AALIANGIUSSAQ

Inigisimasavit, xx inatsisit malillugit nalinginnaasumik iluarsaanneranut aningaasartuutit akileqquneqarnerat pillugu naammagittaalliuutit Ineqarnermut Naammagittaaliortarfiup 24. november 2011 suliaraa imatullu aalajangiilluni

AALAJANGIINEQ

Ineqarnermut Naammagittaalliortarfik isumaqarpoq illit tunngaviatigut inigisimasavit inatsisit malillugit nalinginnasumik iluarsaanneranut aningaasartuutit ilaat illit akileeqataassutissatit akilissagitit.

Taamaattoq Ineqarnermut Naammagittaalliortarfiup nalilersuereernikkut inigisap inatsisit malillugit nalinginnaasumik iluarsaanneranut aningaasartuutit ilaat illit akileeqataassutissatit 5.000,00-ininik ikilileriffigai.

Inisiaatileqatigiiffiup nutsernermut atatillugu nutaamik naatsorsuusiussaaq.

Taamaalillutit naammagittaalliuutinni ilaannakortumik taperserneqarputit.

Paasissutissat suliamut tunngassuteqartut

Attartornermut isumaqatigiissut 14. december 2010-meersoq.

Amigaatit allattorsimaffiat 29. december 2010-meersoq.

Takusaanermit nalunaarusiaq 7. juni 2011-meersoq Inissiaatileqatigiiffiup Inissiaatileqatigiiffiup piumasanut allagartaliaa 8. juni 2011-meersoq.

Akiligassat allagartaat 15. juni 2011-meersoq.

Nutsernermut atatillugu naatsorsuusiaq 5. juli 2011-meersoq.

Naammagittaalliiuut 13. juli 2011-meersoq.

Nassuiaat

Inissiamut, xx nutserputit 15. december 2010.

Naammagittaalliuutinni allapputit inissiami qaammatini tallimani najugaqarsimallusi. Tassunga nutserpusi 15. december 2010 inissiarlu qimapparsi 30. maj 2011. Inissiaq qaliparlaavoq eqqiarneqaranili, nammineq eqqiarsimavat. Inissiamut isertiterassi naqqi nutaamik lakkersimapput inilu qaliparlaalluni. Aama allapputit ilissi najugaqarnissinni pujortartoqarneq ajortoq, aammalu assiliaq ataaseq qulliillu marluk iikkanut ikkuttakkat kiisalu saagut ikkuffii taamaallaat nivinngarsimavatit.

Kiisalu allapputit inissiamut iserterassi amigaatit allattorsimagisi. Amigaataasutut allattukkatit tamarmik iluarsineqarsimanngillat.

Takusaanermit nalunaarusiami takuneqarsinnaavoq torsuusami, iggavimmi, issiaartarfimmi, sinittarfimmi ineeqqami qulaanilu ineeqqami iikkat marloriarlugit qalipatassaasut, aammalu torsuusami akunnequtaasumi, uffarfimmi majuartarfiillu ataasiarlugit qalipatassaasut.

Aamma allassimavoq paarlermi qilaaq marloriarlugu qalipatassaasoq ininilu allani qilaat ataasiarlugit qalipatassaasut. Majuartarfiit qulaanilu ineeqqap naqqa, inip issiaartarfiup ineeqqallu naqqi ataasiarlugit lakkigassaasut.

Taavalu iikkat natillu katiffiisa sallilikkersuutaat, taamatuttaaq torsuusami ininilu allani tamani sallilikkersuutit taamaattut marloriarlugit qalipallugit. Igaffimmi, uffarfimmi, inimi, sinittarfimmi, qulaani ineeqqami majuartarfiillu qulaanni qisuttalersuutit ataasiarlugit qalipallugit. Taamalu aamma teknikkikkut atortulersuutit torsuusaniittut marloriarlugit qalipallugit taavalu inissiap sinnerani qisuttalersuutit marloriarlugit qalipallugit.

Kiisalu allassimavoq inissiaq tamakkivillugu eqqiarneqassasoq, majuartarfiit ajaperfii qasertumik qalipallugit uffarfimmilu sikaaviit qiversartui ilisiviillu peerlugit.

Akiligassat allagartaat 27. juni 2010-meersoq malillugu inissiap tamakkiisumik eqqiarneranut aningaasartuutaasussaapput 1.719,00 koruunit.

Akiligassat allagartaat 15. juli 2011-meersoq malillugu iikkat qalipannerinut 5.000 koruunit aningaasartuutaasussaapput, qilaat qaqortumik qalipannerinut 5.000 koruunit taavalu naqqit lakkernerinut 5.000 koruunit aningaasartuutaasussaallutik.

Nutsernermut atatillugu naatsorsuusiami takuneqarsinnaavoq illit sallunaveeqqutitut akilersimagitit 11.322 koruunit. Inatsisit malillugit iluarsaaneq nalinginnaasoq 15.000 koruuninik akeqarluni, eqqiaanerlu 1.719 koruuninik. Katillugit 16.719 koruunit aningaasartuutaassallutik. Nalinginnaasumik iluarsaanermut aningaasartuutinit Inissiaatileqatigiiffiup ilanngaatigai 6 %, aningaasanngorlugit 900 koruunit. Tamanna tunngavigalugu Inissiaatileqatigiiffik naatsorsuivoq illit Inissiaatileqatigiiffimmut akiligassarigitit 4.497 koruunit.

Inatsisitigut tunngavigisat

Inissianik attartortitsisarneq pillugu Inatsisartut peqqussutaanni nr. 2-mi, 20. november 2005-imeersumi § 77, imm. 1 malillugu inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iikkanik qalipaaneq aamma/imaluunniit ungalitsersuineq, kiisalu eqqiaaneq. Naqqit nutaamik lakkersimasutut isikkoqassapput taamaattorli tak. Imm. 3.

§ 77, imm. 3 malillugu attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermi pissuserisaatut itsillugu tunniutissavaa.

§ 78 malillugu attartortup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

§ 79, imm. 1 malillugu attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamilu misissuisoqarnissaa allaganngorlugu isumaqatigiissutigissavaat.

Imm. 2. Misissuinermi attartortitsisoq misissuisimanermut nalunaarusiussaaq , tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluuniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaannik missingersuummik allakkatigut nalunaarfigineqassaaq.

§ 84 malillugu ineqarneq pillugu naammagittaalliortarfiup attartortut naammagittaalliuutaat makkununnga tunngasut suliarisarpai:

7) Inissiap anisoqarnerani qanoq issusia (iluarsaassineq nalinginnaasoq), tak. § 77.

Naliliineq

Ineqarnermut Naammagittaalliortarfik isumaqarpoq illit tunngaviatigut inigisavit inatsisit malillugit nalinginaasumik iluarsarneranut aningaasartuutit ilaat akileeqataassutissatit akilissallugit pisussaasutit.

Ineqarnermut Naammagittaalliortarfik taamatut naliliinermi pingaartippaa inissianik attartortittakkanik attartortitsisarneq pillugu Inatsisartut peqqussutaanni § 77, imm. 1 malillugu inissiap nalinginnaasumik iluarsarnissaata inatsisitigut piumasaqaataanera.

Tamanna isumaqarpoq inissiap qimanneranut atatillugu inissiap nalinginnaasumik iluarsarnissaanut, tassunga atatillugu qilaat qaqorsarlugit qalipannissaat iikkat qalipannissaat aamma imaluunniit ungalitsersornissaat eqqiaanermullu aningaasartuutissat akilernissaat attartortup akisussaaffigigaa. Naqqit nutaamik lakkersimassapput.

Inissiamik pineqartumik attartornerpit sivikissusianut tunngatillugu piffissamilu attartorfiusumi (soorlu assit atorlugit takussutissiuinikkut) attartukkami nungullartoqarsimaneragut allatigullu takussutissaqannginnera tungavigalugu nalinginnaasumik iluarsaanermut aningaasartuutit ilaat illit akileeqataassutissatit nalilersuineq tunngavigalugu ikilisinneqarput 5000 koruuninik. Taamatut aalajangiinermi Ineqarnermut Naammagittaalliortarfiup pingaartutut isigaa suliamut ilanngussanut ilanngussat (suliassanik assigiinngitsunik suliallit akiligassanut allagartaliaat) tamakkiisumik takussutissiinngimmata suliat suliarineqartut qanorpiaq annertutiginerannik, pissutigalugu suliassanik assigiinngitsunik suliallit akiligassanik allagartaliaanni akit atorneqartut tassaanerummata akit aalajangersimasut isumaqatigiissutaasimasut kisitsisitaasa ilivitsunngorlugit allanneqarsimanerat.

Aalajangiineq

Inigisavit inatsisit malillugit nalinginnaasumik iluarsarneranut aningaasartuutit ilaat illit akileeqataassutissatit nalilersuineq tunngavigalugu 5.000-inik ikilisinneqarput.

Taamaattumik Inissiaatileqatigiiffik nutsernermut atatillugu nutaamik naatsorsuusiussaaq. Aalajangiinermut matumunnga tunngatillugu Inissiaatileqatigiiffimmit tusagaqassaatit.

Naammagittaalliorsinnaanermut ilitsersuut

Inissianik attartortitsisarneq pillugu Inatsisartut peqqussutaanni nr. 2-mi, 20. november 2005-imeersumi § 86, imm. 7 malillugu naammagittaalliuummik itigartitsineq allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq. Saqitsaannerup eqqartuussisunut suliassanngortinneqarnissaa kissaatigineqarpat attartortitsisumik eqqartuussivimmut aggeqqusissut eqqartuussivimmut tunniunneqassaaq. Tamanna atuuppoq attartortitsisup allaffissornikkut ingerlatseqatigiiffiinit allakkatigut attaveqarfiginninneq ingerlanneqarsimagaluarpalluunniit.

§ 86, imm. 6 malillugu Ineqarnermut Naammagittaalliortarfiup aalajangiineri Namminersornerullutik Oqartussanit (Namminersorlutik Oqartussanit) kommuninillu pinngitsoorani malinneqartussaapput.

Nunatta Eqqartuussiviata ilitsersuinermut immikkoortortaqarfia oqarasuaat atorlugu saaffiginninnernut ammasarpoq sisamanngornerni nal. 14-miit 15-mut oqarasuaat 36 80 00.