AALIANGIUSSAQ

Inissannut nuunninni inissavit pissusissamisut innginnera pillugu aammalu saaffiginnittarnerigaluatit inissiaatileqatigiiffimmit qisuariarfigineqartannginneri pillugit naammagittaalliuutit Ineqarneq pillugu Naammagittaalliuuteqartarfiup ulloq 25. august 2011 suliaraa imatullu aalajangiilluni

AALAJANGIINEQ

Inigisami aaqqissugassat inissiaatileqatigiiffimmit isumagineqarmata, taamaasillunilu inissianik attartortitsisarneq pillugu Inatsisartut peqqussutaanni § 47 naapertorlugu inissiaatileqatigiiffiup pisussaaffini eqquutsimmagu, maalaarutit akuerineqanngilaq.

Paassissutissat suliamut tunngassuteqartut:

Attartornermut isumaqatigiissut 30. maj 2008.

31. august 2010: Teknologisk Instituttip inimi oqoqarneranik misissuinera

4. oktober 2010: Nuunnissamik kissaatigisaq malillugu qinnuteqarneq.

6. okitober 2010: Allakkat 4. oktober 2010 ulloqartut tigunerinut inissiaatileqatifiiffiup uppernarsaataa.

23. oktober 2010: Inigisassi qanoq innera pillugu Inissiaatileqatigiiffimmut naammagittaalliuut.

28. oktober 2010: Inigisassinni suliassanut tunngatillugu inissiaatileqatigiiffimmit rekvisitioni.

11. november 2010: Atartortumit naammagittaalliuummik itisilerineq.

7. december 2010: Naammagittaalliuuteqartup erneranut tunngatillugu nakorsap nalunaarutaa.

7. januar 2011: Naammagittaalliuuteqartup utaqqiisaasumik inigineqartartumut nuunnissamut utaqqisut allattorsimaffianni siullerpaatut inissinneqarnera.

19. januar 2011: Suliap ingerlanneqarnera pillugu inissiaatileqatigiiffiup Ineqarneq pillugu Naammagittaalliuuteqartarfimmut nassuiaataa.

11. maj 2011: Nutaamik suliami illuatungerisamut tusarniaaneq, pissutigalugu attartorttoq sumut nuunnerminik naluaaruteqaqqaarani nuussimammat.

Nassuiaat:

Attartornermut isumaqatigiissummi 30. maj 2008 ulloqartumi atuarneqarsinnaavoq, illit ullormi 1. juni 2008 attartorneqartoq tigussagit.

Paasissutissani inuit nalunaarsorsimafianneersuni atuarneqarsinnaavoq inimut pineqartumut nuussimanngitsutit aamma tassani ineqarsimanngitsutit.

Piffissami 29. august 2007-imit 15. august 2008-mut xx-mi, xx-miittumi najugaqartutut nalunaarsimavutit, taava piffissami 15. august 2008-miit 18. december 2009-mut yy najugaqarlutit nalunaarsimavutit, taava piffissami 18. december 2009-mit 2. februar 2011-mut xx-mi yyimi najugaqarlutit nalunaarsimallutit.

Aapparisat piffissami 19. februar 2010-mit 2. februar 2011-mut xx-imi, najugaqarluni nalunaarsimavoq.

Ulloq 2. februar 2011 utaqqiisaasumik najugaqarineqartartumut, xx-imut nuuppusi.Ulloq 23. oktober 2010 naammagittaalliuutigaat inissiamut nuunnissinni amigaataasut allattorsimallugit, Inissiaatileqatigiiffimmilli tamanna pillugu tusagaqarnak aammalu viceværtimit inigisarsi takusarneqarani. Innersuussutigaat amigaataasunik allattuisimanngikkuit inigisat qimakkukku sallunaveeqqutitut akiliutigisannut sunniuteqarnerlussasoq.

Naammagittaalliuutigaat perusuersartarfissinni annertuumik oqoqarnera paasineqarsimammat. Oqaatigaat tamanna pissutigalugu perusuersartarfissi iluarsaanneqassasoq, taamaammallu utaqqiisaagallartumik najugarineqartartumut nuukkallarnissassinnik neqeroorfigineqassallusi. Tamatumunnga atatillugu oqaatigaat ernersi 2010 inunngortoq misissortikkami paasineqartoq immannguaq astmaqalersimasoq aammalu amerluuteqalaalersimasoq, nakorsallu oqaatigisimagaa tamakku oqummik pissuteqattut.

Naammagittaalliuutigaat uffarfimmi naqqup iikkallu tamarmik iluarsaanneqannginnerat, tassami uffarfimmi qorlortitsissutip eqqaa kisiat iluarsaanneqarmat. Isumaqarputit neriorsorneqarsimallutit uffarfiup iigai naqqilu tamarmik iluarsaanneqassasut oquiarneqarlutik, kisianni taamatut pisoqanngitsoq.

Kiisalu naammagittaalliuutigaat tupap pujuanik inersi tippattartoq sanilersi pujortaraangat. Isumaqarputit tamanna iikkat ussiinnerannik inissiallu sannarluutaaneranik pissuteqartoq.

Danmarkimi Teknologisk Institutimeersut ulloq 31. august 2010 misissuinerisa inerneranit takuneqarsinnaavoq uffarfimmi teqeqqumi annertuumik oqoqartoq. Inimili iikkani qilaamiluunniit oqummik nassaartoqanngilaq.

Utaqqiisaagallartumik inigineqartunut nuunnissamik utaqqisuni siullerpaanngornissi kingorna illit ilagisatillu ulloq 2. februar 2011 nuuppusi.

Inissiaatileqatigiiffiup allakkatigut 19. januar 2011 ulloqartutigut Ineqarneq pillugu Maalaaruteqartarfimmut maalaarutigisatit akissuteqarfigai.

Inissiaatileqatigiiffiup allagai paasissutissallu allat ilanngullugit ilinnut nassiunneqarput suliami soqutigisalittut tusarniaavigineqarninnut atatillugu. Tamatumunnga tunngatillugu illit oqaaseqaateqanngillatit.

Inissiaatileqatigiiffiup allakkamini oqaatigaa amigaataasinnaasut inigisamit nuunnermut atatillugu nalunaarusiami allassimasunut sunniuteqarsinnaasut, taamalu sallunaveeqqutitut akiliutinnut aamma sunniuteqarsinnaasut iluarsaanneqarsimasut. Allakkanut nakkartitsiviliisoqarpoq, matumilu ammaneq allakkanut nakkartitsiviusartoq matuneqarluni. Aneerasaartafimmut matu ussissarneqarpoq, tigummivia iluarsineqarluni, kuuffillu salinneqarluni ammarsarneqarluni.

Oqummut tunngatillugu inissiaatileqatigiiffiup oqoqarnera ima annertutigisutut isigaa pisariaqalersimalluni illit ilaqutatillu inigisassinnit oqulimmit allammut nuuttariaqarlusi ajoqutaasup iluarsaannerani. Taamaammat utaqqiisaasumik inigineqartartumut, taanna inueruppat nuukkallarnissarsi qinnutigaat, utaqqillunilu najugarineqartartup inuerunnissaata tungaanut suliassaq utaqqisinneqarallartariaqarluni.

Taavali inimut utaqqiffiusartumut utaqqisut allattorsimaffianni siullerpaangortitaavutit, taavalu nuunnissassinnik neqeroorfigineqarlutit.

Inigisassinni oqoqarnera pillugu naammagittaalliuutinnut tunngatillugu inissiaatileqatigiiffik allappoq iikkat natillu oquiarlugit eqqiarneqarnissaat pillugu ilisimatinneqarsimanerit eqqortuunngitsoq. Inissiaatileqatigiiffiup oqaatigaa iikkami oqoqarfiusumi oqummik misissugassamik tigusisoqarsimasoq, misissuinermilu paasineqartoq oquit assigiinngitsut pingasuusut, taakkunanilu oquk (skimmel) nassaarineqartoq. Ilanngullugu oqaatigineqarpoq oquk nassaarineqartoq isugutasuusoq, inassutigineqarporlu oqummik tassannga pinngorfiusoq peerneqassasoq. Taamaammat eqqiaasoqarpoq iikkallu oqoqarfiusup qalliutaa taarserneqarpoq. Uffarfiup natiata ataani oqoqarnissaa ilimagissallugu pissutissaqarsimanngilaq.Inissiap sannarluttaasinnaaneranut tunngatillugu aammalu sanilissi pujortarneragut inigisassinni tupasunnittarnera pillugit naammagittaalliuutinnut tunngatillugu inissiaatileqatigiiffiup inassutigissavaa sanileriit akerleriissutaat akerleriit nammineq aaqqittassagaat.

Aamma allassimavoq inissiaatileqatigiiffik inissiap sannaata allanngortinnissaanut pisinnaatitaanngitsoq inissiat inissiaatileqatigiiffimmit pigineqanngimmata.

Inatsisitigut tunngavigisat:

Inissianik attartortitsisarneq pillugu Inatsisartut peqqussutaanni nr. 2-mi, 12, maj 2005-imeersumi § 84-imi allassimavoq ineqarneq pillugu Naammagittaalliuuteqartarfiup attartortut naammagittaalliuutaat makkununnga tunngasut suliarisarpai:

Inissiap iserterfigineqarnerani qanoq issusia, tak. § 47.Peqqussummi pineqartumi § 47-mi allassimavoq attartortitsisup attartorneqartoq piffissamit attartornissap aallartiffissaaniit pitsaasumik isumannaatsumillu pitsassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1.

Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikkikkullu atortulersuutit ajoquteqassanatik.

Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5.

Takuniaanermi amigaatit malugineqartut inissiamut iserternermut nalunaarusiamut ilanngunneqassapput.

Amigaatit allat, attartortup inissiamut iserternermi kingorna tigusinermut atatillugu tikkuartugai inissiamut iserternermiit sapaatit akunneri marluk qaangiutsinnagit allakkatigut attartortitsiumut nalunaarutigineqassapput. Amigaatilli nalinginnaasumik misissuinermi takuneqarsinnaanngippata imaluunniit attartortitsisoq peqquserlussimappat tamanna atuutissanngilaq.

Naliliineq:

Ineqarneq pillugu Maalaaruteqartarfiup aalajangiinermini inuit nalunaarsorsimaffiata paasissutissiissutai tunngaviliuppai, taakkulu malillugit illit ini inigisimanngisaannarsimavat. Ineqarneq pillugu Maalaaruteqartarfiup nalilerpaa illit tunginnit puigorneq kukkunerluunniit pineqanngitsut, pissutigalugu illit piffissami 1. juni-miit 1. februar-imut inimi najugaqarfissaraluanni najukkani allani najugaqartutut nalunaarsimasaravit.

Taamaattoq Ineqaneq pillugu Maalaaruteqartarfik isumaqarpoq suliassaq suliarisinnaallugu attartornermik isumaqatigiissummi attartortutut atsiorsimanerit pissutigalugu. Taamaammallu suliami illuatungiliuttutut inissisimallutit naammagittaalliuuteqarsinnaatitaallutillu.

Inimi pineqartumi najugaqarsimannginninnerpit kingunissai suussanersut pillugit illit attartortitsisorlu akunnissinni aaqqinneqassapput.

Taamaammat Ineqarneq pillugu Maalaaruteqartarfik isumaqarpoq inissiaatileqatigiiffiup inissianik attartortitsisarneq pillugu peqqussummi § 47 malillugu pisussaaffini naammassigai.

Tamatumunnga tunngaviuvoq uffarfimmi oqoqarnera pissutigalugu uffarfik iluarsaanneqarmat. Tamatuma saniatigut uffarfik eqqiarneqarpoq iikkallu qalliutaasa ilaat taarserneqarlutik, naak tamaani oqummik nassaartoqanngikkaluartoq, kisianni tamanna isugutattuummat iluarsineqarluni.

Inimi amigaatit allattorsimaffiat tamaanneqartoq pillugu Ineqarneq pillugu Naammagittaalliuuteqartarfik innersuussuteqarpoq, tassani paasissutissat inissiaatileqatigiiffiup pigisai malillugit ajoqutit iluarsaanneqarput, taakkulu iluarsaassinerit inip qimanneranut atatillugu nalunaarusiamut taamaalillunilu sallunaveeqqutitut akiliutinnut sunniuteqartussaassapput. Tamatumunnga tunngatillugu illuatungerisap tusarniaavigineqarnerani oqaaseqaateqanngilatit.

Inip pineqartup pisoqaassusianut sananeqarsimaneranullu tunngatillugu Ineqarneq pillugu Maalaaruteqartarfiup oqaatigaa tamanna pillugu Ineqarneq pillugu Maalaaruteqartarfik aalajangiisinnaassuseqanngitsoq.

Aalajangiineq:

Inimi pineqartumi iluarsaassassat pisariaqartut inissiaatileqatigiiffiup iluarsaappai, taamaammallu inissiani attartortittakkani ineqarneq pillugu peqqussummi § 47 malillugu pisussaaffini naammassillugit. Taamaattumik illit naammagittaalliuutinni tapersernqanngilatit.

Naammagittaalliuuteqarsinnaanermut ilitsersuut:

Inissianik attartortitsarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinneruskkut allannguuteqartinneqartumi § 86, imm. 7 malillugu Ineqarneq pillugu Naammagittaalliuuteqartarfiup itigartitsilluni aalajangiinera allaffissornikkut ingerlatsinermi oqartussaasunut allanut naammagittaalliuutigineqarsinnaanngilaq. Attartortitsisup attartortullu akornanni saqitsaassutaasut eqqartuussisunut suliassanngortineqarnissaat kissaatigineqarpat,attartortitsisumik eqqartuussivimmut aggeqqusissut eqartuussivimmut tunniunneqassaaq. Tamanna atuuppoq attartortitsiup allafissornikkut ingerlatseqatigiiffanit alakkatigut attaveqarneq ingerlanneqarsimagaluarpalluunniit.

Ineqarneq pillugu Maalaaruteqartarfiup aalajangiineri Namminersornerullutik Oqartussanit kommuninillu attartortitsisuusunit pinngitsoorani malinneqartussaapput, tak. § 86, imm. 6.

Nunatta Eqaartuussiviata ilitsersuinermut immikkoortortaa oqarasuaat atorlugu saffiginninnernut ammasarpoq sisamanngornerni nal. 14.00-miit 15.00-mut oqarasuaat 36 80 00.