AALIANGIUSSAQ

Suliap saqqummiunneqarnera:

Ineqarneq pillugu Maalaaruteqartarfiup attartortup maalaarutaa 19. december 2006-imi tiguaa. Attartortup unioqqutitsilluni errorsivimmik ikkussinera, kiisalu attartortup ikkussukkap inatsisit malillugit aaqqinnissaanut piffissakitsuararsuutinneqarluni peqquneqarnini maalaarutigai. Tamatuma saniatigut attartortup attartortitsisumit pineqarnini maalaarutigaa.

Attartortup attartornera 2005-imi oktobarimi aallartippoq, attartortitsisullu unioqqutitsilluni errorsivimmik ikkussisoqarsimanera pissutigalugu attartorneq 18. juli 2006-imi atorunnaarsippaa.

Attartortitsisup attartorunnaarsitsinerminik nalunaarutimini 18. juli 2006-imeersumi inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi (attartortitsinermut peqqussummi) §§ 50 aamma 73, torersaarnissamut maleruagassanik unioqqutitsineq pissutigalugu attartorunnaarsitsisarnermut tunngasut innersuussutigai.

Attartorunnaarsitsinissaq sioqqullugu attartortoq peqqussutitut allakkanik 14. juli 2006-imi ullulerneqartunik tigusaqarpoq. Peqqussummi errorsiviup unioqqutitsilluni ikkunneqarsimanera, aammalu inip atiliata qilaavanik, illullu saqqaanik ajoqusiisimanera tunngavigineqarput.

19. december 2006-imi attartortup maalaarutaa attartortitsisumut oqaaseqarfigisassanngorlugu saqqummiunneqarpoq, aammalu 19. januar 2007-imi akissuteqartoqarnissaanik nukingisaarisoqarpoq. Attartortitsisoq 6. februar 2007-imi suliami akissuteqarpoq.

Attartorunnaarsitsineq attartortup errorsivimmik ikkussinnginnermini akuersissummik pisariaqartinneqartumik piniarsimannginneranik tunngaveqartoq attartortitsisumit oqaatigineqarpoq. Kiisalu attartortitsisup oqaatigaa attartortup errorsivia inissiap atiliata pisataanik ajoqusiisimasoq. Attartortup errorsivik misissoramiuk errorsiviup naqqa putoqartoq, tassuunalu imermik ajoqusiinermut pissutaasumik kuuttoqartoq paasisimavaa. Attartortitsisup allakkatigut peqqussutaanik 14. juli 2006-imeersumik naammassinninnginneq torersaarnissamut maleruagassanik unioqqutitsinertut isumaqarfigaa, tamannalu attartorunnaarsitsinermik kinguneqartinneqarpoq.

28. februar 2007-imi attartortitsisup oqaaseqaataa attartortumut oqaaseqarfigisassanngorlugu nassiunneqarpoq. 28. marts 2007-imi attartortoq akissuteqaqqullugu nukingisaarneqarpoq.

Attartortoq 10. april 2007-imi akissuteqarpoq, tassanilu ilaatigut erseqqissaatigaa init quleriit akornanni ussiitsoqarnera ukiuni arlalinni ajornartorsiutaasimasoq, aammalu attartortup iserternissaa sioqqullugu pioreersimasoq, tamannalu iikkami ruujorimik ussiitsumik pissuteqartoq, attartortup errorsivia pissutaanani. Attartornermut isumaqatigiissutip atorunnaarsinneqarneranut atatillugu iikkami ruujori ussiitsoq VVS-ilerisumit taarserneqarsimasoq attartortup oqaatigaa. Kiisalu attartortoq aatsaat 2006-imi apriilimi errorsivittaarsimalluni allappoq, kisiannili viceværtit attartortitsisup atorfeqartitai ussiitsoqarfinnik misissuiartorlutik 2006-imi januaarimili aamma februaarimili takkuttarsimasut oqaatigaa.

12. april 2007-imi attartortup akissutaa attartortitsisumut oqaaseqarfigisassanngorlugu saqqummiunneqarpoq.

Attartortitsisoq 23. april 2007-imi akissuteqarnermini ilaatigut nassuiaavoq, inissiat quleriit akornanni erngup qerlaarnera attartortup errorsiviata naqqata ussiinneranik pissuteqartoq. Taamatuttaaq attartortitsisup ilisimatitsissutigaa, attartorunnaarsitsinermut atatillugu attartukkami VVS-ilerisup suliarisaa kuuffimmut kussanngaarissumut tunngasuusoq, taannalu erngup ajoqusigaanut tunngasuunngitsoq. Attartorunnaarsitsinermut torersaarnissamut maleruagassanik unioqqutitsineq kisimi tunngavigineqartoq attartortitsisup erseqqissaatigaa, tassani errorsivimmik unioqqutitsilluni, tassalu akuersissummik piniaqqaarani ikkussisoqarsimammat, aammalu errorsivik ajoquteqarmat natermullu imermik katersuiffeqanngitsumut ilineqarsimalluni.

26. april 2007-imi siusinnerusukkut paasissutissiissutigineqartut erseqqissaavigeqqullugit attartortitsisoq qinnuigineqarpoq. Attartortitsisup 3. maj 2007-imi akissuteqarnermini ilaatigut oqaatigaa, attartortitsisup 12. januar 2006-imili attartortoq oqaasiinnaat atorlugit errorsivimmik unioqqutitsilluni ikkussamik atuiunnaaqqullugu peqqusimagaa, taamatullu aamma 2006-imi maajip qaammataani attartortoq attaveqarfigineqarsimalluni. Attartortitsisoq saaffiginnissutinut taakkununnga uppernarsaatissaqanngilaq. Tamatuma kingorna attartortitsisoq allanik qanoq iliuuseqarsimanngilaq, aatsaalli 14. juli 2006-imi attartortoq allakkatigut errorsiviup inatsisit malillugit aaqqinneqarnissaanik peqquneqarpoq, tassani unioqqutitsilluni atuineq unissimanngitsoq attartortitsisumit paasineqarsimalluni. Attartortoq errorsivimmik ikkussinissamut akuersissummik peqanngimmat, errorsivillu ajoquteqarmat aammalu natermut imermik katersuiffeqanngitsumut inissinneqarsimammat, attartortoq torersaarnissamut maleruagassanik unioqqutitsisutut attartortitsisup isummernini aalajangiusimaannarpaa, tamannalu attartornermut isumaqatigiissutip 18. juli 2006-imi atorunnaarsinneqarneranik kinguneqarpoq.

Ineqarneq pillugu Maalaaruteqartarfiup suliamik suliaqarnini 31. maj 2007-imi naammassivaa.

AALAJANGIINEQ

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 4 naapertorlugu attartukkami attartortup ikkussugaani inatsisit malinneqarnersut pillugu suliami aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq.

Ineqarneq pillugu Maalaaruteqartarfik ataatsimiititaliamilu ilaasortat marluk isumaqarput, attartortitsisup attartornermut isumaqatigiissummik atorunnaarsitsinera atortussaatinneqassanngitsoq.

Ataatsimiititaliami ilaasortaq ataaseq isumaqarpoq, attartortitsisup attartornermut isumaqatigiissummik atorunnaarsitsinera atortussaatinneqassasoq.

Aalajangiineq nalinginnaasumik amerlanerussuteqartoqarneratigut pivoq.

Tunngavilersuut:

Attartortoq allakkatigut akuersissummik attartortitsisumut piniareerluni nammineq akilikkaminik attartukkamini nalinginnaasunik ikkussuititsisinnaavoq, tamatumani attartortitsisup illumi innaallagissap kuuffiillu pisinnaasai ikkussuinissamut naammanngitsut uppernarsarsinnaanngippagu, tak. attartortitsinermut peqqussummi § 51, imm. 1. Errorsivinnik ikkussisarneq aalajangersakkamut tassunga ilaavoq.

Ineqarneq pillugu maalaaruteqartarfimmi ilaasortat isumaqatigiissut oqaatigaat, attartortitsisarnermut peqqussummi § 73, imm. 2, nr. 4 naapertorlugu torersaarnissamut maleruagassat unioqqutinneqarpata attartortitsisup attartornermut isumaqatigiissut atorunnaarsissinnaagaa. Attartortitsisarnermut peqqussummi § 50, imm. 1 naapertorlugu attartortup torersaarnissamut maleruagassat ilanngussaq 4-mi taaneqartut malittussaavai. Torersaarnissamut maleruagassat naapertorlugit attartortup inissiaq najukkani sumiginnarpagu attartortitsisup attartortitsinermut isumaqatigiissut atorunnaarsissinnaavaa. Unioqqutitsilluni errorsivimmik ikkussineq inissiamik sumiginnaanertut isigineqarpoq.

Kisiannili attartortitsinermut peqqussummi § 73, imm. 3 naapertorlugu pineqartoq attartortumut iluarseqquneqartoq annertuumik pingaaruteqartussaavoq, unioqqutitsillunilu errorsivimmik ikkussineq taamatut isigineqarpoq.

Attartorunnaarsitsinissaq sioqqullugu attartortoq pineqartumik iluarseeqqullugu allakkatigut peqquneqartussaavoq, tak. attartortitsinermut peqqussummi § 73, imm. 5.

Ineqarneq pillugu Maalaaruteqartarfiup siulittaasua ataatsimiititaliamilu ilaasortat marluk isumaqarput, attartortitsinermut isumaqatigiissutip atorunnaarsinneqarnissaanut matumani tunngavissaqartoqaraluartoq attartortup iluarseeqqullugu peqquneqarneranut piffissaliussaq sivikippallaartoq. Tassani 14. juli 2006 tallimanngornerummat pingaartinneqarpoq, aammalu peqqussissutip aatsaat attartortumut ataasinngornermi 17. juli 2006-imi apuussimanera tunngavigineqarluni. Taamaattumik peqqusissummi piffissarititaasoq taamaallaat ulloq ataaseq inorlugu sivisussuseqarsimavoq. Attartortitsisup juulip ulluisa 18-anni ullaakkut attartortitsinermut isumaqatigiissut atorunnaarsissimavaa.

Peqqusissuteqartarnermut siunertaasoq eqqarsaatigalugu attartortup pineqartumik iluarsiinissamut naammaginartumik piffissaqartinneqartarnissaa naatsorsuutigineqarpoq. Errorsivimmik unioqqutitsilluni ikkutamik iluarsiinissamut ikkussuisartutut akuerisaasup suliakkerneqarnissaa, kiisalu erngup katersuuffianik pisinissaq pisariaqartinneqarmata, attartortup pineqartoq iluarsissallugu naammaginartumik periarfissaqartinneqarsimanngilaq, taamaattumillu peqqusinermi piffissarititaasoq naammaginartumik sivisussuseqarsimanani.

Taakku saniatigut Ineqarneq pillugu Maalaaruteqartarfiup siulittaasuata ataatsimiititaliamilu ilaasortat marluk oqaatigissavaat, 2006-imi juulip qaammataani oqaasiinnaat atorlugit 12. januar 2006-imi peqqusineq tunngavigalugu attartortitsinermut isumaqatigiissummik atorunnaarsitsinissamut periarfissaq iliuuseqartoqarsimannginnera pissutigalugu annaaneqarsimasoq.

Ataatsimiititaliami ilaasortaq ataaseq isumaqarpoq, peqqussut attartortumut tallimanngornermi 14. juli 2006-imi imaluunniit ataasinngornermi 17. juli 2006-imi attartortumut anngussimagaluarpalluunniit, attartortitsisup peqqusinermini piffissaritissimasaa naammattoq. Ataatsimiititaliami ilaasortap tassani errorsivik naqqamigut putoqarluni ajoqutilik pineqarmat, kiisalu erngup katersuuffianik ikkussisoqarsimanngimmat tunngavilersuutigaa. Ajoqutip annertunera aammalu imermik katersuivimmik soqannginnera pissutaallutik peqqusinermi piffissarititaasoq sivikippallaanngilaq.