AALIANGIUSSAQ

Suliap saqqumminnera:

Allakkatigut Ineqarneq pillugu Maalaaruteqartarfiup allattoqarfianit februar 2009-mi tiguneqartutigut ineqarfimmi ileqqorissaarnissamik malittarisassat arlaleriarluni unioqqutinneqartarnerat tunngavigalugu naammagittaalliortup attartornerata atorunnaarsinnera pillugu attartortoq naammagittaalliuuteqarpoq.

Attartortup inigisaanit nipiliornermik ajoqusersuutaasumillu pissusilersorsimanermik naammagittaalliuutit tiguneqartarsimanerat pillugu Inissiaatillip septemberimi, decemberimi aamma januar 2009-mi allagarisartagaatigut attartortoq ilisimatinneqartarsimavoq. 2009-mi attartortoq nipiliorluni ajoqusersuillunilu pissusilersorsimanera pillugu allaffigineqaqqippoq kiisalu ileqqorissaarnissamik malittarisassat arlaleriarluni unioqqutinneqartarnerisa kingunerisaanik attartornerup atorunnaarsinneqarneranik allaffigineqarluni.

Inissiaatillip september 2008-mi ilisimatitsissutitut allagaani ajoqutaasumik nipiliortumillu pissusilersornermut tunngasuni taaneqarpoq pigaartup nipiliortunik nakkutilliisua nipiliorneq pillugu nalunaarusiorsimasoq tassanilu paasineqarsimasoq nipilornerup annertussusilerneqartarnera malillugu nipilersuumik nipituumik naammagittaalliuutigineqartup inissiaanit nipilersortoqarsimasoq.

Allakkatigut december 2008-meersutigut nipiliornermik ajoqusersuutaasumillu pissusilersorsimaneq pillugu naammagittaalliuummik attartortitsisoq tigusaqaqqippoq. Pigaartup nipiliorneq pillugu nalunaarusiorsimavoq nipiliortitsisarnerup annertussussilerneqartarnera malillugu unnuakkut nipitoorujussuarmik nipiliortitsisimaneq pillugu.

Allakkatigut januar 2009-meersutigut Inissiaatileqatigiiffimmut naammagittaalliuuteqaqqittoqarpoq tassanilu ukiortaap unnuaani nipiliorluni ajoqusersuutaasumillu pissusilersorsimaneq pineqarpoq naammagiittaalliuuteqartullu oqaatigaa piffissami pineqartumi arlaleriarluni festertoqartarsimasoq. Aammattaaq allakkatigut naammagittaalliuutigineqartoq ilisimatinneqarpoq naammagittaalliortoqaqqippat inissiap attartorneqarnera ingerlaannartumik atorunnaarsinneqassasoq inissianik attartorneq pillugu § 50, imm. 1 aamma § 73, imm. 2, nr. 4 aamma imm. 3 tunngavigalugit.

Illua´tungeriit piumasaqaataat tunngavilersuutaallu:

Attartortoq:

Ineqarfimmi ileqqorissaarnissamik malittarisassat arlaleriarluni unioqqutinneqartarsimanerat pissutigalugu attartornermik atorunnaarsitsineq pillugu naammagittaalliuuteqarpoq. Tassunga atatillugu naammagittaaliuuteqartup oqaatigaa inissiaq 2000-imiilli inigisimallugu 2008-lu sioqqullugu naammagittaalliorfigineqartarsimanani.

Attartortitsisoq:

Ineqarfimmi ileqqorissaarnissamik malittarisassat arlaleriarluni unioqqutinneqartarsimanerat tunngavigalugu attartornerup atorunnaarsinneqarnera aalajangiusimavaa. Aammattaaq ingerlatseqatigiiffik anisitsinissap suliarineqarnissaa pillugu qinnuteqaammik nassiussaqarpoq.

AALAJANGIINEQ

§ 84, imm. 1, nr. 5, tunngavigalugu Ineqarneq pillugu Maalaaruteqartarfik isumaqarpoq ineqarfimmi ileqqorissaarnissamik malittarisassat unioqqutinneqartarsimanerat tunngavigalugu suliaq pillugu aalajangiisinnaatitaalluni.

Ineqarneq pillugu Maalaaruteqartarfiup suliaq misissorpaa tungavilersuutillu malillugit ineqarfimmilu ileqqorissaarnissamik malittarisassat unioqqutinneqartarsimanerat tunngavigalugit inissiamik attartornermik isumaqatigiissutip attartortitsisumit atorunnaarsinneqarnera atuutsissasoq aalajangiullugu, imaammat maalaaruteqartarfiup naliliinera malillugu attartornerup atorunnaarsinnera naammattumik tunngavissaqartutut isigineqarmat, takuuk tunngavilersuut pillugu titarnertaaq.

Taasisut nalinginnaasumik amerlanerussuteqarnerisigut aalajangiisoqassaaq. Taasinerit amerlaqatigiippata siulittaasup taasinera aalajangiisuussaaq.

Tunngavilersuut:

Nammagittaalliuut allakkanut september 2008-meersunut tunngaviusoq Inissiaatileqatigiiffimut ingerlatinneqarsimavoq. Naammagittaalliuummi pineqarpoq nipitoorujussuarmik nipilersorsimanikkut nipiliortitsilluni pissusilersorsimaneq, tamannalu pigaartup 16. september 2008-mi unnuarornerani nalunaarusiortuusup uppernarsarpaa. Tamanna tunngavigalugu attartortoq allaffigineqarpoq ileqqorissaarnissamik malittarisassat malillugit ineqarfimmi eqqissisimaartoqarnissaa ileqqorissaartoqarnissaalu inissiaatileqatigiiffiup sakkortuumik erseqqissaatigaa.

Naammagittaalliuut december 2008-meersoq nipiliorluni pissusilersorsimanermik pissuteqarpoq tassungalu atatillugu unnuami nipitoorujussuarmik nipilersorsimaneq pigaartup eqqortuunerarpaa.

Allakkani januar 2009-meersuni 31.december 2008-p aamma 1. januar 2009-p akornanni unnuami nipiliorluni ajoqusersuutaasumillu pissusilersorsimaneq pineqarpoq. Nipiliornerit annertussusilerneqartarnerat malillugu nipituumik nipilersorsimaneq pigaartup nalunaarusiaani taaneqarpoq.

Taamatuttaaq allakkani februar 2009-meersuni nipiliorsimaneq pineqarpoq. Naammaannartumik nipiliortoqarsimasoq pigaartup nalunaarusiaani taaneqarpoq. Nalunaarusiami ilassutitut una taaneqarpoq: ”Festertoqarnera aamma nipiliornerup annertussusilerneqartarnera malillugu naammattumik nipituumik oqaluttoqarlunilu suaartaatoqarpoq”.

Ineqarneq pillugu Maalaaruteqartarfiup aalajangiinermini pingaartippaa naammagittaalliuutit pigaartup nalunaarusiaannik naammattumik tunngavissaqarnerat, piffissaq eqqarsaatigalugu naammagittaalliuutit imminnut ataneqarmata kiisalu ineqarfimmi ileqqorissaarnissamik malittarisassat attartortumut sakkortuumik erseqqissarneqarsimammata tamatumalu kingorna taanna mianersoqqussummik tunineqarsimammat unioqqutitsisoqaqqippat attartornerup atorunnaarsinneranik tamanna kinguneqassasoq paasissutissartalimmik.

Taamaattumik naammagittaalliummut akiliut itigartitsissutigineqarpoq attartornermillu atorunnaarsitsineq aalajangiusimaneqarluni. Akerliussuteqartoq ilalerneqanngimmat naammagittaalliuummut akiliut utertillugu tunniunneqassanngilaq.

Naammagittaalliornissamut ilitsersuut:

Inissianik attartorneq pillugu Inatsisartut peqqussutaanni kingusinnerusukkut allannguuteqartartumi nr. 2-mi 12. maj 2005-imeersumi § 86, imm. 7 malillugu Ineqarneq pillugu Maalaaruteqartarfiup aalajangiineri oqartussaasunut allanut naammagittaalliuutigineqarsinnaanngillat. Attartortitsisup attartortullu akornanni saqitsaassut eqqartuussivinnut suliasanngortinneqassasoq kissaatigineqarpat attartortitsisoq pillugu unnerluussut najukkami eqqartuussivimmut tunniunneqassaaq. Tamanna atuuppoq, allaffigeqatigiittarnerit il.il. attatortitsisup aqutsinikkut aktiaatileqatigiiffianit suliarineqarsimagaluarpataluunniit.

Ineqarneq pillugu Maalaaruteqartarfiup aalajangiineri Namminersorlutik Oqartussanit kommuninillu inissianik attartortitsisartunit malinneqartussaapput. Taamatuttaaq Namminersorlutik Oqartussat kommunilluunniit avataaneersumik aqitsisoqartitsippata maalaaruteqartarfiup aalajangiineri taakkunannga malinneqartussaapput, takuuk § 86, imm. 6.

Nunatta Eqqartuussiviata ilitsersuinermut immikkortortaqarfia oqarasuaatikkut saaffigineqarsinnaavoq sisamanngornerni nal. 14-15 oqarasuaatip normua 36 80 00 atorlugu.