AALIANGIUSSAQ

Inigisanni uffarfiup iluarsaannerata ilinnit akilerneqarnissaa pillugu inissiaatileqatigiiffiup aalajangiinera naammagittaalliuutigisat ineqarneq pillugu maalaaruteqartarfiup 19. september 2011 suliaraa imatullu aalajangiilluni

AALAJANGIINEQ

Inigisanni uffarfiup iluarsaannera illit akilissanngilat. Iluarsaassinermut aningaasartuutit inissiaatileqatigiiffimmit akilerneqassapput.

Paasissutissat suliamut tunngassuteqartut takuneqarsinnaasut

• Inissiamik attartornermut isumaqatigiissut 29. februar 1996-imeersoq.

• Inissiaatileqatigiiffimmiit inissianik nakkutilliisup attartukkamik misissuiartornera 20. august 2010.

• Uffarfiup qalipaatilinnik assiliortorneqarnera.

• Akiligassat allagartaat iluarsaassisuneersut.

• Akiligassaqarnermut uppernarsaat.

• Inissiaatileqatigiiffiup inissianik nakkutilliisuisa akornanni ullormi 2. november 2010 qarasaasiakkut allaffigeqatigiinnerit

• Attartortup inissiaatileqatigiiffimmut allagai 3. november 2010-meersut.

• Iluarsagassanngorsimasut paarsinerlunnermik pissuteqarnerannik naliliinermik inissiaatileqatigiiffiup aalajangiussinera 12. november 2010.

• Inissiaatileqatigiiffimmi atorfillip kiisalu K-p qaammat november allaffigeqatigiinnerannit.

• Attartortup naammagittaalliuutaa Inatsisartut Ombudsmandianit ulloq 20. januar 2011 ingerlateqqinneqartoq.

• Attartortup naammagittaalliuutaa 28. december 2010 ulloqartoq.

• Ineqarneq pillugu ullormi 14. juni 2010 suliap maalaaruteqartarfimmit suliarineqarsinnaannginnera pillugu maalaaruteqartarfiup attartortumik attaveqarnera.

• Ineqarneq pillugu suliap ulloq 5. august 2011 suliareqqinneqarnissaa pillugu maalaaruteqartarfiup attartortumut attaveqarnera.

• Inissiaatileqatigiiffiup allattoqarfiata V-illu akornanni ulluni 16. aamma 17. august 2011 allaffigeqatigiinnerit.

Nassuiaat

Attartornermut isumaqatigiissummi 29. februar 1996-imeersumi takuneqarsinnaavoq illit inissiamut, S, 1. marts 1996 nuuttutit.

Attartornermut isumnaqatigiissummi attartugassap pitsaassusisaa pillugu paasissutissanik allassimasoqanngilaq.

Najukkannik 19. august 2010, allamik pissuteqarluni, takusaanermi inissianik nakkutilliisup takuaa uffarfimmi maluginngitsuugassaanngitsumik aserortoqarsimasoq, tassa uffarfiup iigaasa qalliutaat kipparissunngorlugit suliat arlallit nakkaasimammata. Inissianik nakkutilliisoq naliliivoq tamatumunnga pissutaasimassasoq iikkat tunuini kiisalu uffarfiup naqqata qalliutaasa ataanni tunngaviit piffissami sivisuumi erngup qillaarfigisimammagit, taamaattumillu qalliutaasut katagarsimasut. Illit oqaatigaat aserfallanneq pisoq 1. juli 2010 missaani.

Inissianik nakkutilliisup S ullormi 20. august 2010 ilisimatissimavaatit uffarfiit paarinerlutaasimasoq, taamalu iluarsaanermut akiligassaq ilinnut nassiunneqassasoq. Tamatumunnga pissutaavoq illit iluarsagassanngorsimasut pillugit nakkutilliisumut kalerriussisimannginnerit.

Tamatuma kingunerisaanik uffarfiup iluarsarneranut akiligassat 29.505,00 koruunit akiligassaralugit uppernarsaallutit atsiorputit.

Uffarfiup iluarsaanneranut tunngatillugu inissiaatileqatigiiffik aalajangiivoq uffarfiup iigaasa qalliutaat uffarfiullu naqqata qalliutai manngertumik sanaat taarsersorneqassasut. Uffarfik suliarineqarpoq init imileriffiit aaqqissorneqartarnerat malillugu, uffarfiullu naqqa nutaanik kipparissunik manngertunngorlugit ikuallatanik qalliusersorneqarpoq, tamakkulu katiffii manngertumik ussissaasersorneqarlutik iigaalu nutaanik qallersorneqarlutik, akorni manngertumik ussissaaserlugit ilaatigullu gummi atorlugu ussissaaserlugit.

Ruujorit suliarineri inissiaatileqatigiiffimmit akilerneqarput.

Inissiaatileqatigiiffiup ineqarneq pillugu maalaaruteqartarfimmut allakkamini 17. august 2011 ulloqartuni oqaatigaa, akiligassat ilaat illit akiligassatit 27.155,00 koruuninut appartinneqarsimasut pissutigalugu, ilinnut akiligassiissutit allagartaanni ruujorit suliarinerisa akiligassartaata 2.450,00 koruuninik aningaasartallip ilannguttoorneqarsimanera.

Ullormi 2. november 2010 S-ip N, tamarmik inissiaatileqatigiiffimmit atorfillit, akornanni qarasaasiaq atorlugu allaffigeqatigiittarnernit takuneqarsinnaavoq, inissiap inigisavit qulaaniittup uffarfianit inigisavit qilaava aqqutigalugu imermik inigisannut qillaartoqartarsimasoq.

Aamma assileerummik assilisani, inissiatileqatigiiffimmit nassiunneqartuni takuneqarsinnaavoq, inigisavit uffarfittaani ruujorit assut nutaanngilisimasut. Ruujorit ilaat takuneqarsinnaasutut manngortornermit saaliortinneqarlutik putoqalersimasut.

Uffarfimmi aserfallannerit pinngorsimanerinut ruujorit putoqalersimanerisa erngup aseruineranut pisooqataanerat ilimanarluinnarpoq.

Uffarfiup assilinerisa takutippaat uffarfik pisoqaaqisoq attartortitsisumit aserfallatsaalineqarsimannginnera takuneq ajornanngitsoq.

Ullormi 3. november 2010 Inatsisartut Ombudsmandianut inissiaatileqatigiiffimiit iluarsaassinermut atatillugu akiligassat piumasarisai maalaarutigaatit. Inatsisartut Ombudsmandiata maalaarutit ineqarneq pillugu maalaaruteqartarfimmut ingerlateqqippaa.

Maalaarutinni suliap ingerlasimanera nassuiaatigaat kiisalu allapputit toqqissiveeruttutut misigisimasimallutit, taamaattumillu akiitsoqarnermut uppernarsallutit atsiorsimallutit. Oqarfigineqarsimavutit inigisanni iluarsaassinermut aningaasartuutit akilernianngikkukkit inissiaatileqatigiiffimillu suleqartiginninnianngikkuit inigisannit anisitaassasutit. Aamma naammagittaalliuutinni oqaatigaat uffarfinni iluarssaassinerup kingorna ullut 14 qaangiuttut qilaamit cementikkamit kusilersimasoq. Oqaatigaat tamanna N nalunaarutigisimallugu, kisianni suli arlannik iliuuseqartoqanngitsoq, maannalu kusertoq immineerluni kuserunnaarsimasoq. Qilaami takusinnaasimavat kuserfiit nalunaatsut marluk.

Inissiaatileqatigiiffiup ineqarneq pillugu maalaaruteqartarfimmut ulloq 17. august 2011 allakkamini oqaatigaa inissiaatileqatigiiffiup nalinginnaasumik politikkerigaa inissiami annerusumik minnerusumilluunniit iluarsaassisoqaraangat – apeqqutaatinnagu kiap akiligassaanik iluarsaassisoqarnersoq – taava iluarsaassineq iluatsillugu aserfallatsaaliinermik annerusumik minnerusumilluunniit suliassat aamma isumagineqartartut. Aamma matumani taamaaliortoqarpoq. Taamaalilluni aningaasat aserfallatsaaliinermut atorluarneqartarput tamatumunngalu peqatigitillugu soorlu allanngortiterinertigut/nutserinertigut iggavimmut, uffarfimmut assigisaannullu ingerlasinnaajunnaartarnerit ineqartunut pinngitsoortinniarneqartarlutik.

Inatsisitigut tunngavigisat

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 84 malillugu ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.

2) Aserfallatsaaliuineq iluarsaassinerlu, tak. § 45.

Peqqussummi pineqartumi § 45 malillugu Namminersornerullutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikkikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit aalaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikut pisoqalisimasullu ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.

Naliliineq

Ineqarneq pillugu maalaaruteqartarfik isumaqarpoq Inissiaatileqatigiiffiup inigisanni uffarfiup iluarsaanneranut akiligassaq tamaat akilissagaa.

Aalajangiinermut tunngavigineqarpoq inissiaatileqatigiiffik tassaasoq taknikkikkut atortulersuutinik iluarsassinissamut pisussaaffeqartoq, tassani ilaatinneqarlutik ruujorit imerajuit aqqutaat ruujorillu allat il.il.

Ineqarneq pillugu maalaaruteqartarfik suliamut matumani pineqartumut tunngatillugu isumaqarpoq ersarissumik uppernarsaaserneqanngitsut aserfallannerit matumani pineqartut nungullarnermik pisoqalinermillu pissuteqarnerat. Taamaattumik aalajangersakkami pingaarnermi § 45, imm. 2 pkt. 3-mi allassimasut malillugit, tassani ataatsimut oqaatigineqarlutik akisussaaffinnut tunngasut, tassalu imaappoq attartortitsisoq attartukkamik aserfallatsaaluinermut pisussaaffeqartoq.

Aalajangiineq isumaqarpoq inissiatileqatigiiffik ruujorinik uffarfimmilu atortunik aserfallatsaaliuisimannginerata malitsigisaanik ajoqutit pinngorsimasut inissiaatileqatigiiffimmit akisussaaffigineqartut.

Taamaattumik inissiatileqatigiiffiup uffarfimmi iikkersuutit naqqatalu marrarmik sanaanik ikuallallugit manngertunngortitanik kipparissunik qalliutaasa aseruatiternerinut aningaasartuutit akilernissaannut pisussaavoq, tamakkununnga ilanngullugit iikkanut qalliutit aammalu uffarfiup naqqanut qalliutit qarmasissiassanit sanaat ikuallallugit manngertunngortitat inissiaatileqatigiifiup nammineq taarsersugai siunissami attartortumut akornutaaqqunagit.

Ineqarneq pillugu maalaaruteqartarfiup oqaatigissavaa inigisanni kusertoqarnera pillugu viceværti inissianilluunniit nakkutilliisoq kallerissimasariaqaraluaritit taamaaliornikkut erngup aseruinissaa killilerumallugu.

Inissiaatileqatigiiffiup tungaanut qisuariaateqarsimannginnerpit immini uffarfinni iluarsaanermi aningaasatuutit akilernissaannut pisussaatinneqarnissat kingunerissanngilaa.

Ineqarneq pillugu maalaaruteqartgarfiup arajutsisimanngilaa iluarsaanermi aningaasartuutit akiitsorinerinut uppernarsaat atsiorsimagit. Taamaattoq aalajangiineq manna malillugu uppernarsaaneq akisussaassuseqarnissamut tunngavissamik pasinaarneqanngitsumik tunngaveqarpoq, taamatuttaaq uppernarsaanerup – nalinginnaasumik paasillugu - naammagittaalliuuteqarsinnaaninnut periarfissannit akornusersinnaanatit.

Aalajangiineq

Inissiaatileqatigiiffiup uffarfinni iluarsaanermut atatillugu aningaasartuutit tamakkiisumik akilissavai.

Naammagittaalliorsinnaanermik ilitsersuut

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi kingusinnerusukkut allannguuteqartinneqartumi, tak. § 86, imm. 7, ineqarneq pillugu maalaaruteqartarfiup aalajangiinera allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq. Attartortitsisup attartortullu akornanni saqitsaassutaasoq eqqartuussisunut suliassanngortinneqarnissaa kissaatigineqarpat attartortitsisumik eqqartuussivimmut aqqeqqusissut eqqaartuussivimmut tunniunneqassaaq. Tamanna aamma atuuppoq attartortitsisup allaffissornikkut aqutsisoqarfianit allakkatigut nalunaaruteqarnerit il. il. pisarsimagaluarpataluunniit.

Ineqarneq pillugu maalaaruteqartarfiup aalajangiineri Namminersornerullutik Oqartussanit kommuninillu, inissianik attartortitsisuusunit pinngitsoorani malinneqassapput, tak. § 86, imm. 6.

Nunatta Eqqartuussiviani ilitsersuinermut immikkoortortaqarfik oqarasuaatikkut saaffiginninnernut ammasarpoq sisamnngornerni nal. 14.00-miit 15.00-mut, oqarasuaat 36 80 00.