Sags nr. 40.72.07

Meeqqanut tapiissutit allagartanngorlugit tunniunneqarnerat pillugu L Kommuneata 14. oktober 2008 aalajangiinera pillugu 20. oktober 2008 naammagittaalliuutersi Isumaginninnermi Naammagittaalliuuteqartarfiup 8. oktober 2010 suliaraa imatullu aalajangiilluni

Aalajangiineq

L Kommuneata aalajangiinera allanngortinneqarpoq, taamaalilluni ilissi oktober 2008 aallarnerfigalugu meeqqanut tapiissutit aningaasanngorlugit tigusarneri ingerlatiinnassagisi. Tamanna isumaqarpoq ilissi naammagittaalliuutissinni taperserneqartusi.

Suliaq aalajangiiffigineqassaaq meeqqanut tapiissutit pillugit Inatsisartut peqqussutaat nr. 11, 31. oktober 1996-imeersoq aamma pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq naapertorlugit.

Nassuiaat:

Allakkatigut 30. oktober 2008 ulloqartutigut meerarsiassinnut L-imut, atuarfimmi najugaqarfiuutigisumi najugalimmut tunngasut meeqqanut tapiissutit allagartanngorlugit tunniunneqarnissaat pillugu L Kommuneata aalajangiinera Isumaginninnermi Naammagittaalliuuteqartarfimmut naammagittaalliuutigaarsi.

Naammagittaalliuutissinni allappusi naammaginagu meeqqassi atuarfimmi najugaqarfiuutigisumi najugallip meeqqanut tapiissutisiani allagartaannanngorlugit tigusarmagit, ilissilu tunngavigineqartoq, tassalu meeqqap pisariaqartitaanik pitsissisarsimannginneraaneq paasiuminaatsikkissi. Allakkassinnissaaq allappusi  aalajangersakkami, kommunip aalajangiinermini innersuussutigasaani, qanoq allassimasoqarnersoq paaserusukkissi.

Naammagittaalliuutissinnissaaq apeqqutigaarsi, suna pissutigalugu L kuisinneranut, atualerneranut apersortinneranullu atatillugu aningaasatigut immikkut tapiissuteqarfigineqannginnera.

Allakkassinnut ilanngullugu nassiupparsi aalajangiinerup naammagittaalliuutigisassi assinga. Aalajangiinermi takuneqarsinnaavoq L Kommunea aalajangiisimasoq, meeqqanut tamanut atuarfimmi najugaqarfiuutigisumi najugaqartunut meeqqanut tapiissutit allagartanngorlugit tunniunneqartassasut.

Kommuni aalajangiinermini ilaatigut imatut allappoq: ”Taamatut aalajangiinermut tunngaviusoq tassaavoq, ukiuni kingullerni paasisimagatsigu meeqqat atuarfimmi najugaqarfiuutigisumi najugaqartut pisariaqartitaannik pitsinneqarneq ajortut. Inatsisitigut tunngavigisaq tassaavoq meeqqanut tapiissutit pillugit Inatsisartut peqqussutaat nr. 11, 31. oktober 1996-imeersoq.”

Inatsisitigut tunngavigisaq kommunip issuarsimanngilaa ilanngunnaguluunniit aammalu allassimanagu suna pissutigalugu aalajangersagaq taanna ilissinnut tunngatillugu atorneqarnersoq .

Isumaginninnermi Naammagittaalliuuteqartarfiup siullermik L Kommunea kingornalu L Kommune  paasissutissanik suliamut tunngassuteqartunik suliarlu pillugu nassuiaammik qinnuigisarsimavai. Arlaleriartumik Isumaginninnermi Naammagittaalliuuteqartarfimmit eqqaasitsinerit kommunip qisuariarfigisarsimanngilai.

Taamaattoq Isumaginninnermi Naammagittaalliuuteqartarfik – naak ukiup ilivitsup ingerlanerani arlalissuariarluni kommuni paasissutissanik suliarlu pillugu nassuiaammik iluatsinngitsumik qinnuigisareeraluarlugu – aalajangerpoq suliamut tunngasut tiguneqartut tunngavigalugit suliaq suliariniarlugu.

Inatsisitigut tunngavigisat:

Meeqqanut tapiissutit pillugit Inatsisartut peqqussutaanni nr. 11-mi, 31. oktober 1996-imeersumi § 5, imm. 5 malillugu meeraq atuarfimmi najugaqarfiuutigisumiippat taassumaluunniit assigisaani najugaqarpat isumaginninnermut ataatsimiititaliaq aalajangiisinnaavoq meeqqamut tapiissutit ilaannakortumik meeqqamut tunniunneqarsinnaasut.

Peqqussummi pineqartumi § 6, imm. 4 malillugu meeqqap soqutigisaasa pisariaqartitaasalu tamanna pisariaqalersippassuk isumaginninnermi ataatsimiititaliaq aalajangiisinnaavoq meeqqanut tapiissutit piffissami kvartalikkaartumit sivikinnerusumi tunniunneqartassasut, taamatuttaarlu isumaginninnermi ataatsimiititaliaq aalajangiisinnaalluni tapiissutit tamakkiisumik ilaannakortumilluunniit nioqqutissanik pisissutissanngorlugit tunniunneqartassasut, imaluunniit isumaginninnermi ataatsimiititaliap aalajangersagai malillugit aqunneqarlutik.

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi § 22 malillugu aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni. Peqqussummi pineqartumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Inatsimmi pineqartumi § 27 malillugu pisortat ingerlatsiviini suliffilik allanut tusarliussisussaatitaanngilaq, tak. Pinerluttulerinermi inatsimmi § 29, suna ilisimasaq inatsisitigut imaluunniit aalajangersakkakkut atortuusukkut allakkut tassaaneragaappat allanut oqaatigeqqunngisaq, imaluunniit aamma pisariaqarpat isertuutissallugu pisortat inuinnaalluunniit soqutigisaat  pingaaruteqartut pissutigalugit, imaluunniit inuit ataasiakkaat imaluunniit ingerlatsiviit namminersortut peqatigiiffiilluunniit imminnut tunngasut, tamakkununnga ilanngullugit aningaasarsiornermut tunngasut, pillugit paasissutissanik illersuiumallutik soqutigisaat.

Naliliineq:

Isumaginninnermi Naammagittaalliuuteqartarfik isumaqarpoq meeqqanut tapiissutinik aqutsinissamik aalajangiisoqartassasoq ilaqutariit ataasiakkaat immikkut aalajangiiffigalugit, pissutigalugu suliassanut ataasiakkaanut tunngatillugu pissutsit ilaqutariinnut ataasiakkaanut tunngassuteqartut aalajangiinermi pingaaruteqartut tunngaviliunneqartassammata. Aammattaaq paasissutissat inunnut ataasiakkaanut tunngassuteqarluinnartuusinnaasarmata kommuni nipangiussisussaatitaanermik pigisaqarpoq, imaappoq paasissutissat  innuttaasunut allanut ingerlateqqissinnaanagit, taamaammat aalajangiineq ilaqutariinnut tamanut atuarfinni najugaqarfiuutigisuni ineqartunik meeraqartunut tunngatinneqarsinnaanngilaq.

Taamaalilluni L Kommuneata meeqqanut tapiissutit atuarfinni najugaqarfiuutigisuni najugaqartunut allagartanngorlugit tunniussisarneq pillugu aalajangiinera kukkusuuvoq.

Tamanna isumaqarpoq L Kommuneata, massakkut L Kommune oktober 2008-miit siumullu ilissinnut meeqqanut tapiissutit tunniutissagai, kiisalu kommuni isumaqarpat meeqqanut tapiissutit allagartanngorlugit tunniunneqassasut, tamanna pissaaq ilaqutariinnik ataasiakkaaraluni aammalu pissusiviusut suliamut tunngassuteqartut tunngavigalugit aalajangiinikkut.

  

Aalajangiineq:

L Kommuneata 14. oktober 2008 aalajangiinera allanngortinneqarpoq. 

Aammattaaq Isumaginninnermi Naammagittaalliuuteqartarfiup L Kommune  qinnuigissavaa ilissi oqaatigisassitut L kuisinnerani, atuartunngornerani apersortinneranilu immikkut tapiissuteqarfigineqanngineranut tunngatillugu apeqquteqaatersi akissuteqarfigeqqullugu.

Inussiarnersumik inuulluaqqusillunga

Naja Joelsen

Siulittaasoq