AALIANGIUSSAQ

Inissiani attartortittakkani april 2010-mi Inissiaatileqatigiiffiup ineqartunut maleruaqqusanik unioqqutitsinerup malitsigisaanik inissiami attartortittakkami ineqarnermut isumaqatigiissummik ilinnut tunngasumik atorunnaarsitsinera pillugu ulloq 13. oktober 2008 naammagittaalliuutigisat isumaqatigiissummik atorunnaarsitsinermut tunngatillugu suliap annikigisassaanngitsunik kukkuneqarpallaarnera pissutigalugu suliaq ineqarneq pillugu maalaaruteqartarfiup suliareqqippaa.

Ineqarneq pillugu maalaaruteqartarfiup ulloq 25. august 2011 ataatsimiinnermini suliassaq ilinnut tunngasoq suliaraa imatullu aalajangiilluni

AALAJANGIINEQ

Inissiaatileqatigiiffik tunngavissaqanngilaq attartorneq atorunnaarsissallugu, malittarisassanik unioqqutitsineq tunngavigalugu.

Inissiaatileqatigiiffik pisussaaffeqanngikkallarpoq inisseqqissallutit inimut imaluunniit inimik tunissallutit, inip qimatavit assinganik.

Suliamut tunngassuteqartut saqqummiussat:

Attartornermut isumaqatigiissut: 4. juni 1993-imeersoq.

Inissiaatileqatigiiffiup inassutai: 23. januar 2003, 24. september 2003, 29. december 2003.

Inissiaatileqatigiiffiup attartornermut isumaqatigiissummik atorunnaarsitsinera: 9. marts 2005.

Najugaqarfimmi eqqaamiorisat allagaat: 3. januar 2006, 19. januar 2006, 24. januar 2006, aammalu allakkat ullulerneqanngitsut.

Inissiaatileqatigiiffiup mianersoqqussutai: 10. januar 2006, 3. april 2006.

J-P allagai piffissami: 9. februar 2006-miit 8. november 2006-mut.

Kommunip aalajangiinera. 3. juli 2006.

Inissiaatileqatigiiffiup aalajangiinera. 6. november 2006.

Inimik attartornermut isumaqatigiissutip atorunnaasinnera, Inissiaatileqatigiiffimmit 23. november 2006 tiguneqartoq.

Inimik attartornermut isumaqatigiissutip atorunnaarsinnera pillugu allakkat tiguneri Inissiaatileqatigiiffimmit uppernarsarneqarpoq: 23. november 2006.

Attartornermi akilersukkat akilikkallu oqimaaqatigiissinnerat: 1. januar 2007.

Akiitsoqarnermut uppernarsaat: 24. juni 2007.

J-p naammagittaalliuutaa: 13. oktober 2008.

Ineqarneq pillugu maalaaruteqartarfiup allattoqarfiata allagai: 7. november 2008, 18. juni 2009 aamma 11. februar 2010.

Inissiaatileqatigiiffiup paasissutissiissutai nutaat: 15. august 2011.

Nassuiaat:

Inissiaatileqatigiiffiup inissiaatileqatigiiffiup kingullermik 9. marts 2005 inigisannut akiitsoqarnerit pissutigalugu politiit ikiortigalugit inigisannit anisinneqarnissat piumasaraa.

Inissiaatileqatigiiffiup allakkatigut 3. januar 2006, 19. januar 2006, 24. januar 2006 ullulerneqartutigut aamma allakkatigut ullulerneqanngitsutigut inigisanniit nipiliorpallaarnerit pillugit naammagittaalliuutit tiguai.

Naammagittaalliuutini atuarneqarsinnaapput inigisanniit nillianerit suaartarnerillu tusarsaasartut, meeqqat nipiliortut nipilersortarlusilu ilaanni ullaakkut arfineq tikillugu.

Ulloq 10. januar 2006 Inissiaatileqatigiiffiup erseqqissaavigaatit pissuserissaarnissamik malittarisassat malillugit inissiami eqqissisimanissaq pissuserissaarnissarlu piumasaasut, taamalu pissuserissaarnissamik malittarisassanik unioqqutitsinerit inissiami ineqarnermut isumaqatigiissutini aalajangersakkanik saneqqutsinerusut erseqqissaavigineqarnerullu kingorna pisoqaqqippat tamatuma kingunerissagaa inissiami ineqarnermut isumaqatigiissutip erniinnaartumik atulersumik atorunnaarsinneqarnera.

Taamalu Inissiaatileqatigiiffiup aammaarluni 3. april 2006 erseqqissaavigaatit inissiami pissuserissaarnissamik malittarisassat unioqquteqqikkukkit ineqarnermut isumaqatigiissut ilinnut tunngasoq atorunnaarsinneqassasoq inigisarlu erniinnaartumik qimaqquneqarluni. Ineqarnermut tunngasunik maalaaruteqartarfiup innersuussutigai inissiani attartortittakkani ineqarneq pillugu Inatsisartut peqqussutaanni §§ 50 aamma 73.

Paasissutissani suliamut tunngassuteqartuni atuarneqarsinnaavoq illit ulloq 3. juli 2006 inigisannut akiitsuit akilerneqarnissaannik qinnuteqaatit kommunimit itigartitsissutigineqartoq.

Ulloq 6. november 2006 Inissiaatileqatigiiffiup ineqarnermut isumaqatigiissut ilinnut tunngasoq atorunnaarsippaa inigisanni nipiliornerit allanillu akornusersuutaasumik pissusilersornerit pissutigalugit. Tassani Inissiaatileqatigiiffiup innersuussutigaa inissiani attartortittakkani ineqarneq pillugu Inatsisartut peqqussutaanni §§ 50 aamma 73.

Piffissami 4. april-miit 8. november 2006 tungaanut affarlivit nipiliorneri akornusersuutaasumillu pissusilersorneri naammagittaalliuutigaatit.

Naammagittaalliuutinni 8. november 2006-imeersumi ilaatigut allapputit pingasoriarlutit eqqaamiutit naammagittaalliuutigisarlugit, kisianni taakku anisitaanissaq pillugu allagarsitinneqanngitsut. Inissiaatileqatigiiffik iliuuseqanngilaq. Aamma kommuni saaffigisimavat ikioqqullutit. Allakkanni naggasiullugu allapputit eqqaamioriit akornanni assagaliortutut pilluni sorsuunneq qatsutivillugu, assullu kissatigalugu allamik initaarnissat.

Ineqarninnut tunngasumik isumaqatigiissut atorunnaarsippat ulloq 27. november 2006 inigisallu qimattussanngorlugu 28. november 2006.

Ulloq 11. januar 2007 Inissiaatileqatigiiffiup inigisannut, P akiliutinnik naatsorsuinera malillugu inigisannut akiligassatit amerlassusilerneqarput kr. 84.870,92.

Ulloq 18. juni 2009 Ineqarneq pillugu maalaaruteqartarfiup allattoqarfiata suliassap suliarinissaa itigartitsissutigaa. Tassani pingaartutut isigineqarluni illit nammineq ineqarninnut isumaqatigiissuti atorunnaarsissimagakku 27. november 2006.

Inatsisartut Ombudsmandianut allakkatigut 11. februar 2010 ullulerneqartutigut ineqarneq pillugu maalaaruteqartarfiup allattoqarfia allappoq Inissiaatileqatigiiffiup inissiaatileqatigiiffiup ulloq 6. november 2006 aalajangiinera naammagittaalliuuteqartarfiup pingaarutilittut isiginiarsimanngikkaa, tamatumunngalu pissutaasimasoq attartornermut isumaqatigiissummik matumani sammineqartumi qitiusumik atuisup nammineerlu atsiornermigut atorunnaarsitaminik tunniussinera. Nammineerluni atartornermi isumaqatigiissummik atorunnaarsitsinikkut inigisamillu qimatsinikkut attartortup taamaalilluni attartornermi isumaqatigiissutip attartortitsisumit, inigisami ataasiarani nipiliorluni eqqaamiunik akornusersuinikkut inissiami pissuserissaarnissamik malittarisassanik unioqqutitsinerit pissutigalugit, atorunnaarsitaagaluarpat akerliliinissamut periarfissani atorsinnaajunnaarpaa. Aamma oqaatigineqarpoq naammagittaalliuuteqartarfik ataatsimiinermini 10. juni 2009 pisumi allattoqarfiup periaasianik ilisimatinneqarsimasoq, tassa suliassanik akerleriissuteqarfiunngitsunik allattoqarfiup tigusiumanngissinnaanera.

Naammagittaalliuuteqartarfiup allattoqarfiata apeqquteqaataanut atatillugu Inissiaatileqatigiiffup 15. august 2011 oqaatigaa, illit inigisat qimassimagit 28. november 2006 inigisannut akiliisinnaajunnaarnerit pissutigalugu.

Inatsisitigut tunngavigisat:

Inissiani attartortittakkani ineqarneq pillugu Inatsisartut peqqussutaanni nr. 2-mi, 12. maj 2005-imeersumi § 84, imm. 1 nr. 5 malillugu ineqarneq pillugu maalaaruteqartarfiup attartortut pissuserissarnissamik malittarisassanik unioqqutitsisarneri suliassaraat.

Peqqussummi pineqartumi § 50, imm. 1 malillugu attartortup taassumalu inoqutaasa kiisalu attartortumit attartorneqartumut isersinnaatitaasut illumi torersaarnissamut malueruagassat ilanngussaq 4-mi taanqartut maleruassavaat.

Peqqussummi pineqartumi § 67, imm. 1 nr. 4 malillugu attartortoq attartortitsisumit allakkatigut mianersoqqussutinik tunineqartaraluarluni pissuserisassanik malinninngippat, imaluunniit pissusilersornera illumut ineqartunulluunniit allanut akornutaappat, pissutsilli imaanngippata attartortitsisup attartornermik isumaqatigiissut atorunnaarsissinnaallugu. Attartortoq allakkatigut mianersoqqussutinik inassutinilluunniit pingasunik qaammatit tulleriit aqqaneq marluk iluanni tigusisimasussaavoq.

§ 73 malillugu pisortanit attartortitsisup attartornermut, imermut, kiassarnermut imaluunniit qularnaveeqqusiissutissanut akiliutissanik akiliinngitsoornerup kin- gunerisaanik attartornissamik isumaqatigiissut atorunnaarsissinnaavaa.

Imm. 2. Attartortitsisup attartornermut isumaqatigiissut atorunnaarsissinnaavaa torersaarnissamik malittarisassat unioqqutinneqarpata.

Imm. 3. Attartortitsisup aatsaat attartorneq atorunnaarsissinnaavaa, pissutsit attartortumut assuarliutaasut annertuumik pingaaruteqarpata. Attartortitsisup attartornermik atorunnaarsitsinnginnermini attartortoq pissutsinik aaqqeeqqullugu peqqussavaa, attartortitsisullu attartornissamik isumaqatigiissummik atorunaarsitsinnginnerani pissutsit imm. 1-imi aamma imm. 2, nr. 1-4-mi taaneqartut aaqqinneqarsimappata attartortitsisup taakku tunngaviginiarsinnaanngilai.

§ 85-imi allassimasoqarpoq ineqarneq pillugu maalaaruteqartarfiup maalaarut, maalaaruteqartarfimmi suliarineqarnissamut naleqqutinngitsutut nalilerneqartoq suliarinissaa itigartissavaa

.Imm. 2. Maalaaruteqartarfiup maalaarut attartortup taperserneqarnissaanik ilimanaateqanngitsutut isigisariaqartoq suliariumanngissinnaavaa.

Imm. 3. Maalaaruteqartarfiup allattoqarfik imm. 1-imi 2-milu aalajangigassanik taaneqartunik aalajangiinissamut pisinnaatissinnaavaa.

Ineqarneq pillugu maalaaruteqartarfiup sulinera pillugu Namminersornerullutik Oqartussat nalunaarutaanni nr. 4-mi, 13. februar 2006-imeersumi taamanikkut atuuttumi § 1-imi allassimasoqarpoq ineqarneq pillugu maalaaruteqartarfik, Namminersornerullutik Oqartussat kommunillu inissiaataanni attartortittakkani attartortitsisup attartortullu akornanni maalaarutinik allaffissornikkut inaarutaasumik aalajangiisartussaq pilersinneqartoq.

Nalunaarummi pineqartumi § 2 malillugu allattoqarfiup suliassaraa:Ineqarneq pillugu maalaaruteqartarfimmut allakkatigut, oqarasuaatikkut aammalu nammineq ornigulluni saaffiginnittunut akissuteqartarnissaq.

Suliassat ineqarneq pillugu maalaaruteqartarfimmi suliarineqartussat pillugit paasissutissiisarnermigut pisareersaasarnermigullu siulittaasumut ikiuunnissaq.

Naliliineq:

Ineqarneq pillugu maalaaruteqartarfik isumaqarpoq inissiaatileqatigiiffik aalajangiinermi nalaani peqqussummi attartornerup atorunnaarsinnissaanut aalajangersakkanik tunngavissaqarsimanngitsoq.

Taamatut naliliinermi maalaaruteqartarfiup pingaartutut isigaa attartortup attartornermik isumaqatigiissut atorunnaarsissinnaammagu torersaarnissamik malittarisassat unioqqutinneqarpata. Tamatumunnga tunngaviussaaq attartortup tungaaniit annertuumik paarsinerlunneq.

Maalaaruteqartarfik naliliivoq Inissiaatileqatigiiffiup aalajangiinerata nalaani ininik attartorneq pillugu peqqussummi aalajangersakkani attartornermut tunngasumik isumaqatigiissummik atorunnaarsitsinissamut tunngavissaqanngimmat.

Maalaaruteqartarfiup tamatumani pingaartippaa Inissiaatileqatigiiffiup ullormi 6. november 2006-imi aalajangiinissani sioqqullugu mianersoqqussutinik maluinnarnik ilinnut nassitsisimanera.

Periaaseq Inissiaatileqatigiiffiup atugaa ataatsimut isigalugu isumaqarfiginarpoq oqaatsit soraarsitsineq aamma atorunnaarsitsineq atorneqartut isumaannik ularussinermik tunngaveqarsimasoq.

Suliassaqarfimmi oqartussaasunut ilitsersuinermut atatillugu innersuussutigineqassaaq maalaaruteqartarfiup aalajangiinera 27. april 2010-meersoq, suliassaqarfimmut annertusisamik tunngavilersuutitalik tassani pingaartillugit oqaatsit soraarsitsineq akerleralugu atorunnaarsitsineq. Aalajangiineq atuarneqarsinnaavoq maalaaruteqartarfiup quppersagaani www.maalaarut.gl

Ineqarnermut tunngasunik maalaaruteqartarfik aamma isumaqarpoq inissiaatileqatigiiffik illit inigisannut iserteqqinnissannut ikiussallutit pisussaanngitsoq taamatuttaaq inissamik allamik inissiamut qimatannut naapertuuttumik pissarsissunnissannut pisussaanani.

Aalajangiinermut tamatumunnga tunngavigineqarpoq inigisannut tunngatillugu isumaqatigiissummik atorunnaarsitsininnut inigisannillu qimatsininnut Inissiaatileqatigiiffiup ulloq 6. november 2006 inigisannik attartortitsinermut isumaqatigiissummik kukkulluni atorunnaarsitsinera kisiat ilinnit tunngavigineqarsimanera ilimanaateqaraniluunniit uppernarsarneqarsimannginnera.

Ineqarnermut tunngasunik maalaaruteqartarfik naammagittaalliuutivit isummerfiginissaanut pisinnaatitaavoq.

Ineqarnermut tunngasunik maalaaruteqartarfiup matumani pingaartutut isigaa peqqussummi § 84, imm. 1 nr. 5-imi oqaatigineqarmat ineqarnermut tunngasunik maalaaruteqartarfik torersaarnissamik malittarisassanik unioqqutitsineq tunngavigalugu inissiaatileqatigiifiup inimik attartornermut isumaqatigiissummik atorunnaarsitsinera suliarisinnaagaa, tamannalu akuerineqaruni illit inigisavit qimannissaanut aalajangerninnut sunniuteqarsimasinnaassagaluartoq taamaattorli pingaaruteqanngitsumik.

Tamatumunnga peqatigitillugu maalaaruteqartarfik isumaqarpoq naammagittaalliuutip ineqarnermut tunngasunik maalaaruteqartarfimmit suliarineqassanersumik suliarineqassannginnersumilluunniit apeqqut pillugu allattoqarfik pisinnaatitaagaluartoq, kisianni tassa naliliineq kukkusuusimavoq.

Taamaalilluni ineqarneq pillugu maalaaruteqartarfiup inissianik attartortitsisarneq pillugu Inatsisartut peqqussutaanni § 85-imi imm. 3-mi allassimasut pingaartippai. Tassani allassimavoq maalaaruteqartarfiup allattoqarfik peqqusinnaagaa imm. 1-mi imm. 2-milu aalajangiinerit taaneqartut tunngavigalugit aalajangeeqqullugu.

Imm. 1 malillugu Ineqarnermut tunngasunik maalaaruteqartarfiup naammagittaalliuut maalaaruteqartarfimmit suliarineqassalluni naleqqutinngitsup suliarinissaa itigartitsissutigisinnaavaa.

Imm. 2 malillugu maalaaruteqartarfiup naammagittaalliuutip suliarinissaa itigartitsissutigisinnaavaa suliarinissaa attartortumut tapersiisuulluinnannginnissaa erseqqarereerpat.Kiisalu ineqarneq pillugu maalaaruteqartarfiup, maalaaruteqartarfiup sulinera pillugu Namminersornerullutik Oqartussat nalunaarutaat taamanikkut atuuttoq nr. 4, 13. februar 2006-meersoq pingaartippaa. Innersuussutigineqarpoq § 2, taannalu malillugu allattoqarfiup suliassarigaa:

Ineqarneq pillugu maalaaruteqartarfimmut allakkatigut, oqarasuaatikkut aammalu nammineq ornigulluni saaffiginnittunut akissuteqartarnissaq.

Suliassat ineqarneq pillugu maalaaruteqartarfimmi suliarineqartussat pillugit paasissutissiisarnermigut piareersaasarnermigullu siulittaasumut ikiuunnissaq.

Aalajangiineq:

Inissiaatileqatigiiffik ineqarnermut isumqatigiissummi torersaarnissamik malittarisassanik unioqqutitsineq tunngavigalugu atorunnaarsitsinissaminut inatsisitigut tunngavissaqarsimanngilaq.

Taamattoq Inissiaatileqatigiiffiup illit inissiamut utertillutit inisseqqinnissannut pisussaanngilaq taamatuttaaq pisussaanani inissiamut allamut qimatannut naapertuuttumut inisseqqissallutit.

Ineqarneq pillugu maalaaruteqartarfiup inigisavit qimanneranut atatillugu nutserninni pigisavit ilaannik annaasimasannik taarsiiffigineqarnissamik piumasaqaatit suliarissallugu pisinnaatitaanngilaq.

Ineqarneq pillugu maalaaruteqartarfiup allattoqarfia pisussaasimagaluarpoq suliaq paasissutissiissuteqarfigissallugu taamalu aalajangiiffigalugu suliassaq ineqarneq pillugu maalaaruteqartarfimmit suliarineqassanersoq imaluunniit itigartinneqassanersoq. Taamaattoq allattoqarfiup suliassap sularinissaanik itigartitsisimanera kukkuneruvoq.

Maalaarnissamut ilitsersuut:

Ineqarneq pillugu maalaaruteqartarfiup aalajangiinera pisortat ingerlatsineranni oqartussaasoqarfimmut allamut maalaarutigineqarsinnaanngilaq, takuuk inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi kingorna allannguuteqartinneqartumi § 86, imm. 7. Attartortitsisup attartortullu akornanni saqitsaannerup eqqartuussivimmi suliarineqarnissaa kissaatigineqarpat, taava aggeqqusissut atorlugu attartortitsisoq eqqartuussivimmut aggeqquneqassaaq. Tamanna atuuppoq attartortitsisup allaffissornikkut aqutsisoqarfianit attartortoq allakkatigut ilisimatinneqartarsimagaluarpalluunniit.

Ineqarneq pillugu maalaaruteqartarfiup aalajangiineri inissianik attartortitsisunut Namminersornerullutik Oqartussanut kommuninullu qilersuisuupput, takuuk § 86, imm. 6.

Nunatta Eqartuussiviata ilitsersuisartoqarfia oqarasuaatikkut saaffigineqarsinnaavoq sisamanngornerni nal. 14.00-miit 15.00-mut, oqarasuaat 36 80 00.

6 80 00.