AALAJANGIINEQ

Suliap saqqummiunneqarnera: Allakkatigut 2. januar 2007 ullulerneqartutigut attartortup attartortitsisup qaammammut november2005 tunngatillugu akiliuteqaqqusissutaa ineqarneq pillugu Naammagittaalliuuteqartarfimmut tunniuppaa. Attartortoq isumaqarpoq attartortitsisoq piumasarisinnaanngisaminik piumasaqartoq, aammalu attartortup naammagittaalliuutigaa attartortup inimik qimatsinerup kingorna nalinginnaasumik iluarsaassinermut atatillugu qalipaanermik suliaqarnermut akiligassiissutit aningaasartaasa amerlassusii ingasagai. Attartortoq isumaqarpoq nammineq sioqulluni inimik attartortup antennemik ikkussuiffigisimasaata inikua qalipanneqanngitsoq pissutigalugu igaffimmi iikkanik qilaamillu nammineq qalipaanissaminut pisussaanani.

Ineqarneq pillugu Naammagittaalliuuteqartarfiup ineqarnermut akiligassaq november 2005-imut tunngasoq pillugu naammagittaalliuut Ineqarnermut Attaveqarnermullu Pisortaqarfimmut inger-lateqqippaa, Ineqarneq pillugu Naammagittaalliuuteqartarfik tamakkuninnga suliaqarnissamut pisinnaatitaanngimmat.

Attartortup attartornisaamut isumaqatigiissut atsiorpaa 13. maj 2005, allakkatigullu 29. september 2005 ullulerneqartutigut attartornermut isumaqatigiissut atorunnaarsillugu, taannalu allagaq Inissiaatileqatigiiffimmit INI-mit ulloq 5. oktober 2005 tiguneqarpoq. Inimik attartornerup aallartinnerani iserternermut nalunaarusiortoqarpoq attartortumit attartortitsisumillu 17. maj 2005 atsior-neqarpoq.

Iserternermut atatillugu nalunaarusiami atuarneqarsinnaavoq attartornerup aallartinnerani igaffimmi iikkat nutaamik qalipanneqarsimanngitsut. Attartornerup atorunnaarsinnerani inimit aninermut atatillugu takusaasoqarpoq ulloq 31. Oktober 2005. Ullormi tassani takusaanermut atatillugu nalunaarusiami atuarneqarsinnaavoq iikkat, gangimi ilorlermi qilaat,igaffik inilu qalipanneqarsimanngitsut. Ulloq 9. januar 2007 attartortup naammagittaalliuutaa attartortitsisumut saqqummiunneqarpoq oqaaseqarfigisassanngorlugu.

Allakkatigut 10. januar 2007 ullulerneqartutigut, taakkununnga ilaatigut tapiliuuneqarlutik iserternermi nalunaarusiaq kiisalu inip qalipanneqarnissaanut atatillugu neqeroorutip assinga, attartortitsisup naammagittaalliuummut tunniunneqartumut oqaaseqaatini saqqummiuppai. Attartortitsisup aalajangiusimavaa inip qalipanneranut atatillugu akiligassat 1.680,00 koruuniusut eqqortuusut, aammalu inip qimanneranut atatillugu naatsorsukkat eqqortuusut. Attartortitsisut pingaartutut oqaatigaat qalipaasup igaffiup qalipannera taama annikitsigisoq akilertariaqanngitsutut isigimmagu.

Attartortup ulloq 13. februar 2007 attartortitsisup allakkatigut akissutaa 10. januar 2007 ulloqartoq oqaaseqarfigisassatut tiguaa. Allakkatigut 21. februar 2007 ullulerneqartutigut attartortitsisoq oqaaseqaammut ilassuteqarpoq, tassunga ilaatigut tapiliullugit inip qimanneranut atatillugu akiligassat allagartaat attartornermut tunngasoq 11. september 2006 ulloqartoq.

Attartortoq oqaaseqarfigisassaanik ulloq 26. februar 2007 attartortitsisup oqaaseqaammut ilassutaanik saqqummiussivineqarpoq. Attartortoq 17. marts 2007 akissuteqarpoq suliamullu tunngasunik allanik oqaaseqaateqarani.

Ineqarneq pillugu Naammagittaalliuuteqartarfiup suliassamik suliaqarnini naammassivaa 21. marts 2007.

Aalajangiineq:

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi § 84, imm. 1, nr. 7 malillugu Ineqarneq pillugu Naammagittaalliuuteqartarfik isumaqarpoq suliami attartortup inimik qimatsinerani nalinginnaasumik inip iluarsarneranut atatillugu qalipaanermik suliaqarnermut tunngatillugu akiligassap aningaasartaasa amerlassusiligaanerannut aalajangiisinnaassuseqarluni.

Ineqarneq pillugu Naammagittaalliuuteqartarfiup suliaq misissorpaa ilaasortallu tamarmik isumaqatigiillutik aalajangerpaat attartortitsisup attartortumut akilissagai 280 koruunit nalilersuinikkut amerlassusilerneqartut, taakkulu naleqarput qalipaanermi aningaasartuutit arfinilerarterutaannik ataatsimik. Aningaasat akilerneqassapput aalajangiinerup matuma illuatungeriinnut nalunaarutigineqareerneranit kingusinnerpaamik ullut 14 qaangiutsinnagit.

Tunngavigineqartoq:

Inigisamit nuunnermut atatillugu nalunaarusiami 17. maj 2005 ullulerneqartumi atuarneqarsinnaavoq attartornerup aallartinnerani igaffimmi iikkat nutaamik qalipanneqarsimanngitsut. Inissianik attartorneq pillugu peqqussummi § 47, imm. 1, pkt. 2 malillugu iikkat, qilaat natillu inip nuuffigineqarnerani nalinginnaasumik iluarsaanneqarsimassapput. Tamanna peqqussummi § 77 malillugu ilaatigut isumaqarpoq , iikkat natillu nutaamik qalipanneqarsimassasut.

Inimut iserternermut atatillugu nalunaarusiami erseqqissumik allassimanngilaq igaffimmi qilaaq attartornerup aallartinnerani nutaamik qalipanneqarsimanersoq.

Inissianik attartorneq pillugu peqqussummi § 77, imm. 3 malillugu attartortup ini attartukkani iserternermi pissusiatut itillugu utertissavaa, ini iserternermi nalinginnaasumik iluarsaanneqarsimanngippat.

Iserternermi igaffimmi iigaq nutaamik qalipanneqarsimanngimmat, taava attartortup inimik attartorunnaarnerminut atatillugu nalinginnaasumik iluarsaanerup ilaa taanna akilissanngilaa.

Inimik ulloq 31. oktober 2005 misissuinermut atatillugu nalunaarusiami atuarneqarsinnaavoq inimi assigiinngitsuni arfinilinni qalipaasoqartussaasoq, taakkunanngalu ataaseq tassaasoq igaffimmi iikkat.

Attartortitsisup Ineqarneq pillugu Naammagittaalliuuteqartarfimmut oqaatigaa igaffiup iigaanik qalipaanissaq qalipaalluni suliaqarnermut atatillugu akiligassanut allagartaliornermi ilanngunneqanngitsoq. Attartortitsisorli tamanna pillugu uppernarsaammik saqqummiussaqanngilaq.

Aningaasat attartortumut utertillugit akilerneqartussat amerlasusissaat naatsorsorneqarpoq nalinginnaasumik iluarsaanermi aningaasartuutit 1.680,00 koruuniusut arfilerarterutaattut ataatsitut (1.680 kr. : 6 = 280 kr.)