AALIANGIUSSAQ

Inissiaatileqatigiit Inissiaatileqatigiiffiup inigisanniiginnarnissannut itigartitsinera pillugu maalaarutit, Ineqarneq pillugu Maalaaruteqartarfiup marsip 9-ani 2011 suliaraa

AALAJANGIINEQ

Inissiaatileqatigiiffiup attartuinermut isumaqatigiissummik atorunnaarsitsinera eqqunngimmat malaarutigisat akuerineqarpoq.

Suliamut tunngatillugu allagaatit:

Inimik attartornermut isumaqatigiissut maajip 5-ani 2006-imeersoq

YY-p ZZ Kommunea-nut juulip 4-ni 2006 allagaa

Maalaarut juunip 18-ani 2010 tiguneqartoq

Qarasaasiakkut allakkat novembarip 9-ani 2010-meersut

Inissiaatileqatigiiffimmmit suliamut tunngatillugu allagaatit novembarip 2-ani 2010 tiguneqartut

Inunnik nalunaarsuiffimmiit paasissutissat novembarip 9-ani 2010 tiguneqartut

Oqarasuaatikkut oqaloqatigiinnermit allaakkiaq februaarip 9-ani 2011-imeersoq

Nassuiaat:

Inimik attatornissamut isumaqatigiissut maajip 5-ani 2006 ullulerneqarsimasoq naapertorlugu ulloq taanna inigisat XX attartugarilerpat.

Juulip 4-ni 2006 Nuuliarninnut atatillugu inigisat erninnut paaritillugu XX allakkatigut ilisimatsippat. Ernerillu inimi tassani ineqatigeereersimavusi.

XX Kommunea-ta tamanna tusaatissatut tiguaa allakkannullu ukiup pingajua qeqqa peqannginnissannik naatsorsuuteqarnerit nalunaarlugu.

Oqarasuaatikkut oqaluunnermi nalunaarsukkat naapertorlugit februaarip 9-ani 2011 ini attartugaq inissiaatileqatigiiffimmit januaarip 1-ani 2009 tiguneqarpoq.

Allakkanni juunip 14-ani 2010 ullulerneqarsimasuni juunip 18-ani 2010 maani tiguneqartuni inigisavit Inissiaatileqatigiiffimmit utertikkumaneqannginnera, Ineqarneq pillugu Maalaaruteqartarfimmut maalaarutigaat. 2006-imi nuunninnut atatillugu tamatuma neriorsuutaasimanera, ernerpillu peqannginninni inimik paarsisuunissaa kisiat attatortitsisumut oqaatigisimagit ilisimatitsissutigaat. Inissiaatileqatigiiffik, inigisannut utersinnaannginnerit pillugu, Ineqarneq pillugu Maalaaruteqartarfimmut allakkat assilinerinik oqarasuaatikkulluunniit oqaluussimanermut nalunaarsukkamik nassiussaqanngilaq.

Juulip 4-ni 2006 nalunaaruteqarnerit, inip attartorneranut isumaqatigiissummik tunniussinertut attartortitsisup isigaa, ernerpillu ini ilinnut atukkiuppagu aatsaat inigeqqilersinnaagit, Inissiaatileqatigiiffiup Ineqarneq pillugu Maalaaruteqartarfimmut ilisimatitsissutigaa.

XX Kommune-ata ernerpillu akunnerminni inimik attartornissamut atukkiussinissamulluunniit isumaqatigiissusiorsimanerannut takussutissaqanngilaq.

Inatsisit tungavigineqartut:

Inissianik attartortitsisarneq pillugu Inatsisartut Peqqussutaanni nr. 2 maajip 12-ani 2005-imeersumi § 84 imm. 1 nr. 6 naapertorlugu suliat atuisinnaatitaanerup allanut tunniunneqarneranut tunngasut Ineqarneq pillugu Maalaaruteqartarfimmit suliarineqarsinnaapput.

Naliliineq:

Maalaartivit tiguneqarnerata nalaani inimik attartortuusutut ineqarnermullu akiliisartussaasutut isigineqartariaqartutit, Ineqarneq pillugu Maalaaruteqartarfik naliliivoq.

Attartukkap allamit tiguneqarneranut uppernasaatissamik Inissiaatileqatigiiffiup takussutissiisinnaannginnera – InissiaatileqatiGiiffiup XX Kommuneata namminneq ernerpillu akunnerminni, inimik attartornissamut isumaqatigiissutaannik takussutissaqannginnera, Inissiaatileqatigiiffiullu illit attartortutut isumaqatigiissutinnik atorunnaarsitsisimannginnera, Ineqarneq pillugu Maalaaruteqartarfiup pingaarutilittut nalilerpai.

Aalajangiineq:

Inissiamik XX attartortuusutut inissisimavutit.

Naammagittaalliorsinnaaneq:

Inissianik attartortitsisarneq pillugu Inatsisartut Peqqussutaanni nr. 2-mi maajip 12-ani 2005-imeersumi kingorna allannguuteqartumi § 86 imm. 7 naapertorlugu Ineqartut Maalaarutaannik Aalajangiisartoqatigiit aalajangigaat pisortaqarfinnut allanut suliakkiissutigeqqinneqarsinnaanngillat. Attartortitsisup attartortullu akornanni aaqqiaanngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.

Ineqartut Maalaarutaannik Aalajangiisartoqatigiit aalajangigaat kommuninit Namminersorlutillu Oqartussanit inissianik attartortitsisuusunut § 86 imm. 6 naapertorlugu allanngortinneqarsinnaanngilaq.

Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.