Sags nr.2012-072255

Nukappiaqqap inuusup 19. Juli 2012 angajoqqaarsianut inissinneqarnissaa pillugu Kommunia-p aalajangiinera naammagittaalliuutigisarsi Isumaginninnermi Naammagittaalliuuteqartarfiup ulloq 19. April 2013 suliaraa imatullu aalajangiilluni

Aalajangiineq

Kommuni-p aalajangiinera allanngortinneqarpoq. Tamanna isumaqarpoq kommunip aalajangiinera eqqortuunngittoq, taamalu ilissi naammagittaalliuutissinni taperserneqartusi.

Suliaq aalajangiiffigineqassaaq meeqqanik inuusuttunillu ikiorsiisarneq  pillugu Inatsisartut peqqussutaat nr. 1, 15. April 2003-meersoq aamma meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 32, 14. December 2006-meersoq naapertorlugit.

Nassuiaat:

Allakkatigut 28. August 2012 ullulerneqartutigut Isumaginninnermi Naammagittaalliuuteqartarfimmut saaffiginnippusi naammagittaalliuutigalugu nukappiaqqamut B-mut, J-ip erneranut angajoqqaarsianngornissinnut atatillugu aningaasarsiaqartitaannginnersi.

Suliami takuneqarsinnaavoq illit K 22. Juni 2012 J-imit saaffigineqarsimasutit, taassuma paaserusussimallugu meerartaassani inunngorpat ilissinnut paarisassanngortissinnaanerlugu.

Illit K aamma L attavigineqareerlusi J taassumalu sullissisua naapeqatigaasi isumaginninnermut allaffeqarfimmi. Sullissisup oqaatigaa meeqqamik pineqartumik angajoqqaarsiaasussaagaluit meeqqamik paarisaqarnissamut akuersissummik tunineqarsinnaasimanngitsut. Taamatuttaaq aamma ilaqutariit Sisimiormiut nuna tamakkerlugu nalunaarsuutit malillugit nassaarineqarsimasut akuersissummik tunineqarsinnaasimanngillat.

J-ip sullissisumit aperineqarluni oqaatigimmagu nammineq aappaariinniik meeqqamik paarsaqarnissamut piukkunnartunik soqutiginnissinnaasunik nalunngisaqarluni, taamaalilluni oqaatigineqartutut ilissi saaffigineqarlusi.

Ataatsimeeqatigineqarnissinni nalunaarpusi meeraq inunngorpat angajoqqaarsianngornissassinnut akuersillusi. Meeqqap inunngorfissaatut naatsorsuutigineqarpoq 13. Juli 2012.

Ulluinnarni aqqusinermi naapittarnissi saniatigut ilissi J-lu ilisarisimaqatigiinngilasi.

Ulloq 25. Juni 2012 J-nip Kommunimut atugassaq pisinnaatitsissut atsiorpaa, tassuuna uppernarsarlugu meeqqap piffissami sivisussusiligaanngitsumi angerlarsimaffiup avataanut inissinneqarnissaa uppernarsarlugu. Pisinnaatitsissummissaaq takuneqarsinnaavoq meeqqamik angerlartitseqqinnissaq aatsaat pisinaassasoq isumaginninnermi ataatsimiititaliamut saqqummiussereernikkut tassanilu akuersissuteqartoqareerneratigut.

Tamatumunnga peqatigitillugu J-ip kommuni pisinnaatippaa meeqqamut tunngassutilinnik tamanik pissarsiniarsinnaanermut.

Ulloq 25. Juli 2012 meeqqamut suli inunngunngitsumut angajoqqaarsianngornissamut uppernarsaat ilissinnut tunniunneqarpoq, tamanna sioqqullugu angajoqqaarsianngornissamut uppernarsaat  isumaginninnermi ataatsimiititaliap siulittaasuata ulloq 22. Juni 2012 akuersissutigereersimasaa.

Uppernarsaammi takuneqarsinnaavoq meeqqamik paarsaqarnermut aningaasarsiaqartitsisoqassanngitsoq.

Kommuni-p allakkatigut 27. November 2012 ullulerneqartutigut Isumaginninnermi Naammagittaaliuuteqartarfimmut oqaatigaa sulissisup J oqaloqatiginissaanut ulloq 22. Juni 2012 aggersarsimagaa, aperisimallugulu naartua inunngorpat paaqutarinnittussanik ilaqutariinnik nalunngisaqarnersoq. J ilisimatinneqarpoq ilaqutariit angajoqqaarsiassatut piukkunneqaraluartut Ilaqutariinnut Ataatsimiititaliamit akuerineqarsimanngitsut. J ilissi taavaasi naartunermi nalaani oqarsimasusi meeraarannguamik assut tigummisaqarusuttusi.

Allakkani takuneqarsinnaavoq sullissisup ilissinnik ilisarisimannittup oqarasuaatissi normua pigigaa, tamannalu nalinginnaasoq illoqarfimmi mikisumi najugallit akornanni. Sullissisup oqarasuaatissi normua isumaginninnermi allaffeqarfiup oqarasuaataanut ikkussimavaa. Sullissisup illit K oqaloqatigisimanngilaatit, J-mulli normorsi tunniussimallugu taassuma nammineq illit oqaloqatigissammatit.

Allakkani allassimavoq taamatut pineq ilissi isumaqartissimagissi tassa meeqqamik paarsaqarnissarsi naammassineqarsimasoq.

Inatsisitigut tunngavigisat:

Meeqqanik inuussuttunillu ikiorsiisarneq pillugu Nammínersornerullutik Oqartussat nalunaarutaanni nr. 32-imi, 14. December 2006-imeersumi § 18, imm. 2-mi allassimavoq angajoqqaarsianut nalinginnaasunut paaqqinninnersiutit qaammammut kingumoortumik tunniunneqassapput. Paaqqinninnersiutit angajoqqaarsiaasunut akissarsiassatut taamaallaat eqqarsaataapput meeqqap inuusuttulluunniit pilersorneranut atugassaanatik. Paaqqinninnersiutit annertussusaat aningaasat isumaginninnikkut tunniunneqartartut atuuttut pillugit Ilaqutariinnermut Pisortaqarfiup kaajallaasitaani nalunaarutigineqartarput.

Nalunaarummi § 20 malillugu pisort aqqutiginagit nammineq aaqqissuutamik ilaqutariinnut inissiinermi paaqqinninnersiuteqartitsisoqartanngilaq.

Naliliineq:

Isumaginninnermi Naammagittaalliuuteqartarfik isumaqarpoq meeqqamik B-mik tigusinersi tunngavigalugu paaqqinninnersiuteqarnissamut pisinnaatitaasusi.

Aalajangiinermut tunngaviuvoq meeqqamik angajoqqaarsiassanut inissiineq  Kommunimiit isumagineqarsimanera.

Isumaginninnermi Naammagittaalliuuteqartarfiup matumani pingaartutut isigaa ilissi meeqqallu arnaata ilaqutariinnginnersi, aammalu meeqqap inissinneqannginnerani immissinnut ilisarisimaqatigiissimannginnersi. Illoqarfimmi immissinnut takusarsimavusi, ilissilu oqaatigisarsimavarsi meeraarannguamik tigummisaqarusullusi, kisianni taamatut oqaasiinnarmik pineq meeqqamik ilaqutariit akunnerminni isumaqatigiinnerat tunngavigalugu aaqqiinertut isigissallugu naammanngitsoq.

Kiisalu Isumaginninnermi Naammagittaalliuuteqartarfiup ilissi meeqqap arnaanik kommunimi sullissisup sulissutigisaanik kommunip allaffiani naapeqatigiittarsimanisi pingaarutilittut isigai. Tamatuma saniatigut Kommuni-p meeqqap arnaa  meeqqap angerlarsimaffiup avataanut inissinnissaanut atatillugu pisinnaatititsissummik qinnuigisimavaa, soorlu aamma kommuni siusinnerusukkut angajoqqaarsiassanik ilaatigut nuna tamakkerlugu atuuttut naluaarsuutit aqqutigalugit ujaasisimasoq.

Aamma Isumaginninnermi Naammagittaalliuuteqartarfiup pingaartissimavaa meeqqap angajoqqaarsiassanut inissinneqarnissaanut ilissi anaanaasorlu naapeqqaarnissinni akuersissut isumaginninnermi ataatsimiititaliap siulittaasuanit akuersissutigineqarsimanera, tassa ullormi 22. Juni 2012.

Taamaattumik meeqqamik paarsinersiuteqarnissamut pisinnaatitaavusi kingumoortumik ulloq meeqqap ilissinnut inissineqarfia aallarnerfigalugu.

Aalajangiineq:

Taamaalilluni Kommuni-p aalajangiinera allanngortinneqarpoq. Allanngortitsineq malillugu ilissi meeqqamik paasinersiuteqarnissamut pisinnaatittalerlusi.

Inussiarnersumik inuulluaqqusillunga

Naja Joelsen

Siulittaasoq

Inatsisit tunngaviusut:

 

Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq

 

Kommunalbestyrelsimit ilaqutariinnut inissiineq

- 18. Ilaqutariit inuussutissarsiutigalugu paarsisartut tassaapput ilaqutariit paarsisartut, meeqqanut annertuumik eqqarsartaatsimikkut ajoquserneqarsimasunut imaluunniit meeqqanut annertuumik timimikkut eqqarsartaatsimikkulluunniit innarluutilinnut isumaginninnissamut immikkut tunngavissiisumik isumaginninnikkut sullissinissamut ilinniakkamik tunuliaqutallit assigisaanilluunniit inuussutissarsiornermi misilittagallit.

- Imm. 2. Angajoqqaarsiat minnerpaamik aappaata meeqqamik ataatsimik arlalinnilluunniit angerlarsimaffimmi paarsineq ulloq tamaat suliffigissavaa.

- Imm. 3. Ilaqutariinni inuussutissarsiutigalugu paarsisartuni angajoqqaarsiat tamarmik angerlarsimaffiup avataani inuussutissarsiutigalugu suliffeqarnissaat immikkut illuinnartunik pisoqartillugu kommunalbestyrelsi akuerisinnaavaa.

- 19. Ilaqutariit nalinginnaasumik paarsisartut tassaapput ilaqutariit angerlarsimaffimminni meeqqanik paarsisartut.

- Imm. 2. Ilaqutariit paarsisartut paarsinissamik suliassaq nalinginnaasumik ulloq tamaat suliffiginngilaat angerlarsimaffiullu avataani inuussutissarsiutigalugu suliffeqarsinnaallutik.

 

Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 32, 14. december 2006-imeersoq

 

- 17. Meeqqap inuusuttulluunniit ilaqutariinnut inuussutissarsiutigalugu paarsisartunut inissinneqarnerani paarsinissamut isumaqatigiissusiortoqassaaq, tassani paarsinermi pissutsit pillugit piumasaqaatit isumaqatigiissutaasut ersersinneqassallutik. Tamatuma saniatigut iliuusissanik pilersaarusiaq meeqqap inuusuttulluunniit ilaqutariinnut paarsisartunut inissinneqarnerani siunertanik imalik allaganngorlugu ilaqutariinnut paarsisussanut tunniunneqassaaq.

- 18. Ilaqutariinnut inuussutissarsiutigalugu paarsisartunut aningaasarsiat atorfininnermilu pissutsit allat kattuffimmut naleqquttumut isumaqatiginninniarsinnaatitaasumut isumaqatigiissutit malillugit aalajangersarneqassapput. 

- Imm. 2. Angajoqqaarsianut nalinginnaasunut paaqqinninnersiutit qaammammut kingumoortumik tunniunneqassapput. paaqqinninnersiutit angajoqqaarsiaasunut akissarsiassatut taamaallaat eqqarsaataapput meeqqap inuusuttulluunniit pilersorneranut atugassaanatik. Paaqqinninnersiutit annertussusaat Aningaasat isumaginninnikkut tunniunneqartartut atuuttut pillugit Ilaqutariinnermut Pisortaqarfiup kaajallaasitaani nalunaarutigineqartarpoq.

- 19. Perorsaanissaq isumassuinissarlu eqqarsaatigalugit angajoqqaarsiat immikkut ittumik suliniuteqarnissaat piumasaqaataappat akissarsiassat 50%-imik imaluunniit 100%-imik kommunalbestyrelsip qaffassinnaavai.

- Imm. 2. Nukinginnartumik sivikitsumillu inissiinermi paaqqinninnersiutit qaffallugit tunniunneqassapput. Nukinginnartumik inissiisoqartillugu paaqqinninnersiutit Aningaasat isumaginninnikkut tunniunneqartartut atuuttut pillugit Ilaqutariinnermut Pisortaqarfiup kaajallaasitaani nalunaarutigineqartarpoq.

- Imm. 3. Nukinginnartumik inissiinermi paaqqinninnersiutit sivisunerpaamik meeqqamut ataatsimut ullunut unnuanullu 30-nut tunniunneqarsinnaapput, tamatuma kingorna paaqqinninnersiutit nalinginnaasumik paaqqinninnersiutinut appartinneqassapput.

- 20. Nammineq aaqqissuutamik ilaqutariinnut inissiinermi paaqqinninnersiuteqartitsisoqartanngilaq.

- 21. Meeqqap inuusuttulluunniit nerisaqarneranut, kaasarfimmiussaqarneranut aamma atisassaqarnissaanut aningaasartuutinut matussutissanik ilaqutariinnut paarsisunut kommunalbestyrelsi aningaasanik tunniussissaaq. Aningaasat tunniunneqartussat Ilaqutariinnermut Pisortaqarfimmit aalajangerneqassapput.

- Imm. 2. Nerisaqarnersiutit, kaasarfimmiussat atisassarsiutissallu isumaginninnermi aningaasat tunniunneqartartut atuuttut pillugit Ilagutariinnermut Pisortaqarfiup kaajallaasitaatigut tamanut nalunaarutigineqartarput.