Sags nr. 2010-043447

Ineqarnermut tapiissutit pillugit S 4. november 2010 aalajangiinera naammagittaalliuutigisarsi Isumaginninnermut Naammagittaalliuuteqartarfiup siulittaasuata ulloq 24. juni 2011 suliaraa imatullu aalajangiilluni

Aalajangiineq

S aalajangiinera utertinneqarpoq. Tamanna isumaqarpoq Kommuneqarfik Sermersooq nutaamik aalajangiissasoq, tassani kommunip ineqarnermut tapiissutinik qinnuteqaatersi inoqutigiit isertitaasa annertuumik appariaateqarsimanerannut tunngatillugu naliliivigissalugu.

Suliaq aalajangiiffigineqassaaq inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq kingorna allannguuteqartinneqartoq aamma ineqarnermut tapiissutitsinissamut aningaasanut klliliussat, nammineq akileeqataassutissat kiisalu ineqarnermut tapiissutit aningaasartaasa minnerpaaffissaat amerlanerpaaffissaallu pillugit Namminersornerullutik Oqartussat nalunaarutaat nr. 12, 28. maj 2003-meersoq naapertorlugit.

 

Nassuiaat:

Suliami takuneqarsinnaavoq inissiami attartortittakkami Q-mi, W najugaqartusi 18-nillu inorlugit ukiulinnik angarlarsimaffissinni najugaqateqanngitsusi.

Ukioq 2010 maannakkut inigisassinnut nuuppusi. Inigisassinnut qaammammut 3.135 koruunit akiliutigisarpasi. Oqaatigineqarpoq inigisarsi pingasunik initaqartoq.

Aalajangiinermi 4. november 2010-mi pisumi ineqarnermut tapiissutinik qinnuteqaatersi itigartitsissutigineqarpoq. Itigartitsinermut tunngavigineqarpoq inoqutigiit isertitaasa 240.370 koruuniusut ineqarnermut tapiissutisinissamut killissarititanik akimuisimaneri.

Naammagittalliuutinni illit A ilaatigut allapputit, siusinaartumik pensionisiaqarlutit illillu M suliffeqanngitsutit.

Isumaginninnermi Naammagittaalliuuteqartarfiup siulittaasuata ullormi 3. maj 2011-mi paasissutissat suliamut tunngassuteqartut uppernarsaatillu tiguai. Kommunip ilaatigut oqaatigaa illit A siusinaartumik pensioniat qaammammut 8.333 koruuniusut pisartagarigitit, illillu M akissarsiatit akileraaruteqaataasussat kingulliit 2009-mut tunngatillugu 145.374 koruuniullutik. Aamma Kommune allappoq illit M massakkut suliffeqanngikkaluaruilluunniit, taamaattumillu isertiarisartakkavit amerlaqataannik isertitaqarnak, taamaattoq isertitaqarnerit ataavartumik appaariaateqanngilaq, kisianni tassa kommunip allakkamini oqaatigaa appariaateqarsimasussaaneq Naalakkersuisoqarfiup ilitsersuusiaani piumasaqaatitut allassimasoq.

Tamatumunnga malitsigitillugu kommunip oqaatigaa illit M 2010-mi qaammatini januar, februar, marts, april, juni aamma juli kiisalu aamma oktoberimiit suliffeqarnak, suliffeqanngikkarllarninnili suliffeqanngikkallarnermi ikiorsiissutinik tunineqartarsimanak.

Inatsisitigut tunngavigisat:

Inissiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. maj 2001-imeersumi § 5 malillugu ineqarnermut tapiissutit tunniunneqassapput inoqutigiit tamarmiusut ukiumi akileraarfiusumi kingullermi ilisimaneqartumi isertitaat akileraaruteqaataasussat tamarmiusut tunngavigalugit.

Imm. 2-mi takuneqarsinnaavoq, imm. 1 naapertorlugu piffissap naatsorsuiffiusup kingorna inoqutigiit isertitaat annertuumik allannguuteqarsimappata imaluunniit nuunneq assigisaaluunniit pissutigalugu isertitanik paasissutissat pigineqanngippata, inoqutigiit ukiumoortumik isertitassaattut akileraaruteqaataasussatut naatsorsuutigineqartut tunngavigalugit ineqarnermut tapiissutit naatsorsorneqassapput.

Nalunaarummi siuliini taaneqartumi takuneqarsinnaavoq inoqutigiinnut 18 inorlugit ukiulinnik meerartaqanngitsunut  ineqarnermut tapiissutisinissamut killissarititaasut 180.000-kooniupput.

Inatsisitigut tunngavigisaq aalajangiinermi ilanngunneqarpoq.

Naliliineq:

Isumaginninnermi Naammagittaalliuuteqartarfiup siulittaasua isumaqarpoq  kommunip aalajangiinera kukkusuusoq.

Taamaalilluni Isumaginninnermi Naammagittaalliuuteqartarfiup siulittaasuata pingaartutut isigaa peqqussummi isertitatigut appariaateqarnerup ataavartuunissaata piumasarineqannginnera.

Taamaattumik Isumaginninnermut Naalakkersuisoqarfiup ineqarnermut tapiissutinik qinnuteqaatit suliarisarnissaat pillugu Ilitsersuusiaa november 2001-imeersoq suliassanut taaneqartunut tunngatillugu eqqortumik tunngavissiinngilaq.

Tamanna isumaqarpoq ilissi inoqutigiit piffissami isertitassi annertuumik appariaateqarnerisa nalaani ineqarnermut tapiissutisinissamut pisinnaatitaasusi.

Taamaattumik S ilissi ineqarnermut tapiissutisinissassinnut tunngatillugu nutaamik naatsorsuissaaq.

Aalajangiineq:

Taamaalilluni S aalajangiinera allanngortinneqarpoq.

Inussiarnersumik inuulluaqqusillunga

 

Naja Joelsen

Siulittaasoq 

 

Inatsisit tunngaviusut:

Inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq.

- 5. Ineqarnermut tapiissutit tunniunneqassapput inoqutigiit tamarmiusut ukiumi akileraarfiusumi kingullermi ilisimaneqartumi isertitaat akileraaruteqaataasussat tamarmiusut tunngavigalugit.

- Imm. 2. Imm. 1 naapertorlugu piffissap naatsorsuiffiusup kingorna inoqutigiit isertitaat annertuumik allannguuteqarsimappata imaluunniit nuunneq assigisaaluunniit pissutigalugu isertitanik paasissutissat pigineqanngippata, inoqutigiit ukiumoortumik isertitassaattut akileraaruteqaataasussatut naatsorsuutigineqartut tunngavigalugit ineqarnermut tapiissutit naatsorsorneqassapput.

§ 6. Ineqarnermut tapiissutit tunniunneqassapput inoqutigiit ukiumut isertitaat § 5-imi maleruagassat malillugit naatsorsorlugit, ineqarnermut tapiissutisinissamut aningaasanut killissaliussamit ikinneruppata. Inoqutigiit aningaasanut killissaliussaq ataallugu isertitaqartartut ineqarnermut akiliummut nammineq akileeqataassutissaq procentinngorlugu naatsorsugaq akilissavaat.
Imm. 2. Attartornermi nammineq akileeqataassutissap aalajangersarneqarnerani angerlarsimaffimmi meeqqat najugaqartut amerlassusiat apeqqutaatinneqassaaq. Meeqqat angerlarsimaf-fimmi najugaqartut amerlassusaannik allannguutit nalunaarutigineqarnerisa kingorna qaammatip tulliup aallaqqaataaniit naatsorsuunneqartassaaq. Angerlarsimaffimmi meeqqat najugaqartut qaammatip 18-inik ukioqalerfimmik naanerata tungaanut naatsorsuunneqartassapput.
Imm. 3. Aningaasanut killiliussat, nammineq akileeqataassutissat kiisalu ineqarnermut tapiissutit ukiumoortut aningaasartaasa annerpaaffissaat minnerpaaffissaallu Naalakkersuisunit aalajangersarneqassapput.