AALIANGIUSSAQ

Suliap saqqummiunnera:

Allakkatigut Ineqarneq pillugu Maalaaruteqartarfiup allattoqarfiata september 2008-mi tigusaatigut naammagittaaliuuteqartoq ineqarfimmi ileqqorissaarnissamik malittarisassat arlaleriarluni unioqqutinneqartarsimanerat tunngavigalugu attartornerup atorunnaarsinneqarnera attartortup naammagittaalliuutigaa. Attartortup naammagittaalliuummi erseqqissaatigaa ilaqutariinni ilaasortaq ullukkut nipilersortarsimasoq taamaakkaluartorli inissiamit taasarialimmik nipiliortoqartarsimanngikkaluartoq.

Inigisamit attartortukkamit nipituumik ajoqusersuutaasumillu pissusilersortarsimaneq pillugu naammagittaaliuutit tiguneqarsimanerannik attartortoq allakkatigut september 2008-meersukkut ilisimatinneqarpoq. Pigaartut nipiliorneq pillugu nalunaarusiorsimavoq inissiamiillu nipilersukkanik nipitoorujussuarmik nipiliortitsineq nal. 15.05 paasisimallugu.

Taassuma inigissaanit nipituumik ajoqusersuutaasumillu pissusilersortarsimaneq pillugu naammagittaalliuutip tiguneqarnerata kingorna attartortoq september 2008-mi mianersoqqussummik tunineqarpoq. Nipilersukkanik technonik nipitoorujussuarmik nipilersorpalaamik nal. 17:15 paasisaqarneq pillugu pigaartoq nalunaarusiorsimavoq.

Ileqqorissaarnissamik malittarisassat arlaleriarluni unioqqutinneqartarsimanerat pissutigalugu nipiliorluni ajoqusersuineq inissiamillu attartornerup atorunnaarsinneqarnera pillugu attartortoq september 2008-mi allagarsitinneqarpoq. Naammagittaalliuut allakkanut tungaviusoq attartortup eqqaamiuiniit atsiornernik katersuinertaqarpoq.

Naammagittaalliuutip allattoqarfimmit tiguneqarnera pillugu attartortoq allakkatigut oktober 2008-meersutigut ilisimatinneqarpoq. Tassannga erserpoq Ineqarneq pillugu Maalaaruteqartarfiup § 84[2][1] malillugu pisinnaatitaaffii eqqarsaatigalugit attartukkanik atorunnaarsitsisarneq ilanngunneqanngitsoq taamaallaalli pisumi uani aalajangersakkami tassani imm. 1, nr. 5 malillugu ineqarfimmi ileqqorissaarnissamik malittarisassat unioqqutinneqartarsimanerat kisimi pineqartoq.

Attartortup attartorneq januar 2007-imi aallartippaa taannalu attartornermik isumaqatigiissutip atorunnaarsinneqarnera pillugu september 2008-mi allagarsitinneqarpoq tassanilu attartortoq sapaatip akunneranik ataatsimik siumut ilimasaaruteqarnikkut attartukkamit anisissasoq kingusinnerpaamik periarfissinneqarluni. Illoqarfimmi politiinut allakkatigut oktober 2008-meersutigut akiliisitsiniartartup ikiuuneratigut attartortoq anisinneqassasoq Inissiaatileqatigiiffiup qinnuteqaatigaa.

AALAJANGIINEQ

§ 84, imm. 1, nr. 5 tunngavigalugu Ineqarneq pillugu Maalaaruteqartarfik isumaqarpoq ileqqorissaarnissamik malittarisassat unioqqutinneqarnerannut atatillugu suliami aalajangiisinnaassuseqartitaalluni.

Ineqarneq pillugu Maalaaruteqartarfiup suliaq misissorpaa ileqqorissaarnissamillu malittarisassat arlaleriarluni unioqqutinneqartarsimanerat tunngavigalugu attartornermik isumaqatigiissutip attartortitsisumit atorunnaarsinneqarnera atuussinnaangitsoq aalajangiullugu.

Tassunga atatillugu isummernermi Ineqarneq pillugu Maalaaruteqarfiup ilaasortaasa pingaartippaat ullukkut nipiliorneq unnukkut nipiliornermit artukkiinnginnerusartoq. Ineqarneq pillugu Maalaaruteqartarfik isumaqarpoq ullukkut nipiliorluni ajoqusersuutaasumillu pissusilersorneq pillugu ilisimatitsissutinik allagaqarneq kiisalu mianersoqqussineq eqqarsaatigalugit § 73-imi imm. 3-mi pingaartitassanik piumasaqaat naammassineqarsimanngitsoq.

Taamaattumik attartortitsisup attartortoq imatut inississavaa, soorlu atorunnaarsitsineq pisimanngitsoq tassungalu atatillugu anisitsineq politiinit isumagineqarsimmappat aalajangiinerup uumap illua’tungeriinnut nalunaarutigineraniit ullut 14-it qaangiutsinnagit attartortoq attartortitsisup iserterteqqissagaa.

Tunngavilersuut:

§ 73, imm. 2, nr. 4 naapertorlugu attartortitsisup attartorneq atorunnaarsissinnaavaa, takuuk § 50 aamma § 73, imm. 3 naapertorlugu attartortitsisup attartorneq taamaallaat atorunnaarsissinnaavaa pisimasoq attartortumut artukkiutaasoq attartortumut annertuumik pingaaruteqarpat.

Ineqarneq pillugu Maalaaruteqartarfiup ilaasortaasa isumaqataaffigaat atorunnaarsitsineq pisinnaanngitsoq, imaammat allakkat 2. septemberimeersut allakkatut ilisimatitsissutitut isigineqarmata allakkallu imaat malillugit ataatsimullu naliliineq aallaavigalugu attartornermut peqqussummi § 73, imm. 3 malillugu attartornermik atorunnaarsitsisoqarsinnaanngitsoq. Tassunga atatillugu Ineqarneq pillugu Maalaaruteqarfimmi ilaasortat isumaqatigiipput ineqarfimmi ileqqorissaarnissamik malittarisassat unioqqutinneqartarnerat eqqarsaatigalugu ilaatigut eqqarsaatigineqartariaqarmat unioqqutitsinerit ullukkut pisimammata, sanilit unnuakkut nipiliorsinnaanerannit nipiliornerusinnaaneq tassani naatsorsuutigineqarsinnaammat.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.