Sags nr. 2011-047016

Ukiumut 2011-mut tunngatillugu ineqarnermut tapiissutit pillugit Kommunip ulloq 10. februar 2011 aalajangiinera naammagittaalliuutigisat Isumaginninnermi Naammagittaalliuuteqartarfiup ulloq 24. juni 2011 suliaraa imatullu aalajangiilluni

Aalajangiineq

Kommunip aalajangiinera allanngortinneqarpoq. Imaappoq kommunip aalajangiinera eqqortuunngilaq, illillu naammagittaalliuutinni taperserneqarputit.

Suliaq aalajangiiffigineqassaaq inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq aamma inissiani attartortittakkani ineqarnermut tapiissutit pillugit Inatsisartut peqqussutaata  allanngortinneqarnera pillugu Inatsisartut peqqussutaat nr. 13, 14. november 2004-meersoq naapertorlugit.

Nassuiaat:

Suliami takuneqarsinnaavoq kisimiittuusutit ammalu meeqqanik najugaqateqanngitsutit.

Ulloq 9. februar 2011 ukiumut 2011-mut tunngatillugu ineqarnermut tapiissutinik qinnuteqarputit.

Ulloq 10. februar 2011 aalajangiinermi ukiumut 2011-mut tunngatillugu ineqarnermut tapiissutisiassatit naatsorsorneqarput qaammammut 2.730,00 koruunik amerlassuseqassasut. Ineqarnermut tapiissutit ullormit 1. marts-imit 2011 atuutilersussatut akuersissutigineqarput.

Naatsorsuinermi Kommunip illit 2011-mi isertitassattut naatsorsuutigisatit tunngavittut atorpai, taakkulu amerlassuseqarput 134.798 kr.

Allakkatigut 22. februar 2011 ullulerneqartutigut qaammatini januar aamma februar 2011 ineqarnermut tapiissutinik tunineqarsimannginnerit naammagittaalliuutigaat. Oqaatigaat kommunip allaffissornikkut aaqqissuussaanerani allassimareeravit ineqarnermut tapiissutisiassatit ukiumut isertitatit tunngavigalugit naatsorsorneqartut saaffiginnissutiginngikkaluarlugit tigussallugit.

Inatsisitigut tunngavigisat:

Inissiani attartortittakkani ineqarnermut tapiissutit pillugit Inatsisartut peqqussutaanni nr.  3-mi, 31. maj 2001-imeersumi § 9 malillugu inissiani attartortittakkani ineqarnermut tapiissutit januarip aallaqqaatai tamaasa iluarsiivigineqartassapput aammalu ineqarnermut akiliutit allannguuteqaraangata.

Imm. 2. malillugu ineqarnermut tapiissutisisartut ukiumoortumik iluarsiinermut atatillugu nutaamik qinnuteqartassapput nutaamik inoqutigiit amerlassusii, katitigaaneri isertitanullu tunngasut pillugit paasissutissiillutik.

Imm. 3. Ineqarnermut tapiissutisisartup paasissutissat nassiutinngippagit kommunip  paasissutissat pisariallit missingiinikkut aalajangiiffigisinnaavai.

Allannguutitut aalajangersakkanut oqaaseqaatini ilaatigut allassimavoq Naalakkersuisut Ombudsmandip paasinninnera naapertorlugu ersarissagassatut kissaatigigaat ineqarnermut tapiissutinik kommunip ukiumoortumik iluarsiinissaanut atatillugu nutaamik qinnuteqartoqartarunnaassasoq.

Innersuussutigineqarpoq § 9, imm. 2 tassaammat paasissutissat suliamut tunngassuteqartut pillugit aalajangersagaq, ineqarnermut tapiissutit killilersuiffigineqarnerannut taamaallaat atortoq. Ilanngullugu taaneqassaaq aalajangersagaq taamaattoq tunngavigalugu innuttaasup inatsisit malillugit inatsisinillu illersorneqarluni pisassarisaanik itigartitsilluni aalajangiisoqarsinnaanngimmat. 

 

Naliliineq:

Isumaginninnermi Naammagittaalliuuteqartarfik isumaqarpoq 2011-mi qaammatini januarimi aamma februarimi ineqarnermut tapiissutinik pissarsinissamut pisinnaatitaasutit.

Aalajangiinermut tunngavigineqartoq tassa ineqarnermut tapiissutisinissamut piumasaqaataanngimmat ukiup naanerani nutaamik qinnuteqaateqartarnissaq.

Isumaginninnermi Naammagittaalliuuteqartarfiup aalajangiinermi pingaartippaa ineqarnermut tapiissutisinissat inatsisinit illersugaallutit pisinnaatitaaffigigit, taamatut pissarsinissamut piumasaqaataasut naammassigukkit.

Tamanna isumaqarpoq illit aningaasaqarninnut namminermullu tunngasut allannguuteqarnerinik kommuni ilisimatissagit, taamaalilluni kommunip taamaaliornissamut tunngavissaqarpat ineqarnermut tapiissutisiatit iluarsiiviginiassammagit.

Aalajangiineq:

Kommunip ulloq 10. februar 2011 aalajangiinera allanngortinneqarpoq. Kommunip aalajangiineq naapertorlugu qaammatinut januar aamma februar 2011 ineqarnermut tapiissutinik tunissavaatit.

Inussiarnersumik inuulluaqqusillunga 

Naja Joelsen

Siulittaasoq

 

 

Inatsisit tunngavigineqartut:

Inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq.

- 7. Ineqarnermut tapiissutinik qinnuteqaat kommunimut tunniunneqassaaq.

- Imm. 2. Qinnuteqartoq pisussaavoq paasissutissanik suugaluartunik ineqanermut tapiisutit naatsorsornissaannut pingaaruteqartunik tunniussinissamut, taakkununnga ilaapput inoqutigiit amerlassusii, katitigaaneri isertitanullu tunngasut.

- 8. Ineqarnermut tapiissutit qinnuteqaatip tunniunneqarnerata kingorna qaammatip aallaqqaataaniit atuutilersumik tunniunneqassapput.

- Imm. 2. Inissiamut allamut nuunnermi ineqarnermut tapiissutit nutaamik qinnuteqaatigineqassapput.

 

Inissiani attartortittakkani ineqarnermut tapiissutit pillugit inatsisartut peqqussutaata allanngortinneqarnera pillugu Inatsisartut peqqussutaat nr. 13, 14. november 2004-imeersoq.
1.
§ 9, imatut oqaasertalerneqarpoq:
" § 9. Inissiani attartortittakkani ineqarnermut tapiissutit ukiup naatsorsuuteqarfiusup naanerani aamma ineqarnermut akiliutit allanngortinneqarneranni iluarsiivigineqartassapput. Inissiaq attartortittagaq najugaqatigiiffimmut ilaappat ineqarnermut tapiissutit ukiuata najugaqatigiiffiit ataasiakkaat ukioq naatsorsuuteqarfia malissavaa. Inissiaq attartortittagaq najugaqatigiiffimmut ilaanngippat ineqarnermut tapiissutit ukiuata qaammatisiutit ukiuat malissavaa.
Imm. 2. Ineqarnermut tapiissutisisartut ineqarnermut akiliutip allannguutaanik kiisalu inuttut aamma aningaasaqarnikkut pissutsit allannguutaannik ineqarnermut tapiissutinik annertussusiliinissamut pingaaruteqartunik kommunimut nalunaaruteqarnissaminnik pisussaaffeqarput.
Imm. 3. Imm. 2-imi taaneqartut paasissutissat ineqarnermut tapiissutisisartup tunniussimanngippagit kommuni missiliuilluni paasissutissanik pisariaqartunik aalajangersaasinnaavoq."