AALIANGIUSSAQ

Suliap saqqummiunnera:

Juli 2007-imi attartortoq Ineqarneq pillugu Maalaaruteqartarfimmut naammagittaalliuuteqarpoq. Attartortup inissiamit anisernissaminut atatillugu nalinginnaasumik iluarsaassinermut aningaasartuutit annertussusiat naammagittaalliuutigaa.

Attartortup inissiaq juli 2006-imit attartulerpaa attartukkanilu februar 2007-imi aniserfigalugu.

Attartortup attartukkamit aniserneranut atatillugu januar 2007-imi inissiamik takuniaasoqarpoq anisernerlu pillugu nalunaarusiortoqarluni. Aniserneq pillugu nalunaarusiaq attartortitsisumit kisimi atsiorneqarpoq attartorsimasoq takuniaanermi peqataasimanngimmat.

Attartortup naammagittaalliuutaa oqaaseqaateqarfigisassanngorlugu oktober 2007-imi attartortitsisumut saqqummiunneqarpoq. Attartortitsisoq oktober 2007-imi akissummik allagaqarpoq. Attartortitsisup paasissutissiissutigaa ineqarnermut akiliummut sillimmatitut akiliutigigallagassat matussusernissaannut attartortoq taarsigassarsisimasoq tamannalu ilanngussami attartortitsisup ilanngullugu nassiussaani ersertoq kiisalu attartortoq ineqarnermut akiliutinut akiitsugaqartoq taannattaaq ilanngussami ilanngullugu nassiunneqartumi ersertoq. Attartortitsisup allagaani ilanngulluguttaaq nassiunneqarput ilanngussat iserterneq anisernerlu pillugit nalunaarusiat.

Attartortitsisup akissutitut allagaa oktober 2007-imeersoq oqaaseqaateqarfigisassanngorlugu attartortumut oktober 2007-imi saqqummiunneqarpoq. Attartortoq akissuteqarsimanngilaq taamaalillunilu suliaq annertunerusumik paasissutissiissuteqarfiginagu.

Ineqarneq pillugu Maalaaruteqartarfiup suliamik suliarinninni december 2007-imi inaarpaa.

AALAJANGIINEQ

Inissianik attartorneq pillugu Inatsisartut peqqussutaanni nr. 2-mi 12. maj 2005-imeersumi kingusinnerusukkut allanngortinneqartumi § 84, imm. 1, nr. 7, tunngavigalugu Ineqarneq pillugu Maalaaruteqartarfik isumaqarpoq attartortup aniserneranut atatillugu nalinginnaasumik iluarsaassinermi aningaasartuutit annertussusiat pillugu suliami aalajangiisinnaatitaalluni.

Ineqarneq pillugu Maalaaruteqartarfiup suliaq misissorpaa tamarmillu isumaqataaffigisaanik aalajangiullugu nalinginnaasumik iluarsaassinermut attartortitsisoq akiliuteqqusisinnaasoq inissiaq nuuffigneqanermini nalinginnaasumik iluarsaanneqarsimammat. Taamaattumik attartortup attartukkaminit anisernermini nalinginnaasumik iluarsaassinermi peqataassutini akilissavai. Ineqarneq pillugu Maalaaruteqartarfiup tamatumunnga tunngavilersuutigaa anisernermi malittarisassat malillugit takuniaasoqarsimammat aamma takuniaanermi attartortoq peqataasimanngikkaluarpalluunniit.

Ineqarneq pillugu Maalaaruteqartarfik isumaqatigiippoq ineqarnermut akiliummut sillimmasiissutip sinneranut akiitsut attartortup naammassillugit akilersimanngisani kiisalu ineqarnermut akiliummi akiitsuni attartortup attartortitsisumut akilissagai.

Tunngaviliineq:

Attartortup sillimmasiissutit napifferartumik tamakkerlugit akilersorsimanngimmagit attartukkamit anisernermi sillimmatitut akiliutit sinneruttut attartortup akilertussaavai, takuuk attartorneq pillugu peqqussummi § 37, imm. 5.

Atartorneq pillugu peqqussummi § 38 tunngavigalugu attartortup ineqarnermut akiliut akilertussaavaa. Attartortoq ineqarnermut akiliummut akiitsugaqarsimammat attatukkamit anisernermi akiitsut attartortitsisup akileqqusinnaavai.