Sags nr. 2009-019838

B-ip tapersersorteqartinnissaa pillugu Isumaginninnermut Naalakkersuisoqarfiup ulloq 6. august 2009 ilaannakortumik akuersissuteqarnera A naammagittaalliuutigisaa Isumaginninnermi Naammagittaalliuuteqartarfiup ulloq 24. juni 2011 suliaraa imatullu aalajangiilluni

Aalajangiineq

Isumaginninnermut Naalakkersuisoqarfiup aalajangiinera allanngortinneqarpoq, imaalillugu B-ip tapersorteqartinnissaanut sapaatip akunneranut nal. akunneri 40 akuersissutigineqarlutik. Taamaalilluni kommuni naammagittaalliuummini taperserneqarpoq.

Suliaq aalajangiiffigineqassaaq  annertuumik innarluutillit ikiorserneqartarnerat pillugu Inatsisartut peqqussutaat nr. 7, 3. november 1994-imeersoq, annertuumik innarluutillit ikiorserneqartarnerat pillugu Namminersornerullutik Oqartussat nalunaarutaat nr. 9, 4. april 2008-meersoq, kiisalu pisortat ingerlatsineranni suliassat suliarineqartarnerat pillugu Inatsisartut peqqussutaat nr. 8, 13. juni 1994-imeersoq naapertorlugit.

Nassuiaat:

B 1950-imi inunngorpoq. Qinnuteqarnerup nalaani C-mi utoqqaat illuanni najugaqarallarpoq.

Inuuserlertartuuvoq aammalu timaata ilaa nukillaarsimalluni qaratsamigut aanaartoornerata kingunerisaanik, taamalu annertuumik innarluutillit ikiorserneqartarnerat pillugu Inatsisartut peqqussutaanni nr. 7-imi, 3. november 1994-imeersumi pineqarluni.

Ulloq 28. maj 2009 Qaasuitsup Kommuniata Isumaginninnermut Naalakkersuisoqarfik B-ip tapersoteqartinnissaanut  sapaatip akunneranut nal. akunnerinik 40-nik qinnuteqarfigaa.

Qinnuteqaammut tapersersortip nalunaarusiaa iliuusissanullu pilersaarut Ilanngunneqarput. Tapersersortip nalunaarusiaani atuarneqarsinnaavoq B soorlu makinnissaatigut, uffarnissaatigut, eqaarsaarnissaatigut, nerinissaatigut aneertarnissaatigullu kajumissaarneqarlunilu ikiorneqartartussaasoq.

Tapersersortip nalunaarusiaanissaaq atuarneqarsinnaavoq siornatigut sapaatip akuneranut nal. akunneri 40 B-ip tapersersorteqartinneqarneranut akuersissutigineqarsimasut, aamma tapersersortip nalunaarusiaani oqaatigineqanngilaq B taamatut tapersersorteqartinneqarnissaminut pisariaqartitsinera annikinnerulersimanersoq.

Isumaginninnermut Naalakkersuisoqarfik allakkatigut 6. august 2009 ullulerneqartutigut suliaq pillugu aalajangiivoq. Aalajangiinermi takuneqarsinnaavoq nal. akunneri 20 sapaatip akunneranut atugassatut akuersissutigineqarsimasut.

Isumaginninnermut Naalakkersuisoqarfiup allakkamini oqaatigaa Isumaginninnermut Naalakkersuisoqarfiup naliliinera tassaasoq tapersersortitut ikiorti suliamut atatillugu annertuallaamik sulisartoq, tassami qasuersaarnissaminik aamma pisariaqartitsisassammat.

Suna pissutigalugu qinnuteqaat tamakkiisumik akuerinnginnerlugu Isumaginninnermut Naalakkersuisoqarfik ersarinnerusumik tunngavilersuuteqanngilaq.

Isumaginninnermut Naalakkersuisoqarfiup aalajangiinera A allakkatigut 10. august 2009 ullulerneqartutigut Isumaginninnermi Naammagittaalliuuteqartarfimmut naammagittaalliuutigaa. Naammagittaalliuut B-imit akuerineqarpoq.

Naammagittaalliuummi tunngavittut oqaatigineqarpoq B tapersersorteqarnissaminik annertuumik pisariaqartitsisoq, taamalu kommunimi sulisut utoqqaallu illuanni sulisut B-ip ullormut nal. akunnerini 8-ni tapersersorteqartinneqarnissaa pisarialerujussuusoq B qaratsamigut aanaartoornermi kingorna nammineerluni sunilluunniit iliuuseqarsinnaajunnaarsimamat.

Isumaginninnermi Naammagittaalliuuteqartarfiup Isumaginninnermut Naalakkersuisoqarfik  apeqquteqarfigaa suliaq pillugu oqaaseqaateqarniarnersoq. Isumaginninnermut Naalakkersuisoqarfik allakkatigut 7. februar 2011 ullulerneqartutigut akissuteqarpoq, akissumminilu imatut nassuiaateqarluni:

Isumaginninnermut Naalakkersuisoqarfik naliliivoq qinnuteqaat ilaannakortumik tassalu sapaatip akunneranut nal. akunneri 20-t tapersersorteqarnermutatugassatut akuersissutigisinnaallugit, tamatumunnga tunngavigalugit:

- imminut eqqiluisaartinnissamut ataavartumik ikiorteqarnissamik pisariaqartitsinermut

- akunneri 20-t suliassaqartitsinermut atugassiissutitut tunniunneqareermata, kiisalu tapersersorteqartitsisarnerup siunertatut nalinginnaasutut atugaanera siunissaq eqqarsaatigalugu sapinngisamik annikinnerpaaffianiitinniarneqarmat

- Isumaginninnermut Naalakkersuisoqarfik, innarluutilinnut immikkoortortaq naliliivoq B-ip inuttut ineriartorneranut tunngatillugu ullormut angusaqarsinnaanera eqqarsaatigalugu tapersersortitut ikiortimik suleqateqarluni suliaqarnerit sammisaqarnerillu ingerlanneqartartut, tassungalu peqatigitillugu suliaqartitsinermut tunngatillugu nalinginnaasumik qummut killissaq qaffasinnaarneqarsimasoq; tassami inuttaa allatulli qasuersaarnissamik pisariaqartitsisassammat.”

 

B qanoq sulisinneqarnersoq pissutsillu tamatumunnga tunngasut suliami paasissutissiissutigineqanngillat.

Inatsisitigut tunngavigisat:

Annertuumik innarluutillit ikiorserneqartarnerat pillugu Inatsisartut peqqussutaanni nr. 7-imi, 3. november 1994-imeersumi § 7 malillugu innarluutillip kommunitut najugarivitaata inassuteqarneratigut ikiorsiiniut sorleq aallartinneqarsinnaanersoq Isumaginninnermut Naalakkersuisoqarfiup aalajangissavaa. Isumaginninnermut Naalakkersuisoqarfiup assersuutigalugu tapersersortitut ikiortinik atorfinitsitsinissamut ikiorsiineq aalajangiiffigisinnaavaa.

Annertuumik innarluutillit ikiorserneqartarnerat pillugu Namminersornerullutik Oqartussat nalunaarutaanni nr. 9-mi, 4. april 2008-imeersumi § 9 malillugu annertuumik innarluutilik nammineq inigisaminiiginnarsinnaanerminut, matumani najugaqatigiiffik nakkutigineqartumilluunniit najugaqarfik ilanngullugit, perorsaanikkut tapersersorneqarnissamik pisariaqartitsisoq sap. Akunneranut nal. akunnerini arlalinni tapersersorteqartilerneqarsinnaavoq.

Nalunaarummi pineqartumi § 10-mi allassimavoq tapersersortip annertuumik innarluutilik eqarsartaatsimigut, timimigut inooqataanermigullu ineriartornerani tapersersussallugu suliassaraa. Tapersersortitut ikiortip annertuumik innarluutilik ulluinnarni suliarineqartartunut nammineerniarneranik tapersersussavaa. Kommunalbestyrelsi annertuumik innarluutilik 18-it inorlugit ukioqarpat  nammineersinnaatitaanngippalluunniit annertuumik innarluutilik, tapersersortitut ikiorti, immaqa sulianut ilisimasalik, angajoqqaatut oqartussaassusilik nakkutiginnittorluunniit peqatigalugit tapersersortip sulinermini atugassaanik iliuusissanut pilersaarusiussaaq.

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakku atornerannut aalajangiisuunerusut.

Tunngaviusumik nalunaarummi pisariaqarpat  naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

Naliliineq:

Isumaginninnermi Naammagittaalliuuteqartarfik isumaqarpoq Isumaginninnermut Naalakkersuisoqarfiup aalajangiinera eqqortuunngitsoq. Isumaginninnermi Naammagittaalliuuteqartarfiup tamatumani pingaartutut isigaa aalajangiinermut atatillugu ukiup affaa pineqartoq sioqqullugu ukiup affaani sapaatip akunneranut nal. akunneri 40 B-ip tapersersorteqartitaaneranut akuersissutaasimasut, aammalu Isumaginninnermut Naalakkersuisoqarfiup uppernarsanngimmagu B-p tapersersortitut ikiortimik pisariaqartitsinerata annikinnerulersimanera,  aammalumi suliami Nora-p pisariaqartitsinerata annikinnerulersimanissaata anguniagaanera paasissutissani oqaatigineqanngilaq.

Aammattaaq Isumaginninnermi Naammagittaalliuuteqartarfiup pingaartutut isigaa Isumaginninnermut Naalakkersuisoqarfiup aalajangiinermini innersuussutigigaa B-ip suliassaqartitsinermut atatillugu nal. akunneri 20-t pissarsiarisimagai, kisianni suliami tamanna pillugu paasissutissaqarani, taamaattumik Isumaginninnermi Naammagittaalliuuteqartarfik isumaqarpoq, tamanna tunngaviliunneqarsinnaanngitsoq.

Taamaattumik Isumaginninnermi Naammagittaalliuuteqartarfik isumaqarpoq B-ip sapaatip akunneranut nal. akunneri 40-t tapersersorteqartinnissaa pisariaqartoq.

Aammattaaq Isumaginninnermi Naammagittaalliuuteqartarfik isumaqarpoq Isumaginninnermut Naalakkersuisoqarfiup suliamik ingerlatsinermini paasissutissat suliamut tunngassutillit pingaaruteqartut tamaasa pissarsiareqqaarsimasariaqaraluarai, tamakkununnga ilanngullugit suliassaqartitsinermut tunngasut, taamalu aalajangiinermini allassimassariaqaraluarlugit pissusiviusut suut naalakkersuisoqarfiup qinnuteqaammik tamakkiisumik akuersinnginneranut pissutaanersut.

Aalajangiineq:

Isumaginninnermut Naalakkersuisoqarfiup ulloq 6. august 2009 aalajangiinera imaalillugu allanngortinneqarpoq B-ip piffissami 1. juli 2009-mit 31. december 2009-mut  tapersersortimik ikiorteqartinneqarnissaanut sapaatip akunneranut nal. akunneri 40-t akuersissutigineqarlutik.

Inussiarnersumik inuulluaqqusillunga

Naja Joelsen

Siulittaasoq

  

Inatsisit tunngaviusut:

 

Annertuumik innarluutillit ikiorserneqartarnerat pillugu Inatsisartut peqqussutaat nr. 7, 3.november 1994-imeersoq.

 - 7. Innarluutillip kommunitut najugarivitaata inassutegarneratigut ikiorsiiniut sorleq aallartinnegarsinnaanersoq Isumaginninnermut Pisortaqarfiup aalajangissavaa.

- Imm. 2. Isumaginninnermut Pisortaqarfiup assersuutigalugu makku aallartinneqarnissaat aalajangersinnaavaa:

- 1) iluaqusersuutinik pisinissamut ikiorsiineq,

- 2) tapersersortitut ikiortinik atorfinitsitsinissamut ikiorsiineq,

- 3) angajoqqaat allalluunniit innarluutillip angerlarsimaffimmi ulluinnarni paaqqutarineqarneranik suliaqartut sulinermikkut ikiorserneqarnermikkullu oqilisaavigineqarnerat,

- 4) siunnersorteqartitsinermut ikiorsiineq,

- 5) innarluutillip inigisaata allanngortinneqarneranut aaqqissuunneqarneranullu ikiorsiineq,

- 6) qanigisat allallu ilinniartinneqarnerinut, pikkorissartinneqarnerinut il.il. ikiorsiineq, taamaaliornikkut innarluutillip ulluinnarni inuunerata oqinnerulerlunilu pitsaanerulernissaa anguniarlugu,

- 7) najugaqaqatigiiffinnik nakkutigineqarlunilu najugaqarfinnik pilersitsinernut ikiorsiinerit,

- 8) ulloq unnuarlu paaqqinniffimmiinneq, ajornanngippat Kalaallit Nunaanni,

- 9) innarluutillip angerlarsimaffimmi avataani paaqqinniffimmiinneranut atasumik innarluutillip akiliunneqarluni feriartinneqarnera, imaluunniit immikkut pisoqartillugu qanigisaasut akiliunneqarlutik feriartinneqarneri.

 

Annertuumik innarluutillit ikiorserneqartarnerat pillugu Namminersornerullutik Oqartussat nalunaarutaat nr.9, 4. april 2008-imeersoq

Tapersersortitut ikiortit

- 9. Annertuumik innarluutilik nammineq inigisaminiiginnarsinnaanerminut, matumani najugaqaqatigiiffik nakkutigineqarluniluunniit najugaqarfik ilanngullugit, perorsaanikkut tapersersorneqarnissamik pisariaqartitsitsoq sap. akunneranut nal. akunnerini arlalinni tapersersortilerneqarsinnaavoq.

Imm. 2. Annertuumik innarluutilik meeraaqqerivimmi, meeqqerivimmi imaluunniit ulluunerani paaqqinniffimmi 0-6-inik ukiulinnut naatsorsuussaasumi sulisut amerlassusilerneqarneranni pisariaqartinneqartunit annertunerusumik tapersersorneqarnissamik pisariaqartitsisoq paaqqinniffimmi sap. akunneranut nal. akunneri 40-t tikillugit tapersersortilerneqarsinnaavoq.
Imm. 3. Annertuumik innarluutilik sunngiffimmi angerlarsimaffimmi imaluunniit ulluunerani paaqqinniffimmi 6-17-inik ukiulinnut akuleriiffiusussatut naatsorsuussami sulisut amerlassusilerneqarneranni pisariaqartinneqartunit annertunerusumik tapersersorneqarnissamik pisariaqartitsisoq paaqqinniffimmi sap. akunneranut nal. akunneri 20-t tikillugit tapersersortilerneqarsinnaavoq.
Imm. 4. Inunnut annertuumik innarluutilinnut tapersersortilerneqarsinnaapput, utoqqaat illuanni najugaqartunut, kommuni allanik naleqquttumik najugaqarfigineqarsinnaasunik inissamik neqeroorutissaqanngippat.

- 10. Tapersersortip annertuumik innarluutilik eqqarsartaatsimigut, timimigut inooqataanermigullu ineriartornerani tapersersussallugu suliassaraa.
Imm. 2. Tapersersortitut ikiortip annertuumik innarluutilik ulluinnarni suliarineqartartunut nammineerniarneranik tapersersussavaa.
Imm. 3. Kommunalbestyrelsi annertuumik innarluutilik 18-it inorlugit ukioqarpat nammineersinnaatitaanngippalluunniit annertuumik innarluutilik, tapersersortitut ikiorti, immaqa sulianut ilisimasalik, angajoqqaatut oqartussaassusilik nakkutiginnittorluunniit peqatigalugit tapersersortip sulinermini atugassaanik iliuusissanut pilersaarusiussaaq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

 

- 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

- Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

- Imm. 3. Tunngaviusumik nalunaarutip imarisai killiliiffigineqarsinnaapput suliami peqataasup tamakkununnga ilisimasaqarnini nammineq iluaqutigiumallugu atuiumasinnaanerminik soqutiginninnera inuk taanna nammineq eqqarsaatigalugu imaluunniit inuinnaat allat pisortalluunniit soqutigissat pissutiginerullugit minnerutittariaqartutut isumaqarfiginarpat, tak. § 15.