Meeqqanut tapiissutit aamma/imaluunniit meeqqanut akilersuutit tunniunneqarnerat pillugu ulloq 18. september 2008 Aa Kommuneata aalajangiinera naammagittaalliuutigisat Isumaginninnermi Naammagittaalliuuteqartarfiup 8. oktober 2010 suliaraa imatullu aalajangiilluni

Aalajangiineq

Aa Kommuneata meeqqanut akilersuutit nalinginnaasunit ikinnerusut tunniunneqarnissaat pillugu aalajangiinera allanngortinneqarpoq. Taamaalillutit illit naammagittaalliuutinni taperserneqarputit.

Suliaq aalajangiiffigineqassaaq meeqqanut akilersuutit il.il. kiisalu meeravissiartaarnermi tapiissutit tunniunneqartarnerat pillugit Inatsisartut peqqussutaat nr. 2, 3. marts 1994-imeersoq, meeqqanut akilersuutit il.il. kiisalu meeravissiartaarnermi tapiissutit tunniunneqartarnerat pillugit Inatsisartut peqqussutaata allanngortinneqarneranik Inatsisartut peqqussutaat nr. 3, 12. juni 1995-imeersoq, meeqqanut tapiissutit pillugit Inatsisartut peqqussutaat nr. 11, 31. oktober 1996-imeersoq, pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq kiisalu pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat nr. 9, 13. juni 1994-imeersoq naapertorlugit.

Nassuiaat:

Illit siornatigullu inooqatigisimasat Aa erneqarpusi, Aa .

Aa. marts 2000 toqukkut qimaguppoq .

Tamatuma kingorna meeqqanut akilersuutit Aa-mut tunngasut pisalerpatit. Takuneqarsinnaanngilaq suna tunngavigalugu Aa Kommuneat meeqqanut akilersuutinik tunniussisarsimanersoq.

Ilinniagaqarlutit Nuummiinninni Aa angajoqqaanni najugaqarpoq. Tamatuminnga tunngaveqartumik Aa Kommuneat aalajangiivoq illit/meeqqat meeqqanut akilersuutit nalinginnaasunit ikinnerit pisalissagai.

Allakkatigut 19. september 2008 ullulerneqartutigut Aa Kommuneata aalajangiinera Isumaginninnermi Naammagittaalliuuteqartarfimmut naammagittaalliuutigaat. Naammagittaalliuutinni ilaatigut imaattunik allapputit isumaqarlutit ernerit sumiluunniit najugaqaraluaruni meeqqanut akilersuutinik pisartagaqartussaasoq.

Aammattaaq ilaatigut imatut allapputit: ”Meeqqannut angajoqqaatut oqartussaassusera iperanngilara inunnit allanit paarineqarnerani. Misigaanga meeraq pillarneqartoq taamalu nutaanik atisartaarnissaanut killiliivigineqartoq.

Aningaasat 1.901,00 koruunit tunniunneqartut atunngilakka isumaqarama ikippallaartut atisanik ukiorsiutinik pisinissamut. Kingullermik tunniussisoqarmat ernera pissarsinngilaq, tamatumunngalu pissutaasoq paasivara, tassa uanga isertitakka pissutaasut. Kisianni isumaqarpunga eqqortuunngitsoq meeqqanut akilersuutinik tunineqannginnera, najugaqatigiinnginnerput pissutigalugu. Isumaqarpunga meerara sumiluunniit najugaqaraluaruni meeqqanut akilersuutinik tunineqarnissaminut pisinnaatitaasoq.”

Isumaginninnermi Naammagittaalliuuteqartarfiup paasissutissat suliarlu pillugu nassuiaat Aasiaat Kommuneanit pissarsiariniaraluarpai pissarsiaqarnanili, soorlu pisunik allattuiffiilluunniit eqqarsaatigalugit.

Tamatuma kingorna Isumaginninnermi Naammagittaalliuuteqartarfiup qarasaasiaq atorlugu allaffigeqatigiinnerit atorlugit Aa Kommuneat, massakkut Aa Kommunea suliaq pillugu nassuiaammik aammalu aalajangiinermut tunngavigineqartoq pillugu paasissutissanik qinnuteqarfigaa.

Kommunip oqaatigaa taamatut aalajangiisoqartoq pissutigalugu meeqqap arni najugaqatiginngimmagu.

Isumaginninnermi Naammagittaalliuuteqartarfik aamma imaattumik apeqquteqaateqarpoq: ” Aa-p arnaa angutaalu pisortanit ikiorsiissutinik pensionisianilluunniit meeqqap imminnut pinerata nalaani pisartagaqarpat, kommunillu tamanna tunngavigalugu meeqqanut akilersuutit aalajangersaaviginissaat pillugu Eqqartuussivik qinnuigisimavaa?

Imaluunniit meeqqap arnaminik najugaqateqannginnera tunngavigalugu meeqqanut akilersuutit ilaannik meeqqap nammineq pissarsiaqarnissaa pillugu kommuni aalajangiiva?

Paasinninnera malillugu meeqqap angutaa toqukkut qimagussimavoq, taamaammallu meeqqamut akilersuuteqarnissamik pisussaaffilerneqarsinnaanani. Tamatumunnga taarsiullugu kommunip meeqqanut akilersuutit amerlisat tunniuttarsimavai?

Kommuni aalajangiisarsimava, oqaasiinnakkut allakkatigulluunniit, aalajangiinerillu sunik imaqarpat qangalu aalajangiinerit pippat?

Suliami pisunik allattukkanik takussutissaqarpa?”

Aa Kommuneata apeqquteqaat taanna akissuteqarfiginngilaa.

 

Inatsisitigut tunngavigisat:

Meeqqanut akilersuutit il. il. kiisalu meeravissiartaarnermi tapiissutit tunniunneqartarnerat pillugit Inatsisartut peqqussutaanni nr. 2-mi, 3. marts 1994-imeersumi, meeqqanut akilersuutit il. il. kiisalu meeravissiartaarnermi tapiissutit tunniunneqartarnerat pillugit Inatsisartut peqqussutaata allanngortinneqarneranik Inatsisartut peqqussutaanni  nr. 3-mi, 12. juni 1995-imeersumi allannguuteqartinneqartoq, § 4 malillugu makku atuupput: Meeqqap pilersorneqarnissaanut akilersuutinik pisinnaatitaasup meeqqat inatsisitigut illersugaanerat imaluunniit aappariinneq pillugu inatsit tunngavigalugu akilersuisussanngortitsineq naapertorlugu qinnuteqaateqarneratigut meeqqap pilersorneqarnissaanut akilersuutit pisortanit siumoortumik tunniunneqarsinnaapput, akilersuutit akilerneqarsimaffissaasa aqaguani, akilersuutit kingusinnerpaamik ullormi akilerneqarfissaanni akilersuisussaatitaasoq akiliisimanngippat.

Peqqussummi pineqartumi § 6, imm. 2 malillugu angajoqqaat  arlaat akilersuisussaatitaasorluunniit toquppat akilersuutit § 5, imm. 1-imi taaneqartut pisortanit tapiissutitut aamma tunniunneqartalissapput.

Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni nr. 9-mi, 13. juni 1994-imeersumi § 6 malillugu suliassani ingerlatsinermut oqartussaasunit aalajangiiffigineqartussani oqartussaq paasissutissanik suliassamut tunngassuteqarluinnartunik suliassap aalajangiiffigineqarnissaanut pingaaruteqartunik oqaasiinnakkut pissarsisoq, paasissutissanilluunniit taamaattunik allatut iliorluni paasisaqartoq paasissutissat taakku imaat pillugit allakkiussaaq. Taamaattorli paasissutissat taakku suliassap allakkiartaasa ilaanni takuneqarsinnaappata tamanna atuutinngilaq.

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi § 19 malillugu suliassami (illuatungiulluni) peqataasoq paasissutissanik aalajangersimasunik suliassami pisimasuinnut tunngasunik oqartussaasut, tassani kommuni ilanngullugu, pigisaqarnerannik ilisimasaqarsorinanngippat aalajangiisoqassanngilaq peqataasoq taanna paasissutissanik tamakkuninnga oqartussaasunit ilisimatinneqartinnagu oqaaseqaateqarnissaanullu periarfissinneqarsimannginnera ilimatsaanneqarpat.

Innuttaasoq paasissutissat pissarsiarineqartut pillugit oqaaseqaateqarnissaminut  periarfissaqartinneqassaaq.

Pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq malillugu piumasaqaataanngilaq aalajangiinerit allaganngorlugit nalunaarutigisarnissaat. Taamaattoq ingerlatsinermi aalajangiinerit suliami peqataasumut tapersiisuulluinnanngitsut allaganngorlugit nalunaarutigisarnerat ileqquuvoq kusanartoq.

Pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi § 22 malillugu aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

Inatsimmi pineqartumi § 24 malillugu aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Naliliineq:

Isumaginninnermi Naammagittaalliuuteqartarfik isumaqarpoq Aa Kommuneata aalajangiinera eqqunngitsuusoq. Qulaani taaneqartutut akilersuinissamik aalajangersagaq suliarineqarsinnaanngilaq, meeqqamullu akilersuutinik akiliisoqarsinnaanani, akilersuisussaatitaasoq toqukkut qimagutereersimappat. Pissutsini taamaattuni aningaasat akilersuutit amerlaqataat kommunimit meeqqanut tapiissutitut tunniunneqartarput.

Taamaattumik Isumaginninnermi Naammagittaalliuuteqartarfik isumaqarpoq Aa Kommuneata inatsisit eqqortissimanngikkai, kukkusumilli iliuuseqarsimalluni meeqqanut akilersuutinik tunniussinermigut ernerpit angutaata toqukkut qimagutereerneratigut.

Aa Kommuneata kingornagut Aa Kommuneanik taaneqartup meeqqamik pilersuisussaanermik tigusinini uppernarsanngimmagu illit aningaasanik tigusisarnissamut suli pisinnaatitaavutit.

Aammattaaq Isumaginninnermi Naammagittaalliuuteqartarfik isumaqarpoq Aa Kommuneata ulloq 18. september 2008 aalajangiineq sioqqullugu pissutsit suliamut tunngasut sukumiinerusumik misissuiffigisimasariaqaraluarai, tamatumunnga ilanngullugu immikkut pingaartillugu ernerpit pilersorneranut atatillugu aningaasartuutit kiap akilertarsimanerai paasiniarsimasariaqaraluarai.

Aamma Aa Kommuneat suliamik ingerlatsinermini paasissutissat suliamut pingaarutillit ilisimalersimasani pillugit allattuisimasariaqaraluarpoq.

Tamakkua saniatigut Aa Kommuneata, aalajangiitinnani,  paasissutissat ilinnut tusarliunneqarsimanngitsut, kommunillu ulloq 18. september 2008 aalajangiinermini tunngaviliussimasai pillugit illit tusarniaavigeqqaarsimasariaqaraluarpaatit.

Kiisalu Aa Kommuneata 18. september 2008 aalajangiinera allaganngorlugu ilinnut nalunaarutigineqarsimasariaqaraluarpoq, pissutigalugu aalajangiineq ilinnut tapersiisuulluinnanngimmat, aalajangiinermilu aalajangersagaq aalajangiinermi tunngavigineqartoq innersuussutigineqarsimasariaqaraluarluni, inatsisitigullu tunngavigisaq issuarneqarsimasariaqaraluarluni, aalajangiinerlu  pissutsinik suliamut tunngassuteqartunik kommunip aalajangiinermini tunngavigisaanik nassuiaammik ilaqartinneqartariaqaraluarluni.

Taamalu Isumaginninnermi Naammagittaalliuuteqartarfik isumaqarpoq Aa Kommuneata paasissutissat suliamut tunngassuteqartut, Isumaginninnermi Naammagittaalliuuteqartarfiup qinnutigimmagit nassiussimasariaqaraluarai.

Aalajangiineq:

Taamaalillugu Aa Kommuneata aalajangiinera allanngortinneqarpoq.

Inussiarnersumik inuulluaqqusillunga

Naja Joelsen

Siulittaasoq