AALIANGIUSSAQ

Suliap saqqumminuuera:

Naammagittaalliuut august 2008-meersoq Ineqarneq pillugu Maalaaruteqartarfiup allattoqarfiata september 2008-mi tiguaa. attartortsisisu-mit inerteqqut tiguneqarsimasoq naammagittaalliuutigineqarpoq tassani piumasarineqarmat ullut 14-it ingerlaneranni attartortup qimmeqarnini taamaatissagaa, tamatumalu kingorna inissiamik attartortitsineq atorunnaarsinneqassasoq ingerlaannartumillu anisernissaq piumasaqaatigineqarluni, takukkit §§ 50, imm. 3 aamma 73, imm. 2, nr. 4 aamma imm. 3[2][1]. Allakkatigut taakkunuunatigut attartortoq Inissiaatileqatigiiffik ilisimatinneqarpoq Ineqarneq pillugu Maalaaruteqartarfimmut naammagittaalliuuteqarnissamut periarfissaqartoq. Taamaakkaluartoq ilisimatitsissut najukkamut kukkusumut nassiunneqarsimavoq kinguaattoornermik kinguneqartumik. Taamaattumik naammagittaalliuuteqarnissamut killiliussaq malinneqarsimasutut Ineqarneq pillugu Maalaaruteqartarfimmit isigineqarpoq.

Allakkatigut september 2008-meersutigut naammagittaalliuuteqartoq suliap aalajangiiffigineqarnissaata tungaanut qimmeq peeqqullugu ilisimatinneqarpoq akuersissutaanngitsumik qimmeqarneq ineqarfinni ileqqorissaarnissaq pillugu malittarisassanik unioqqutitsinerummat.

Attartortup naammagittaalliuutaa pillugu oqaaseqaateqaqqusissut allakkatigut september 2008-meersutigut attartortitsisumut saqqummiunneqarpoq. Allakkatigut 2008-meersutigut attartortitsisoq akissuteqarpoq ilisimatitsissutigalugulu qimmeqarnissamut attartortoq akuerisaasimanngitsoq. Aamma sutigulluunniit ersertoqanngilaq attartortoq qimmeqarnissamut sukkulluunniit qinnuteqaateqarsimanersoq. Attartortitsisuttaaq uparuarpaa Kommuni-p inissianik piginnittutut aalajangiussimagaa ineqarfimmi immikkoortortami uumasuuteqarnissaq akuersissutigineqassanngitsoq.

Attartortitsisup allagaa september 2008-meersoq allakkatigut septemberimeersutigut naammagittaalliuuteqartumut saqqummiunneqarpoq allanik oqaaseqaateqarnissamut periarfissiinertalerlugu. Periarfissaq tanna attartortup atorsimanngilaa.

AALAJANGIINEQ

§ 84, imm. 1, nr. 5, tunngavigalugu ineqarfimmi ileqqorissaarnissamik malittarisassat unioqqutinneqarnerinut atatillugu suliami Ineqarneq pillugu Maalaaruteqartarfik aalajangiisinnaatitaalluni isumaqarpoq.

Ineqarneq pillugu Maalaaruteqartarfiup suliaq misissorpaa tamarmillu isumaqataaffigisaannik aalajangiullugu aalajangiineq una illua’tungeriinnut nalunaarutigineqareerneranit kingusinnerpaamik ullut 14-it qaangiunneranni attartortup qimmini peersissagaa, taamaattoqanngippat siumut ilisimatitsinertaqanngitsumik inissiamik attartorneq ingerlaannartumik atorunnaarsissallugu attartortitsisoq pisinnaatitaammat. Taamaattumik attartortoq qimmeqassalluni pisinnaatitaanngilaq.

Tunngavilersuut:

§ 50, imm.1, tunngavigalugu ineqarnermi ileqqorissaarnissamik malittarisassat attartorneq pillugu isumaqatigiissummi taaneqartut attartortup malittussaavai. Taakku tunngavigalugit ineqarfiit immikkoortuini 162 aamma 167-ini qimmeqarnissaq akuersissutigineqarsinnaanngilaq. Taanna matumunnga ataqatigiissikkaani, tassalu qimmeqarnissaq qinnuteqaatigineqarsimanngimmat imaluunniit akuersissutigineqarsimanngimmat tamatuma nassatarisussaavaa attartorneq pillugu isumaqatigiissut attartortitsisup atorunnaarsissinnaammagu, takuuk § 73, imm. 2, nr. 4.

Attartortitsisup allakkatigut august 2008-meersutigut peqqussutigisimammagu allakkat ullulernerannit ullut 14-it qaangiutsinnagit attartortup qimmini peersissagaa, attartortitsisup attartorneq pillugu isumaqatigiissut tunngaviatigut atorunnaarsissinnaavaa. Taamaattorli ullut 14-it killiliussat ingerlaneranni attartortup qimmeq peersimammagu taamaattumillu qimmip peerneqarnissaanik attartortitsisup piumasaqaataa malissimammagu, taamaalilluni inissiamik attartornerup atorunnaarsinnissaa tunngavissaaruppoq.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.