AALIANGIUSSAQ

Inissianik paarlaateqatigiinnissaq pillugu suliap Inissiaatileqatigiiffimmit Inissiaatileqatigiiffimmit suliarineqarnera pillugu naammagittaalliuutit Ineqarneq pillugu Naammagittaalliuuteqartarfiup 9. marts 2012 suliaraa imatullu aalajangiilluni

AALAJANGIUSSAQ

Ineqarneq pillugu Naammagittaalliuuteqartafik isumaqarpoq inissianik paarlaateqatigiinnissamut atatillugu aningaasartuuteqarnerussutaasut attartortut akilissagaat.

Tamanna isumaqarpoq illit nammineq ineqarnermut aningaasartuutit, makkuusut ineqarnermut akiliut, kiassarneq innaallagiarlu akilissagitit, inissiamilli qimatamik iluarsaassinermut nalinginnaasumut atatillugu aningaasartuutit ikiliartuaassasut.

Tamanna aamma isumaqarpoq illit tunngaviatigut ineqarnermut, kiassarnermut innaallagissamullu akiligassat akilissagitit allami inisimasuugallarnerpit nalaani kiisalu utaqqiisaasumik ineqartitaanerpit nalaani.

Ineqarneq pillugu Naammagittaalliuuteqartarfiup nalunngilaa illit ataatanni najugaqarallarnerpit nalaani ineqarnermut, kiassarnermut innaallagissamullu aningaasartuutit akilernissaat pillugu naammagittaalliuutit Inissiaatileqatigiiffiup Inissiaatileqatigiiffiup akuerisimagaa. Inissiaatileqatigiiffik aalajangersimavoq piffissami 5. april 2011-miit 18. april 2001-mut, tassa ulluni 14-ini inisimasuunerpit nalaani, akiliissanngitsutit.

Taamaattumik Ineqarneq pillugu Naammagittaalliuuteqartarfik isumaqarpoq paarlaateqatigiinnermut atatillugu aningaasartuutinnik amerlanerusunik utertitsivigineqarnissamut pisinnaatitaanngitsutit.

Tamanna isumaqarpoq naammagittaalliuutinni taperserneqanngitsutit.

Sofap aserorneranut atatillugu taarsiiffigitinnissamut, aammalu nuuttarnernut atatillugu illit ernerpillu, oqaatigineqartut naapertorlugit misigissutsikkut nanertuutissinneqarnersi pillugu taarsiiffigineqarnissassinnut pisinnaatitaanersusi Naammagittaalliuuteqartarfiup isummerfigisinnaanngilaa.

Paasissutissat suliamut tunngassuteqartut:

Attartornermut isumaqatigiissut ilinnut tunngasoq, 15. november 1994 atsiorneqartoq.

Attartornermut isumaqatigiissut A-mut tunngasoq, atsiorneqartoq 7. juli 2003.

Inissianik paarlaateqatigiinnissaq pillugu qinnuteqaat, atsiorneqartoq 23. marts 2011.

Inissiaatileqatigiiffiup allagai 25. marts 2011 ulloqartut, ilinnut A-mullu.

Inigisannik misissuinermut atatillugu nalunaarusiaq 14. april 2011 ulloqartoq.

A-p inigisaanik misissuinermut atatillugu nalunaarusiaq 26. april 2011 ulloqartoq.

Inissiaatileqatigiiffiup nassuiaataa 15. juni 2011 ulloqartoq.

Illit nassuiaatit Ineqarneq pillugu Naammagittaalliuuteqartarfimmit ulloq 4. juli 2011

tiguneqartoq.

Akiligassat allagartaat 19. april 2011 ulloqartoq.

Naammagittaalliuut 27. juni 2011 ulloqartoq.

Nassuiaat:

Suliami takuneqarsinnaavoq najukkami X 1994-imiilli najugaqarsimasutit.

A 2003-miit XX 2003 najugaqarpoq.

Ulloq 22. marts 2011 illit A-lu inigisassinnik paarlaateqatigiinniarlusi qinnuteqarpusi.

Allakkatigut 25. marts 2011 Inissiaatileqatigiiffiup Inissiaatileqatigiiffiup uppernarsarpaa ullormi 1. maj 2011 inigisassinnik paarlaateqatigiissinnaasusi. Taava tassunga tunngasumik aperineqarpusi, qanoq iliorlusi paarlaatigigiinnissarsi ingerlanniarnerissi. Inissiaatileqatigiiffiup inissiaatileqatigiiffiup paarlaateqatigiinnissamut periarfissat saqqummiupai. Paarlaateqatigiinnissassinni qanoq iliorniarnerlusi nalunaarutigigussiuk, taava Inissiaatileqatigiiffiup allakkiat atsiugassat naammassissagai.

Qarasaasiaq atorlugu allakkatigut 15. juni 2011 ullulerneqartutigut Inissiaatileqatigiiffik suliap ingerlarnga pillugu nassuiaateqarpoq, tassunga ilanngullugu taallugu ilissi paasinnittusi inigisassannik paarlaateqatigiinnissarsi akornutissaqanngitsoq, Inissiaatileqatigiiffimmi atorfillip oqaatigimmagu paarlaateqatigiinnissaq akornutissaqanngitsoq akiitsoqannginnassi allatigulluunniit Inissiaatileqatigiiffimmik akerleriissuteqannginnassi.

Nassuiaammi allassimavoq ulloq 25. marts 2011 ilissi paasitinneqartusi angerlarlusi paarlaateqatigeeriaaseq sorleq toqqarniarnerlugu eqqarsaatigissagissi. Paarlaateqatigiinnisaap pissusissaatut pinissaanut piumasaasut naammassineqanngimmata inissiaatileqatigiiffimmi sulisup pisortatiguunngitsumik oqatigisimavaa paarlaateqatigiinneq atuutilersinnagu attartornermut isumaqatigiissutit nutaat atsioqqaartariaqartut. Inissinnik paarlaateqatigiippusi 26. april 2011. Tassunga tunngatillugu nalunaarfigineqarputit malittarisassat malissimanngikkisi, tassa attartornermut isumaqatigiissutinik atsiugaqarsimannginnassi. Peqatigitillugu ilisimatinneqarputit inigisassi nalinginnaasumik iluarsaannerini inissassinnik nammineq pissarsiniartariaqartusi. Taamatut ilisimatinneqarnerit paasillugu oqarputit, imaappoq inigisannit anisinneqartutit. Nassuiaatigineqarpoq inigisannit anisinneqanngitsutit ineqarnerli pillugu peqqussut attartukkap nalinginnaasumik iluarsaannissaanut atatillugu isummerfigissagit.

Kiisalu nassuiaammi atuarneqarsinnaavoq inissiaatileqatigiiffiup paasinninnera malillugu suliaq naammassisimasoq. Marluullusi attartornermi isumaqatigiissutit nutaat atsiorsimavasi. Isumaqatigiinneq malillugu inissannut nutaamut nuussimavutit 16. maj 2011. Inissiaatileqatigiiffiup akueraa ininik paarlaateqatigiinnermut atatillugu nalunaarutit amigaateqartarsimanerat.

Naammagittaalliuutinni allapputit inissianik paarlaateqatigiinnissaq pillugu qinnuteqaatit 22. marts 2011 ulloqartut atsiorneqartut Inissiaatileqatigiiffimmullu tunniunneqartut. Qinnuteqaat Inissiaatileqatigiiffimmi sulisup tiguai nassuiaallunilu ilissi inissinnik paarlaateqatigiissinnaasusi 1. april nallertinnagu, paarlaateqatigiinnerlu pivoq 29. marts 2011. Nassuiaanneqanngilasi inissiat iluarsaanneqarsimanissaannik nutaamillu qalipanneqasimanissaannik. Inissiat inigisasi qimattariaqarsimavasi pigisasi ilanngullugit, namminerlu immikkut tamassi inigisassi iluarsaanrerini inissamik utaqqiffissassinnik pissarsiniartussallusi.

Aamma allapputit inigisasi ulloq 5. april 2011 qimareersimasussaagisi. Illit ulloq 12. april 2011 ataatannut nuupputit, tassaniillutillu 26. april 2011 missaata tungaanut. Ataatanniit inissiamut utaqqiffiusartumut nuupputit. Ullorlu 16. maj 2011 paarlaateqatigiiffigisavit inaanut nuupputit. Inissiamut april tamaat ineqarnermut, innaallagissamut kiassarnermullu akiliisussaavutit. Aamma inissiap utaqqiffiusartup piffissami 1. majimiit 15. majimut atorneranut akiliuteqartussaallutit, aammalu 16. majimit 2011 paarlaateqatigisavit inaanut nuuffigisannut akiliisussaallutit.

Naggasiullugu makku piumasaraatit:

1. Ataatavit inigisaani utoqqarnut inissiami inisimanermut atatillugu qaammatip affaanut akiliutip ilinnut utertillugu akilerneqarnissaa/taarsiivigineqarnissat

2. Inissiamut tunngatillugu qaammatip aprilip affaanut ineqarnermut, kiassarnermut innaallagissamullu akiliutivit utertinneqarnissaat/taarsiivigineqarnissat

3. Inissiamut utaqqilluni inigineqartartumut akilikkat utertinneqarnissaat.

4. Aammalu inissiap paarlaateqateqarlutit inigilikkavit qimaqquneqarneranut atatillugu pigisat nal. akunnerpassui assartoqattaarlugit, pequtillu assartoqattaarnerini sofap niulua napisimasoq. Nal. akunneri tamatumunnga atorneqartut aamma sofap ajoqusernerata akilerneqarnissaat piumasaraarsi.

5. Naggataatigut nutseqattaarnerni ilissi misigissutsitigut artorsartitaanissinnut atatillugu taarsiivigineqarnissarsi piumasaraarsi.

Inatsisitigut tunngavigisat:

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 59, imm. 2 malillugu attartortut iniminnik paarlaateqatigiinnissartik namminneerlutik isumaqatigiissutigisimappassuk, tamanna nuunnissamik kissaateqartut allattorsimaffiannut allatsinngikkaluarluni pisinnaavoq. Aalajangersakkami pineqartumi imm. 3-mi atuarneqarsinnaavoq attartortut iniminnik paarlaateqatigiinnissamik kissaateqartut tamarmik attartornermut isumaqatigiissutinik maleruaasinnaanissaat piumasaqaataavoq. Inigisanik paarlaateqatigiinnermi attartornermut ataatsimut 250 koruuninik sullissinermut akiliisitsisoqartarpoq.

Imm. 4 malillugu attartortut inigisaminnik paarlaateqatigiissinnaapput imaaliorlutik:

1) Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-t paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissat pillugit ilitsersussavai.

2) Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagisinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.

Aalajangersakkami pineqartumi imm. 5-imi atuarneqarsinnaavoq imm. 4, nr. 2 naapertorlugu inissianik paarlaateqatigiinnermi attartortitsisup attartortup attartugassamini nutaami nammineerluni nalinginnaasumik iluarsaassinissamik kissaateqarnera itigartissinnaavaa, nalinginnaasumik iluarsaassinermit kingullermiit ukiut tallimat sinnerlugit qaangiussimappata.

Kiisalu imm. 6-imi atuarneqarsinnaavoq, imm. 4 nr. 2 naapertorlugu nalinginnaasumik iluarsaassinermut atatillugu inissiat paarlaateqatigiinnermi pineqartut nalinginnaasumik iluarsassinerup nalaani inigineqarnerat pissutigalugu saniatigut aningaasartuuteqartoqassappat, saniatigut aningaasartuutit attartortumit qimatsisussamit akilerneqassapput.

Peqqussummi pineqartumi § 84, nr. 2 malillugu Ineqarneq pillugu Naammagittaalliuuteqartarfiup suliarisarpai attartortunit inigisanik paarlaateqatigiinnermut atatillugu naammagittaalliuutigineqartut, takuuk § 59.

Naliliineq:

Ineqarneq pillugu Naammagittaalliuuteqartarfik isumaqarpoq illit inissianik attartortitsisarneq pillugu peqqussummi malittarisassat malissimanngikkitit, taamanikkut paarlaateqatigiinnermut atatillugu paarlaateqatigisavit inigisimasaanut 29. marts 2011 nuunninni, pissutigalugu attartornermut isumaqatigiissut atsiorneqarsimanngimmat.

Inissianik attartortitsisarneq pillugu peqqussummi § 59-imi atuarneqarsinnaavoq inigisanik paarlaateqatigiinnissamut tunngaviusoq tassaasoq inissianik attartortitsisarneq pillugu peqqussummi malittarisassat malinneqarnissaat.

Tamatumani Ineqarneq pillugu Naammagittaalliuuteqartarfiup pingaartutut isigaa Inissiaatileqatigiiffiup ilinnut A-mullu allagaani 25. marts 2011-meersuni takuneqarsinnaavoq tamassi ilisimatinneqarsimasusi paarlaassinnaasusi 1. maj 2001. Aamma allakkani takuneqarsinnaavoq aaqqiinissaq qanoq ittoq atorniarnerlugu isumaqatigiissutigigussiuk tamannalu nalunaarutigalugu, taava inissiaatileqatigiiffiup uppernarsaatit atsiugassat suliarissagai.

Aamma Ineqarneq pillugu Naammagittaalliuuteqartarfik isumaqarpoq illit ineqarnermut, kiassarnermut innaallagissamullu akiligassat akilissagitit, taavalu ataatavit inigisaani inisimasuuninni aammalu inissiami utaqqiisaagallartumik inigineqartartumi ineqarnerpit nalaani inigisavit qimatavit nalinginnaasumik iluarsaanneranut aningaasartuutit, ineqarnermut, kiassarnermut innaallagissamullu aningaasartuutit ikiliartortinneqassallutik.

Taamatut naliliinermi Ineqarneq pillugu Naammagittaalliuuteqartarfiup pingaartutut isigaa ilissi tamassi immikkut inigisassinni qaammatit 35 sinnerlugit najugaqarsimanersi. Taamaattumik attartornermut isumaqatigiissutit atorunnaarseqqaartussaapput inissiallu nalinginnaasumik iluarsaanneqarlutik. Attartornermut isumaqatigiissutit nutaat atsiorneqartussaapput. Tamakkua pereerpata aatsaat paarlaateqatigisavit ini qimataa nuuffigisussaavat.

Tamanna isumaqarpoq nalinginnaasumik iluarsaassinerup kingunerisinnaagaa aningaasartuutit amerlanerulernerat aammalu aningaasartuutissat amerleriaatigisinnaasaat inissiamiit nuuttup akilissagai.

Tamanna tunngavigalugu Ineqarneq pillugu Naammagittaalliuuteqartarfik isumaqarpoq tunngaviatigut pequttat assartornerannut aningaasartuutit illit akiligassarigitit, kiisalu ataatavit inaani inisimasuunerpit aammalu utaqqiisaagallartumik inigineqartartumi ineqarnerpit nalaani aningaasartuutit akiligassarigitit, pissutigalugu tamakku inigisap qimatap nalinginnaasumik iluarsaaneranut attuumassuteqarmata.

Taamatuttaaq Ineqarneq pillugu Naammagittaalliuuteqartarfiup nalunngilaa Inissiaatileqatigiiffiup 15. juni 2011 paarlaateqatigiinnermut tunngasumik suliamut atatillugu paarlaateqatigiinnik ilisimatitsisarnerit amigaateqarsimanerat ilumoornerarsimagaa. Taamaattumik Inissiaatileqatigiiffik aalajangerpoq piffissami 5. april-imiit 18. april-imut 2011, tassa katillugit ullut 14-t ineqarnermut akiliuteqarfigissanngikkitit.

Tamanna isumaqarpoq paarlaateqatigiinnermut atatillugu aningaasartutigisannit amerlanerusunik utertitsinissamik/taarsiivigineqarnissamik piumasaqarnissamut pisinnaatitaanngitsutit.

Illit piffissap 12. april-.imiit 26. aprilimut pineqarneranik oqaaseqarsimanerpit siuliini naliliineq allanngortissinnaanngilaa.

Ineqarneq pillugu Naammagittaalliuuteqartarfiup sofap niuluata aserorneranut tunngatillugu taarsiivigineqarnissamik piumasaqarneq isummerfigissallugu pisinnaatitaanngilaq, taamatuttaaq misigissutsikkut oqimaatsorsiortitaasimanermut tunngatillugu taarsiivigineqarnissamik piumsaqarneq Ineqarneq pillugu Naammagittaalliuuteqartarfiup isummerfigissallugu pisinnaatitaanngilaq.

Aalajangiineq:

Ineqarneq pillugu Naammagittaalliuuteqartarfik isumaqarpoq inigisanik paarlaateqatigiinnermut atatillugu aningaasartuutigisannik utertoorutigeriikkavit saniatigut utertitsivigineqarnissamik piumasaqarnissamut pisinnaatitaanngitsutit.

Taamaattumik naammagittaalliuutinni taperserneqanngilatit.

Naammagittaalliorsinnaanermut ilitsersuut:

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 86, imm. 7 malillugu naammagittalliuummik itigartitsineq allaffissornikkut aqutsinermi pisortanut oqartussaasunut allanut suliassanngortinneqarsinnaanngilaq. Attartortitsisup attartortullu akornanni saqitsaannerup eqqartuussisunut suliassanngortinneqarnissaa kissaatigineqarpat, attartortitsisumik eqqartuussivimmut aggeqqusissut eqqartuussivimmut tunniunneqassaaq. Tamanna aamma atuuppoq attartortitsisup allaffissornikkut ingerlatseqatigiiffianit allakkatigut nalunaarfigeqatigiittarneq il. il. ingerlanneqarsimagaluarpalluunniit.

Ineqarneq pillugu Naammagittaalliuuteqartarfiup aalajangiineri Namminersornerullutik Oqartussanit Kommuninillu attartortitsisuusunit pinngitsoorani malinneqartussaapput Namminersornerullutik Oqartussat kommuniluunniit avataaniit allaffissornikkut aqutsisumik isumaginnittuutitaqarpata, naammagittaalliuuteqartarfiup aalajangiineri aamma taakunannga pinngitsoorani malinneqassapput, takuuk inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 86, imm. 6.

Nunatta Eqqartuussiviani ilitsersuinermut immikkoortortaqarfik oqarasuaatikkut saaffiginninnernut ammasarpoq sisamanngornerni nal. 14-15 oqarasuaat 36 80 00

0.