AALIANGIUSSAQ

Suliap saqqummiunnera:

Allakkatigut august 2007-imeersutigut Ineqarneq pillugu Maalaaruteqartarfimmit tiguneqartutigut attartortup attartukkamit anisernerminut atatillugu nalinginnaasumik iluarsaassinermi aningaasartuutit pillugit kiisalu isertinngitsiarnermi attartortitsisup attartukkamut isersimanera pillugu attartortoq naammagittaalliuuteqarpoq. Iserternermi amigaatit pillugit allattukkat takuniaanermullu nalunaarusiap attartortup aniserneranut atatillugu suliarineqarsimasut assilineqarnerneri attartortup naammagittaalliuumminut ilanngullugit nassiussimavai.

Isertinnginnermi attartortitsisup attartukkamut isersimanera pillugu attartortup naammagittaalliuutaa suliarissallgu Ineqarneq pillugu Maalaaruteqartarfiup itigartitsissutigaa, attartortitsisup attartukkamut isersinnaanera pillugu naammagittaalliuutip suliarinissaanut Ineqarneq pillugu Maalaaruteqartarfik pisinnaatitaanngimmat.

Attartortup attartorneq april 2007-imi aallartippaa attartornerlu atorunnaarsillugu juli 2007-imi aniserfigineqartussanngorlugu.

Attartortup naammagittaalliuutaa oqaaseqaateqarfigisassanngorlugu september 2007-imi attartortitsisumut saqqummiunneqarpoq taassumalu akineqarnissaa oktober 2007-imi allakkatigut eqqaassitsissutigineqarluni. Ineqarneq pillugu Maalaaruteqartarfiup allagaqaqqaammini attartortitsisumut erseqqissaatigaa ineqarnermut attartortup mappiani uppernarsaatit tamatumunnga tunngasut attartortitsisup nassiutissagai, pingaartumik iserternermut nalunaarusiap iserternermilu attartukkap qanoq issusianut uppernarsaatit assilineri ilanngullugit eqqarsaatigalugit. Attartortitsisoq oktober 2007-imi akissuteqarpoq nalinginnaasumillu iluarsaassinermut attartortumut akileqqusat eqqortuusut aalajangiusimanerarlugu. Iserternermut nalunaarusiap assilinera attartortitsisup nassiutinngilaa aamma amigaatit pillugit allattukkat attartortup allattorsimasaanut tunngasunik attartortitsisoq ilisimasaqannginnerarpoq. Attartortitsisup oqaaseqaammini taavaa amigaatit pillugit allattukkani immikkoortut taagorneqartut attartukkap iserterfigineranut atatillugu attartukkap pequtilersorneranut attuumassuteqartut.

Attartortitsisup oqaatigaa ineeqqap aappaani natip lakkernissaanik piumasaqaat attartortitsisup taamaatsinniaraa, attartukkap iserterfiginnginnerani nateq kigartornernik peqarmat. Tamanna erserpoq siusinnerusukkut najugaqartumit aniserneq pillugu nalunaarusiami.

Attartortitsisup akissutaa oqaaseqaateqarfigeqqullugu oktober 2007-imi attartortumut saqqummiunneqarpoq taassumalu akineqarnissaa november 2007-imi allakkatigut eqqaassitsissutigineqarluni. Suliaq pillugu oqaaseqaammik attartortoq november 2007-imi tunniussivoq attartortullu naammagittaalliuunni aalajangiusimavaa. Attartortup oqaatigaa peqqusineq malillugu iserternermit ullut 14-it qaangiutsinnagit killiliussap iluani amigaatit pillugit allattukkat attartortup tunniussimagai.

AALAJANGIINEQ

Inissianik attartorneq pillugu Inatsisartut peqqussutaanni nr. 2-mi 12. maj 2005-imeersumi § 84, imm. 1, nr. 7 kingusinnerusukut allannguutitalik tunngavigalugu Ineqarneq pillugu Maalaaruteqartarfik isumaqarpoq suliami aalajangiinissamut pisinnaatitaalluni.

Ineqarneq pillugu Maalaaruteqartarfiup suliaq misissorpaa aalajangiullugulu inissiami attartukkami tamarmi iikkat qilaallu qalipannerat natillu lakkernerat ineeqqap iserternermi natia kigartornilittut taaneqartoq ilanngunnagu nalinginnaasumik iluarsiaassinermi aningaasartuutit attartortitsisup akileqqusinnaagai.

Taamaalilluni ineeqqami natip suliarineranut aningaasartuutit attartortitsisup attartumut utertillugit akilissavai. Aalajangiinerup uumap illua’tungeriinnut nalunaarutigineranit kingusinnerpaamik ullut 14-it qaangiunneranni aningaasat akilerneqassapput.

Tunngavilersuut:

Attartorneq pillugu peqqussummi § 47, imm. 2 naapertorlugu attartortup iserterneranut atatillugu iserternermut nalunaarusiornissaq attartortitsisup pisussaaffigaa. Attartorneq pillugu peqqussummi § 79, imm. 2 tunngavigalugu attartortup attartukkamit aniserneranut atatillugu takuniaanermi nalunaarusiornissaq attartortitsisup pisussaaffigaa. Attartortup iserterneranut atatillugu iserterneq pillugu nalunaarusiortoqarsimanersoq suliami ersertoqanngilaq. Iserternermut nalunaarusiunngitsoorsimaneq kinguneqartitsiffiunngilaq, pisulli tunngavigalugit tamanna uppernarsaatit eqqarsaatigalugit attartortitsisumut ajoqusiisinnaavoq assersuutigalugu anisernermi pisut eqqarsaatigalugit.

Attartorneq pillugu peqqussummi § 77, imm. 3 tunngavigalugu attartortup attatugaq tiguneratulli itsillugu tunniuttussaavaa.

Ineqarneq pillugu Maalaaruteqartarfiup tunngavigaa attartugaq iserterfigineqarnermini nalinginnaasumik iluarsaanneqarsimammat, naak iserterneq pillugu nalunaarusiortoqarsimanngikkaluartoq. Tamatumunnga pissutaavoq attartortitsisup uppernarsarsinnaammagu attartugaq siusinnerusukkut attartortup anisernerani nalinginnaasumik iluarsaanneqarsimasoq kiisalu amigaatit pillugit allattukkani attartortup allattugai iserternermi pequtinut inissiap pequtilersorneranut atasunut tunngassuteqarmata, iserternermi nalinginnaasumik iluarsaassisoqarsimannginneranut tunngasuunani.

Inissiap pequtilersoriikkap qullilersornissaanut qilaat iikkallu qilleriffigineqartariaqarnerat attartortup ilisimasimannginneraa uani apeqqutaanngilaq. Attartukkap nalinginnaasumik iluarsaaneranut aningaasartuutit akilernissaat attartortup suli pisussaaffigaa.

Taamaattorli inissiami natit tamarmik lakkerneqarnerisa akilernissaat attartortitsisup piumasarisinnaanngilaa, attartortup amigaatit pillugit allatukkamini ilanngussimammagu iserternermi nateq kigarnernik peqarsimasoq. Tamatumunnga peqatigitillugu attartortitsisup oqaaseqaammini akuerisimavaa amigaatit pillugit attartortup allattugai tunngavigalugit ineeqqap aappaani natip lakkerneqarnissaa piumasaqaatigineqassanngitsoq. Taamaalilluni ineeqqami nateq nalinginnaasumik iluarsaanneqarsimanngitsutut isikkoqarpoq.

Naammagittaalliornissamut ilitsersuut:

Ineqarnermut Naammagittaalliuuteqartarfiup aalajangigai ingerlatsinermi oqartussaasunut allanut naammagittaalliiuutigineqarsinnaanngillat, tak. inissianik attartortitsineq pillugu Inatsisartut peqqussutaanni nr. 2, 12. Maj 2005-imeersumi § 86, imm. 7 kingusinnerusukkut allanguutitalik. Attartortup attartortitsisullu akornanni saqitsaassutit eqqartuussivimmut suliassanngortinnissaat kissaatigineqarpat attartortoq pillugu unnerluussut Kalaallit Nunaanni Eqqartuussivimmut suliassanngortinneqassaaq. Tamanna atuutissaaq, allaffigeqatigiittarneq il.il. aktiaatileqatigiiffimmit attartortup aqutsisoqarfigisaanilluunniit ingerlanneqartaraluarpalluunniit.

Ineqarnermut Naammagittaalliuuteqartarfiup aalajangigai Namminersorlutik Oqartussanut kommuninullu inissianik attartortitsisusutut inissisimasunut pituttorneqaataasumik sunniuteqassapput. Namminersorlutik Oqartussat kommunillu aqutsisumik avataaneersumik suliaqartitsippata taamatuttaaq naammagittaalliuuteqartarfiup aalajangiineri taakkununnga pituttorneqaataassapput, tak. § 86, imm. 6. Kalallit Nunaanni Eqqartuussiviup inatsisitigut ikiorsiisarfia oqarasuaatikkut saaffiginnissutinut ammasarpoq sisamanngornikkut nal. 14-15 oqarasuaat 36 38 00 atorlugu.