Sags nr. 2011-055247

Aningaasatigut ikiorserneqarnissamik qinnuteqaativit kommunimit aggustip 15-ani 2011 itigartitsissutaanera pillugu maalaarutit, Isumaginninnermi Naammagittaalliuteqartarfiup decembarip 14-ani 2012 suliaraa imalu aalajangiivigalugu:

AALAJANGIINEQ

Kommunip aalajangigaa atortussaatinneqanngilaq taamaammallu kommunip suliaq nangeqqillugu nutaamik aalajangiivigissavaa.

Suliaq siusinaartumik pensionisiat pillugit Inatsisartut peqqussutaat nr. 4, maajip arfineq aappaani 2007 –imeersoq, Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, marsip pingajuani 1994-imeersoq, Meeqqanut akilersuutit il.il. kiisalu meeravissiartaanermi tapiissutit tunniunneqartarneri pillugit Inatsisartut peqqussutaata allanngortinneqarneranik Inatssartut peqqussutaat nr. 3, juunip aqqaneq aappani 1995-imeersoq, kiisalu pisortat ingerlatsineranni suliassat suliarineqartarnerat pillugu Inatsisartut Inatsisaat nr. 8, juunip 13-ani 1994-imeersoq naapertorlugit aalajangiivigineqarpoq.

Nassuiaat:

Suliamut tunngatillugu paasissutissat naapertorlugit marlunnik meeraqarpusi, angajulleq 1994- inuusoq, nukaleq inuusoq 1997-mi. Aapparisimasat 2008 toqukkut qimaguppoq. Angajullermut angajoqqaatut oqartussaaffik apriilip 15-ani 2011 eqqartuussinikkut aalajangiivigineqartumik ilinnut tunniunneqarpoq. Inuup normua naapertorlugu angajulliliat juulip tallimaani 2011 ilinnut nuuppoq. Nukarlermut kina angajoqqaatut akisussaaffimmik tigumminnittuunersoq ilisimatitsissutaanngilaq; inuulli normua najoqqutaralugu decembarip arfineq pingajuani 2011 ilinnut nuussimavoq.

Isumaginninnermi Naammagittaalliuteqartarfik 2011-imi septembarip arfineq pingajuaniilli noqqaasaraluarluni, suliamut tunngatillugu allakkiat annikitsuinnaat pissarsiarai. Illit qinnuteqaatinnik imal. paasissutissanik aningaasaqarnermut-, inuttut namminermut-, inuttullu atukkanut tunngasunik nassaassaqanngilaq.

Kommuni aggustip 15-ani 2011 aalajangiivoq. Kommunip itigartitsinerminut ukiup affakkaartumik meeqqanut akilersuutinik pisartagaqarnerit tunngavilersuutigaa.

Inatsit tunngaviusoq pillugu kommuni ima ilanngiussivoq: ”Itigartitsinermi meeqqanik inuusuttunillu ikiorsiisarneq pillugu Inatsisartut peqqussutaat nr. 1 apriilip 15-ani 2003-meersoq § 9, imm. 3 tunngavigineqartoq naapertorlugu,  meeqqamut pilersuisussaatitaavutit meeqqallu angerlartinneqarnerani tigunissaanut  piareersimasussaallutit. Meeqqanut tapiissutit pillugit Inatsisartut Inatsisaat nr. 9, decembarip arfineq aappaani 2009-meersoq naapertorlugu qinnuteqaativit nassiunneraniit ullualunnguit qaangiunneranni meeqqanut tapisisimavutit. Peqqussummi tassani § 2 naapertorlugu tapiissut meeqqamut pilersuinermut taamaallaat atugassiaavoq. Taamatuttaaq Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, marsip pingajuani 1994-imeersoqnaapertorlugu ukiup affaakkaarlugit meeqqanut tapiissutit meeqqat pisariaqartitaannut taamaallaat atorneqarsinnaanerat erseqqiissaatigineqassaaq.”

Kommunip suna tunngavigalugu meeqqanut akilersuutinik tunniussisarsimanera takuneqarsinnaanngilaq.

Allakkanni aggustip 22-ani 2011 ullulikkani aalajangiineq Isumaginninnermi Naammagittaalliuteqartarfimmut maalaarutigaat. Maalaarutinni inimut nutaamut nutsernermut atatillugu siusinaartumik pensionisiatit atortariaqarsimallugit- taamaattorli pisariaqartitat assigiinngitsut soorlu siniffik, madrassi, oqorutillu akissaqartissimanagit oqaatigaat. Tamatuma saniatigut ima aaamma allapputit: ” PS.: Meeqqanut inuusuttunullu ikiorsiissutit pillugit Inatsisartut peqqussutaata malinneqarsimannginnera maalaarutigaara. Angajulliliara meeqqanut inissiivimmiinnermini pisunik akueriuminaatsunik isigisaqartarsimavoq ilaatigut sulisut meeqqanut/inuusuttunut nakuusernerannik - tassalu nakuusernikkut pillaanernik misigisaqartarsimavoq. Tamakku angajulliliannut tarnikkut misigissutsikkullu ajornartorsiuteqareersumut ajornartorsiornerulersitsipput.

Tamakku tunngavigalugit Kommuni angajulliliara sinnerlugu tarnip pissusaanik immikkut ilisimasalimmik oqaloqateqartarnissaa noqqaassutigigakku, kommunip akissaqartinngimmagu itigartitaavunga.”

Inatsisit tunngaviusut:

Siusinaartumik pensionisiat pillugit Inatsisartut peqqussutaat nr. 4, maajip arfineq aappaani 2007-imeersoq § 13 naapertorlugu siusinaartumik pensionisiallit meeqqanut 18-it inorlugit ukiulinnut pilersuisussaatitaasut meeqqat ataasiakkaarlugit tapisiaqaatigissavaat. Pilersuisussaatitaaneq toqqaannartumik pilersuinerunersoq imaluunniit meeqqanut akilersuutinik akiliisarnikkut eqquutsinneqarnersoq apeqqutaatinnagu, tapiissutit tapiissutigineqartassapput.

Peqqussumi pineqartumi § 15 naapertorlugu Inummut tapit pisariaqartitanik pisut ataasiakkaarlugit naliliineq tunngavigalugu, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut akuersissutigineqartassapput.

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, marsip pingajuani 1994-imeersoq § 4 allannguutillu - Meeqqanut akilersuutit il.il. kiisalu meeravissiartaanermi tapiisutit tunniunneqartarneri pillugit Inatsisartut peqqussutaata allanngortinneqarneranik Inatssartut peqqussutaat nr. 3, juunip aqqaneq aappaani 1995-imeersoq naapertorlugit, meeqqap pilersorneqarnissaanut akilersuutinik pisinnaatitaasup meeqqat inatsisitigut illersugaanerat imaluunniit aappariinneq pillugu inatsit tunngavigalugu akilersuisussanngortitsineq naapertorlugu qinnuteqaateqarnikkut, meeqqap pilersorneqarnissaanut akilersuutit akilerneqarsimaffissaasa aqaguani, akilersuutit kingusinnerpaamik ullormi akilerneqarfissaanni akilersuisussaatitaasoq akiliisimanngippat, akilersuutit pisortanit siumoortumik tunniunneqarsinnaapput.

Peqqussumi pineqartumi § 6 imm. 2 naapertorlugu Angajoqqaat arlaat akilersuisussaatitaasorluunnit toquppat akilersuutit § 5, imm. 1,-imi taaneqartut pisortanit tapiissutitut tunniunneqartalissapput.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, juunip 13-ani 1994-imeersoq § 22 naapertorlugu aalajangiineq allakkatigut nalunaarutigineqaruni suliami peqataasumut tassunga tamakkiisumik tapersiinngippat, aalajangiinermut tunngaviusumik ilaqartinneqassaaq.

Peqqussummi pineqartumi § 24 naapertorlugu Aalajangiinermut tunngaviusumik nalunaarummi inatsisini maleruaqqusat aalajangiinermi tunngavigineqartut innersuussutigineqassapput. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat, tunngaviusumik pissutaasut pingaarnerusut isummat tamakkua atornerannut aalajangiisuunerusut nalunaarummi taaneqassapputtaaq. Tunngaviusumik nalunaarummi pisariaqarpat paasissutissat suliami pissusiviusunut tunngasut aalajangiinermi annertuumik pingaartinneqartut naatsumik erseqqissarneqassapputtaaq.

 

Naliliineq:

Kommuni suliamik ingerlatsinermi aalajangiinermilu inatsimmi aalajangersakkanik naapertuutinngitsunik atuillunilu ilanngussisimavoq.

Aningaasanik ikiorserneqarsinnaanerup naliliiviginera siusinaartumik pensionisiaqarneq pillugu peqqussut tunngavigalugu aalajangiivigineqassaaq.

Kommuni akilersuinissamut isumaqatigiissut tunngavigalugu aatsaat siumoortumik meeqqanut akilersuutinik tunniussisinnaavoq.

Tapiissummik tunniussisussaq toqukkut qimagussimappat akilersuinissamut isumaqatigiissusiortoqarsinnaanngilaq. Taamaattoqartillugu anigaasat taakku amerlaqataat kommunip meeqqanut tapiissutitut tunniutissavai.

Taamaammat Isumaginninnermi Naammagittaalliuteqartarfiup isumaa naapertorlugu Kommuni nuliavit toqukkut qimagutereernerani kukkunikkut meeqqanut akilersuutinik tunniussisimanermigut, inatsisit naapertorlugit suliamik ingerlatsisimanngilaq.

Angajulliliavit tarnip pissusaanik immikkut ilisimasalimmik oqaloqateqartinnissaanut qinnuteqaatit Kommunip aamma suliarissavaa. Aalajangiineq allaganngorlugu piumasaqaatigisinnaavat. Aalajangiinermilu tamakkiisumik ilalerneqanngikkuit tamanna aamma Isumaginninnermi Naammagittaalliuteqartarfimmut maalaarutigisinnaavat.

Meeqqanut inissiivimmi pissutsinut eqqartukkannut tunngatillugu Isumaginninnermi Naammagittaalliuteqartarfiup pissutsinik misissuisitsinissaaq kommunimut inassutigissavaa. Illit meeqqanilu inissiivimmi sulisut meeqqanut nakuusertarnerat nakuusernertalimmillu pillaasarnerat pillugu ilisimatitsinerit tamatumunnga tunngaviuvoq. Isumaginninnermi Naammagittaalliuteqartarfiup taamaaliornerminut Meeqqanut inuusuttunullu ikiorsiisarneq pillugiu Inatsisartut peqqussutaat nr. 1 apriilip 15-ani 2003-meersoq § 4 innersuussutigaa. Aalajangersagaq taanna naapertorlugu meeqqat inuusuttullu atugarisaannik nakkutilliinissaq kommunip pisussaaffigaa. Meeqqat inuusuttullu kommunip avataani ulloq unnuarlu angerlarsimaffinniittut, ornittakkaniittut assigisaanniittullu matumani aamma pineqarput.

 

Aalajangiineq:

Taamaasilluni Kommuni pisortat ingerlatsineranni suliassat suliarineqartarnerat pillugu inatsimmi piumasaqaataasoq tassalu inatsisit tunngaviusut eqqortut ilanngullugit issuaavigalugillu kiisalu pissutsit sorpiaat tunngavigineqartut ilanngullugit, nutaamik aalajangiissaaq.

Inussiarnersumik inuulluaqqusillunga

Naja Joelsen

Siulittaasoq

Inatsisit tunngaviusut: 

Siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq

Meeqqanut tapit

- 13. Siusinaartumik pensionisiallit meeqqanut 18-it inorlugit ukiulinnut pilersuisussaatitaasut meeqqat ataasiakkaarlugit tapisiaqaatigissavaat. Tapiutit tapiutigineqartassapput pilersuisussaatitaaneq toqqaannartumik pilersuinerunersoq imaluunniit meeqqanut akilersuutinik akiliisarnikkut eqquutsinneqarnersoq apeqqutaatinnagu. 

Imm. 2. Pilersuisussaatitaaneq meeqqanut akilersuutinik akiliinikkut eqquutsinneqarpat, aningaasat meeqqanik akilersuutinik tigusisinnaatitaasumut il.il. meeqqanut kiisalu qitornavissiartaarnermi tapinut Inatsisartut peqqussutaanni malittarisassat naapertorlugit tunniuneqartassapput.
Imm. 3. Meeqqanut tapit siusinaartumik pensionisiaqartunut Kalaallit Nunaata avataanut nunassissimasunut tunniunneqartussaanngillat.

 

Inummut tapit

- 15. Inummut tapit pisariaqartitanik pisut ataasiakkaarlugit naliliineq tunngavigalugu akuersissutigineqartassapput, ingerlaavartumik pisartakkatut sivisunerpaamik ukiumut ataatsimut atuuttussatut aalajangersarneqartunik imaluunniit immikkut pisariaqartitanut matussutissatut ataasiaannartumik ikiorsiissutitut. 

- Imm. 2. Inummut tapiutit utertillugit akileqquneqarsinnaapput:

- 1) illersorneqarsinnaanngitsumik aningaasanik aqutsinerlunneq pissutigalugu inummut tapiutit tunniunneqarpata, imaluunniit

- 2) siusinaartumik pensionisialik inummut tapiutinik pisartagaqartoq kingusinnerusukkut aningaasanik, piffissamut pineqartumut inummullu tapiutit assinganik siunertaqartumik pissarsisimappat.

- Imm. 3. Utertillugit akileeqqusineq aatsaat piumasarineqarsinnaavoq, siusinaartumik pensionisialimmut tapinik tunniussinermut atatillugu utertitsisussaatitaaneranik ilisimatinneqarsimappat.

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat nr. 2, 3. marts 1994-imeersoq.

 

Kapitali 2.
Meeqqap pilersornegarnissaanut akilersuutinik pisortanit siumoortumik tunniussisarneq

- 4. Meeqqap pilersorneqarnissaanut akilersuutinik pisinnaatitaasup meeqqat inatsisitigut illersugaanerat imaluunniit aappariinneq pillugu inatsit tunngavigalugu akilersuisussanngortitsineq naapertorlugu qinnuteqaateqarneratigut meeqqap pilersorneqarnissaanut akilersuutit pisortanit siumoortumik tunniunneqarsinnaapput, akilersuutit akilerneqarsimaffissaasa aqaguani, akilersuutit kingusinnerpaamik ullormi akilerneqarfissaanni akilersuisussaatitaasoq akiliisimanngippat.

Imm. 2. Akilersuutit pisortanit siumoortumik tunniunneqarsinnaasut tassaapput § 5-mi nalinginnaasumik amerlassusilerneqarsimasut, apeqqutaatinnagu pineqartumi annertunerusumik akilersuinissamut aalajangiisoqarsimanera.
Imm. 3. Meeqqap pilersorneqarnissaanut akilersuutit meeqqap 18-inik ukioqalernissaata tungaanut pisortanit siumoortumik tunniunneqarsinnaapput, taamaattorli sivisunerpaamik meeqqap 18-inik ukioqalernerata katinnerataluunniit tungaanut.

- 5. § 4, imm. 2-mi, akilersuutit nalinginnaasut imatut nalinginnaasutut amerlassusilerneqarput:
1) Akilersuutit ingerlaavartut nalinginnaasut ukiumut 8.247 kr.
2) Anaanaasup erninissaa qaammatinik marlunnik sioqqullugu ernineralu qaammammik ataatsimik kingoqqullugu pilersorneqarnissaanut akilersuutit, qaammammut 548 kr.
3) Erninermut atatillugu aningaasartuutinut akilersuutit 519 kr.
4) Meeqqap kuisinneranut atatillugu akilersuutit 691 kr.
5) Meeqqap apersortinneranut atatillugu assigisaanulluunniit akilersuutit 2.749 kr.
Imm. 2. Akilersuutit imm. 1-imi taaneqartut Kalaallit Nunaanni Naatsorsueqqissaartarfiup kisitsit akinut iluarsiissutaasartoq saqqummiuttagaa tunngavigalugu iluarsineqartassapput (naleqqersuut januar 1984 = 100). Januarimi julimilu akinut iluarsiissut tunngavigalugu ukiut tamaasa 1. april aamma 1. oktober iluarsiissuteqartoqartassaaq, taamaalilluni akilersuutit 3%-imik qaffanneqartassallutik appartinneqartassallutilluunniit akinut iluarsiissutissaq 100 tunngavigalugu pointit ilivitsukkuutaat pingasut qummut ammulluunniit angugaangagit.

Imm. 3. Akilersuutit akunnaallineqartassapput kronimut ilivitsunut qaninnermut, taamaattorli imm. 1, nr. 1 tunngavigalugu meeqqap pilersorneqarnissaanut akilersuutit nalinginnaasut suli akunnaallineqartassallutik aningaasanut 12-imik agguarneqarsinnaasunut qaninnerpaanut.
Imm. 4. Akinut iluarsiissut najoqqutaralugu iluarsiissutit atuutilissapput akilersuutinut 1. april aamma 1. oktober tunniunneqarsinnaalersunut. Imm. 1, nr. 1 tunngavigalugu meeqqap pilersorneqarnissaanut akilersuutit ingerlaavartumik tunniunneqartartut nalinginnaasut ukiup af f aani tullermi tunniunneqarsinnaalerf imminni aatsaat aaqqiivigineqartassapput.
Imm. 5. Isumaginninnermut Suliffeqarnermullu Pisortaqarfiup ukiut tamaasa 1. april aamma 1. oktober imm. 1 tunngavigalugu pilersuinissamut akilersuutit amerlassusiinik atuuttunik tamanut saqqummiussisassaaq.

Kapitali 3.
Pilersornegarnissaanut akilersuutit pisortanit tapiissutitut tunniunneqartartut

- 6. Ataataasumik aalajangiisoqarsimatinnagu imaluunniit akilersuisussaatitsisoqarsimatinnagu meeqqat inatsisitigut illersugaanera imaluunnit aappariinneq pillugu inatsit tunngavigalugu akilersuutit § 5, imm. 1,-imi taaneqartut pisortanit tapiissutitut tunniunneqartassapput. Kisermaaq meeravissiartaarpat tamanna aamma atuutissaaq.

Imm. 2. Angajoqqaat arlaat akilersuisussaatitaasorluunnit toquppat akilersuutit § 5, imm. 1,-imi taaneqartut pisortanit tapiissutitut aamma tunniunneqartalissapput.

Meeqqanut akilersuutit il.il. kiisalu meeravissiartaanermi tapiisutit tunniunneqartarneri pillugit Inatsisartut peqqussutaata allanngortinneqarneranik Inatssartut peqqussutaat nr. 3, 12. juni 1995-imeersoq.

 -  1

Meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsiartut peqqussutaanni nr. 2-mi 3. marts 1994-imeersumi makku allannguutigitinneqassapput:


  1. § 4, imm. 2 imatut oqaasertalerneqassaaq:
    "Imm. 2. Akilersuutit pisortanit siumoortumik tunniunneqarsinnaasussat tassaapput nalinnginnaasumik akilersuutit ataani taaneqarsimasut, amerlanerusunik akilersuisussaatitaaneq aalajangersarneqarsimagaluarpalluunniit:
    1) Nalinginnaasumik akilersuutit ingerlaavartut.
    2) Anaanap erninera qaammatinik marlunnik sioqqullugu aamma qaammammik ataatsimik kingoqqullugu akilersuutit.
    3) Erninermut atatillugu aningaasartuutinut akilersuutit.
    4) Meeqqap kuisinneranut atatillugu akilersuutit.
    5) Meeqqap apersortinneranut tassungaluunnit assi-ngusumik pisoqarneranut akilersuutit.
  2. § 5, imm. 1 aamma 2 imatut oqaasertalerneqassapput:
    "§ 5. Nalinginnaasumik akilersuutit § 4, imm. 2-mitaaneqartut aningaasanut inatsimmi aalajangersarneqartassapput.
    Imm. 2. § 4, imm. 2-mi meeqqanut akilersuutit taaneqartutut atuuttut Isumaginninnermut Suliffeqarnermullu Pisortaqarfiup 1. aprilimi aamma 1. oktoberimi tamanut nalunaarutigisassavai."
  3. § 5, imm. 3-5 atorunnaarput.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq.

Kapitali 6.
Tunngavigisat il.il.

- 22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

§ 24. Aalajangiinermuttunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.
Imm. 2. Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.