AALIANGIUSSAQ

Iserternissinni initaassi pitsaassusaa pillugu inissiaatileqatigiiffimmut maalaarutit aggustip 25-ani 2011 ullulerneqarsimasoq, Ineqarneq pillugu Maalaaruteqartarfiup suliaraa.

AALAJANGIINEQ

Inissiaatileqatigiiffiup inigisassi iluata silaannalunneranut patsisaasoq aalajangiiviginiarlugu misissuiffigeqqinneqarnissaanut qinnuteqaatinnut itigartitsinera atuutsinnassaaq. Inissiaatileqatigiiffik oqoqarnera pillugu pisarialinnik misissuisitsereerpoq misissuisitsinermilu tunngavilersuutaasut aaqqiivigineqareerlutik.

Oqunnik annertunerusunik ippiuutinnut patsisaasinnaasunik nassaartoqanngilaq.

Taamaammat inissiaatileqatigiiffiup inigisavit silaannalunnerata annertunerusumik misissuiffigineqarnissaanut itigartitsinera pillugu maalaarutit akuerineqanngilaq.

Suliamut tunngatillugu allagaatit:

• Inimik attatornermut isumaqatigiissut decembarip 15-ani 2010-meersoq

• Ineqarneq pillugu Maalaaruteqartarfimmut februaarip 24-ani 2011 maalaarutit

• Inissiaatileqafigiiffiup Ineqarneq pillugu Maalaaruteqartarfimmut allagai maajip 2-ani 2011 ullulikkat inissiaatileqatigiiffiup illillu akunnissinni allagarisartakkasinnik ilanngussivigineqarsimasut

Nassuiaat:

Inimik attartornermut isumaqatigiissut decembarip 15-ani 2010 ullulerneqarsimasoq naapertorlugu januaarip aallaqaataani 2011 xx attartulerpat.

Januaarip arfineq aappaanni 2011 inimik takuniaanermut atatillugu nalunaarusiortoqarpoq. Takuniaaneq illit ilisimatitsinerit naapertorlugu minutsit qulit missaannaannik sivisussuseqarpoq.

Nooqqammitsiarlutit inigisavit silaanna peqqissutsinnut ajornartorsiutaalerpoq.

Januaarip aqqarnanili 2011 inissiaatileqatigiiffik attaviginiarsimagaluarpat aatsaalli januaarip 17-ani 2011 sulisut arlaannut attaveqarsinnaasimavutit.

Ulloq taanna januaarip 17-ani 2011 inissiaatileqatigiiffiup inissianik nakkutilliisua peqatigalugu inigisat misissorassiuk ajornartorsiutit arlallit uparuarpatit. Illit nassuiaanerit naapertorlugu nakkutilliisup ajornartorsiutit amerlanersaat iliuuseqarfiginiarsimanngilai, ilaatigut init allat taamaannerat ilaallu suli ajornerunerat tunngavilersuutigalugit.

Ininilli nakkutilliisup uffarfiup naqqa oqoqassangatimmagu naqqup taarserneqarnissaa aalajangiunneqarpoq. Uffarfiup suliarineqarneranut atatillugu uffarluni kuutsitsiviup aquittarfiullu peerneqartariaqarnerini inimut allamut innersuunneqanngilatit. Januaarilli 19-ani 2011 inissanik allamik tunineqarputit.

Inissiaatileqatigiiffik isumaqatigiissuteqarfigalugu februaarip sisamaani 2011 inigisannut uterputit. Tamatumali kinguninngua illup iluata silaannata suli ajornera peqqissutsinnullu akornutaanera paasivat.

Inissiaatileqatigiiffimmut saaffiginneqinninni inigisanni oqoqarnersoq paasiniarlugu uuttortaasoqarpoq. Uuttortaanerli annikitsuinnarmik malussarfiuvoq. Arlaleriarlutit inissiaatileqatigiiffimmut saaffiginnittareerlutit akissutisisareerlutillu, inigisanni silaannalunneranut suna patsisaanersoq paasiniarlugu misissueqqittoqassanngitsoq, Inissiaatileqatigiiffimmit nalunaarfigineqarputit.

Februaarip 24-ani 2011 Ineqarneq pillugu Maalaaruteqartarfimmut inigisat silaannaluttuarsinnarmat, peqqissutsikkut akornutiginera inissiaatileqatigiiffiullu misissuiffigeqqikumanagu nalunaarnera maalaarutigaatit. Maalaarutinni inigisannut nuunninniit maalaaruteqarnerpit tungaanut qanoq pisoqarsimanera nassuiaatigaat.Ineqarneq pillugu Maalaaruteqartarfiup, Inissiaatileqatigiiffik allakkatigut marsip qulaaluaanni 2011 ullulikkatigut nassuiaateqaqqullugu, suliamullu tunngalillugu allattugaatinik nassiussequllugu qinnuigaa.

Inissiaatileqatigiiffiup allakkanik nassitsinermut uppernarsaammut maajip 22-ani 2010 ullulerneqarsimasumut ilanngullugit, suliamut tunngatillugu allattugaatit nassuiaatitaqanngitsut Ineqarneq pillugu Maalaaruteqartarfimmut nassiuppaai.

Suliamulli tunngatillugu allattugaatit naapertorlugit annertunerusumik iliuuseqarnissaq inissiaatileqatigiiffiup tunngavissaqarsorinngilaa.

Inatsisit tunngavigineqartut:

Inissianik attartortitsisarneq pillugu Inatsisartut peqqussutaat nr. 2 maajip 12-ani 2005-imeersumi § 84 naapertorlugu ininik attartortut ilaatigut inigisap nutserfiginerani pitsaassusaa pillugu maalaarutit Ineqarneq pillugu Maalaaruteqartarfiup suliarisarpai (§ 47 takuuk).

Peqqussummi tassani § 47 naapertorlugu attartortitsisup attartorneqartoq piffissamit attartornissap aallartiffissaaniit pitsaasumik isumannaatasumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq.

Amigaatit allat, attartortup inissiamut iserternermi kingorna tigusinermut atatillugu tikkuagai, inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq unneqaserlussimappat tamanna atuutissanngilaq.

Naliliineq:

Inimik attartornermut isumaqatigiissut naapertorlugu januaarip aallaqaataani 2011 inigisat attartulerpat. Tamatuma nalaani ini attartortunit kingullernit qimanneqarmat suliarineqarpoq. Januaarip arfineq aappaani inimik takusaareernerup kingorna inigisannut iserterputit.Nooritsiarninni inigisappit silaannalunnera taamaanneratalu peqqissutsinnut ajornartorsiutaanera paasivat.

Inissiaatileqatigiiffiup ajornartorsiut aaqqiiviginiarlugu uffarfiup naqqa piiaarlugu taarsersorpaa iluaqutaanngitsumilli. Inissiaatileqatigiiffiup ajornartorsiutip MMA atorlugu oqummik patsiseqarsinnaanera aamma misissuivigaa.

Misissuinerli illit peqqissutsikkut ajornartorsiutinnut attuumasuteqartumik nassaarfiunngilaq, ajornartorsiutivillu nalinginnaasumik ulluinnarni inuuninnut atatillugu sunniivigineqarnermut atassutilimmik patsiseqanngitsutut oqaatigineqarsinnaanngimmat, inissiaatileqatigiiffiup inimik misissuiseqqinnissaanut piumaffigineqarnissaa, Ineqarneq pillugu Maalaaruteqartarfiup tunngavissaqarsorinngilaa.

Aalajangiineq:

Inigisap oqoqarnera pillugu misissuinerup saniatigut misissuinernik allanik inissiaatileqatigiiffik aallartitsissanngilaq.Naammagittaalliorsinnaaneq:Inissianik attartortitsisarneq pillugu Inatsisartut Peqqussutaanni nr. 2-mi maajip 12-ani 2005-imeersumi kingorna allannguuteqartumi § 86 imm. 7 naapertorlugu Ineqartut Maalaarutaannik Aalajangiisartoqatigiit aalajangigaat pisortaqarfinnut allanut suliakkiissutigeqqinneqarsinnaanngillat. Attartortitsisup attartortullu akornanni aaqqiaanngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.

Ineqartut Maalaarutaannik Aalajangiisartoqatigiit aalajangigaat kommuninit Namminersorlutillu Oqartussanit inissianik attartortitsisuusunut § 86 imm. 6 naapertorlugu allanngortinneqarsinnaanngilaq.

Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.