AALIANGIUSSAQ

Siornatigut inigisimasavit, W, nalinginnaasumik iluarsaanneranut matullu ataatsip nutaamik taarseneranut aningaasartuutit ilinnut akiligassanngortinneqarneri pillugit naammagittaalliuutit ineqarneq pillugu malaaruteqartarfiup ulloq 19. september 2011 suliaraa imatullu aalajngiilluni

AALAJANGIINEQ:

Iluarsaanermut matumillu taarsiinermut aningaasartuutit akilissanngilatit.

Inigisavit nalinginnaasumik iluarsaanneranut atatillugu aningaasartuutit ilaat illit akileeqataassutissatit akilissavatit.

Paasissutissat suliamut tunngassuteqartut:

• Attartornermut isumaqatigiissummut tapiliussaq 3. oktober 2006-imeersoq.

• Inimik attartukkamik misissuineq 31. juli 2009-meersoq.

• Nutsernermut akiligassat isumannaarnerannut uppernarsaat I 2. oktober 2009-meersoq

• Nutsernermut akiliigassat isumannaarnerannut uppernarsaat II, allakkanik ilalerlugu nassiunneqartoq 16. februar 2010-meersoq.

• Akilersuinissamik isumaqatigiissut 28. maj 2010-meersoq.

• Naammagittaalliuut.

• Alakkat 3. juni 2011 ulloqartut S-imeersut.

Nassuiaat:

Qaammat juni 2009 inigisavit W, attartorneranut isumaqatigiissut atorunnaarsippat juli 2009-mi qimattussanngorlugu.

Allakkatigut 18. juni 2009 ullulerneqartutigut S-ip uppernarsarpaa isumaqatigiissummik atorunaarsitsinerit tigusimallugu siunnersuutigalugulu inimik misissuineq pissasoq 31. juli 2009. S nangilluni allappoq inigisaq nalinginnaasumik iluarsaanneqassasoq, tassungalu ilaatinneqarlutik qilaat qaqortumik qalipanneri, iikkat qalipanneri ungalitsersornerilu, naqqit lakkerneri, kingornalu inissiap tamarmi eqqiarnera.

Inissiaq ullormi 31. juli 2009 misissorneqarpoq. Suliami takuneqarsinnaavoq misissuinermit nalunaarusiaq, tassani takuneqarsinnaalluni matut sisamat sanasumit suliassaasut, aammalu iikkat qalipaasumit suliassaasut, qilaat inillu naqqi. Qulequttap “oqaatigumasat allat” ataani allassimapput: “Inigisamik paarlaassineq nalinginnaasumik iluarsaassinertalik pos 1.” Misissuinermi nalunaarusiaq ilinnit inissianillu nakkusilliisumit atsiorneqartoq.

Ullormi 2. oktober 2009 S nutsernermut atatillugu aningaasartuutit isumannaarnissaannut allagartaq naammassivaa, tassani atuarneqarsinnaalluni illit sallunaveeqqutitut 7.485,00 koruunit akilersimagitit. Akiligassat allagartaanni nalunaarsukkat: Nalinginnaasumik iluarsaassineq, paarsinerlunneq iluarsaanerillu allat nalaanni nalunaarsimavoq 0 kr. Takuneqarsinnaasutut nutsernermut atatillugu akiligassat isumannaarnissaannut allagartaq ulloq taanna ilinnut nassiunneqarsimavoq.

Suliami akiligassanik isumannaarinissamut allagartaq alla takuneqarsinnaavoq, taanna aamma ullulerneqarsimavoq 2. oktober 2009, tassani allassimapput:

Sallunaveeqqutitut akilersimagitit kr. 7.485,00.

Nalinginnaasumik iluarsaassinermi aningaasartuutit 15.750,00 koruuninik amerlassuseqartut.

Paarsinerlunnermut atatillugu aningaasartuutit 12.733,00 koruuninik amerlassuseqartut.

Aammattaaq allassimavoq piffissaq illit inissiami najugaqarfigisat tunngavigalugu nalinginnaasumik iluarsaassinermi aningaasartuutit 77 % -ii ilanngaatigineqassasut.

S allappoq taamatut inerniliinermi illit akiligassarileritit 16.605,50 koruunit.

Nutsernermut atatillugu aningaasartuutit isumannaarnissaannut allagartami ilassutigaat:

“2002-mi paarsinerlunnermut tunngasoq

Inissiaq uannut tunniunneqarpoq S-imillu sumilluunniit attuisoqanngilaq, uagut nammineq qalipaavugut.”

Taamaattoq S nutsernermut atatillugu aningaasartuutit isumannaarnissaannut allagartaq aatsaat ilinnut nassiuppaa 16. februar 2010 allakkanik ullormi tassani ullulerneqartunik ilalerlugu.

Ulloq 15. oktober 2009 kontonnut aningaasat 7.485,00 koruunit ikineqarput, oqaatigineqartut malillugit tassaasut sallunaveeqqutitut akiliutigisimasatit S-imit utertinneqartut.

Ulloq 28. maj 2010 illit S-illu isumaqatigiissut atsioqatigiiffigaarsi, tassani allassimasoqarluni illit S-mut 16.385,47 akiligassaralugit nassuerutigigit, aammalu naafferartumik akilersorniaritit aallaqqaammut 1.160,30 koruunit akiliutiginiarlugit, kingornalu qaammammut 910,30 koruunit akiliutigisarniarlugit 1. december 2011-ip tungaanut.

Allakkatigut ullulerneqanngitsutigut ineqarneq pillugu maalaaruteqartarfimmit februar 2011-imi tiguneqartutigut naammagittaalliorputit, naammagittaalliuutinni allallutit inigisavit qimanneranut atatillugu S-imut saaffiginnissimallutit, tassanilu oqarfigineqarlutit inissiat W-imiittut qimannerini iluarsaanneqassanngitsut isaterneqangajalermata; kisianni tassa taamatut oqartoqaraluartoq illit inigisat qimanneranut atatillugu iluarsaaneqarpoq. Aamma apeqqutigaat suna pissutigalugu sallunaveeqqutitut akiliutitit utertinneqarnersut, taavalu matuma kingunerujussuatigut nutsernermut atatillugu akiligassat allagartaannik nassinneqarlutit.

Allakkatigut 3. juni 2011 ullulerneqartutigut S suliaq pillugu nassuiaateqarpoq. Allakkani taakkunani S allappoq inuup inigisannik qimatannik kingoraarlutit tigusisup attartornermut isumaqatigiissut piffissaq sivikitsuinnaq qanngiuttoq atorunnaarsikkaa, tamannalu tunngavigalugu qimatsinermut atatillugu misissuisoqarluni ullormi 12. august 2009. Taamalu illit inigisamit nunninnut atatillugu iluarsaanerit nutsernerup kingorna misissuinerup kingunerisaanik iluarsaanissami suliarineqartussanut aningaasartuutissat kukkunikkut attartortup kingulliup konto-anut nalunaarsorneqarsimasut. Tamannalu nutsernermut atatillugu aningaasartuutit isumannaarutissaattut allagartami siullermi ilinnut nassiunneqartumi akiligassanik allattuisoqarsimannginneranut pissutaavoq. Inissiamut qimatannut nuuttup tamanna S-imut januar qammat ilisimatitsissutigisimavaa, taavalu S nutsernermut atatillugu aningaasartuutit isumannaarutissaannut allagartamik nutaamik ilinnut nassitsivoq, taannalu nassiussaq tassaavoq 16. februar 2010 nassiunneqartoq allakkanik ilalerlugu. Aammattaaq S allappoq, ilinnut nassiussami kingullermi akiligassat allattorneqarsimasut ilaatigut makku: matut pingasut iluarsaanneri taarsernerilu, tamannali kukkusuusoq, tassalu eqqortoq unaasoq matu ataaseq illit akiligassarissagit. Kiisalu S allakkamini allappoq akiligassat allagartaat ilinnut nassiunneqartoq kinguleq pillugu assuarliuteqarsimanngitsutit, taamaallaalli naafferartumik akilersuinissamik isumaqatigiissuteqarsimallutit.

Inatsisitigut tunngavigisat:

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi § 45, imm. 1 malillugu Namminersornerullutik Oqartussat kommunillu inissiaataanni attartortittakkani illu utit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.

Imm. 2. Avammut kuuffinnut, kiassarnermut, innaallagissamut, gassimut imermullu teknikkikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikkiussat, matserfiit, kiassaatit, ruujorit, sikaaviit aalaakkaasut, illup iluani atortut il. il. aserfallatsaalissallugit attartortitsisup pisussaaffigaa. Nungullarsimasut pisoqalisullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit sulierineqartassallutik.

Imm. 3. Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu naqqisa lakkernissaat akisussaaffigaa taakkununngalu aningaasartuutit akilissallugit.

§ 48 malillugu attartortup attartorneqartoq isumannaatsumik paarissavaa, ajoqusikkanullu attartortup nammineq, attartortup inqutaasa allalluunniit attartortup attartorneqartumut isersimatitaasa isumannartumik pissusilersornerisigut ajoqusersimasaannut taarsiinissamut attartortoq akisussaavoq. Takusaanermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai.

Pqqussummi pineqartumi § 77 malillugu inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iigaanik qalipaaneq aamma/imaluunniit ungalitsersuineq kiisalu eqqiaaneq. Naqqi nutaamik lakkersimasutut iskkkorqassapput, taamaattorli tak. Imm. 3.

Imm. 3. Attartortup inissiamut iserternerani inissiaq nalinginnaasumik iluarsaanneqasimanngippat, attartortup inissiaq iserternermini pissuserisaatut isillugu tunniutissavaa.

§ 78 malillugu attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

§ 79 malillugu attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat. Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa.

Imm. 2. Misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaannik missingersuummik allakkatigut nalunaarfigineqassaaq.

§ 84 malillugu ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:

1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, stk. 2.

2) Aserfallatsaaliuineq iluarsaassinerlu, tak. § 45.

Naliliineq:

S-ip matup taarserneranut aningaasartuutit akilissavai.

Naliliinermi tassani matup aserornera illit tunginnit illersorneqarsinnaanngitsumik pissusilersonerup kingunerisaanik pisimanersoq S-imit uppernarsarneqannginnera ineqarneq pillugu maalaaruteqartarfiup pingaarutilittut isigaa.

Tamatumani ineqarneq pillugu maalaaruteqartarfiup pingaartippaa matup aserornerata qanoq ililluni pinngorsimanera.iluamik misissorneqarsimanmnagimmat. Inimik misissuinermit nalunaarusiami taamaallaat matup taarserneqarnissaa allassimavoq, tamatumunngalu tunngatillugu innersuussutigineqarluni inissianik attartorneq pillugu peqqussummi § 58, imm.1.

Suliami matumani ineqarneq pillugu maalaaruteqartarfik isumaqarpoq mianersuaalliorluni piaaraluneerluniluunniit iliornikkut matu aserorsimasinnaanera uppernarsarneqanngitsoq, taamaattumillu maalaaruteqartarfiup § 45, imm. 2-mi pkt. 3-mi aalajangersagaq pingaarneq malippaa, aalajangersakkami tassani pisuni taamaattuni akisussaassuseqarneq ataatsimut oqaatigineqarpoq, tassaasoq nungullarneq pisoqalinerlu.

Tamanna tunngavigalugu ineqarneq pillugu maalaaruteqartarfik naliliivoq ineqarneq pillugu maalaaruteqartarfik matup taarsernissaanut tunngatillugu aningaasartuutit kimit aningaasartuutigineqarnissaat pillugu isummernissamut pisinnaatitaasoq, tak. § 84, nr. 7, tak. § 45, imm. 2 amma imm. 3.

Tamanna isumaqarpoq § 45, imm. 2-mi aamma imm. 3-mi attartukkap iluata aserfallatsaaliorneqarnissaanut tunngatillugu akisussaaffeqarnerup agguataarneqarnera aalajangersakkami pingaarnermi oqaatigineqartoq atussasoq. Attartortitsisoq taamaalilluni tunngaviatigut – aamma suliamut matumunnga tunngatillugu - attartorneqartup matuinut tunngatillugu aamma taakku taarserneqarnissaannut attartortup attartukkamik nalinginnaasumik atuinerata kingunerinut akisussaavoq.

Ineqarneq pillugu maalaaruteqartarfik inimik qimatsinermut tunngasumik suliamut atatillugu isumaqaruni aserorsimasoq attartortup attartukkamik nalinginnaasumik atuineranut tunngatinneqarsinnaanngitsoq taava ineqarneq pillugu maalaaruteqartarfik suliamut attuumassuteqarunnaassaaq, tassani innersuussutigalugu apeqqutip pineqartup inisianik attartoneq pillugu peqqussummi § 48 malillugu paasiniarneqartussaanera, aalajangersagaq taanna malillugu ineqarneq pillugu maalaaruteqartarfik pisinnaatitaaffeqarani.

Tamanna tunngavigalugu ineqarneq pillugu maalaaruteqartarfik isumaqarpoq S matup taarserneranut akileeqqusinissaminut peqqussummi tunngavissaqanngitsoq.

Illit taamaallaat inigisavit nalinginnaasumik iluarsarnissaani aningaasartuutit ilaat illit akileeqataassutissatit akilissavatit, akiligassatillu makkununnga tunngassuteqarput: Qilaat qaqortumik qalipannerinut, iikkat qalipaanerinut ungalitsersornerinullu kiisalu eqqiaanermut. Naqqit nutaamik lakkersimassapput.

Taamaalilluni ineqarneq pillugu maalaaruteqartarfik isumaqarpoq illit inigisavit nalinginnaasumik iluarsaanneranut aningaasartuutit ilaat illit akileeqataassutissavit akilernissaannut pisussaasutit.

Taamaalilluni ineqarneq pillugu maalaaruteqartarfik isumaqarpoq S malillugu inissiap piiarneqarnissaa pissutigalugu inigisavit iluarsaanneqannginnissaanik oqarsimanerit uppernarsanngikkit.

Tamatumani ineqarneq pillugu maalaaruteqartarfiup pingaartutut isigaa inigisannik qimatsinissat sioqqullugu allakkatigut ilisimatinneqarsimasutit inigisat iluarsaaneqassasoq, aammalu suut iluarsaanneqassasut. Naak S-ip sallunaveeqqutitut akiliutitit kukkunikkut utertillugit ilinnut tunniussimagaluarai, tamanna isumaqanngilaq inigisavit nalinginnaasumik iluarsaannissaanut pisussaaffeqassanngitsutit, pissutigalugu illit nammineq nalunnginnakku inigisavit naqqi iigaalu nungullarsimasut iluarsaattariaqarlutillu.

Aalajangiineq:

Matup taarserneranut aningaasartuutit S-ip akilissavai.

Inigisavit nalinginnaasumik iluarsaanneranut aningaasartuutinit akileeqataassutissatit akilissavatit.

Naammagittaalliorsinnaanermut ilitsersuut:

Inissianik attartorneq pillugu Inatsisartut peqqussutaanni nr. 2-mi, 12. maj 2005-.imeersumi kingusinnerusukkut allannguuteqartinneqartumi § 86, imm. 7 malillugu ineqarneq pillugu maalaaruteqartarfiup aalajangiineri pisortat ingerlatsineranni oqartussaasunut allanut suliassanngorteqqinneqarsinnaanngillat. Kissaatigineqarpat attartortitsisup attartortullu akornnanni saqitassussutaasoq eqqartuussivimmut suliassanngortinneqassasoq, attartortitsisumik aggeqqusissut eqqartussivimmut tunniunneqassaaq. Tamanna aamma atuuppoq attartortitsisup allaffissornikkut ingelratseqatigiiffia allakkatigut attavigeqatiginninninermik ingerlatsisimagaluarpalluunniit.

Inissianik attartorneq pillugu peqqussummi § 86, imm. 6 malillugu ineqarneq pillugu maalaaruteqartarfiup aalajangiineri Namminersornerullutik Oqartussanit kommuninillu pinngitsooratik malinneqassapput.

Nunatta Eqqartuussiviata ilitsersuinermut immikkoortortaqarfia oqarasuaat atorlugu saaffiginninnernut ammasarpoq siamanngornerni nal. 14-imit 15.00-mut. Oqarasuaat 36 80 00.