Sags nr. 2010-040320

Meeqqanut akilersuutit siumoortumik tunniunneqarnissaat pillugu itigartitsigallarnermik X ulloq 22. oktober 2010 aalajangiinera naammagittaalliuutigisat Isumaginninnermi Naammagittaalliuuteqartarfiup 8. april 2011 suliaraa imatullu aalajangiilluni

Aalajangiineq

X aalajangiinera allanngortinneqarpoq, imaalillugu X kingumoortumik meeqqanut akilersuutinik akiliisussanngorlugu. Tamanna isumaqarpoq naammagittaalliuutinnik taperserneqartutit.

Suliaq aalajangiiffigineqassaaq meeqaanut akilersuutit il. il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, 3. marts 1994-imeersoq aamma meeqqanut akilersuutit il. il. kiisalu meeravissiartaanermi tapiissutit tunniunneqartarneri pillugit Namminersornerullutik Oqartussat nalunaarutaat nr. 33, 26. juli 1994-imeersoq naapertorlugit.

Nassuiaat:

Ulloq 18. oktober 2010 paninnut A-mut tunngatillugu meeqqanut akilersuutinik Qaasuitsup Kommunia qinnuteqarfigaat.

Qaasuitsup Kommunia 22. oktober 2010 qinnuteqaatit pillugu aalajangiigallarpoq, taannalu malillugu itigartitsisoqarpoq.

Panippit A-p kimit pilersorneqarsimanera pillugu misissuisoqarnissaa Qaasuitsup Kommuniata pingaartutut isigaa, pissutigalugu paninni angajullermi S-imi, C-mi najugalimmi najugaqarsimammat.

Allakkatigut 22. oktober 2010 tiguneqartutigut Isumaginninnermi Naammagittaalliuuteqartarfimmut naammagittaalliorputit.

Allakkanni oqaatigaat X meeqqanut akilersuutit ilinnut tunniukkumasimanngikkai, pissutigalugu paniit ilinni najugaqanngimmat.

Paniit A X-ni B-ni 10. klassersinnanngilaq, taamaattumik imaaliorputit paninni angajullermi C-mi najugalimmi najugaqartilerlugu, taamaalilluni 10. klassersinnaanngorlugu.

Oqaatigaat A ilinni najugalittut nalunaarsorsimanera ingerlaannassasoq, aammalu illit paninnut pilersuisutut inissisimaannarlutit.

Tassunga tunngatillugu oqaatigaat ullut 14-nngorneri tamaasa aningaasanik A-p kontoanut ilisisarlutit nerisassarsiutissaanik allanullu pisariaqartitaminut atugassaanik.

Kiisalu oqaatigaat nunaqarfimmi B-mi sullissisup paniit angajulleq attavigisimagaa nalunaarutigalugu panippit A-p angajuminut C-mi najugalimmut  adressine nuuttariaqaraa.

Oqaatigaat paasisinnaanagu, suna pissutigalugu X-ta  meeqqanut akilersuutit ilinnut tunniukkumanngikkai, aamma suna pillugu suliamut akulerunneqassanersoq

Paasissutissat suliamut tunngassuteqartut nassiunnerinut atatillugu X-a paasissutissiissutaareersut saniatigut  paasissutissanik allanik saqqummiussaqanngilaq.

Paasissutissani suliamut tunngassuteqartuni atuarneqarsinnaavoq ulloq 22. oktober 2010-mi A-p nuunneranut uppernarsaat immersorneqarsimasoq, immersugarlu atsiorneqarsimasoq paninnit angajullermit S-imit.

Isumaginninnermi Naammagittaalliuuteqartarfiup ilinnik ulloq 28. oktober 2010 telefonikkut oqaloqateqarneranit takuneqarsinnaavoq meeqqanut akilersuutit paninnut angajullermut S-imut tunniunneqarsimasut.

Inatsisitigut tunngavigisat:

Meeqqanut akilersuutit il. il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaanni nr. 2-mi, 3. marts 1994-imeersumi § 4, imm. 1 malillugu meeqqap pilersornissaanut akilersuutinik pisinnaatitaasup meeqqat inatsisitigut illersugaanerat imaluunniit aappariinneq pillugu inatsit tunngavigalugu akilersuisussanngortitsineq naapertorlugu qinnuteqaateqarneratigut meeqqap pilersorneqarnissaanut akilersuutit pisortanit siumoortumik tunniunneqarsinnaapput, akilersuutit akilerneqarsimaffissaasa aqaguani, akilersuutit kingusinnerpaamik ullormi akilerneqarfissaanni akilersuisussaatitaasoq akiliisimanngippat.

Meeqqanut akilersuutit il. il. kiisalu meeravissiartaarnermi tapiissutit tunniunneqartarneri pillugit Namminersornerullutik Oqartussat nalunaarutaanni nr. 33-mi, 26. juli 1994-imeersumi § 4, oqaaseqatigiit siulliit tunngavigalugit meeraq akilersuutinik pisinnaatitaasumi najugaqanngippat meeqqap pilersorneqarneranut kina aningaasartuuteqartarnersoq paasissutissiissutigineqassaaq.

 - 4 oqaaseqatigiit aappaanni allassimasut malillugit akilersuutinik pisinnaatitaasoq meeqqap pilersorneqarneranut aningaasartuuteqartanngippat meeqqamut akilersuutit pisortanit siumoortumik tunniunneqarsinnaanngillat.

Naliliineq:

Isumaginninnermi Naammagittaalliuuteqartarfik naliliivoq X-ta meeqaanut akilersuutit siumoortumik tunniunneqartussat 18. oktober 2010-miit atuutilersumik ilinnut tunniutissagai.

Meeqqamut akilersuutit kimut siumoortumik tunniunneqarnissaannut A-p allami najugaqarnerata aalajangiissuunnginnera Isumaginninnermi Naammagittaaliuuteqartarfiup pingaartutut isigaa.

Meeqqalli kimit pilersorneqarnera aalajangiisuuvoq.

Tamatumunnga tunngatillugu Isumaginninnermi Naammagittaalliuuteqartarfiup pingaarutilittut isigaa paasissutissani suliamut tunngassuteqartuni takuneqarsinnaammat illit ingerlaavartumik A-p kontoanut aningaasanik ilisisisarsimasutit pilersorneqarneranut atugassanik.

Aammattaaq paninnik A-mik pilersuinerpit ingerlatiinnarnera panippit angajulliup kommunillu tungaannit assuarliutigineqannginnera Isumaginninnermi Naammagittaalliuuteqartarfiup pingaarutilittut isigaa.

Tamatumunnga tunngatillugu Issumaginninnermi Naammagittaalliuuteqartarfiup upuarassavaa, imaammat meeqqanut akilersuutit siumoortumik tunniunneqartarnerat pisinnaanngimmat meeqqamut akilersuutinik pisinnaatitaasup meeraq pilersunngippagu.

Tamatumunnga tunngatillugu Isumaginninnermi Naammagittaalliuuteqartarfiup oqaatigissavaa meeqqamut akilersuutit S-imut tunniunneqareersut kommunimit utertinniarneqarsinnaanngimmata, pissutigalugu S-ip akilersuutinik pisinnaannginnini ilisimasinnaasimassanngimmagu.

Kiisalu Isumaginninnermi Naammagittaalliuuteqartarfiup oqaatigissavaa nuunnermut uppernarsaat taamaallaat angajoqqaatut oqartussaassuseqartumit atsiorneqarsinnaammat.

 

Aalajangiineq:

X 22. oktober 2010 aaajangiinera allanngortinneqarpoq.

Inussiarnersumik inuulluaqqusillunga 

Naja Joelsen

Siulittaasoq

 

Inatsisit tunngaviusut:

 

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, 3. marts 1994-imeersoq.

 - 4, imm 1Meeqqap pilersorneqarnissaanut akilersuutinik pisinnaatitaasup meeqqat inatsisitigut illersugaanerat imaluunniit aappariinneq pillugu inatsit tunngavigalugu akilersuisussanngortitsineq naapertorlugu qinnuteqaateqarneratigut meeqqap pilersorneqarnissaanut akilersuutit pisortanit siumoortumik tunniunneqarsinnaapput, akilersuutit akilerneqarsimaffissaasa aqaguani, akilersuutit kingusinnerpaamik ullormi akilerneqarfissaanni akilersuisussaatitaasoq akiliisimanngippat.

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Namminersornerullutik Oqartussat nalunaarutaat nr. 33, 26. juli 1994-imeersoq.

§ 4. Meeraq akilersuutinik pisinnaatitaasumi najugaqanngippat meeqqap pilersorneqarneranut kina aningaasartuuteqartarnersoq paasissutissiissutigineqassaaq. Akilersuutinik pisinnaatitaasoq meeqqap pilersorneqarneranut aningaasartuuteqartanngippat meeqqamut akilersuutit pisortanit siumoortumik tunniunneqarsinnaanngillat.