2011-049006

Ineqarnermut tapiissutisiavit 2.295 koruuninut naatsorsorneqarsimanerat pillugu Kommune-p ulloq 18. juli 2011 aalajangiinera naammagittaalliuutigisat Isumaginninnermi Naammagittaalliuuteqartarfiup siulittaasuata 12. december 2011 suliaraa imatullu aalajangiilluni

Aalajangiineq

Ineqarnermut tapiissutisiatit pillugit Kommune-p naatsorsuinera allanngortinneqarpoq, imaalillugu illit qaammammut 2.805 koruunit pissarsiarisalissallugit. Tamanna isumaqarpoq illit naammagittaalliuutinni taperserneqartutit.

Suliaq aalajangiivigineqassaaq  inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq kingusinnerusukkut allannguuteqartinneqartoq naapertorlugu

 

Nassuiaat:

Ulloq 18. juli 2011 illit ukiumut 2011-mut tunngatillugu ineqarnermut tapiissutisiassatit pillugit Kommune-p aalajangiivoq. Inoqutigiit isertitassamissut naatsorsuutigisaat 126.252 koruuniusut aammalu ineqarnermut akiliutit 5.100 koruuniusut tunngavigalugit kommunip ineqarnermut tapiissutisiassatit qammammut tunniunneqartartussat amerlassusilerpai 2.295,00 koruuninut.

Naammagittaalliuutinni allapputit timelæreriullutit nal. akunnermusiaqarlutillu. Aamma oqaatigaat ullut 14-kkaarlugit akissarsiavit allagartaat arfinillit tunniuttussaallugit, imaluunniit qaammatini pingasuni akissarsiavit allagartaat. Kommunip soqutiginngilaa akissarsiat allagartaat tulleriiaanngikkarluarpata. Aamma oqaatigaat qaammat januar akissarsisimanak, taamaammat qaammammi tassani akissarsiat allagartaannik tunniussassaqarnak, kisianni tamanna apeqqutaanngitsoq, ajunngimmat akissarsiat allagartaat arfinillit tunniukkukkit.

Aamma allapputit nalliuttuni akissarsiassaqassanak, aamma atuartut atuanngiffeqarneranni soorlu aasaanerani. Kiisalu oqaatigaat ukiumi 2010-mi isertitatit akileraaruteqaataasussat 62.875 koruuniusut aammalu isertitatit B-t 26.400 koruuniusut. Tamakkua saniatigut oqaatigaat  ukioq kingulleq tassalu 2010-mi inerqarnermut tapiissutit qaffasinnerpaat pissarsiarisimallugit.

Inatsisitigut tunngavigisat:

Inissiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. maj 2001-imeersumi § 5, imm. 2 tunngavigalugu, ukiumi matumani ineqarnermut tapiissutisiassat naatsorsornqarnerisa kingorna annertuumik allannguuteqartoqarnerani, ukiumi matumani akileraaruteqaataasussanik iseritassatut naatsorsuutigineqartut tunngavigalugit ineqarnermut tapiissutit naatsorsorneqassapput.

Naliliineq:

Isumaginninnermi Naammagittaalliuuteqartarfiup siulittaasua naliliivoq Kommune-p ineqarnermut tapiissutinik naatsorsuinera kukkusuusoq.

Akissarsiat allagartaanni suliamut ilanngunneqartuni takuneqarsinnaavoq piffissami sapaatip akunnerinik 12-inik sivisussuseqartumi 36.330 koruuninik isertitaqarsimasutit. Imaappoq sapaatip akunneranut 3.027 koruunit isertittarlugit. Naammagittaalliuutinni allapputit qaammammi januarimi isertitaqarsimanak, taamatullu nalliuttuni atuartullu asaanerani atuanngiffeqarneranni. Akissarsiannit sulinngiffeqarnersiutissaqanngilatit, pissutigalugu massakkut sulisorineqarnerit sioqqullugu ilinniagaqartuusimagavit.

Isumaginninnermi Naammagittaalliuuteqartarfiup siulittaasua naliliivoq ukiumi ilivitsumi sapaatip akunneri 41-t akissarsiaqartussaassasutit. Imaappoq ukiumut katillugit 124.127 koruunit isertitarissallugit. Inummut ilanngaat ilanngaatigalugu akileraaruteqaataasussanik isertitaqassallutit 114.127 koruuninik.

Taamaalillutit qaammammut 2.805 koruuninik ineqarnermut tapiissutisinissamut pisinnaatitaassallutit.

Isumaginninnermi Naammagittaalliuuteqartarfiup siulittaasuata uparuassavaa aningaasaqarnerpit annertuumik allannguuteqarnerani kommunimut ilisimatitsinissannut pisussaatitaagavit.

Aalajangiineq:

Kommune-p 18. Juli 2011 aalajangiinera allanngortinneqarpoq.

Inussiarnersumik inuulluaqqusillunga

Naja Joelsen

Siulittaasoq