AALIANGIUSSAQ

Suliap saqqummiunnera:

Naammagittaalliuuteqartup allakkatigut ullulerneqanngitsutigut ineqarneq pillugu maalaaruteqartarfimmit juni 2008-mi tiguneqartutigut ineqarfimmi ileqqorissaarnissamik malittarisassat unioqqutinneqarnerat pillugu Inissiaatileqatigiiffiup maj 2008-mi allagaa naammagittaaliuutiga.

Pigaartuusup nipiliortunik nakkutilliisoq maj 2008-mi attartortup inissiaanit nipit annertussusilerneqartarneranni nipilersuummik nipitoorujussuarmik nipiliornertut taallugu nalunaarusiorpoq.

Naammagittaalliuut pillugu allakkatigut september 2008-meersutigut Inissiaatileqatigiiffik ilisimatinneqarpoq tassungalu atatillugu naammagittaaliuummut oqaaseqaateqaqqullugu ingerlatseqatigiiffik qinnuigineqarpoq. Inissiaatileqatigiiffik allakkanut taakkununnga oktober 2008-mi akissuteqarpoq, tassanilu allakkat maj 2008-meersut ileqqorissaarnissamik malittarisassat malinneqarnissaannik sakkortuumik eqqaasitsissutaasut erseqqissarneqarpoq.

Inissiaatileqatigiiffiup akissutaa pillugu allakkatigut oktober 2008-meersutigut naammagittaaliuuteqartoq ilisimatinneqarpoq. Tassunga atatillugu Inissiaatileqartigiiffiup allagai oktober 2008-meersut allanik oqaaseqaateqarfiginiarneqarnersut naammagittaalliuuteqartoq aperineqarpoq. Periarfissaq taanna naammagittaalliuuteqartup atunngilaa, taamaattumillu suliaq aalajangiiffigissallugu naammattunik paasissutissartaqartutut isigneqarpoq.

AALAJANGIINEQ

§ 84, imm. 1, nr. 5 malillugu suliami aalajangiisinnaatitaalluni Ineqarneq pillugu Maalaaruteqartarfik isumaqarpoq, imaammat naammagittaalliuut pillugu suliaq ineqarfimmi ileqqorissaarnissamik malittarisassat aalajangersakkami pineqartut unioqqutinneqarnerannut tunngammat.

Ineqarneq pillugu Maalaaruteqartarfiup suliaq misissorpaa allakkalu maj 2008-meersut imaatigut akuersissutigineqassasut tamarmik isumaqataaffigisaannik aalajangiunneqarpoq. Taamaalilluni attartortoq naammagittaalliuutaanik taperserneqanngilaq.

Tunngavilersuut:

§ 50, imm. 1 malillugu ileqqorissaarnissamik malittarisassat ilanngussaq 4-mi taaneqartut attartortup malittussaavai taakkunani aalajangersarneqarmat nipiliornermi mianerisassat pisariallit mianerineqassasut.

Ataatsimut isiginnilluni pisullu aallaavigalugit ineqarneq pillugu maalaaruteqartarfik isumaqarpoq allakkat maj 2008-meersut nassiunneqarsimasut ilisimatitsissutaasut aamma ineqarfimmi ileqqorissaarnissamik malittarisassat arlaleriarluni unioqqutinneqartarnerat pissutigalugu attartornerup atorunnaarsinnissaanut tunngaviusinnaasumik mianersoqqussutaanngitsut.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.