2011-049172

Isumaginninnermi naammagittaalliuteqartarfiup ulloq 13. april 2012 naammagittaalliutersi suliarisimavaa Kommune-p aalajangigaa ulloq 4. april 2011-imeersoq tunngassuteqartoq  qitornarsiartaarnissamut akuersissummut tamannalu tunngavigalugu ima aalajangiilluni

AALAJANGIINEQ

Isumaginninnermut Naammagittaalliuteqartarfiup allanngortippaa Kommenip aalajangiinera. Isumaqarporlu Kommunip aalajangiussaa eqqunngitsuusoq. Taamaalillusi maannamiit naammagittaalliutersi taperserneqarluni.

Kommune-p taamaattumik akuerissavaasi qitornarsiartaarniarlusi akuersissummut, qinnuteqaatigisimasassinnut.

Inatsisit tunngavilersuutaasut tassaapput Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq aammalu Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 17, 1. juli 2003-meersoq.

Qulaajaaneq:

Suliami pineqartumiit erserpoq, inooqatigiittusi. Marluullusi inooqatigiinissinni qitornaqanngilasi, kisianni illit T erneqarputit 16-inik ukiulimmik, ilissinni najogaqartumik. Taassuma saniatigut marlunik inersimasunik qitornaqarlutit.

Pasissutissiinissigut ersersipparsi, inooqatigiilerlusi ataatsimoorussassinnik ineqatigiilersimasusi 7. oktober 2010-imi, inunnullu nalunaarsuiffik naapertorlugu suli maanna ineqatigiillusi.

Ulloq 13. marts 2011 Kommune-p qinnuteqaasiorfigaarsi qitornarsiartaarnissamut akuersissummik piumasaqarlusi A qitornassaanut.

Qinnuteqaammi ilanngunneqarpoq, illit, T ilinniarsimasuusutit p-tut aammalu atorfeqarlutit. Illit, B suliffeqarputit suliffeqarfimmi X. Ilaqutariinnissinnut attuumassuteqartunut ilanngullugit ilisimatitsissuteqarsimavusi, ernerit L kinguaassiutitigut innarlerneqartarsimasoq ataataminiit atornerlunneqarluni, taamaattumik illit L pisariaqartissimallusiuk ikiorserneqarnissaq ilaqutariinnut ilitsersortimiit aammalu tarnit pissusaannik ilinniarsimasumiit.

Ilisimatitsissutigisimavarsilu, imigassamik atuisarlusi, ikiaroornartumilli atuisuunasi.

Suliap allassimaffia (rapport) naapertorlugu 2. juni 2009-immersoq ilagutariinnut ilitersortimiit, O aammalu tarnit pissusaannut ilinniarismasumiit C-imiit saqqummiunneqarpoq ilinnut tunngasoq, T, pisariaqartitsisutit tapersersorneqarnissamik aammalu kaammattorneqarnissamik uani eqqarsaatigalugit akisussaaffimmik tigusinissamut.

Tassannga suliap allassimaffiani aamma erserpoq, qitornannut akisussaaffimmik misigisimanermik pigisaqartutit tamannalu aamma annertusarneqarsimasoq ilaqutariinnut ilitsersortimut attaveqartarninni.

Suliap ingerlanneqarnera tunngavigalugu, Kommune-p paasissutissanik piniarsimavoq narkorsamiit paasissutissanik aammalu pinerlussimanermut allattorsimaffimmiit.

Pinerlussimanermut uppernarsaataasartumi erserpoq, illit B 10. oktober 2008-imi pineqaatissinneqarsimasutit eqqartuussummit pinerloqqinngikaanni naammassineqartussamit akiliisinneqarsimallutillu 2000 kr.-inik pinerluttaalisitsinermut inatsimmut § 60-imut persuttaasimanermut tunngassuteqartumik unioqqutitsisimaninnut, taannalu misiligummik kinguneqarluni ukiuni marlunni.

Kommunip aalajangiussaani 4. april 2011-imi qinnuteqaatigisassinnik itigartinneqarpusi qitornarsiartaarnissamik akuersissummut.

Aalajangiussaq tunngavilersorneqarpoq, illit B 10. oktober 2008-imi pineqaatissiissummik eqqartuunneqarsimagavit persuttaasimanermut. Kommunip tunngavilersuinermini una siunnerfigaa, paasinarsippat, taanna qinnuteqartoq, qitornarsiartaarnissamut akuersissummik taassumalluunniit katissimasaa/inooqataa pinerlussimannginnissamut uppernarsaammik allagartaqanngippat, kommune immikkut ittumik naliliissasoq, qitornarsiartaarnissamut qinnuteqaammut akuersissummik tunniussisinnaanissamut. Pinerlussimanermullu allagartami takussutissaqarpat, qinnuteqartoq inoqatiminut persuttaasimappat imaluunniit inoqatiminut persuttaanissamik siorasaarisimappat, kinguaassiutitigut innarliinikkut atornerluisimappat imaluunniit assigisaanik tamakkununnga tunngassuteqartunut, taava naliginnaasumik qitornarsiartaarnissamut akuersissummik qinnuteqarnermi itigartitsissuteqartoqartariaqartoq.

Kommunilu tunngavilersuummut innersuussaqarpoq § 17-imut Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersumut.

Naamagittaalliummi 7. april 2011-imeersumiit ilisimatitsissuteqarpusi, qinnuteqaatersi qitornarsiartaarnissamut akuersissut unitsissimanngikkissi siunertaralugu qitornavissartaariumallugu. Tassannga innersuussaqarlusi, illit B ukiut marluk iluanni misiligutaasumi pinerluttaalisitsinermut inatsisinik nataamik unioqqutitsisimannginnerit.

Pineqaatissinneqarnermut tunngatillugu ilisimatitsissutigineqarsimavoq, persuttaaneq pisimammat julefrokosternerup nalaani aammalu peqqutaasoq tassaammat, inooqatigisimasat ukiuni 15-ini, suliffiit peqqutaalluni sivisunerusumik takusimanagu, ikiaroornartumik atornerluinermut pulaqqissimammat.

Illit, B ilisimatitsissutigisimavat, ullut suliffiit naatsorsorneqarneranni suliffigisimagitit 2007-imi ullut 272-it, 2008-imi sulisimallutit ullut 228-it aammalu 2009-imi sulisimallutit qaammatini arfinilinni (6) piffissami 4. april ammalu 20. oktober 2009 tikillugu. Naammagittaallíummittaaq erserpoq, kingumut imminut tatigineroqqilersimanerit timersortalersimallutillu, kingumullu atorfigisimasat uterfigeqqissimallugu asarnermut naliliisartutut, taanna unitsittariaqarsimagakku pineqaatissinneqarnerit peqqutigalugu.

Ilaatigut ilaaffigimavatit peqatigiiffilerinermut pikkorissarnerit aammalu pinerlunnaveersaartitsinernik suliaqartarsimallutit meeqaanut inuusuuttuaqqanullu.

Meeqqap pineqartup anaanaa suliamut atatillugu paasissutissiisimavoq, siusinnerusukkut naapinnikuusimallusi, attaveqatigiittarsimallusilu, taamaattumillu nammineq toqqissisimanaralugu, qitornaanut angajoqqaarsianngussagussi.

Inatsisitigut tungavilersuutit:

Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq § 17 naapertorlugu. Kinaluunniit meeqqamik ilaqutariinni paarisassamik tigusisinnaanngilaq kommuni ilaqutariit paarsisussat najugarivitaat tamatumunnga allaganngorlugu akuersissuteqaqqaartinnagu.

Peqqussummilu § 17 Imm. 2. naapertorlugu paarsinissamik akuersissummik qinnuteqartoqarnerani qinnuteqartoq taassumalu aappaa inooqataaluunniit pinerluuteqarsimanermut nalunaarsuiffimmit takussutissiamik takutitsiissaaq. Ilaqutariit paarsisussat angerlarsimaffianni pissutsit perorsaanissamut aamma peqqinnissamut tunngatillugu isumannaatsuunersut kommunalbestyrelsi naliliissaaq.

Inatsisartut Peqqussutaani siunnersuutip nassuiaataani ima allassimasoqarmat, paasinarsisimappat paarsinissamik akuersissummik qinnuteqartoq taassumaluunniit aappaa / inooqataa allagartamik pillagaasimanermik imaqanngitsumik takussutissiisinnaanngitsut, kommuni ataasiakkaani naliliissaaq paarsinissamik akuersissummik tunisisoqarsinnaanersoq. Pillagaasimanermi allagartamiippat qinnuteqartoq inoqatiminut persuttaasimasoq imaluunniit persuttaanissamik sioorasaarisimasoq, kinguaassiutitigut atornerluisimasoq assigisaannilluunniit pissutsinik ittoqartoq, nalinginnaasumik paarsinissamik akuersissummik tunniussisoqartariaqanngikkaluarpoq.

Inatsimmi § 13 imm. 4 Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaanni nr. 32, 14. december 2006-imeersumi pinerluuteqarsimasunik nalunaarsuiffimmit allakkiamik ilaqutariinni paarsisussani najugaqartut tamaasa kommunalbestyrelsip piumaffigissavai, akuersissuteqartoqarsinnaanngilarlu ilaqutariinni paarssisussani najugaqartut akornanni inunnut ulorianaatilimmik pinerlussimasutut pineqaatissiisoqarsimappat.

Oqaaseqaasiornerata assigaa § 9 imm. 4-mi siusinnerusukkut nalunaarummi, naapertorlugu inatsisip tunngavilersuuta.

Inatsisip nassuiaataani erserpoq, sakkortuumik pinerluttoqarsimatillugu inunnut ulorianaatilimmik, soorlu ukunannga, kinguaassiutitsigut innarliilluni atornerluinikkut meeqqanut minnerusunut, pingitsaaliinikkut imaluunniit annertunerusumik persuttaanermi, naliginnaasumik siunnerfiussammat qitornarsiartaanissamut akuersissummik tunniussisoqartariaqanngitsoq.

Maanna pinerluttaalisitsinermut inatsimmi § 129-imi ersermat, inissiisarfimmi inissitsinissamut eeqartuussissut utaqqisitaq atorneqarsinnaavoq, iliuuseqartup annertunerusumik inatsisinik unioqqutitseqqinnginnissaanut nammassorinarpat aamma inatsisinik unioqqutitsinerup sakkortussusaa pineqaatissamik tassannga atuinissamut akerliunngippat.

Taassanngalu atatillugu una ilanngunneqarluni, pineqaatissap naammassineqarnissaa inatsisip immikkoortua 2 naapertorlugu atorunnaassallunilu misiligutaasumik piffissarititaq gaangiuppat

Naliliineq:

Isumaginninnermut naammagittaalliuuteqartarfiup aalajangerpaa, Kommune-mut qitornarsiartaarnissamut akuersissummik qinuteqaatersi qinnuteqaammut A qitornanut akuersissutigineqassasoq. 

Naliliinermut tunngavilersuutigineqarpoq, ulluinnarni inuunissinni aalajaatsumik ingerlakkassiuk, illit T ilinniarsimasuugavit suliffeqarlutillu, sungiusimallugulu meeqqat najornissai. Aalajaatsumik isertitaqarpusi inigisassinnilu inissaqarluarluni, meeraaqqamittaaq inissaqartitsisumik.

Isumaginninnermut naammagittaalliuuteqartarfiup aammattaaq naliliinermini isiginiarpaa, inersimasuugassi akisussaaffeqartut, illillu ingammik, T eqqummaariffigigakkit ajornartorsiutaasinnaasut allat inissisimaffigalugulu ikiortissamik ujartuisinnaanissaq, pisariaqalersillugu.

Isumaginninnermut naammagittaalliuuteqartarfiup una eqqumaffigaa, illit B 2008-imi pineqaatissinneqarsimasutit eqqartuussummit pinerloqqinngikaanni naammassineqartussamit persuttaasimaneq tunngavigalugu, tamannalu ima isumaqarluni, taanna tunngavigalugu naliginnaasumik qitornarsiartaarnissamut akuersissummik qinnuteqaammut itigartitsissumik tunineqarnissamik.

Isumaginninnermut naammagittaalliuuteqartarfik maannakkumut naliliivoq, § 17 imm. 2 Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq naapertorlugu mattussivinngitsoq, piffinni aalajangersimasumik immikkuullarissuni taassuma peqqussutip isiginiarneqannginnissaa.

Una ersermat peqqussutip nassuiaataani, kommune pisuni ataasiakkaani nalileeqqissaartarnissaa pisariaqartinneqartassammat soorlu aamma ersertoq mattunneqavinnissaq qitornarsiartaarnissamut akuersissummut tunngavippiaanngimmat persuttaasoqarsimanikkut pisoqarsimanera il.il. Peqqussutip nassuiaataani una oqaaseq ersermat "naliginnaasumik pisumi" qitornarsiartaanissamut akuersissummik tunniussisoqarsinnaangitsoq.

Una innersuussutigaarput, pineqaatissinneqarsimanerit eqqartuussummit pinerloqqinngikaanni naammassineqartussaanera peqqutigalugu, naammassineqarsimammallu nutaamik pinerluuteqaqqissimannginnerit tunngavigalugu malitsigisillugulu, ilaqutariittut ilissi ingerlalluartuugassi aalajangersimasunillu najoqqutaqarlusi inuuneqarlusi,  tamanna Isumaginninnermut naammagittaalliuuteqartarfimmit ima isiginiarneqarpoq, persuttaasimaneq ima sakkortutigisimanngitsoq, pinerlussimanermut allagartap matukkaasi, qitornarsiartaanissamut akuersissumik qinnuteqarnissinnut.

 

Inerniliineq:

Kommune-p inerniliinera allanngortinneqarpoq, isumaqarporlu ima, kommunip akuersissuteqarfigissagaasi qitornarsiartaarnissamut akuersissummik qinnuteqarnissinnut A-p qitornaanut.

  

Inatsisit tunngaviusut:

Meeqqanik inuusuttunillu ikiorsiisarneq pillugu Inatsisartut peqqussutaat nr. 1, 15. april 2003-meersoq

- 17. Kinaluunniit meeqqamik ilaqutariinni paarisassamik tigusisinnaanngilaq kommuni ilaqutariit paarsisussat najugarivitaat tamatumunnga allaganngorlugu akuersissuteqaqqaartinnagu.

- Imm. 2. Paarsinissamik akuersissummik qinnuteqartoqarnerani qinnuteqartoq taassumalu aappaa inooqataaluunniit pinerluuteqarsimanermut nalunaarsuiffimmit takussutissiamik takutitsissaaq. Ilaqutariit paarsisussat angerlarsimaffianni pissutsit perorsaanissamut aamma peqqinnissamut tunngatillugu isumannaatsuunersut kommunalbestyrelsi naliliissaaq.

- Imm. 3. Meeqqanut ataasiakkaanut ilaqutariinni paarineqartussanut tamanut paarsinissamik akuersissut allaganngorlugu tunniunneqassaaq. Meeqqat paarineqartussat qassit ilaqutariinni paarsisussani isumagineqarsinnaanersut kommunalbestyrelsi ataasiakkaani tamani aalajangiissaaq.

- Imm. 4. Akuersinermi tunngaviusut tunngavissaajunnaarpata paarsinissamik akuersissut atorunnaarsinneqassaaq.

- Imm. 5. Ilaqutariinnik paarsisussanik akuerinnittarneq pillugu aalajangersakkanik erseqqinnerusunik Naalakkersuisut aalajangersaassapput.

Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 17, 1. juli 2003-meersoq.

- 9. Meeraq inuusuttorluunniit ilaqutariinnut paarsisussanut kommunalbestyrelsimit inissinneqannginnerani ilaqutariit paarsisussat kommunalbestyrelsimit akuerineqaqqaassapput meeqqallu inissinneqartussat ataasiakkaat tamaasa pillugit paarsaqarnissamut akuersissut allaganngorlugu pineqartassalluni. 

- Imm. 2. Ilaqutariit paarsisussat akuerineqannginneranni angerlarsimaffimmi pissutsit perorsaanissamut peqqissutsikkullu isumannaatsuunersut sukumiisumik naliliiffigineqaqqaassapput.

- Imm.3. Ilaqutariinni paarsisussani najugaqartut tamarmik qaammatit pingasut inorlugit pisoqaassusilimmik peqqissutsikkut nalunaarummik saqqummiussaqassapput taamatullu akuersissuteqarnerup nalaani angerlarsimaffimmi tunillaassuuttunik nappaateqartoqassanani. 

- Imm. 4. Pinerluuteqarsimasunik nalunaarsuiffimmit allakkiamik ilaqutariinni paarsisussani najugaqartut tamaasa kommunalbestyrelsip piumaffigissavai, akuersissuteqartoqarsinnaanngilarlu ilaqutariinni paarssisussani najugaqartut akornanni inunnut ulorianaatilimmik pinerlussimasutut pineqaatissiisoqarsimappat.

- Imm. 5. Ilaqutariinni paarsisussani najugaqartut akornanni allatut pinerluuteqarsimasunik pineqatissiisoqarsimappat, pineqaatissiinermit minnerpaamik ukiut tallimat qaangiussimappata aatsaat ilaqutariit paarsisussat akuerineqarsinnaapput.

 

Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 32, 14. december 2006-imeersoq

- 13. Meeqqap inuusuttulluunniit ilaqutariinnut paarsisussanut kommunalbestyrelsimit inissinneqannginnerani ilaqutariit paarsisussat kommunalbestyrelsimit akuerineqaqqaassapput. Meeqqat inissinneqartussat ataasiakkaat tamaasa pillugit paarsaqarnissamut akuersissut allaganngorlugu pineqartassaaq.. 

- Imm. 2. Ilaqutariit paarsisussat akuerineqannginnerini angerlarsimaffimmi pissutsit perorsaanissamut peqqissutsikkullu isumannaatsuunersut sukumiisumik naliliiffigineqaqqaassapput.

- Imm.3. Ilaqutariinni paarsisussani najugaqartut tamarmik qaammatit 3-it inorlugit pisoqaassusilimmik peqqissutsikkut nalunaarummik saqqummiussaqassapput taamatullu akuersissuteqarnerup nalaani angerlarsimaffimmi tunillaassuuttunik nappaateqartoqassanani. 

- Imm. 4. Pinerluuteqarsimasunik nalunaarsuiffimmit allakkiamik ilaqutariinni paarsisussani najugaqartut tamaasa kommunalbestyrelsip piumaffigissavai, akuersissuteqartoqarsinnaanngilarlu ilaqutariinni paarssisussani najugaqartut akornanni inunnut ulorianaatilimmik pinerlussimasutut pineqaatissiisoqarsimappat.

- Imm. 5. Ilaqutariinni paarsisussani najugaqartut akornanni allatut pinerluuteqarsimasunik pineqatissiisoqarsimappat, pineqaatissiinermit minnerpaamik ukiut tallimat qaangiussimappata aatsaat ilaqutariit paarsisussat akuerineqarsinnaapput