AALIANGIUSSAQ

Suliami periaaseq:

Suliaq una siulittaasup aalajangiineratigut Ineqarnermut Naammagittaaliiuteqartarfimmut allattoqarfimmi sulianik suliarinnittarnermi ileqquusumit ilaatinneqanngilaq.

Ineqarnermut Naammagittaalliuuteqartarfiup allattoqarfia aaqqissuussaanikkut Siunnersuisoqatigiinnut Aalajangiisartunullu Aqutsisoqarfiup ataani inissisimavoq suliamilu uani attartortup illua’tungiusutut sinniisaa ulluinnarni pisortatut atorfimmi ulluinnarni sulisuuvoq.

Taamaattumik uanga Ineqarnermut Naammagittaalliuuteqartarfimmi siulittaasutut aalajangepunga, suliami uani Ineqarnermut Naammagittaaliiuteqartarfiup allattoqarfia allakkat pillugit saaffiginnittarfittut kisimi atuutissaaq, inissianik attartortitsisarneq pillugu Inatsisartut peqqussutaat nr. 2, 12. Maj 2005-imeersoq (kingusinnerusukkut allannguutitalik) naapertorlugu.

Taamaattumik aalajangiiffigisassatut inassuteqaat una aamma tamakkerlugu uanga suliaraara, soorluttaaq taanna aalajangiisartunut ilaasortanut uannit namminermit agguaanneqartoq.

Suliap saqqummiunneqarnera:

Ulloq 15. april 2005-imi attartortup attartornini aallartippaa najukkami Nuummi L1-imi inissisimasoq A-ip ataaniittumi. Inissiaq 2-nik initaqarpoq.

Ilaqutariit amerliallannerisa kingunerisaanik inissiamut anginerusumut parlaannissaq attartortup 2010-mi upernaakkut kissaatigaa tassungalu atatillugu A-imut saaffiginnilluni taassumalu attartortoq attartortumut allamut X-imut inissiamik paarlaateqatigiikkumasunik allattortissimasumut attaveqartippaa. Atartortoq X najukkami L2-mi inissisimasumik inissiami najugaqarpoq.

Attartortoq 12. maj 2010-mi attartortoq X-imik naapitsinneqarpoq.

Siullermik inissiaq attartortup L1-imi najugaa takuniarpaat kingornalu attartortup X-ip L2-mi inissiaq inigisaa takuniarpaat.

Takuniaanerit tunngavigalugit “inissianik paarlaannisasamik” kissaateqarumallutik taakku isumaqatigiipput.

Inissianik paarlaannissamik qinnuteqaat A-imut saqqummiunneqarpoq tassungalu atatillugu attartortut taakku marluk peqatigalugit A-ip Nuummi immikkoortortaani 25. Maj 2010-mi ataatsimut ataatsimiittoqarpoq. Ataatsimiinnermi tassani attartortup, attartortup X-ip aamma A-ip akornanni inissianik paarlaannermi attartornermut isumaqatigiissummut tapiliut atsiorneqarpoq.

Tapiliut imatut imaqarpoq:

[Attartortoq X] attartukkamit 01.07.2010-mi anissaa, [attartortoq X] aamma [attartortoq] inissianik paarlaannissartik isumaqatigiissutigimmassuk, imaalillugu [attartortoq] attartukkami ngerlaannassalluni, tak. inissianik attartortitsisarneq pillugu Inatsisartut peqqussutaanni § 59, imm. 4, nr. 1. [Attartortoq X] attartornermut isumaqatigiissut aamma attartornermik inatsit malillugit attartortumut piumasaqaateqarnissaq atussanngilaa, sallunaveeqqusiussat utertillugit akilernissaannut pisinnaatitaaneq ilanngullugu eqqarsaatigalugu. Attartornermik isumaqatigiissut aamma attartornermik inatsit malillugit siumissami akiliutissat akilertarnissaannut [attartortoq X-imut] piumasaqaammik saqqummiussinissaq attartortitsisup atussanngilaa.

Aningasanut tunngasut [attartortoq X-p] aamma [attartortup] akunnerminni aaqqissuteqarfigissavaat.

Attartornermut isumaqatigiissut aamma attartornermut inatsit malillugit [attartortup] pisussaatitaaffiit aamma piginnaatitaaffiit tamaasa attartortutut ingerlatiinnassavai. Imaalillugu imermut kiassarnermullu naatsorsuutit inaarneqarpata akiliutinit utertitat [attartortup] pissagai imaluunniit saniatigut akileeqqusissutinik akiliissasoq.

Kingusinnerusukkut “inissianik paarlaanneq” piumasaqaammik allamik nutaamik allartortoq X-ip 25. Maj 2010-mi naammassinneqqusivoq. Piumasaqaatit attartortumut oqarasuaatikkut aamma toqqaannartumik saqqummiunneqarput. “Inissianik paarlaannermi” piumasaqaat alla nutaaq attartortup aallaqqaammut akueraa, piaarnerpaamilli attartortoq X sianerfigaa piumasaqaat itigartitsissutigalugu taanna inatsisinik unioqqutitsisoq taallugu.

“Inissianik paarlaanneq” atorsinnaanersoq pillugu attartortup aamma A-imi sulisup akornanni ulluni tulliuttuni oqarasuaatikkut attaveqaqatigiissutigingaatsiarpaat. Inissanik paarlaannermi attartornermut isumaqatigiissummut tapiliutip atsiukkap assilinera attartortup 28. Maj 2010-mi A-imit allakkatigut tiguaa. Junip aallartinnerani attartortup aamma A-imi sulisup akornanni oqarasuaatikkut attaveqatigiittarneq ingerlateqqinneqalerpoq.

A attartortoq X-imut najugaanut 15. Juni 2010-mi pulaarpoq.

Ataatsimiinnermi imaqarnialimit erserpoq, A-ip Nuummi immikkoortortaqarfiani sulianik suliarinnittartut marluk namminneq ornigullutik attartortoq X pulaarsimagaat. Ataatsimiinnermit imaqarniliamit ilaatigut atuarneqarsinnaavoq:

[Sulianik suliarinnittartartoq 1] aamma {sulianik suliarinnittartoq 2]ullumi nal.14.15 [attartortoq X] takuniarpaat [attartortoq X-imik] aamma [attartortumik] inissiamik paarlaanneq pillugu oqaloqatigiartorlugu. [Attartortoq X-p] matuatigut sianerpugut arnallu taassuma nammineq mappiuppaatigut, inissiamik paarlaannermi (Inissiamik paarlaannermi attartornermik isumaqatigiissummut tapiliummi) taassuma atsiornera pillugu taanna nassuiaappaat, nalinginnaasumik iluarsaassineq avaqqullugu illua’tungeriit taaku marluk namminneq inissiatik paarlaallutik tigugaat.

Arnaq taanna oqarpoq inissiamik paarlaanneq unitsissimallugu, tassagooq [tapiliummi piumasaqaat], [attartortoq X] 3-nik initalimmik inissiaqarmat aamma [attartortoq] 2-nik initalimmik inissiaqarmat.

Tamatumalu kingorna matu matuaa.

17. juni 2010-mi attartortoq aamma taassuma illua’tungiusutut sinniisaa aamma A-imi sulianik suliarinnittartut marluk peqatigiillutik ullut marluk qaangiummata attartortumut pulaarsimasut akornanni A-ip Nuummi immikkoortortaata allaffiani ataatsimiipput. Ataatsimiinnermit imaqarnialiamit ilaatigut erserpoq attartortup aamma taassuma illua’tungiusutut sinniisaata A-ip aaqqissugaanik inissiamik paarlaannerup atuunnera aalajangiusimagitsik. A-ip oqaatigaa isumaqatigiinngissutaasinnaasut A-ip susassaqarfiginngikkai.

Attartortup illua’tungiusutut sinniisaa 28. juni 2010-mi A-imut allappoq (e-mail). E-mailimi manna erserpoq:

Attartortut akunnerminni attartornermut isumaqatigiissutiminnut imminnut sinniisuutimmata taamaalilluni inissiat attartukkat attartortumut atugassiissutisiginissaanut A attartortitsisutut pisussaaffeqarpoq.

E-mailimi tassani illua’tungiusutut sinniisup piumasaraa uppernarsarneqassasoq tamanna A-ip paasisimaarigaa aamma attartortoq inissiamut “nutaamut” (L2) 01. Juli 2010-mi isersinnaatitaalissasoq.

Illua’tungiusutut sinniisup e-mailip naggataani oqaatigaa attartortup pigisanik nussuisartut 31. Juni 2010-imut inniminnersimagai.

Illua’tungiusutut sinniisup e-mail 28. Junimi nassiussaa A-ip 29. junimi akissuteqarfigaa. A attartortumut toqqaannartumik allagaqassalluni aalajangerpoq. Akissummi ilaatigut manna atuarneqarsinnaavoq:

Taammaattorli INI-mut attaveqarnermi siullermi attartortut taakku marluk erseqqissaavigineqarput inissianik paarlaanneq AS-ip akuersissutigigaa, tamatumalu kingorna parlaanneq pillugu suliassat naammassineqarnissaat attartortut marluk namminneq isumagissagaat.

A pisumut paasinnippoq, aalajangiusimalluguli nuunnermi suliassat attartortut taakku marluk akunnerminni aalajangiiffigissagaat.

…Aammattaaq oqaatigisinnaavara suliaq ilissinnut tunngasoq tunngavigalugu suliat inissianik paarlaannernut tunngasuni suliarinnittarnermiperiaaseq A’p nalileqqissimammagu.

Siunissami attartortutatsiortinnagit paasissutissiinermik ataatsimiitsitsisoqartassaaq. Taamaalilluni inissianik paarlaannissap suli ataasiarluni isumaliutersuutiginissaanut attartortut periarfissinneqartalissapput. Nalunngilara tamanna [attartortumut] iluaqutaavallaassanngitsoq, qularnaarsinnaavarali suliat taama ittut INI-p alaatsinaammagit.

L2-mi A-imit ineqarnermut akileeqqusissut attartortup 29. Juni 2010-mi tiguaa. Attartortoq aalajangerpoq akileqqusissut 01. Juli 2010-p kingorna akilerniarlugu kingusinnerpaaffimmilli akiliiffissap iluani, naak attartortoq L2-mut 01. julimi isertertussaanngikkaluartoq.

Attartortoq nammineq A-imi sulisunut marlunnut atii taallugit (e-mailikkut) 9. juli 2010-mi toqqaannartumik allagaqarpoq. Attartortup nammineq erneeqqamilu sisamanik qaammatilik inissiaminni “pisoqqami” (L2-mi) suli najugaqarlutik nuunnissamut poortuereersimagaluarlutik.

Attartortup nangilluni erseqqissarpaa L2-mi ineqarnermut akiliutigeqqusaq akilersimallugu. Attartortup A-imut “ineqarneq pillugu naammagittaalliuunni” akineqassasoq e-mailip naggataani qinnutigaa.

Ulloq taanna (9. Juli 2010-mi) A-ip attartortoqakissuteqarfigaa. Akissummit ilaatigut erserpoq:

Julip qaammataanut inissiamut paarlaaffigisannut ineqarnermut akiliut akilersimavat. Taassuma ulumikkut akia allanngorsimanngilaq.

Inissiamut siusinnerusukkut inigisannut kisimi akiliinissat kissaatigigukku, inissiamik paarlaannissamik isumaqatigissutip atorunnaarsinnissaa pillugu kissaatigisamut tamanna A-p sanilliussinnaavaa. Suliami tassani taamatut kissaateqarneq imaalillugu suliarineqassaaq illua’tungiusumut saaffiginnittoqassaaq aamma inissianik paarlaannissamik isumaqatigiissutip atorunnaarsinnissaa illua’tungeriinnit isumaqataaffigineqarpat taanna utertillugu ingerlatinneqassaaq....

Inissiamik allamik kissaateqarnissannut tunngatillugu taamatut kissaateqarneq Aaqqiivigissallugu A periarfissaqanngilaq.

Suliap kinguarsarneqarnera pillugu oqaaseqaatinnut tunngatillugu oqaatigisinnaavara suliap maani naammassinera A-p aalajangiusimammagu.

Suliami inissianik paarlaannissamut tunngasumi inissiamik paarlaanissamik qinnutaat akuersissutigineqarsimavoq nalinginnaasumikiluarsaassinissaq ilanngunnagu. Taamatut aalajangiineq allanngortinneqassappat inissianik paarlaannissamik akuerseqqusineq A-p itigartitsineranik kinguneqartussaavoq.

Tassa suliap A-mit naammassineqarsimasutut isigineqarnera uanga suli taamatut isigaara.

Attartortoq Ineqarnermut Naammagittaalliuuteqartarfimmut 27. Juli 2010-mi naammagittaalliuuteqarpoq. Ineqarnermut Naammagittaalliuuteqartarfimmut naammagittaalliuut A-ip 17. August 2010-mi allakkatigut akissuteqarfigaa.

ILLUA’TUNGERIIT OQAATIGISAAT TUNNGAVILERSUUTAALLU

Attartortoq: Oqarpoq inissianik paarlaanneq pillugu attartornermik isumaqatigiissummut tapiliut 25. Maj 2010-meersup A-imit suliarineqartup atsiorneqartullu naammassineqarnissamut akisussaaneq A-ip pisussaaffigigaa.

Attartortitsisoq: Oqarpoq tamatumunnga pinngitsuutitaalluni pissutigalugu inissianik paarlaanneq inuinnaat namminneq initsisitigut susassaqarfigimassuk, tak. Inissianik attatortitsineq pillugu Inatsisartut peqqussutaat nr. 2, 12. Maj 2005-imeersoq § 59.

AALAJANGIINEQ

Tak. Inatsisartut peqqussutaat nr. 2, 12. Maj 2005-imeersoq (kingusinnerusukkut allannguutitalik) § 84, imm. 1, nr. 6, Ineqarnermut naammagittaalliuuteqartarfik isumaqarpoq suliami uani peqqussummi § 59,imm. 4, nr. 1 malillugu “inissianik paarlaannermut” atatillugu namminneq aalajangiisinnaatitaallutik.

Inissiaatileqatigiiffik A pisussaatinneqarpoq attartugaq (L2) attartumut piaartumik atugassiissutigissagaa. Inissiaatileqatigiiffik A periarfissatut allatut inissiap angeqataanik, pitsaassusia, akia inissisimaneralu malillugit attartugassamik piaartumik attartortumut atugassiisinnaavoq.

Inissisimaffimmi tassanerpiaq tassunga tunngatillugu imatut paasineqassaaq inissiaq attartugassaq illoqarfimmi inissisimasoq.

Attartornermik isumaqatigiissummut tapiliummi 25. Maj 2010- meersumi naammassinninnginnikkut aningaasartuutinut tamatumunnga tunngasunut tamanut aamma aningaasartuutinut pissutaasunut ataneqartunut attartortup akiliisussatinnginnissaanut Inissiaatileqatigiiffik A sinnerlugu tamakkuninnga pisussaaffiliinissaq Ineqarnermut Naammagittaalliuuteqartarfiup massakkut pisinnatitaaffiisa avataaniisorinarpoq, taamaakkaluartoq suliami uani tamanna pillugu Inissiaatileqatigiiffik A-imut inassummik Ineqarnermut Naammagittaalliuuteqartarfik oqaaseqaateqarniarluni aalajangerpoq.

Inissianik paarlaanneq pillugu attartornermik isumaqatigiissummut tapiliutip 25. Maj 2010-meersup atsiorneratigut Inissiaatileqatigiiffik A “inissianik paarlaannermut” piumasaqaammik unioqqutitsisimanersoq pillugu aalajangiinermi uani Ineqarnermut Naammagittaalliuuteqartarfik isummersimanngilaq. Piumasaqaammi uani tunngavigineqarpoq Inatsisartut peqqussutaanni nr. 2, 12. maj 2005- imeersumi (kingusinnerusukkut allannguutitaqartumi) § 59, imm. 4, nr. 1. Tassani taamaallaat pineqarpoq attartut marluk attartugaat paarlaanissaannik isumaqatigiissut atsiorneqarsimasussaammat inissiat parlaannissaat pillugu attartortut qinnuteqarnerannit qaammatit 36-it ingerlanerata iluanni, tamannami saqitsaassummi uani pingaaruteqanngitsutut nalilerneqarmat. Malugeqquneqassaarli aalajangersakkami naqinneq taamatuttaaq oqaaseqatit tassunga attuumassutillit pingaartumik peqqussutip 2005-imi aappassaanerlugu Inatsisartuni oqaluuserineqarnerani siunissami tamanut tunngatillugu suliassanik suliarinnittarnermi pingaarutilimmik ikiuuttaanngitsuunngimmata.

Aalajangiinermi peqataapput Ineqarnermut Naammagittaalliuuteqartarfiup siulittaasua ilaasortallu pingasut. Siulittaasup ilaasortallu marluk aalajangiineq isumaqataaffigaat. Ilaasortap ataatsip tassunga atatillugu peqqussummi § 59, imm. 4, nr. 1-p aalajangiinermi uani paasisimanissaata pingaruteqassusia erseqqissarpaa.

Ilaasortat sisamaat aalajangiinermi pineqartumi imaaliallaannaq taaseqataarusunngilaq, Inissiaatileqatigiiffik A-imut inassuteqaat ilanngullugu eqqasaatigalugu. Ilaasortalli taassuma peqqussummi § 59, imm. 4, nr. 1-p suliamut uunga tunngatillugu paasisimanissaa ilaatigut isumaqataaffigigini kissaatigaa.

Ineqarnermut Naammagittaalliuuteqartarfiup aalajangiinera amerlanerussuteqarnissamik piumasaqaammut naapertuuppoq, tak. Inissianik attartortitsisarneq pillugu Inatsisartut peqqussutaanni nr. 2-mi 12. maj 2005-imeersumi (kingusinnerusukkut allannguuteqartumi) § 86, imm. 3.

Tunngavilersuut:

Attartortup “inissianik parlaannissamik” kissaateqarnera inissianik attartortitsisarneq pillugu Inatsisartut peqqussutaanni nr. 2-mi 12. Maj 2010-meersumi (kingusinnerusukkut allannguutitalimmi) § 59-imit killeqartinneqarpoq.

Taamatut “inissianik parlaannerup” pisinnaanerani periaatit tunngaviusut assigiinngitsut marluk Inatsisartut peqqssutaanni § 59-imi, imm. 4-mi innersuussutigineqarput. Illua’tungeriit isumaqataaffigaat suliami uani “inissianik paarlaanneq” isumaqatigiissutigineqarmat § 59, imm. 4,nr. 1 malillugu, taannalu imatut oqaasertaqarpoq:

Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq.

Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavai.

§ 59-imi aalajangersagaq innersuussutinik erseqinnerusunik tunngaviatigut imaqanngilaq, “inissianik paarlaannermut” atatillugu attartortitsisoq (taassuma ingerlatseqatigiiffik inissianik aqutsisoq ilaaffigisaa) killilimmik pissuseqarnera ilanngullugu eqqarsaatigalugu.

Inissiaatileqatigiiffik A-ip Ineqarnermut Naammagittaalliuuteartafik pillugu attartortitsisumut tunngatillugu taamatut inissisimanermut una erseqqissaatigaa: inissianik attartortitsisarneq pillugu peqqussummi § 59, imm. 3 naapertorlugu attartortut akuersissutigineqassapput.

Aalajangersakkami § 59, imm. 3 imatut oqaasertaqarpoq:

Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.

Akuerineqarnikkut inissianik paarlaassinnaanermut atatillugu aalajangersagaq taanna oqaasertamigulluunniit erseqqinnerusumik killilikkamik attartortitsisumut suliassaqartitsinngilaq atorsinnaannaniluunniit, assersuutigalugu taamaallaat oqartussaasutut akuersisartutuinnaq, ikiuusinnaasutuinnaq imaluunniit paasissutissiissutussatuinnaq kisimi atorsinnaanera ilanngullugu eqqarsaatigalugu akisussaaffigisamik erseqqinnerusumik nammineq nassuiaasinnaaneq aamma ilanngullugu.

Peqqussmmi aalajangersakkamut ataasiakkaanut nassuiaatini § 59, imm. 4,nr. 1 pillugu imatut allassimasoqarpoq: Oqaatigiinnavillugu oqartoqarsinnaavoq attartornermut isumaqatigiissutit aallaqqaataann atit titaannarlugit paarlaanneqassapput.

§ 59 malillugu ingerlatsivimmik suliaqarnermi attartortitsisup pingaarutaa akisussaaffialu annikitsuinnarmilluunniit paasissallugu Inatsisartut peqqussutaanni nassuiaatit tamanut tunngatillugu pisunulluunniit ataasiakkaanut tapersersuutaanngillat, tassani ilanngullugit isummat uunga sammivillit, tassalu “inissianik paarlaanneq” inunnut namminernut tunngasuuvoq, inissiaatileqatigiiffimmit A-imit oqaatigineqartutut.

§ 59-imi aalajangersakkap kinaassusersiunngitsumik kinassusersiortumillu nassuiareerlugu tamatuma kingorna Ineqarnermut Naammagittaalliuuteqartarfiup manna tunngavigilerpaa, tassalu aalajangersagaq sukumiisumik immersorneqartariaqartoq aamma tassani peqataasunut tunngatillugu ilaatigullu taassuma ingerlatsivia aqqutigalugu.

Suliami uani Inissiaatileqatigiiffik A-imit ingerlatsivigineqartutut Ineqarnermut Naammagittaalliuuteqartarfiup ilimagaa § 59,imm. 4,nr. 1 malillugu inissianik paarlaanneq pisimasoq peqataasut pingasuutillugit, tassani isumaqatigiissutip naammassinnissaanut pissutsit malillugit peqataasut tamarmik immikkut akisussaaffeqartariaqarlutik– Inissiaatileqatigiiffik A ingerlatseqatigiiffittut pisortat pigisaattut pisortat malittarisassarititaat tunngaviusut aamma Ineqarnermut Naammagittaalliuuteqartarfiup aalajangigai malittussaallugit.

Suliami uani Inissiaatileqatigiiffik A-ip sulai ataatsimut isigalugit inatsisit naammassineqarnissaat attartortuulluni naatsorsuutigissallugu pissutissaqarpoq una tunngavigissagaani: Inissianik paarlaannermi attartornermik isumaqatigiissummut Tapiliut A-ip aaqqissuussaa atsiugaalu.

Tamatuma aalajangiiffiginerani tapiliutip imaa taannarpiaq immikkut pingaartinneqarpoq, tassani isumaqatigiissut aamma attartornermut inatsisit malillugit pisussaaffiit piginnaatitaaffiillu tamarmik nuunneqarnerat A-ip atsiormagit, taamaalillunilu isumaqatigiissummi manna pingaarnerpaalerluni, tassalu L2 pillugu attartortoq ineqarnermut akileeqquneqarmat, kisianni aamma makku pisut eqqarsaatigalugit, soorlu Inissiaatileqatigiiffik A 15. Juni 2010-mi attartortoq X namminneq ornigullutik inissianik paarlaanneq pillugu nassuiaakkiartorpaat tamatumalu saniatigut Inissiaatileqatigiiffik A 29. Juni 2010-mi attartortup sinniisaanut imatut allappoq, tassalu suliaq una imatut kinguneqarsimasoq, suliat inissianik paarlaannernut tunngasut sulliarineqartarneranni periaaseq nalileqqinneqarsimasoq, (paasissutissiinertalimmik ataatsimiissimaneq naggatip tulliani pineqartoq apeqqutaatinnagu) aamma A’p suliat taamatut ittut alaatsinaammagit oqaaseqatigiillu taakku ilanngunneqarput suliap ersernerlunnera ilaatigut nassuerutiginiarlugu, imaammammi ingerlatsivik suliami tassani pimoorussilluni killilimmik peqataaniarsimagaluarmat tamatumalu kingorna ajornartorsiutit pilermata tamanna tunuarsimaarniarfigisimagaluarlugu.

25. maj 2010-mi inissianik paarlaannermi Attartorneq pillugu isumaqatigiissummut tapiliummi oqaaseqatigiit ataatsit uku taaneqarput:

[Attartortoq X-p] aamma [attartortup] aningaasanut tunngasut akunnerminni aaqqissuutissagaat naammanngilaq “inissianik paarlaanneq” qulaani pineqartoq inuit namminneq isumagisassaattut ataatsimut isigalugu oqimaalutassagaani.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.