AALIANGIUSSAQ

Maajip 5-ani 2010 nuunninnut atatillugu inissiaatileqatigiiffiup W-ip naatsorsugai pillugit maalaarutit, Ineqartut Maalaarutaannik Aalajangiisartoqatigiit decembarip 16-ani 2010 aalajangiivigaat.

AALAJANGIINEQ

Inissiaatileqatigiit nuunninnut atatillugu naatsorsugaat ilaatigut allaannguuteqarput. Taamaammat naatsorsuineq naapertorlugu akiligassavit annertussusianut tunngatillugu maalaarutit ilaatigut taperserneqarpoq.

Suliamut tunngatillugu allagaatit:

• Inimik attartornermut isumaqatigiissut juulip 1-ani 1986-imeersoq

• Inimik attartornermut isumaqatigiissutip atorunnaarsinnera septembarip 8-ni 2009-meersoq

• Inissiamit aninermi W-imit malittarisassat septembarip 17-ani 2009-meersut

• Inigisimasamik takuniaanermi nalunaarusiaq – novembarip 2-ani 2009-meersoq.

• Takuniaanermi allagaqaat qalipaatilinnik assitalik februaarip 21-ani 2010-meersoq

• Inissiamik atuisup nuunnerani naatsorsuutit maajip 5-ani 2010-meersut

• Inimik attartortup maalaarutaa juulip 9-ani 2010-meersoq

• W-ip tusarniaavigineqarnera juulip 14-ani 2010-meersoq

• W-p tusarniaavigineqarnermut akissutaa ullulerneqarsimanngitsoq.

Nassuiaat:

Inissiamik attartornermut isumaqatigiissut juulip 11-ani 1986 ullulerneqarsimasoq naapertorlugu, juulip 16-ani 1986 P attartugarilerpat. Inimik attartornermut isumaqatigiissut naapertorlugu ini isikkuatut itsillugu iserterfigaat.

Iserternerpit nalaani takuniaanermut atatillugu nalunaarusiortoqanngilaq.

Danmark-imut nuunninnut atatillugu inigisat Q-imut atukkiuppat.

Allakkanni septembarip 8-ni 2009 ullulerneqarsimasuni inissiamik attartornermut isumaqatigiissut atorunnaarsippat. Atorunnaarsitsinermi qanga inissiap qimanneqarneranut tunngasunik paasissutissaqanngilaq.

Septembarip 17-ani 2009 inissiap qimalernerani qanoq iliornissannik- ilaatigut inigisap qaqugu takuniarneqarnissaanut piffissamik isumaqatigiissuteqarnissaq pillugu- inissiamik attartortitsisup ilisimatippaatit.

Qangarpiaq Q inissiamit anisimanersoq paasineqanngilaq. Qarasaasiakkut allakkasuaatikkut illit inissiamillu attartortitsisoq attaveqatigiinnersi naapertorlugu, novembarip 17-ani 2009 inissiaq suli imaarneqarsimanngilaq.Novembarip 17-ani 2009 qarasaasiakkut allakkasuarnikkut qaammammut akiliutip akilerneragut, inissiap novembarip naanissaata tungaanut attartorsinnaaneranik attartortitsisup ilisimatippaatit.Inissiamik attartortitsisup arlaleriarluni ilinnut Q-imullu inigisamit aninissaq pillugu- kinguneqanngitsumik aattaveqartareerluni inissiamut imminut mappiuppoq. Inissiaq imaarneqarsimavoq errorsivilli peerneqarsimanani.

Februaarip 21-ani 2010 takuniaanermi nalunaarusiaq naapertorlugu igafiup sikaaviisa innaat tamarmik aappalaartumik qalipanneqarsimapput. Igaffimmi sikaaviit matuisa ilaat putoqarpoq, nerriviup qaava sikaavik alleq sikaaviillu matui marluk amigaataapput, kissarsuut iffiorfillu eqqiarsimanngillat nipitittakkanillu sumi tamaani nippussuisoqarsimalluni.

Sinittarfimmi sikaaviup innaa iikkallu aappalaartumik qalipassimapput. Inimi nateq nungullarsimavoq. Natermi arlalinnik itisuunik kigarneqarpoq inimullu matu putusimalluni. Uffarfiup igai tunguusamik qaamasumik taartumillu qalipassimapput. Inissiaq eqqiarneqarsimanngilaq.

Suliamut tunngatillugu allagaatini qanga takuniaanermi nalunaarusiap ilinnut nassiunneqarsimanera allassimanngilaq.

W-ip maajip 5-ni 2005 inigisannit anininnut atatillugu naatsorsuutit ilinnut nassiuppai tamatumalu kingunerisaanik 23.450,34 koruunit akiligassarilerpatit. Taakkunannga ineqarnermut akiitsoq imermut kiassarnermullu akiliut ilanngunnagu 5.489,19 koruuniuvoq, inissiamillu aserfallatitsisimanermut akiitsut tassaalerput 17.961,15 koruunit.

W-ip paasissutissiissutai naapertorlugit nalinginnaasumik iluarsaanermut 11.850,80 koruunit atorneqarput. Ineqarneq pillugu peqqussummi § 78 tamatumunnga tunngaviusutut inissiaatileqatigiit innersuussutigaat.

Inissiaatileqatigiit juunip 24-ani 2010 ullulikkanik W allakkatigut akiitsutit akileqquaat, ullullu 14-it qaangiutsinnagit akiliisimanngikkuit akiliisitsiniaasarfimmut akiligassavit tunniunneqarnissaannik ilisimatillutit.

Qarasaasiakkut allakkasuaat atorlugu maajip 5-ani 11-anilu 2010 nalunaarusiamut akerliunerit ilisimatitsissutigaat.

W inissiaatileqatigiit qarasaasiakkut allakkannik tigusaqarsimannginnerarput.

Maajip 11-ani qarasaasiakkut Ineqartut Maalaarutaannik Aalajangiisartoqaatigiinnut allakkasuaatinni makku akerliuffigalugit nalunaarputit: 1) Inissiaq atukkiunneqarsimammat atortup eqqiaaneq akiligassarisariaqaraa. 2) Inissiaq nutserfigineqarnermini iluarsarneqanngimmat. 3) 2005/2006-imi majuartarfeqarfimmi ikuallattoqarnerata kingorna iluamik eqqiaasoqarsimanngimmat. 4) Ineqarfik/blokki aserfallassimammat aserfallatsaalisaasimanngimmallu.

Juulip 9-ani 2010 allakkanni nuunninnut atatillugu akiligassaq naammagittaalliutigaat. Akiligassap isumaqatigiissutiginissaanut noqqaassutit soqutiginagu nukingisaaraluni akileeqqusissumik nassinneqarnerit-, majuartarfeqarfimmi ikuallattoqarnerata kinguneranik ISS-ip taamungaannaq eqqiagaata ilinnut akiligassanngortinneqarnera - W-illu inip 1986-mi nutserfiginerani iluarsarneqannginneranik eqqaasaqannginnera naammagittaalliutigaatit. Inissiap eqqiarneqarnera akiligassaralugu paasigit, illillu nammineq attartortulluunniit takuniaanermi nalunaarusiaq atsiorsimanngikkissi ilisimatitsissutigaat.

1986-imi inissianut iserternermi nalunaarusiornissaq piumasaqaataanngitsoq, juulip 14-ani 2010 Ineqartut Maalaarutaannik Aalajangiisartoqatigiit tusarniaaneranni W akissummini ilaatigut ilisimatitsissutigaa. Inatsit naapertorlugu inissiaq nutserfigineqarnermini aserfallatsaalisaallunilu isumannaatsuussaaq.

Maajip 1-ani 2010 naammagitaalliortumit qarasaasiakkut allakkanik tigusaqarsimanani W-ip ilisimatitsissutigaa, naammagittaalliortorlu qarasaasiakkut allakkat assinginik Ineqartut Maalaarutaannik Aalajangiisartoqatigiinnut tunniussinani, allakkatigut saaffiginnissutaasimagunartup assinganik tunniussisimasoq, ilanngullugulu oqaatigalugu.

Inatsisit tungavigineqartut:

Inatsisartut inissianik attartortitsisarneq pillugu Peqqussutaat nr. 2 maajip 12-ani 2005-imeersoq § 88 naapertorlugu januaarip 1-at 1990 sioqqullugu inissiamik attartornermut atatillugu isumaqatigiissutini § 45, imm. 3 kiisalu §§ 77, 78 80-ilu, imm. 1 aamma 2 atuutinngillat.

§88- ip nassuiaatitaa naapertorlugu piffissani assigiinngitsuni immikkut pisinnaatsitaaffiit isumaqatigiissutaasimasut ajornerulersinnagit, inissianik attartornerup assigiimmik maleruagassiuunneqarnissaa peqqussummi qulakkeerniarneqarpoq.

Inissiamik attatornissamut isumaqatigiissutit januaarip 1-ani 1990 peqqussutip siulliup atuutilerfia sioqqullugu isumaqatigiissutaasuni aalajangersagaq naapertorlugu, attartortut ineqarnerup nalaani inigisap iluanik aserfallatsaaliinissaq anilernermilu iluarsarnissaa akisussaaffiginngilaat.

§ 79 imm. 2 naapertorlugu attartortitsisup takuniaanermini amigaataasut aserfallatsinneqarsimasullu attartortup akisussaaffiisut nalilikkatik nalunaarusiussavai.

Aalajangersakkat ataani ilanngunneqarput.

Naliliineq:

Inissiamik attartornermi isumaqatigiissut naapertorlugu 1986-imili juuli qaammat inissiami najugaqarputit. Taamaasillutit ikaarsaarnermi aalajangersakkani § 88 naapertorlugu ineqarnerpit nalaani inigisappit iluata iluarsarnissaa nuunnermilu iluarsarnera akisussaaffiginngilatit.

W-ip inigisap nalinginnaasumik iluarsartinnera akilersimagaa, peqqussummili § 78 kukkusumik innersuussutigisimagaa ilisimatitsissutigineqarpoq.

Takuniaanermi nalunaarusiami takuneqarsinnaasutut (qulaani allaaserisaq takuuk), nalinginnaasumik iluarsaanerup saniatigut- ilaatigut sikaaviit matui taarserlugit nerrivillu qallerlugu- iluarsaasoqartariaqarpoq.

Inissiap qimannerani suut amigaataasut assitigut uppernarsarneqarput.

Nalunaarummissaaq allassimasutut ilaatigut qalipaat aappalaartoq tunguusarlu atorlugit qalipaasoqartarsimavoq.

Takuniaanermut atatillugu nalunaarusiami sikaaviit matui nerriviullu qaava amigaataasutut taaneqarsimasut assilineqarlutillu uppernarsarneqartut, Ineqartut Maalaarutaannik Aalajangiisartoqatigiit naliliinerat naapertorlugu, illit Q-illuunniit inissiamik aserfallatitsisimanerannik patsiseqarput.

Taamaammat iluarsaanermi aningaasartuutit ilaat- igaffimmi sikaaviit matuisa nerriviullu qaavata taarserneqarnerat akiligassaraat. Taakku saniatigut inissiap- kissarsuut assigisaallu ilanngullugit- eqqiarneqarnera amma akilissavat.

Ineqartut Maalaarutaannik Aalajangiisartoqatigiit naliliinerat naapertorlugu, W qalipaatit aappalaartup tunguusallu piiarnissaat tamatumunngalu atatillugu ilaatigut iikkami putunik iluarsaanissat, W-ip akiligassarai. Inissiaatileqatigiittaaq nalinginnaasumik iluarsaanermut aningaasartuutit isumagissavai.

Inissiamik attartortuunerpit nalaani W-ip inigisamik iluarsaasimaneranut uppernarsaatissaqanngimmat, attartornermilu isumaqatigiissummi imal. inissiaatileqatigiit maleruagassiaanni, attartortup qalipaatit allat atorlugit inip iluanik qalipaasinnaatitaannginneranik allassimasoqannginnera, naliliinermi tunngavigineqarpoq.

Tamatumunnga atatillugu ”piumasaqaatit nalinginnaasut” inissiamik attartornermi isumaqatigiissummi innersuunneqartut piginagit W-ip oqarasuaatikkut nalunaarnera maluginiarneqarpoq. Taamaammat taakku suliamut tunngatillugu naliliiniarnermi tunngaviusinnaanngillat.

W-ip inigisap qimanneqarnerani aningaasartuutissanik naatsorsuinermini, illit attartortuilluunniit inissiap takuniarneqarnerani takkutinnginnersi, Peqqussummi §88 aamma §80 imm. 1 naapertorlugit takuniaanermi nalunaarutip tunngavigineqarsinnaaneratut paasineqarsinnaannginnera, Ineqartut Maalaarutaannik Aalajangiisartoqatigiit oqaatigissavaattaaq.

Aalajangiisartoqatigiinni ilaasortaasut ilaat pingasut aalajangiinermut isumaqataallutik taasipput, ataaseq taaseqataanngilaq.

W inissiaatileqatigiit aalajangiineq una tunngavigalugu inigisannit anininnut atatillugu akiligassatit naatsorsoqqissavaat.

Naammagittaalliorsinnaaneq:

Inissianik attartortitsisarneq pillugu Inatsisartut Peqqussutaanni nr. 2-mi maajip 12-ani 2005-imeersumi kingorna allannguuteqartumi § 86 imm. 7 naapertorlugu Ineqartut Maalaarutaannik Aalajangiisartoqatigiit aalajangigaat pisortaqarfinnut allanut suliakkiissutigeqqinneqarsinnaanngillat. Attartortitsisup attartortullu akornanni aaqqiaanngissutip eqqartuusivikkut suliassanngortinnissaa kissaataappat, allakkatigut attaveqatigiinneq il.il. attartortitsisup ingerlatseqatigiiffianit isumagineqarsimagaluarpalluunniit, attartortitsisumik eqqartuussivimmut tunniussineq nunap immikkoortuani eqqartuussivimmut ingerlatinneqassaaq.

Ineqartut Maalaarutaannik Aalajangiisartoqatigiit aalajangigaat kommuninit Namminersorlutillu Oqartussanit inissianik attartortitsisuusunut § 86 imm. 6 naapertorlugu allanngortinneqarsinnaanngilaq.

Kalaallit Nunaata eqqartuussiviata siunnersuinermut immikkoortortaqarfia oqarasuaat 368000 aqqutigalugu sisamanngornerni nal. 14-miit 15-imut attavigineqarsinnaavoq.