2009-016920

D

Ineqarnermut tapiissutinik itigartitsineq pillugu Kommuneqarfiup 7. april 2009  oqaasiinnarmik aalajangiinera naammagittaalliuutigisarsi Isumaginninnermi Naammagittaalliuuteqartarfiup 2. december 2011 suliaraa imatullu aalajangiilluni

Aalajangiineq

Kommune-p aalajangiinera allanngortinneqarpoq.

Tamanna isumaqarpoq kommuni nutaamik naatsorsuusiorluni aalajangiissasoq, tassunga atatillugu aapparisavit suliffeerunneratigut aningaasaqarnissi allannguuteqarneranut tunngatillugu ineqarnermut tapiissutinik qinnuteqaatersi kommunip naliliivigissallugu.

Suliaq aalajangiiffigineqassaaq inissiani attartortittakkani ineqarnermut tapiissutit pillugit Inatsisartut peqqussutaat nr. 3,  31. maj 2001-imeersoq aamma ineqarnermut tapiissutisinissamut killiliussat, nammineq akileeqataassutissat kiisalu ineqarnermut tapiissutit aningaasartaasa minnerpaaffissaat annerppaaffissaallu pillugit Namminersornerullutik Oqartussat nalunaarutaat nr. 12, 28. maj 2003-meersoq naapertorlugit.

Nassuiaat:

Oqaatigineqarpoq Kommune-p 17. november 2008 ukiumut 2009-mut tunngatillugu ineqarnermut tapiissutinik qinnuteqaatit pillugu aalajangiisimasoq.

Kommune-p ineqarnermut tapiissutinik qinnuteqaat itigartitisissutigaa, pissutigalugu illit aappavillu ukiumi 2008-imi isertitasi amerlassuseqarsimammata 480.008 koruuninik,  taakkulu inoqutigiinnut sisamanik meerartalinnut ineqarnermut tapiissutinik akuersissuteqarnissamut isertitatigut qummut killissaritat akimorpaat.

Taava ineqarnermut tapiissutinik qinnuteqaqqipputit ulloq 6. april 2009.

Kommune-p 7. april 2009 ineqarnermut tapiissutinik qinnuteqaat pillugu oqaasiinnarmik itigartitsilluni aalajangiivoq.

Allakkatigut 7. april 2009 ulloqartutigut naammagittaalliorputit.

Oqaatigaat pilersuisunngorsimallutit kisimiittoq, tassa inooqatigisat suliffeerussimammat sisamanillu qitornaqarlusi.

Inissiaatileqatigiifimmut qaammammut aningaasartuutigisarpasi 3.454 koruunit, Nukissiorfinnut 976,00 koruunit qaammammat kiisalu ikummatissamut gasolie-mut qaammammut 180-200 liter annertussuseqartumut aningaasartuutit.

Aamma oqaatigaat inooqatigisat suliffisarsiortuusoq, illillu ullut 14-kkaarlugit 3.500 koruunit isertitarisarlugit.

Paasissutissat suliamut tunngassuteqartut nassiunnerinut atatillugu Kommune-p oqaatigaa inissiani attartortittakkani  ineqarnermut tapiissutit pillugit Inatsisartut oeqqussutaanni nr. 3-mi, 31. maj 2001-imeersumi § 6 tunngavigalugu ineqarnermut tapiissutisisinissamik qinnuteqaatit itigartitsissutigineqartoq, inoqutigiit isertitaasa qaffasippallaarnerat pissutigalugu ineqarnermut tapiissutigisinnaanngitsutit.

Aamma kommunip oqaatigaa inooqatigisavit 2009-mi suliffissaarusimanerata illit peqqussummi § 5, imm. 2 malillugu ineqarnermut tapiissutinik tunineqarnissat kingunerisinnaanngikkaa, pissutigalugu  suliffissaarunneq inoqutigiit aningaasaqarnermikkut ataavartumik appaariaateqarnerattut isigineqarsinnaanngimmat.

Paasissutissani suliamut tunngassuteqartuni atuarneqarsinnaavoq inooqatigisat ullormi 9. marts 2009 suliffimminit soraarsitaasimasoq.

Inatsisitigut tunngavigisat:

Inssiani attartortittakkani ineqarnermut tapiissutit pillugit Inatsisartut peqqussutaanni nr. 3-mi, 31. maj 2001-imeersumi § 5, imm. 2 tunngavigalugu, ukiumi matumani ineqarnermut tapiissutisiaqarfissamut tunngatillugu naatsorsuinerup kingorna ataavartumik allannguuteqartoqarpat, ineqarnermut tapiissutit naatsorsorneqassapput ukiumi ineqarnermut tapiissuteqarfiusumi matumani aningaasat isertitassatut naatsorsuutigisat akileraaruteqaataasussat tunngavigalugit.

Ineqarnermut tapiissutisinissamut aningaasanut killiliussat, nammineq akileeqataassutissat kiisalu ineqarnermut tapiissutit aningaasartaaasa minnerpaaffissaat annerppaaffissaallu pillugit Namminersornerullutik Oqartussat nalunaarutaanni nr. 12-imi, 28. maj 2003-meersumi § 2, imm. 5-imi atuarneqarsinnaavoq, inoqutigiinnut sisamanik meerartalinnut ineqarnermut tapiissutinik pissarsinissamut isertitatigut qummut killissarititat 416.000-iusut.

Naliliineq:

Isumaginninnermi Naammagittaalliuuteqartarfik naliliivoq Kommune-p nutaamik aalajangiissasoq, pissutigalugu peqqussummi piumasaqaataanngimmat isertitatigut appariaateqarneq annertussasoq aamma ataavartuussasoq, taamaallaalli appariaateqarneq annertussasoq.

Isumaginninnermi Naammagittaalliuuteqartarfiup peqqussummi qulaani taaneqartumi § 5-imi oqaaseqatigiit pingaarutilittut isigai.

Tamanna isumaqarpoq ineqarnermut tapiissutit pillugit peqqussummi § 5 malillugu  piffissami inooqatigisavit suliffeqanngikkallarneranik pissuteqartumik inoqutigiit aningaasaqarnerata appariaateqafiani ineqarnermut tapiissutisisinnaasimagaluartusi.

Tapiissutisisinnaanissinnulli tunngaviussaaq annertuumik allannguuteqarneq, tamannalu Kommune-p nutaamik aalajangiinermut atatillugu isummerfigissavaa.

Taamaattumik Kommune-p ulloq 6. april 2009, taamanikkut ineqarnermut tapiissutinik qinnuteqarfigisarsi aallarnerfigalugu ineqarnermut tapiissutinissarsi pillugu nutaamik naatsorsuissaaq.

Aammattaaq Isumaginninnermi Naammagittaalliuuteqartarfiup uparuassavaa kommuni ullormi 7. april 2009 allaganngorlugu aalajangiisimasariaqaraluartoq, pissutigalugu  aalajangiineq ilinnut inooqatigisannullu tapersiisuulluinnanngimmat.

Isumaginninnermi Naammagittaalliuuteqartarfiup oqaatigissavaa suliaq manna ineqarnermut tapiissutit pillugit peqqussummi § 5 malillugu aalajangiivigineqartusssaammat, ineqarnermut tapiissutisiaqariinnginnerit pissutigalugu.

Imaattoqaraluarpat innuttaasoq ineqarnermut tapiissutisiaqareersuulluni, taava aalajnagiineq pissaaq peqqussummi § 10 malillugu, taanna malillugu piumasarineqarmat annertuumik ataavartumillu isertitatigut appariaateqarsimanissaq.

Aalajangiineq:

Kommune-p 7. april 2009 aalajangiinera allanngortinneqarpoq.

Inussiarnersumik inuulluaqqusillunga

Naja Joelsen

Siulittaasoq