AALIANGIUSSAQ

Suliamik saqqummiussineq:

Nipiliorneq pillugu allakkat naammagittaalliuutit Ineqarneq pillugu Maalaaruteqartarfiup allattoqarfiata maj 2008-mi tiguai. Attartortup nipiliorneq pillugu naammagittaalliuut itigartitsissutigineqassasoq kissaatigaa manna peqqutigitillugu, tassalu malittarisassat malillugit piffissami taaneqartumi nipiliorneq naammagittaalliuutigineqarsinnaangitsoq. Aammattaaq patsisigitinneqarpoq illu nipinut ussiitsorujussuummat aamma piffissami taaneqartumi imaluunniit sapaatip akunnerata naanerani pineqartumi arnap taassuma inissiaanit nipiliortoqarsimannginnera.

Inissiamit attartukkamit nipiliornerup ajoqutaasimaneranut naammagittaalliuummik takkuttoqarsimanera pillugu attartortoq allakkatigut maj 2008-meersutigut ilisimatinneqarpoq. Inissiamit attartukkamit nipitoorujussuarmik nipilersortoqarsimanera arfininngornermi paasineqarsimasoq ISS Securitasimit nipiliorneq pillugu nalunaarusiortoqarpoq. Inissiami nipiliorneq pillugu naammagittaalliortoqaqqippat attartorneq atorunnaarsinneqassasoq uparuarneqarpoq.

AALAJANGIINEQ

§ 84, imm. 1, nr. 5[2][1], tunngavigalugu ileqqorissaarnissaq pillugu malittarisassat unioqqutinneqarsimanerannut atatillugu suliami aalajangiisinnaatitaalluni Ineqarneq pillugu Maalaaruteqartarfik isumaqarpoq.

Ineqarneq pillugu Maalaaruteqartarfiup suliaq misissorpaa aalajangiullugulu nipiliorneq pillugu ileqqorissaarnissamut aalajangersakkat piffissaq pillugu aalajangersagartaqanngitsut. Imaappoq nipiliorluni ajoqusersuillunilu pissusilersorneq sukkulluunniit inerteqqutaavoq. Tamanna tunngavigalugu attartortup naammagittaalliuutaa Ineqarneq pillugu Maalaaruteqarfiup ilalersorsinnaanngilaa. Tassa maj 2008-mi mianersoqqussut suli atuuppoq.

Tunngavilersuut:

Attartornermut peqqussummi § 50, imm.1-imi aalajangersarneqarpoq inissiaq pillugu ileqqorissaarnissamik malittarisassat taaneqartut attartortup malissagai. Nipiliorluni pissusilersorneq pillugu ineqarfinni ileqqorissaarnissamut malittarisassani aalajangersarneqarpoq:

” Sakkut nipiliortut, soorlu qillerutit, eqqaamiut eqqarsaatigalugit taamaallaat nal. 8-ip aamma nal. 19-ip akornanni atorneqaqqusaapput. Majuartarfinni, torsuusaasarsuarni imaluunniit naqqut iluini nipiliorluni pinnguartoqaqqusaanngilaq. Radio, fjernsyni, båndoptageri, oqaluttartoq imaluunniit CD-mik nipilersuut eqqaamiunut akornutaasumik atorneqaqqusaanngillat. Nalliuttorsiornerit nipiliorfiusut eqqaamiut tamatumunnga akuersiteqqaarsimatinnagit ingerlanneqaqqusaanngillat. Nipilersortartut sungiusartarneri imaluunniit nipilersornermik ilinniartitsisarnerit attartortitsisumut isumaqatigiissutigineqaqqaarsimassapput.”

Aalajangersakkami takuneqarsinnaavoq atortut nipiliortitsisartut nal. 8 aamma 19 akornanni kisimi atorneqarsinnaasut. Nipiliortitsinermut periaatsinut allanut atatillugu qanoq ilisukkut nipiliortitsisinnaaneq pillugu piffissanik killilersuutinik soqanngilaq. Imaappoq aalajangersakkap oqaasertai nipiliornerup suussusia apeqqutaatillugu nassuiarneqarsinnaapput nassuiarneqartussaallutillu ullup unnuallu ingerlanerani piffissani aalajangersimasuni nipiliortoqarsinnaanera pineqanngilaq. Tassa attartortup ima oqarnera, tassalu ileqqorissaarnissamik malittarisassat malillugit piffissami pineqartumi nipiliorsimaneq naammagittaalliuutigineqarsinnaanngitsoq, taamaalilluni taanna tunngavigineqarsinnaanngilaq.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.