Sags nr. 2012-066320

Meeqqap angerlarsimaffiup avataani ilaqutariinnut inissinneqarsimasup immikkut pisariaqartitsinera tunngavigalugu ikiorneqarnerata sivitsorneqarnissaa pillugu I Kommuni xx. Marts 20xx aalajangiinera naammagittaalliuutigisat Isumaginninnermi Naammagittaalliuuteqartarfiup 30. August 2013 ataatsimiinnermi suliaraa imatullu aalajangiilluni:

Aalajangiineq

Isumaginninnermi Naammagittaalliuuteqartarfiup I Kommuni aalajangiinera allanngortippaa. Tamanna isumaqarpoq aalajangiineq eqqunngitsuusoq, illillu naammagittaalliuutinni taperserneqartutit.

Suliaq aalajangiiffigineqassaaq meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. April 2003-meersoq naapertorlugu.

Nassuiaat:

Suliami takuneqarsinnaavoq illit x ukioqarlutit angerlarsimaffiup avataanut inissinneqartutit ilaqutariinnut massakkut najugaqarfigisannut. Ilaqutariit najugarilikkatit 20xx-imi Danmark-imut nooqatigaatit.

Inissinneqarfigisannit allamut nuutinneqarnissat pillugu inassuteqaammi xx. December 20xx-meersumi atuarneqarsinnaavoq illit angajoqqaarsiavillu akornassinni ataqatigiinnersi ajornartorsiorfiuleriartorsimasoq. Angajoqaarsiavit inooqatiginerit ingerlatiinnarusukkaluarpaat, kisianni maanna kissaatiginagu illit taakkunaniiginnarnissat, pissutigalugu isumaqaramik tapersersorneqarnissamik pisariaqartitannik tunisinnaanak.

Illit pillutit oqaatigineqarpoq siornatigut meeqqat atuarfianni atuartuusimasutit meeqqat ilikkarsinnaanermikkut pisinnaasassatigullu ajornartorsiutillit atuaqatigalugit. Ukiumi atuarfiusumi 20xx-mit 20xx-mut  Nmi ilinniarfianni atuarputit. Atuarfimmi pissutsit akueriniarnerat akuuffiginiarnerallu sapersaatigisimavat, taamaattoq ukioq ilivitsoq suli N atuaqqinnissannut akuerineqarsimallutit. Kisianni atuarfimmi piumasaqaataasut naleqqussarfigiuminaatsikkakkit malinniarnerilu ajornartorsiorfigalugit angerlartiinnarneqarputit xx. September 20xx.

N ilinniarfiannit oqaaseqaammi xx. December 20xx-meersumi ilaatigut atuarneqarsinnaavoq illit inuttut toqqissisimaniarneq sapersaatigigit amerlasuutigut qanoq iliornissatit nalorniffigalugit, taamalu sapilersutut ilisarlutit. Ilinnut matuttarputit qanilliuminaallillutit, aallaqqaataani taamaannerit illersorlugu qanilliniartunik itigartitsisarlutit, sivitsoriartortilluguli tunuarsimaarnermik tamanna taarserlugu. Inuttut toqqissisimanerit erseqqissiartorpoq, soorlu N atuarfianni angerlarsimasutut misigilerlutit, kisianni tassa ilorlikkut qajannarlutit. Suli tapersersorneqarlutit ikorfartorneqarlutillu pineqarnissat annertuumik pisariaqartillugu.

Tamakkua saniatigut oqaaseqaammi atuarneqarsinnaavoq N ilinniarfianniinnerit ilinnut assut unamminarsimasoq. Ullaakkut makinniartarneq ajornartorsiutigisarpat, piffissarlu eqqorlugu takkuttarnissat ajornartorsiutigalugu, aammalu ulloq tamaat makitaarnissat ajornartorsiutigisarlugu. Atuartitsinernut, nerinissanut pisussaaffinnillu isumaginninnermut kiisalu aaqqissuussinernut pinngitsoorani peqataaffigisassanut peqataaniartarnerit ajornartorsiutigisarlugu.

Inuit allat aningaasaataannik paarsisuutitap K-p xx januar 20xx allakkiaani takuneqarsinnaavoq angajoqaarsiatit isumaqartut ineriartorsimasutit, inuusuttutut inuunerit arlalippassuartigut nalinginnaasumik ingerlasimalluni, aammalu uviusaqartarlutit/angutaateqartarlutit.  Kisianni angajoqqaarsiatit isumaqarput kisimiillutit najugaqarnissat sapissagit, pissutigalugu pisinnaanerit amerlasuutigut ukiunnut naleqqiullugu appasimmat.

Ulloq xx. November 20xx L Kommuni illit immikkut pisariaqartitsinerit tunngavigalugu ikiorneqarnerpit sivitsorneqarnissaa pillugu kommunip aalajangiinera akuereqqullugu I Kommune qinnuteqarfigaa, tamanna isumaqarpoq allamut inissinneqarneq. Pisariaqartitsinerit tunngavigalugu ikiorneqarnerpit sivitsornissaanut tunngaviuvoq ulloq unnuarlu angerlarsimaffimmi inunnit immikkut paasisimasalinnit ikiorneqarnissamik pisiariaqartitsinerit.

L Kommune naliliivoq ulloq unnuarlu angerlarsimaffimmi sulisunit immikkut ilinniagalinnit tepersersorneqarnissat anguniarlugu inissinneqassasutit, tassani ullup ingerlarnga aaqqissuulluagaq, malitassat killissallu aalajangersimasut ingerlatsiviussapput, tassami illit tamanna iluaqutigissagit naliliisoqarmat. Kommuni innersuussutigaa illit atoruminaatsunik toqqissisimananngitsunillu atugaqarlutit alliortorsimasutit, sulilu mikisuutillutit sumiginnagaasimallutit. Taamaattumik meeraqatinnut allanut naleqqiullutit artornarnerasunik piumasaqarfiusumi peroriartorsimallutit, taamaammat naliliisoqarpoq sumiginnagaasarsimanitit maaannakkut ineriartornikkut inissisimaninnut sunniuteqartut. Kommuni naliliivoq ukiut kingulliit Danmarkimiinnerit tunngavigalugu illit tassaasutit niviarsiannguaq  annertuunik ajornartorsiutilik, qajannartoq eqqortumik tapersorneqanngikkuit allanut naleqqiullutit navianartorsiornerusoq.

Kommuni allappoq N atuarfianni siumukarnermik takutitsisimasutit, atuarfillu naliliivoq ulloq unnuarlu angerlarsimaffimmi immikkut ilinniarsimasunik sungiusarsimasunillu sullinneqaleruit ineriartoqqinnissannut periarfissagissaarnerulissasutit. Eqqortumik tapersersorneqaleruit inersimajartorninnut iluaqutigissavat, aammalu imminut pilersortunngornissat eqqarsaatigalugu inuussutissarsiortunngornissat siunertaralugu ilinniarnissannut periarfissaqalerlutit.

Iliuusissanut pilersaarut xx. December 20xx-meersoq suliniutissat ataatsimoortumik aaqqissuussat illit inersimasunngornissannut ikaarsaariarnissat ajungitsoq qulakkeersissavaat ilinniarnissaq najugaqarnissamullu sungiussinissaq qitiutillugit. Iliuusissatigut ataatsimoortumik aaqqissuussatigut siunertaavoq najugaqarnissavit, ilinniarnissavit suliffeqarnissavillu paasisaqarfigilluarnissaat kiisalu illit pisinnaasassatigut siuarsaavigineqarnissat, taagorneqartutigut periarfissatit pitsanngorsarlugit.

Aalajangiinermi xx. Marts 20xx pisumi I Kommune angerlarsimaffiup avataanut inissinneqarlutit ikiorneqarnerpit sivitsuiffiginissaa pillugu qinnuteqaat itigartitsissutigaa.

Aalajangiinermi tunngavigineqarpoq angerlarsimaffiup avataanut inissinneqarninnut atatillugu ikiorneqarnerpit sivitsuiffiginissaanik illit 18-inik ukioqalerfissat qaammatinik arfinilinnik sioqqullugu qinnuteqartoqarsimannginnera.

Inatsisitigut tunngavigisanut tunngatillugu kommunip innersuussutigaa meeqqanik inuusuttunillu ikiorsiisarneq pillugu Inatsisartut peqqussutaanni nr. 1-imi, 15. April 2003-meersumi § 27, imm. 3.

Naammagittaalliuutinni xx. Marts 20xx ulloqartumi innersuussutigaat I Kommune inatsisini aalajangersakkamut aalajangersimasumut innersuussinani, tamannami illinnut attuumassuteqanngimmat taarsiullugu isiginiarsimasariaqaraluaraa illit qanoq iliorluni pitsaanerpaamik ikiorneqarsinnaanersutit, taamaalillutit qaquguugaluarnersoq nammineq inuuninnik ajunngitsumik ingerlatsilersinnaanissannut periarfissaqalersinniarlutit. Oqaatigaat  angajoqqaarsiavit aamma L Kommuni illinik ajunnginnerpaamik tapersersuinissartik ikiuinissartillu kissaatigigaat. Kiisalu oqaatigaat  Kalaallit Nunaannut uteqqinnissat kissaatiginagu, Danmakimiiginnarusullutit.

Inatsisitigut tunngavigisat:

Meeqqanik inuusuttunillu ikiorsiisarneq pillugu Inatsisartut peqqussutaanni nr. 1-imi, 15. April 2003-meersumi § 9, imm. 1 aamma 2 nr. 11 malillugit angajoqqaatut oqartussaassuseqartoq aamma meeraq 15-ileereersimasoq akuersiseqqaarlugit ikiorsiissutissaq meeqqap immikkut pisariaqartitsineranut naleqqunnerpaaq kommunalbetyrelsip toqqassavaa, soorlu angerlarsimaffiup avataanut inissinneqarnerata sivitsuiffigineqarnissaa meeqqap immikkut ilinniarsimasunit sungiusarsimasunillu tapersersorneqarluni ikiorneqarnissaa siunertaralugu.

Kommunalbestyrelsi assersuutigalugu aalajangersinnaavoq suliniuteqareernermi malinnaanissamik.

Peqqussummi pineqartumi § 27, imm. 3-mi allassimavoq, imm. 2 malillugu suliniuteqarneq unippat, kommunalbestyrelsi inuusuttoq suleqatigalugu aammalu kingusinnerpaamik angerlarsimaffiup avataanut inissiinerup taamaatinnissaa qaammatinik arfinilinnik sioqqullugu, nassuiassavaa tamatuma kingorna inuusuttoq qanoq tapersersorneqassanersoq.

Naliliineq:

Isumaginninnermi Naammagittaalliuuteqartarfik isumaqarpoq angerlarsimaffiup avataanut inissinneqarnerpit sivitsuiffigineqarneragut immikkut pisariaqartitsinerit tunngavigalugu immikkut ilinniarsimasunit tapersersorneqarnermik sullinneqarnissat pisinnaatitaaffigigit.

Tamatumunnga tunngavigineqarpoq taamatut qinnuteqarnerup pinerata nalaani ikiorneqarnissamik tepersersorneqarnissamillu suli pisariaqartitsinerit, taamaalillutit siunissami ineriartornissannut periarfissinneqarlutit, taamaalillutit inersimasutut inuuneq patajaatsumik ingerlassinnaaniassagakku.

Isumaginninnermi Naammagittaalliuuteqartarfiup pingaarutilittut isigaa ineriartorsimanerit ukiunnut naleqquttumik ingerlasimanngimmat, taamalu maanna suli qajannarlutit allanullu naleqqiullutit sapilernissamut qaninnerullutit. Taamaattumik aaqqissuussamik ulloqarnissamut aalajangersimasunillu killeqarnissamut tapersersorneqarnissat pisariaqartikkit.

Assersuutigalugu isumaqatigiissuteqarsimaguit tamakku eqqortinnissaat ajornartorsiutigisarpat, aamma ataatsimoornerni peqataanissat qanorlu iliorlutit assortuunnerit akerleriinnerillu pinaveersimatinnissaat ajornartorsiutigisarlugit. Aningaasaatitit aqussinnaasanngilatit innarfissallu nakkutigisinnaasarnagu, pissutigalugu ulloq unnuarlu mumingasumik atulersarakkit.

Angerlarsimaffiup avataanut inissinneqarnerpit immikkut ikiorneqarnissamik tapersersorneqarnissamillu pisariaqartitsinerit pillugu sivitsuinissaq qanorlu ikiorneqarneq ittoq pillugu Isumaginninnermi Naammagittaalliuuteqartarfik isummerfiginninnissamut pisinaatitaaffeqanngilaq.

Isumaginninnermi Naammagittaalliuuteqartarfiup kommunip tungaanut oqaatigissavaa peqqussummi § 27, imm. 3-mi qaammatit arfinillit taaneqartut tassanngimmata  immikkut ikiorneqarnissamik tapersersorneqarnissamillu pisariaqartitsineq tunngavigalugu  angerlarsimaffiup avataanut inissinneqarnerup sivitsuiffigineqarnissaanut piffissaliussaq, tassaaginnarlunili inuusuttoq suleqatigalugu inuusuttup 18-inik ukioqalereernerani qanoq iliortoqarnissaanut periarfissanik misissuinissaq isumagalugu kommunimut kaammattuut. Taamaalilluni innuttaasoq immikkut pisariaqartitsineq naapertorlugu ikiorneqarnissamut tapersersorneqarnissamullu periarfissaanit akornuserneqaqqunagu kingusinnerusukkut tamanna qinnutigineqarpat.

Kiisalu oqaatigineqassaaq immikkut ikiorneqarnissamik tapersersorneqarnissamillu pisariaqartitsineq tunngavigalugu angerlarsimaffiup avataanut inissinneqarnermik sivitsuinerup qanoq sivisutigisumik ingerlanissaa peqqussummi killiliiffigineqanngimmat. Nalunaarutikkut ukiutigut killiliisoqarsinnaanngilaq peqqussummi ukiutigut killiliisoqanngimmat.

Aalajangiineq:

Isumaginninnermi Naammagittaalliuuteqartarfiup I Kommune aalajangiinera allanngortippaa illit immikkut ikiorneqarnissamik tapersersorneqarnissamillu pisariaqartitsinerit tunngavigalugu angerlarsimaffiup avataanut inissinneqarnerpit sivitsuiffigineqarnissaanut pisinaatitaalerlutit.

Inussiarnersumik inuulluaqqusillunga

Naja Joelsen

Siulittaasoq

 

Inatsisit toqqammaviit

Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq

- 9. Angajoqqaatut oqartussaassuseqartoq aamma meeraq 15-ileereersimasoq akuersiseqqaarlugit ikiorsiissutissaq meeqqap immikkut pisariaqartitsineranut naleqqunnerpaaq kommunalbestyrelsip toqqassavaa.

- Imm. 2. Kommunalbestyrelsi assersuutigalugu aalajangersinnaavoq

- 1) meeqqamut pissutsinut tunngatillugu isumaginninnermi sullissinikkut ikiorsiinissamik,

- 2) meeraq ulluunerani neqeroorutini, inuusuttut klubbianni, ilinniartitaanermut assigisaanniluunniit peqataassasoq,

- 3) illup iluani, perorsaanermik imaluunniit allatut angerlarsimaffimmi tapersersuinikkut ikiorsiinissamik,

- 4) ilaqutariinnik katsorsaanissamik assigisaanilluunniit tapersersuinissamik,

- 5) meeqqamut, angajoqqaatut oqartussaassuseqartumut aamma ilaqutariinni ilaasunut allanut ulloq unnuarlu paaqqinniffimmi, angajoqqaarsiani assigisaanniluunniit ulloq unnuarlu inissiinissamik neqerooruteqarnissamik,

- 6) ulloq unnuarlu paaqqinniffimmi, angajoqqaarsiani assigisaanniluunniit oqilisaassinertut inissiinissamik neqerooruteqarnissamik,

- 7) meeqqap angerlarsimaffiup avataanut inissinneqarneranut atatillugu angajoqqaatut oqartussaassuseqartup tapersersorteqarnissaanik neqerooruteqarnissamik,

- 8) inuttut siunnersuisorisamik neqerooruteqarnissamik, tak. § 16,

- 9) ineqarfiutigalugu atuarfimmiinnermut efterskole-miinnermulluunniit aningaasatigut ikiorsiinissamik, tamatumunnga angajoqqaatut oqartussaassuseqartoq nammineerluni akissaqanngippat,

- 10) meeqqap angerlarsimaffiup avataanut inissinneqarnissaanik, assersuutigalugu ulloq unnuarlu paaqqinniffimmut imaluunniit angajoqqaarsianut, meeqqap immikkut pisariaqartitsineranut naammassinnissinnaasutut isigineqartumut imaluunniit,

- 11) suliniuteqareernermi malinnaanissamik.

- Imm. 3. Kommunalbestyrelsi aalajangersinnaavoq suliniutit imm. 2-imi taakkartorneqartut malitsigisaannik aningaasartuutinut ikiorsiinissamik, taakkununnga angajoqqaatut oqartussaassuseqartoq nammineerluni akissaqarsimanngippat

 - 27. § 9 aamma § 10 naapertorlugit suliniutit unissapput suliniuteqarnermi siunertaq anguneqarpat, ilanngullugit iliuuseqarnissamik pilersaarummi anguniakkat anguneqarpata, imaluunniit suliniuteqarneq siunertaminik naammassinnikkunnaarpat.

- Imm. 2. Inatsisartut peqqussutaat manna naapertorlugu suliniutit aamma unissapput meeqqap 18-iliinerani. Suliniutit ingerlareersut 18-ileereernermi ingerlaannarsinnaapput, inuusuttoq tamatumunnga akuersippat aammalu iliuuseqarnissamik pilersaarummi anguniakkat aalajangiunneqarsimasut anguneqarnissaat naleqquttumik ilimanaateqarpat.

- Imm. 3. Imm. 2 malillugu suliniuteqarneq unippat, kommunalbestyrelsip inuusuttoq suleqatigalugu aammalu kingusinnerpaamik angerlarsimaffiup avataanut inissiinerup taamaatinnissaa qaammatinik arfinilinnik sioqqullugu, nassuiassavaa tamatuma kingorna inuusuttoq qanoq tapersersorneqassanersoq.