaalliuuteqartarfimmut oqaaseqaammini oqaatigaa, ullormi inissiami pineqartumi naqqit kiassaataasa ajoquteqarnerat pillugu illit naammagittaalliorfinni, inissiaatileqatigiiffiup suliffeqarfik XX attaveqarfigigaa amigaataasut iluarsarnissaat pillugu. Paasineqarpoq naqqit kiassaataasa innaallagissap aqqutaanut atassutaa peerneqarsimasoq ikkuteqqinneqarsimananilu. Taamaammallu innaallagissamik atuineq iluamik uuttuiffigineqarsinnaasimanngitsoq. Innaallagissap aqqutaanut ataassutaasup peerneqarsimanera pissutaalluni naqqit kiassaataata ikinneqarnerani sikrinngi atorsinnaajunnaartarluni.

Oqaaseqaammi aamma atuarneqarsinnaavoq suliffeqarfimmi XX-imi sulisut ilaat nassuiaasimasoq naqqit kiassaataata malussarniutaa atassutaarneqarsimasoq, taamaammallu innaallagiaq atorneqartoq uuttorneqarsinnaanani. Ajoqullu taannarpiaq XX-imit ulloq 19.April 2011 iluarsineqarsimavoq, taamaalilluni innaallagissamik atuinerit uuttorneqarsinnaalerlunilu siunissami akiligassat allagartaanni atuineq takuneqarsinnaalissaaq. Sulisup nammineerluni tamatuminnga nalunaarfigisimavaatit ilanngullugulu Inissiaatileqatigiiffimmiit nalunaarfigisimallugu. Kiisalu oqaaseqaammi allassimavoq XX-p uppernarsaraa naqqit kiassaataata malussarniutaata peerneqarsimanera piffissami aalajangersimasumi innaallagissamik atuinermi akiligassat qaffannerinut pissutaanngitsoq. Inissiaatileqatigiiffiup innersuussutigaa nalinginnaasuummat aasaanerani qaammammut akiligassat amerlassuseqartarnerannut naleqqiullugu ukiup qaammataani innaallagissamik atuinermut akiligassat qaammammut 7-8000 koruunit akornanni amerlassuseqartarnerat.

Inatsisitigut tunngavigisat

Inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005-imeersumi § 45, imm. 1 malillugu Namminersorlutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Aalajangersakkami imm. 2 malillugu avammut kuuffinnut, kiassarnermut, innaallagissamut, gassimut imermullu teknikkikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnertigut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.

Peqqussummi pineqartumi § 84, imm. 2 malillugu ineqarneq pillugu naammagitttaalliuuteqartarfiup attartortut naammagittaalliuutaat makkununnga tunngasut suliarisarpai:

2) Aserfallatsaaliuineq iluarsaassinerlu, tak. § 45.

Naliliineq

Ineqarneq pillugu Naammagittaalliuuteqartarfik isumaqarpoq Inissiaatileqatigiiffiup amigaataasup iluarsineratigut attartortitsisutut pisussaaffini naammassigaa.

Taamatuttaaq Ineqarneq pillugu Naammagittaalliuuteqartarfik isumaqarpoq naqqit kiassarnerannut atortup peerneqarsimanera ukiuunerani innaallagissamut akiligassat qaffannerannut pissutaasinnaanera uppernarsarneqanngitsoq, taamaassinnaaneraluunniit ilimanaateqanngitsoq.

Taamaalilluni ineqarneq pillugu Naammagittaalliuuteqartarfik isumaqarpoq Inissiaatileqatigiiffiup ukiuunerani aasaaneranilu kiassarnermut aningaasartuutit assigiinngissutaannut ukiuunerani innaallagissamik atuinerusarneq pissutaasutut ilimanarnersaasoq.

Aalajangiineq

Inissiaatileqatigiiffiup attartortitsisutut pisussaaffini naammassigaa naqqit kiassarnerannut amigaataasup iluarsaanneragut.

Ukiuunerani innaallagissamut akiligassaqarnerulernermut naqqit kiassaataannut atassutaasup amigaataanerata pissutaanera uppernarsarneqanngilaq pissutaasinnaaneraluunniit ilimanaateqarani.

Naammagittaalliorsinnaanermut ilitsersuut

Inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005-imeersumi, kingusinnerusukkut allannguuteqartinneqartumi, § 86, imm. 7 malillugu ineqarneq pillugu Naammagittaalliuuteqartarfiup aalajangiineri ingerlatsinermi oqartussaasunut allanut naammagittaalliuutigineqarsinnaanngillat. Attartortup attartortitsisullu akornanni saqitsaassutaasup eqqartuussisunut suliassanngortinneqarnissaa kissaatigineqarpat, attartitsisumik eqqartuussivimmut aggeqqusissut eqartuussivimmut tunniunneqassaaq. Tamanna atuuppoq attartortitsisup allaffissornikkut ingerlatseqatigiiffianit allakkatigut attaveqarnerit il. il. ingerlanneqarsimagaluarpataluunniit.

Ineqarneq pillugu Naammagittaalliuuteqartarfiup aalajangiineri Namminersorlutik Oqartussanit kommuninillu, attartortitsisuusunit pinngitsoorani malinneqartussaapput. Namminersorlutik Oqartussat kommuniluunniit avataanit allaffissornikkut aqutsisumik isumaginnittuutitaqarpata Naammagittaalliuuteqartarfiup aalajangiineri aamma taakkunannga pinngitsoorani malinneqassapput, tak. Inissianik attartortitsisarneq pillugu Inatsisartut peqqussutaanni nr. 2-mi, 12. Maj 2005-imeersumi § 86, imm. 6.

Nunatta Eqqartuussiviata ilitsersuinermut immikkoortortaqarfia oqarasuaat atorlugu saaffiginninnernut ammasarpoq sisamanngornermi nal. 14 – 15 oqarasuaat 36 80 00.