AALIANGIUSSAQ

Suliap saqqummiunneqarnera:

Attartortoq allakkatigut 25. januar 2007-imeersutigut attartortup attartukkaminit nuunneranut atatillugu nalinginnaasumik iluarsaassinermut aningaasartuutit amerlassusaat pillugit Ineqarneq pillugu Maalaaruteqartarfimmut maalaarummik saqqummiussivoq. Attartortup 27. februar 2007-imi maalaarutip suliarineqarnissaanut 150 koruunit akilersimavai.

Attartortup attartornini 15. august 2004-mi aallartippaa, attartukkanilu 1. december 2006-imi qimattussanngorlugu taamaatillugu.

Attartortup maalaarummini misissuinermut nalunaarusiaq, attartortup attartukkaminit nuunneranut atatillugu 24. oktober 2006-imi attartortumit aamma attartortitsisup sinniisaanit atsiorneqartoq, tamatumalu kingorna attartortitsisumit allaanngortinneqarsimasoq ilisimatitsissutigaa uppernarsarlugulu. Attartortup naqqup moreerneqarnissaa inissiallu ataasiartamik qalipanneqarnissaa akilissagaa, misissuinermut nalunaarusiami 24. oktober 2006-imeersumi allassimavoq. Torsuusaq silarleq inilu qalipanneqassapput. Allannguinermi attartortitsisup misissuinermi nalunaarusiami suliassat ilassuteqarfigisimavai, taamaalillunilu attartortup naqqup moreerneqarnissaa inissiallu marloriarluni qalipanneqarnissaa attartortup akilertussanngorlugit. Torsuusaq, uffarfik, ini, ineeraq 1 aamma ineeraq 3 qalipanneqartussanngorput. Taakku saniatigut matut marluk qalipanneqartussaapput (inimut matu aamma perusuersartarfimmut matu).

Attartortup misissuinermi nalunaarusiap allaqqaarnerata assilinera kiisalu misissuinermut nalunaarusiap allanngortinneqarsimasup, attartortitsisup nalinginnaasumik iluarsaassinermut attartortumut akiligassiissutaanut tunngaviliisup assilinera nassiuppai.

Attartortup maalaarutaa 1. marts 2007-imi attartortitsisumut oqaaseqarfigisassanngorlugu saqqummiunneqarpoq, aammalu 28. marts 2007-imi akissuteqarnissamut nukingisaarisoqarluni. Ineqarneq pillugu Maalaaruteqartarfiup nukingisaarummini erseqqissaatigaa, 19. april 2007 nallertinnagu attartortitsisoq akissuteqanngippat, tunngavissatut pigineqartut tunngavigalugit aalajangiisoqarumaartoq. 19. april 2007 nallertinnagu attartortitsisoq Ineqarneq pillugu Maalaaruteqartarfiup saaffiginnissutaanut qisuariaateqanngilaq. 2. maj 2007-imi attartortitsisoq akissuteqarpoq, tassanilu oqaatigaa attartortitsisup misissuinermi nalunaarusiaq atsioriigaq allanngortissimagaa. Attartortup nalinginnaasumik iluarsaassinermut aningaasartuutissaasa annikillisarneqarnissaat eqqarsaatigalugu allannguisoqarsimasoq attartortitsisup oqaatigaa. Ineqarneq pillugu Maalaaruteqartarfiup suliamik suliaqarnini 19. oktober 2007-imi naammassivaa.

AALAJANGIINEQ

Inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi, kingusinnerusukkut allannguuteqartinneqartumi (attartortitsinermut peqqussut) § 84, imm. 1, nr. 7 naapertorlugu suliami aalajangiinissamut piginnaatitaaffeqarluni Ineqarneq pillugu Maalaaruteqartarfik isummerpoq.

Ineqarneq pillugu Maalaaruteqartarfiup suliaq misissorpaa, ilaasortallu isumaqatigiillutik aalajangerput, attartortitsisoq taamaallaat suliassanut, misissuinermi nalunaarusiaq, 24. oktober 2006-imi attartortumit attartortitsisumillu atsiorneqarsimasoq naapertorlugu attartortup akiligaanik suliarineqartussanut akiliisitsisinnaasoq. Taamaattumik attartortitsisup 1.070 koruunit attartortumut utertissavai, tassalu qularnaveeqqusiissutigineqartumit inissiap ataasiartamik qalipanneqarnissaanik naqqullu suliarineqarnissaanik ilanngarlugu annertussuseqartumik. Aningaasat aalajangiinerup matuma illuatungeriinnut nalunaarutigineqarneraniit kingusinnerpaamik ullut 14-it qaangiunnerini akilerneqassapput. Aningaasanit qularnaveeqqusiissutit tunniunneqareersimasinnaasut ilanngaatigineqassapput.

Tunngavilersuut:

Attartortitsinermut peqqussummi § 47, imm. 2 naapertorlugu attartortup iserterneranut atatillugu nalunaarusiornissaq attartortitsisup pisussaaffigaa, aammalu attartortitsinermut peqqussummi § 79, imm. 2 naapertorlugu attartortup attartukkaminit nuunneranut atatillugu misissuinermut nalunaarusiornissaq attartortitsisup pisussaaffigaa.

Attartortitsinermut peqqussummi § 77, imm. 3 naapertorlugu attartugaq iserterfigineqarnermini nalinginnaasumik iluarsaanneqarsimanngippat, attartortup attartukkani iserterfigineratut itsillugu qimassavaa. Attartortup attartukkamini nalinginnaasumik suliassat, misissuinermut nalunaarusiami 24. oktober 2006-imi attartortumit attartortitsisumillu atsiorneqarsimasumi attartortup akiligassaatut isumaqatigiissutigineqarsimasut attartortumit attartortitsisumillu aaqqiagiinngissutigineqannginnerat, Ineqarneq pillugu Maalaaruteqartarfiup aalajangiinermini tunngavigaa. Tamanna tunngavigalugu misissuinermut nalunaarusiaq 24. oktober 2006-imeersoq, attartortitsisup attartortumut nalinginnaasumik iluarsaassinermut akilersissinnaasaanut tunngavigineqarpoq.

Attartortup misissuinermut nalunaarusiamut atsioreernerata kingorna attartortitsisoq allannguisimavoq. Taamaattumik misissuinermut nalunaarusiaq allanngortitaq, nalinginnaasumik iluarsaassinermut akiligassanut uppernarsaatitut attartortumut nassiunneqartoq atortussaatinneqanngilaq.

Tamatumunnga ilassutitut ataatsimiititaliamit oqaatigineqassaaq, uppernarsaat attartortumit attartortitsisullu sinniisuanit atsiorneqarsimasoq allanngortinneqarsimammat, tamanna annertuumik isornartoqartinneqartoq.